له دیدارێكدا به‌ڕێز وه‌زیرى ده‌ره‌وه‌ى هۆله‌ندا كه جارى یه‌كه‌مه سه‌ردانى هه‌رێمى كوردستان ده‌كات، خۆشحاڵى به سه‌ردانى كوردستان و سه‌رسامیى خۆى به پێشكه‌وتنه‌كانى هه‌رێمى كوردستان نیشان دا و ده‌ستخۆشى له حكوومه‌ت و خه‌ڵكى كوردستان كرد كه له سه‌ره‌تاى ڕاپه‌ڕینى ئازارى 1991 و دواى ڕووخانى ڕژێمى به‌عسه‌وه له 2003، هه‌رێمى كوردستان پێشكه‌وتنى زۆر گه‌وره‌ى به‌خۆیه‌وه بینیوه و له هه‌موو بواره‌كاندا پێشكه‌وتووه.
له دیداره‌كه‌دا دوایین پێشڕه‌و‌ى و سهركهوتنهكانى پێشمه‌رگه له شه‌نگال و ناوچه‌كانى ده‌وروبه‌رى باسیان لێوه كرا و به‌ڕێز وه‌زیرى هۆڵه‌ندى پیرۆزبایى سهركهوتنهكانى له به‌ڕێز سه‌رۆك وه‌زیران كرد و خۆشحاڵیى خۆى به پێشڕه‌وییه‌كانى پێشمه‌رگه نیشان دا. هه‌روه‌ها پشتگیریى مرۆیى و سه‌ربازیى وڵاته‌كه‌ى بۆ هه‌رێمى كوردستان دووپات كرده‌وه و ئاماژه‌ى به چالاكییه سه‌ربازییه‌كانى هۆڵه‌ندا له شه‌ڕى دژى تیرۆردا كرد و تیشكى خسته سه‌ر به‌شداریكردنى هێزه ئاسمانییه‌كانى هۆڵه‌ندا له‌و هێرشانه‌دا كه هاوپه‌یمانیى نێوده‌وڵه‌تى دژى داعش ئه‌نجامیان ده‌دات. هه‌روه‌ها تیشك خرایه سه‌ر ڕه‌وشى ئاواره و په‌نابه‌ران له هه‌رێمى كوردستان.
په‌یوه‌ندییه‌كانى هه‌رێمى كوردستان و هۆڵه‌ندا به‌شێكى دیكه‌ى دیداره‌كه بوو كه تیایدا هه‌ردوولا خواستى خۆیان بۆ بره‌ودان به‌و په‌یوه‌ندییانه و به تایبه‌تیش له‌و بوارانه‌دا كه بۆ هه‌ردولا گرنكن، دووپات كرده‌وه، وه‌ك بواره‌كانى ئابوورى و بازرگانى و كشتوكاڵ و هاوكارى له كه‌رتى وزه‌دا. هه‌روه‌ها باس له كار و چالاكییه‌كانى كۆمپانیا هۆڵه‌ندییه‌كان له هه‌رێمى كوردستان و چۆنیه‌تیى به‌ره‌وپێشبردن و كاركردنى زیاتریان كرا.
دوایین ڕێككه‌وتنى حكوومه‌تى هه‌رێمى كوردستان و حكوومه‌تى فیدرال و هه‌نگاوه‌كان بۆ چاره‌سه‌ركردنى ته‌واوى كێشه‌كانى نێوان هه‌ولێر و به‌غدا، ڕۆڵى هه‌رێمى كوردستان له بنیاتنانه‌وه‌ى عیراقى دواى 2003 و په‌یوه‌ندییه‌كانى هه‌رێمى كوردستان له‌گه‌ڵ وڵاتانى دراوسێ، پرسى كورد و پرۆسه‌ى ئاشتى و چاره‌سه‌رى له توركیا، پێشهاته‌كانى ناوچه‌كه و سووریا و ڕووبه‌ڕووبوونه‌وه‌ى تیرۆر و كاریگه‌رییه‌كانى شه‌ڕى داعش له ناوچه‌كه، چه‌ند بابه‌ت و ته‌ورێكى دیكه‌ى دیدارى هه‌ردوولا بوون. دواى ئه‌وه‌ش له كۆنگره‌یه‌كى ڕۆژنامه‌وانیى هاوبه‌شدا تیشكیان خسته سه‌ر ناوه‌ڕۆكى دیداره‌كه و وه‌ڵامى رۆژنامه‌نووسانیان دایه‌وه.
له سه‌ره‌تاى كۆنگره ڕۆژنامه‌وانییه‌كه‌دا به‌ڕێز نێچیرڤان بارزانی سەرۆك وه‌زیرانى هەرێمی كوردستان، هۆڵەندای بە وڵاتێكی گرنگ بۆ كوردستان له قه‌ڵه‌م دا، بەتایبەتی لەو كاتە سەختانەی سه‌ره‌تاى نه‌وه‌ده‌كان و سه‌ده‌ى ڕابردوو كه هەرێمی كوردستان پیایدا تێپه‌ڕی و لە كاتی ئێستاشدا وەك ئەندامێكی هاوپەیمانیی نێودەوڵەتی بۆ بەرەنگاربوونەوەی تیرۆرستانی داعش و یارمەتیدانی پێشمەرگەی كوردستان.
به‌ڕێز سه‌رۆك وه‌زیران خۆشحاڵیی خۆی بە سەردانی به‌ڕێز كۆندەرس نیشان دا و ئاماژەی بەوەدا كه ئەمە یەكەمجارە وەزیری دەرەوەی هۆڵەندا سەردانی هەرێمی كوردستان دەكات و گوتی:
بە خێر بێن، ڕۆژتان باش،
خۆشحاڵین ئەمڕۆ بەیانی پێشوازیمان لە جەنابی وەزیری دەرەوەی هۆڵەندا كرد، كە جەنابیان یەكەمجارە سه‌ردانى كوردستان ده‌كه‌ن و ئێمە ئەم هاتنەی بەڕێزیان بۆ هەرێمی كوردستان بە پشتگیریی گەلی كوردستان و عیراق بە شێوەیەكی گشتی دەبینین. هۆڵەندا یەكێك بووە لەو وڵاتانەی لە سەرەتای ساڵی 1991ـەوە بەشداری لە یارمەتیدانی هەرێمی كوردستان كردووە و بەشێك بووە لە هاوپەیمانیی نێودەوڵەتیی ئەوكات بۆ پاراستنی هەرێمی كوردستان و ئێستاش جارێكی دیكە بەشێكە لەو هاوپەیمانییە نێودەوڵەتیەی لە دژی تیرۆریستان هەیە، بۆ پشتگیریی عیراق و هەرێمی كوردستان.
ئێمە لەو كۆبوونەوەیەدا لەسەر كۆمەڵێك تەوەر قسە و باسمان كردووە كە یەكێكیان، چۆنیەتیی مەشقپێكردن و ڕاهێنانی هێزی پێشمەرگە بوو. پرسى دووەمیش: چۆنیەتیی پێشكەشكردنی یارمەتیی مرۆیی و هاوكاری بۆ هەرێمی كوردستان بوو، هەروەها چۆنیەتیی بەشداریكردنی هۆڵەندا لە پێشخستن و یارمەتدانی كوردستان لە ڕووی ئابووریەوە.
بە شێوەیەكی گشتی كۆبوونەوەكەمان زۆر باش بووە، بە ناوی حكوومەتی كوردستان بەخێرهاتنی جەنابی دەكەین، و ئەویش خۆشحاڵیی خۆی دەربڕیوە، بەتایبەتی لەم كاتەدا كە سه‌ردانى كوردستانی كردووە، هاوكاتە لەگەڵ ئەو سەركەوتنانەی هێزەكانی پێشمەرگە لە بەرەكانی شەڕ بەدەستیان هێناوە.
لای خۆیەوە، وەزیری دەرەوەی هۆڵەندا وێڕای خۆشحاڵی بە سەردانی كوردستان و پیرۆزبایی لە گەلی كوردستان و پێشمەرگە، دووپاتی كردەوە كه وڵاتەكەی هەمیشە لە یارمەتیدانی هەرێمی كوردستان بەردەوام دەبێت، بە تایبەتی لە بواری وزە و كشتوكاڵدا و تیشكی خستە سەر بەرنامەی سەردانەكەی بۆ هەرێمی كوردستان و ئەو دیدارانەی بە نیازە ئەنجامی بدات و گوتی: زۆر سوپاس، جەنابی سەرۆك وەزیران، سوپاسی ئەو پێشوازیەتان لێ دەكەم كە لە من و شاندی هۆڵەندیتان كرد. زۆر خۆشحاڵم بەوەی كە یەكەمجارە سەردانی هەرێمی كوردستان دەكەم، بە ڕەچاوكردنی پردی پەیوەندییەكانی نێوان هەرێمی كوردستان و هۆڵەندا، خۆشحاڵین ببینین ئەم پەیوەندییە پێش دەكەوێت و لە دوو قۆناغی جیادا بەیەكەوە بووین، لە نەوەدەكان و ئێستاش.
ئێمە كۆبوونەوەیەكی باشمان لەگەڵ سەرۆك وەزیران و حكوومەتی هەرێمی كوردستان هەبوو، تیایدا باسمان لە تیرۆری داعش كرد، خۆشحاڵیش بووم بەوەی كۆمەڵگەی ئێوە ئامادەییی خۆی بۆ پێشوازیكردن لە ژمارەیەكی زۆری ئاوارە و پەنابەر نیشان داوە و دەستخۆشی لە گەل و حكوومەتی ئێوە دەكەین، بۆ ئەو پێشوازییە لەو پەنابەر و ئاوارانەی ناوەوە و دەرەوەی عیراق، بە تایبەتى سووریا.
لێرەدا دەمەوێ پیرۆزبایی لە سەرۆكی هەرێمی كوردستان و سەرۆك وەزیران بكەم بە بۆنەی ئەو سەركەوتنەی لە دژی داعش بەدەستی هێنا لەو ماوەیەی دواییدا. هێزەكانی ئێوە هێزی باش و ئازا و پیشەگەرن و ئەو سەركەوتنانە زۆر مەزن بوون، بە تایبەتى لە شوێنێكی وەك شه‌نگال كە خەڵكێكی زۆری تیادا كوژرا، خەڵكێكیش تووشی ئازار و ئەشكەنجە بوون.
ئێمە لە هۆڵەندا پشتگیرییەكی تەواوی گەلی عیراق دەكەین و لەو چوارچێوەیەشدا لە گەلی كوردستان. لە ڕێگەی فڕۆكەی F16 ـه‌وه كە بەشدارییان لە چالاكییە سەربازییەكان كردووە بۆ شەڕی دژی تیرۆر و لەناوبردنی داعش. لە بەرنامەشماندایە كار بۆ ڕاهێنان و مەشقپێكردنی هێزە سەربازییەكان بكەین لە عیراق و كار بۆ ناردنی 100 ڕاهێنەر و شارەزا لەم بواره‌دا دەكەین. ڕاستە ئێوە هێزی ئازا و شەڕكەرتان هەیە، بەڵام زۆر جار بە هۆی نەبوونی ئامێری تایبەت بۆ پشكنین، بە تایبەتی بۆ پشكنینی مین و بۆمبی چێندراو، تووشی زیان دەبن.
ئێمە لەو گفتوگۆیانەی لەگەڵ سەرۆك وەزیران كردمان، خۆشحاڵین بەوەی باسی زۆر شتمان كرد كە بۆ هەردوولا گرنگن و مایەی خۆشحاڵیمانە هەردوولا پابەندیی خۆمان بەو پرسانە دووپات كرده‌وه كە باسمان لێ كردن و هیوادارین بتوانین پەیوەندییەكانمان زیاتر بەرەو پێشەوە ببەین، بە تایبەتیش لە بواری ئابووریدا. ئێمە چالاكیی بازرگانیی باشمان لێرە هەیە و هیوادارین باشتر و زیاتریش ببن.
هەر لەو كۆبوونەوەیەدا باسی پرسی وزەمان كرد و باوەڕی تەواوم هەیە كە دەرفەتی زۆر هەیە بۆ هۆڵەندا و حكوومەتی هەرێمی كوردستان كە خۆی، خۆی بەڕێوە دەبات، بتوانین پەیوەندییەكانمان چاكتر و چالاكتریش بكەین. هاوبەشیمان بۆ شەڕی دژی داعش دەبێتە هۆی ئەوەی پەیوەندییەكانمان زیاتر و درێژتر و بەردەوامتریش بن.
پاش نیوەڕۆی ئەمڕۆش سەردانی كامپێك دەكەم كە ڕێكخراوی MAG كاری لەسەر دەكات بۆ هۆشیاركردنەوە و ئاگاداربوون لە زەرەر و زیانەكانی مین. هەروەها سەردانی كامپی بەحركەش دەكەم، لەو سەردانانەشدا ئێمە هۆشداری دەدەینە هاووڵاتیان كە لە مەترسییەكانی مین و بۆمبی چێندراو ئاگادار بن و زۆر بە پەرۆشەوەم جارێكی دیكە بگەڕێمەوە كوردستان، لە بارودۆخێكدا كە ترس و نیگەرانیی داعشی تیادا نەمابێت.
من لە یەكەمین سەردانمدا بۆ هەولێر دیدێكی باش و ئه‌رێنیم لەبارەیەوە وەرگرت و بە بەراوردكردن لەگەڵ بارودۆخی نالەباری ئەوسای ناوچەكە لەساڵی 1991 و دوای ڕووخانی ڕژێم لەساڵی 2003، پەرەسەندنەكانی هەرێمی كوردستان سەرنجیان ڕاكێشام و هیوادارم جارێكی دیكە بێمە ئێرە و پێشكەوتنی زیاتریش ببینم.
به‌ڕێز وەزیری دەرەوەی هۆڵەندا لە وەڵامی پرسیارێكدا لەبارەی بەشداریی وڵاتەكەیه‌وه لە شەڕی دژی داعش، ڕوونى كرده‌وه كه فڕۆكەی F16 ی تایبەت بە سوپاسی هۆڵەندا، چالاكانە بەشداریی شەڕی دژی داعشیان كردووە و پاڵپشتیی پێشكەوتنەكانی پێشمەرگەی كردووە، ئەمە جگە لە دابینكردنی جلوبەرگ و كەرەستەی پێویست بۆ پێشمەرگە، كه ئەمەش ورەی زیاتر بە پێشمەرگە دەدات. هاوكات باسی لە بەرنامەی ڕاهێنان و مەشقی تایبەتی لە ڕێگەی وڵاتەكەیانەوە بۆ پێشمەرگە كرد و دووپاتی كردەوە ئەوان دەیانەوێ هەوڵەكانیان لەمبارەیەوە پیشەگەرانە بێت.
بەڕێز نێچیرڤان بارزانی، سه‌رۆك وه‌زیرانى هه‌رێمى كوردستانیش لە وەڵامی پرسیارێكدا لەبارەی وادەی مەشقپێكردنی پێشمەرگە له لایەن هۆڵەنداوە كە بۆ ماوه‌ى ساڵێكە و ده‌كرێت نوێ بكرێته‌وه یان نا؟، گوتی: بەشداریكردنی هۆڵەندا یارمەتیدەرێكی باشە بۆ هەرێمی كوردستان لەم بوارەدا. كارەكە دەستپێكێكی باشە بۆ یەك ساڵ بەپێی بڕیاری پەرلەمانی هۆڵەندا و حكوومەتیش پێیەوە پابەندە و ئەگەر دوای ئەوە پێویست بوو، ده‌كرێ داوای زیاتر مانەوەیان بكەین بۆ یارمەتیدانی زیاتری پێشمەرگە.
وەزیری دەرەوەی هۆڵەندا ڕوونی كردەوە، وڵاتەكەی یەكێكە لە وڵاتە كۆمەكبەخشە گەورەكانی جیهان لە ڕووی پێشكەشكردنی یارمەتیی مرۆییه‌وه بۆ ئاوارەكانی ناوخۆ كە لە ئاكامی تیرۆری داعش، یانیش بە هۆكاری دیكەوه لە ناوچەكە، ئاوارە بوون. ئاشكراشی كرد كه لە میانی ساڵی 2014 دا وڵاتەكەی زیاتر لە 100 ملیۆن دۆلاری خه‌رج كردووە و لە ساڵی داهاتووشدا ئه‌م بڕه هاوكارییه زیاتر دەبێت. هه‌روه‌ها باسى له‌وه كرد كە بۆ عیراق نزیكەی 17 ملیۆن یارمەتیی مرۆیی هەبووە، ئەمە جگە لە هاتنی دوو كاروانی دیكەی یارمەتیی مرۆیی.
هەروەها گوتی : ئێمە بە ڕوونی بە پەرلەمانمان ڕاگەیاند، ئەو پارەیەی تەرخان كراوە، مەشق و ڕاهێنانی پێشمەرگە دەگرێتەوە لە هەرێمی كوردستان، ئەمە جگە لە هێزی سەربازیی تایبەت لە بەغدا و جگە لە چالاكییە ئاسمانیەكانیش بۆ پاڵپشتیی هێزەكانی پێشمەرگە.
هاوكات وەزیری دەرەوەی هۆڵەندا ستایشی پێشكەوتنی ئابووریی هەرێمی كوردستانی كرد كە لە كاتێكی سەختدا هاتوونەتە دی و خۆشحاڵیی خۆیشی بە گەیشتنی هەولێر و بەغداى بە ڕێككەوتنی سەرەتایی بۆ چارەسەركردنی گرفتەكانی نێوانیان نیشان دا و بە ڕێگایەكی نوێی لە قەڵەم دا بۆ دەستپێكردنەوەی چالاكیی ئابووری و بازرگانی و دووپاتیشی كردەوە هۆڵەندا لەم بوارەدا دەتوانێت زۆر شت پێشكەش بكات.
لە بارەی سەركەوتنەكانی پێشمەرگەش لەدەڤەری شه‌نگال، به‌ڕێز سەرۆك وه‌زیران دەستخۆشی لە پێشمەرگە كرد و سوپاسی كردن كە لەم پرۆسەیەدا بەشدار بوون و گوتی: ئێمە سڵاو بۆ پێشمەرگە قارەمانەكان دەنێرین، دەستیان، چاویان ماچ دەكەین و دەشزانین كارێكی زۆر سه‌ختیان كرد، بەڵام زۆر بە سەركەوتوویی، وەك دەشزانن ئەم پرۆسەیە بە سەرپەرشتیی ڕاستەوخۆی جەنابی سەرۆك بارزانی بووە و لە هەموو شوێنەكانیش جەنابیان بە وردی چاودێری كردە و ئۆپەراسیۆنەكانی پێشمەرگه‌ى كردووە، بەڵام شه‌نگال بۆ ئێمە وەكوو كورد پرسێكی یەكجار زۆر گرنگە و تەنانەت بۆ جەنابی سەرۆكیش گرنگ بوو خۆی لەو مەسەلەیەدا بەشدار بێت.
سوپاس بۆ خوا ناوچەیەكی یەكجار زۆر لە دەستی ئەوان ڕزگار بوو، هه‌رچه‌نده تا ئێستا ناوشارى شه‌نگال بە تەواوی كۆنترۆڵ نەكراوە، بەڵام پێشڤەچوون هەیە و بە هیوای ئەوەین پەنا بەخوا لە زووترین كاتدا گوێمان لە هەواڵی خۆش ببێت و ئەمەش زیاتر بۆ فەرماندە سەربازیەكانی ئەوێ بەجێ دەهێڵم تا ئەوان قسەی لەسەر بكەن. بەڵام بە شێوەیەكی گشتی لە ماوەى ڕابردوودا ئەم سەركەوتنە یەكێك بووە لەو سەركەوتنە گەورانەی پێشمەرگە بە دەستی هێناوە و ئەمڕۆ هەم جەنابی وەزیر و جەنابی سەرۆك كۆمارى عیراق و سەرۆك وەزیران عه‌بادی، پیرۆزباییى ئه‌م سەركەوتنەیان كرد و ئەم سەركەوتنەش نەك تەنها بۆ كوردستان، بەڵكوو بۆ هەموو عیراقیش یەكجار زۆر گرنگ بووە.
لە بارەی ئایندەی ناوچە كوردستانییەكانی دەرەوەی ئیداری هەرێمی كوردستانیشه‌وه، بەڕێز نێچیرڤان بارزانی گوتی: گرنگترین شت ئەوە بوو ئەو ناوچانە لە دەستی تیرۆریستانی داعش پاك كرانەوە، ئەمە لە بەرژەوەندیی عیراق و هەرێمی كوردستان و هەموو لایەكدایە. بۆ ئێمە جارێ ئەمە گرنگ بوو، لەبارەی گەڕانەوەشیانه‌وه بۆ هەرێمی كوردستان، ئه‌وا دەستووری عیراق ئەم پرسەی دیاری كردووە و نەخشەڕێگای بۆ جێبەجێكردنی داناوە و ئێمەش پابەندی ئەم ماددە دەستووریە دەبین. پاككردنەوەی ئەم ناوچانە لە تیرۆریستانی داعش بێگومان لە بەرژەوەندیی هەرێمی كوردستان و عیراق و هەموو پێكهاتەكانی عیراقدا دەبێت.
پێشنیوه‌ڕۆی ئه‌مڕۆ هه‌ینی 19ی دیسه‌مبه‌ری2014 ، به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان له ئیستانبول له لایه‌ن به‌ڕێز ئه‌حمه‌د داوود ئۆغلو سه‌رۆك وه‌زیرانی توركیاوه پێشوازی لێكرا.
له كۆبوونه‌وه‌یه‌كدا بارودۆخی ئێستای عیراق و ناوچه‌كه و پێشهاته سه‌ربازییه‌كان و شه‌ڕی دژی تیرۆر و ئه‌و سه‌ركه‌وتن و به‌ره‌وپێشچوونانه‌ی ئه‌م ڕۆژانه له لایه‌ن پێشمه‌رگه‌ی كوردستانه‌وه، له ناوچه‌كانی زوممار و ده‌وروبه‌ری شه‌نگال به ده‌ست هاتوون، تاوتوێ كران و باس له پێشڕه‌وه‌ییه به‌رده‌وامه‌كانی پێشمه‌رگه و كۆنترۆڵكردنه‌وه و ده‌رهێنانی ئه‌و شوێنانه له ده‌ستی داعش، كرا.
له به‌شێكی دیكه‌ی كۆبوونه‌وكه‌دا، دوایین ڕێككه‌وتنی نێوان هه‌ولێر و به‌غدا خرایه به‌ر باس و به‌ڕێز داوود ئۆغلو وێڕای ده‌ربڕینی خۆشحاڵیی خۆی به‌و ڕێككه‌وتنه، ده‌ستخۆشی له هه‌ردوولا كرد و هیوای خواست ئه‌م ڕێككه‌وتنه كه به‌شێك له كێشه‌كانی هه‌ولێر و به‌غدا چاره‌سه‌ر ده‌كات، ببێته هانده‌رێك بۆ ئه‌وه‌ی هه‌موو كێشه‌كانی نێوان هه‌رێمی كوردستان و حكوومه‌تی عیراق، چاره‌سه‌ر بكرێن.
تاوتوێكردنی په‌یوه‌ندییه‌كانی هه‌رێمی كوردستان و توركیا به‌شێكی دیكه‌ی كۆبوونه‌وه‌كه بوو، كه تیایدا هه‌ردوولا داكۆكییان له‌سه‌ر بره‌ودانی زیاتر و فراوانكردنی بواره‌كانی په‌یوه‌ندییه‌كان كرده‌وه و كۆك بوون له‌سه‌ر ئه‌وه‌ی كه به‌رده‌وامیی سه‌ردان و دیداره‌كان له نێوان هه‌دوولادا، بۆ ئاڵوگۆڕی بیروڕا و تێڕوانینی هه‌دوولا له‌سه‌ر پرسه‌كان و پته‌وكردنی په‌یوه‌ندییه‌كان، هاوكار ده‌بێت.
ئه‌مه‌و بڕیاره ئێواره‌ی ئه‌مڕۆش له ئه‌نقه‌ره‌ی پایته‌ختی توركیا، هه‌ردوو به‌ڕێزان نێچیرڤان بارزانی سه‌رۆك وه‌زیرانی هه‌رێمی كوردستان و ڕه‌جه‌ب ته‌ییب ئه‌ردۆغان سه‌ركۆماری توركیا، كۆببنه‌وه.
پاشنیوه‌ڕۆى ئه‌مڕۆ پێنجشه‌ممه 18ى دیسه‌مبه‌رى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان، پێشوازى له به‌ڕێز نیكۆلاى میلادینۆف نوێنه‌رى تایبه‌تى سكرتێرى گشتیى نه‌ته‌وه یه‌كگرتووه‌كان له عیراق كرد.
له دیدارێكدا ڕه‌وشى ئاواره و په‌نابه‌ران له هه‌رێمى كوردستان تاوتوێ كرا و خه‌جت له‌وه كرایه‌وه كه حكوومه‌تى هه‌رێمى كوردستان هه‌موو تواناكانى خستووه‌ته گه‌ڕ بۆ ئه‌وه‌ى بتوانێت وه‌ك پێویست خزمه‌ت به ئاواره و په‌نابه‌ران بكات و كۆمه‌ك و هاوكارییان پێشكه‌ش بكات، به تایبه‌تى له‌م وه‌رزى سه‌رما و سۆڵه‌دا، به‌ڵام باره‌كه زۆر له تواناكانى حكوومه‌تى هه‌رێمى كوردستان قورستره، بۆیه جه‌خت له‌وه كرایه‌وه كه عیراق و كۆمه‌ڵگه‌ى نێوده‌وڵه‌تیش ڕۆڵێكى زیاتر بۆ هاوكارییان بگێڕێت و له‌مباره‌یه‌وه نه‌ته‌وه یه‌كگرتووه‌كان كۆمه‌ڵگه‌ى نێوده‌وڵه‌تى هان بدات تا ئاوڕى جددیتر له‌م كه‌یسه بداته‌وه.
له دیداره‌كه‌دا به‌ڕێز نوێنه‌رى تایبه‌تى سكرتێرى گشتیى نه‌ته‌وه یه‌كگرتووه‌كان خۆشحاڵیى خۆى بۆ ڕێككه‌وتنى نێوان حكوومه‌تى هه‌رێمى كوردستان و حكوومه‌تى فیدرال ده‌ربڕى و پشتگریى خۆى و ڕێكخراوى نه‌ته‌وه یه‌كگرتووه‌كانى بۆ لێكگه‌یشتن و چاره‌سه‌ركردنى هه‌موو كێشه‌كانى نێوان هه‌ولێر و به‌غدا دووپات كرده‌وه. به‌ڕێز سه‌رۆك وه‌زیرانیش هیواى خواست ئه‌م ڕێككه‌وتنه ببێته هۆى چاره‌سه‌ركردنى ته‌واوى كێشه‌كان و ببێته هانده‌رێك بۆ حكوومه‌تى فیدرال تا چاره‌سه‌رى گونجاو له به‌رژه‌وه‌ندیى ته‌واوى عیراق و هه‌رێمى كوردستاندا بۆ هه‌موو كێشه و گرفته‌كان بدۆزێته‌وه.
ڕه‌وشى سه‌ربازى و به‌ره‌نگاربوونه‌وه‌ى تیرۆرستانى داعش و پرسى دامه‌زراندنى هێزى پاسه‌وانى نیشتمانى، به‌شێكى دیكه‌ى دیداره‌كه بوو، هه‌روه‌ها هه‌ردوولا داكۆكییان له ئاشتبوونه‌وه‌ى نیشتمانى له عیراق كرد و هیویان خواست هه‌موو لایه‌نه عیراقییه‌كان به گیانێكى نیشتمانییه‌وه مامه‌ڵه له‌گه‌ڵ ڕه‌وش و بارودۆخه‌كه‌دا بكه‌ن.
بەرپرسێکی حکوومەتی هەرێمی کوردستان لە تاران دەڵێت: کۆماری ئیسلامیی ئێران جیاوازی لە نێوان ئیدارەی یەکێتیی و پارتی نەکردووە و چۆن لە جەلەولا هاوکاری سەربازیی پێشکەش کردووە، لە مەخمووریش بە هەمان شێوە هاوکاری پێشمەرگە کراوە.
"نازم دەباغ" نوێنەری حکوومەتی هەرێمی کوردستان لە تاران دەربارەی هەڵوێستەکانی ئێستای ئێران لە شەڕی دژی داعش، بۆ ئاژانسی ئانادۆڵی تورکی وتی: "ئێران لەسه‌ر هەڵوێستەکانی خۆی له‌باره‌ی پێشکەشکردنی هاوکاری مرۆیی و سەربازیی بۆ هێزەکانی پێشمەرگە و سوپای عێراق بەردەوامە، وەک بەرپرسانی ئەو وڵاتە رایانگەیاندووە، هەر کاتێک داوایان لێکرابێت بە هەموو شێوەیەک ئامادەی یارمەتیدان بوونە".
دەربارەی دەنگۆی بەشداری کردنی فڕۆکە جەنگییەکانی ئێران لە بۆردومان کردنی خاڵەکانی رێکخراوی دەوڵەتی ئیسلامیی ناسراو بە (داعش) لە خاکی عێراقدا، دەباغ وتی: "وەک بەشێک لە بەرپرسانی ئێران باسیان لێکردووە، فڕۆکە جەنگییەکانی ئێران لەسەر داوای حکوومەتی عێراق چەند بنکەیەکی چەکدارانی داعشیان لە ناوەڕاستی عێراق بۆردومان کردووە. دیارە ئەمە یەکەمجار نییە کە فڕۆکەکانی ئێران دێنە ئاسمانی عێراق و بەشداری شەڕی داعش دەکەن، لە پێشووشدا ئێران هه‌ر هاوکار بووە".
نوێنەری حکوومەتی هەرێمی کوردستان ئەو قسانەی رەتکردەوە کە باس دەکرێت گوایە حکوومەتی ئێران تەنیا هاوکاری سەربازیی پێشکەش بە پێشمەرگەی ژێر ئیدارەی یەکێتیی نیشتمانیی کوردستان کردبێت و لەو باره‌یەوە وتی: "من وەک نوێنەری هەرێم لە تاران ئەو قسانە رەت دەکەمەوە، چونکە سوپای ئێران لە رووی سەربازییەوە ئەگەر چەک و تەقەمەنی دابێت بە پێشمەرگە یان فڕۆکە جەنگییەکانی هێرشیان کردبێت، چۆن هاریکاری پێشمەرگەی لە جەلەولا کردووە، بە هەمان شێوە لە شەڕی مەخموور هاریکاری پێشمەرگەی کردووە و بەشدارییان کردووە".
ئەو بەرپرسەی هەرێم ئاماژەی بەوەشکرد کە هیچ شاندێکی هەرێم لە ماوەی نزیکی رابردوودا نەچووەتە ئێران و کۆبوونەوە ساز نەکراوە.
سەبارەت بەو بابه‌ته‌ش نوێنەری حکوومەتی هەرێمی کوردستان لە تاران وتی: "پەیوەندییەکانی نێوان هەرێم و ئێران لە ئاستێکی باشدایە و وەک خۆیەتی، بەڵام بە ئاگایی نوێنەرانی حکوومـەتی هەرێمی کوردستان هیچ کۆبوونەوەیەک لە نێوان هەر دوولا لە ماوەی مانگی رابردوودا ئەنجام نەدراوە. ئەگەر هەر کۆبوونەوەیەکیش هەبووبێت دەکرێت لە رێگای نوێنەرانی ئێران لە هەولێر و سلێمانی رێکخرابێت".
رۆژی ٢٥ی مانگی رابردوو هەر دوو شارۆچکەی جەلەولا و سەعدییە لە لایەن پێشمەرگە و سوپای عێراق و چەکدارە شیعەکانەوە کۆنترۆڵ کرایەوە. لەم رۆژانەشدا باس لەوە دەکرێت کە فڕۆکە جەنگییەکانی ئێران لە چەند ناوچەیەکی عێراق هێرشیان کردووەتە سەر چەکدارانی داعش، هەر وەک رۆژنامەی گاردیانی بەریتانی بەڵای کردەوە.
هاوکات سەرۆکی هەرێمی کوردستان مەسعود بارزانی ئەوەی راگەیاندبوو کە کۆماری ئیسلامیی ئێران وەک یەکەم وڵاتی ناوچەکە لە شەڕی دژی داعش هاوکاری هه‌رێمی کوردستانی كردووه.
كۆسره‌ت ره‌سول عه‌لی رایده‌گه‌یه‌نێ كه گه‌لی كورد دۆستی راسته‌قینه‌ی دیموكراسی و مافی مرۆڤه له سه‌رجه‌م جیهانداو خه‌باتی چه‌ند ساڵه‌و ئه‌و هه‌موو قوربانیدانه‌ش هه‌ر له‌م پێناوه بووه.
ئه‌م وتانه‌ی كۆسره‌ت ره‌سول عه‌لی جێگری سه‌رۆكی هه‌رێمی كوردستان به ئاماده‌بوونی "ده‌رباز كۆسره‌ت ره‌سول- وه‌زیری ئاوه‌دانكردنه‌وه‌و نیشته‌جێ كردن" ئه‌مڕۆ سێشه‌ممه 16/12/2014 له میانی پێشوازیكردنی له ژماره‌یه‌ك له ئه‌ندامانی كۆنگرێسی ئه‌مریكی هات، كه پێكهاتبوون له"كیڤن مێكارسی- سه‌رۆكی وه‌فد و به ئه‌ندامیه‌تی هه‌ریه‌ك له" ماك سۆرنبێری، رۆدنی فریلانسه‌ر، دیڤن نونس".
له سه‌ره‌تای دیداره‌كه‌دا جێگری سه‌رۆكی هه‌رێمی كوردستان به‌خێرهاتنی وه‌فدی میوانی كردو باسی بارودۆخی عێراق و ناوچه‌كه‌ی كردو رایگه‌یاند "جه‌نگی رووبه‌ڕووبوونه‌وه‌ی تیرۆر جه‌نگی هه‌موو جیهانی دیموكراسی و مرۆڤایه‌تییه‌و ئه‌مڕۆ گه‌لی كورد به‌وپه‌ڕی توانایه‌وه ده‌یكات".
لای خۆیه‌وه كێڤن مێكارسی رایگه‌یاند"ئێمه له نزیكه‌وه ئاگاداری ره‌وشی عێراق و جه‌نگی تیرۆرین و سوپاسی گه‌لی كورد و پێشمه‌رگه ده‌كه‌ین كه به شێوه‌یه‌كی ئازایانه رووبه‌ڕووی تیرۆر ده‌بنه‌وه و هه‌وڵی زیاتر ده‌ده‌ین له‌رووی ته‌كنیكی و سه‌ربازییه‌وه هاوكاری زیاتری پێشمه‌رگه بكه‌ین".
له به‌شێكی وته‌كان و له‌باره‌ی ئه‌م جه‌نگه‌ی ئێستا رووده‌دات، كۆسره‌ت ره‌سول عه‌لی گوتی"ئه‌و جه‌نگه‌ی ئێستا رووبه‌ڕوومان بۆته‌وه جیاوازه له جه‌نگه‌كانی تر، به‌ڵام ئێمه توانیومانه رووبه‌ڕووی ببینه‌وه و تێكی بشكێنین و ئه‌گه‌ر هاوكاری سه‌ربازی باشتر بكرێین، ئه‌وا بێگومان له ماوه‌یه‌كی دیاریكراودا كۆتایی به‌م جه‌نگه ده‌هێنین".
جێگری سه‌رۆكی هه‌رێمی كوردستان گوتیشی"پێویسته له زووترین كاتدا هاوپه‌یمانێتی بۆ رووبه‌ڕووبوونه‌وه‌ی داعش فراوانتر بكرێ و هاوكاری زیاتری هێزی پێشمه‌رگه‌ی كوردستان بكرێ".
لای خۆیانه‌وه وه‌فدی كۆنگرێسی ئه‌مریكی به‌ڵێنیان دا كه هه‌وڵی جدی بده‌ن بۆ ئه‌وه‌ی له‌رووی سه‌ربازی و ته‌كنیكی و میدیاییه‌وه هاوكاری پێشمه‌رگه بكه‌ن".
له كۆتایی كۆبوونه‌وه‌كه‌دا هه‌ردوولا رایانگه‌یاند پێویسته ئه‌م جۆره كۆبوونه‌وانه به‌رده‌وام بن و زیاتر و به بایه‌ختره‌وه لێی بڕوانرێ.
هەولێر، هەرێمی کوردستان، عیراق - کردنەوەی دەیەم پیشانگای نێودەوڵەتی هەولێر لە 9ی دیسەمبەر/کانونی یەکەم، بە بەشداری 250 کۆمپانیا لە 16 وڵاتەوە، بە وتەی بەرپرس وچاودێرانی بازرگانی وئابووری، بووە تەحەدایەکی گەورە بۆ حکومەتی هەرێمی کوردستان بۆ گەڕاندنەوەی متمانە لەنێوان هەرێمی کوردستان ووەبەرهێنەرانی بیانی ودەستپێکردنەوەی ئاڵوگۆڕی بازرگانی وسەلماندنی گرنگی پێگەی هەرێمی کوردستان لەم بارودۆخە سیاسی وئەمنییەی هەرێم پێی تێپەڕدەبێت.
دوابەدوای ئەو قەیرانە داراییەی بەسەر هەرێمی کوردستانەوە لەلایەن حکومەتی پێشووی بەغداوە سەپێندرابوو، هەروەها بەهۆی هەڕەشەی رێکخراوی تیرۆریستی داعش بۆ سەر هەرێمی کوردستان، چالاکیە بازرگانی وئابووریەکان سستی وهەندێک کەرت شێوەیەک لە وەستانیان بەخۆیانەوە بینی.
ساماڵ سەردار، وەزیری بازرگانی وپیشەسازی هەرێمی کوردستان، لەلێدوانێکی رۆژنامەوانیدا لەبارەی گرنگی کردنەوەی خودی پیشانگاکە لەو کاتە هەستیارەدا ئەوەی خستەروو کە " لەوانەیە بەشداریکردنی وڵات وکۆمپانیاکان لە پیشانگای هەولێری نێونەتەویی ئەم ساڵدا وەکو ساڵانی رابردوو نەبێت، بەڵام کردنەوەی خودی پیشانگاکە دەیسەلمێنێت کە هەرێمی کوردستان لەگەشەکردنی ئابووری وجموجۆڵی بازرگانی نەوەستاوە وبارودۆخی ئاسایشی هەرێمی کوردستانیش بۆ کاروباری بازرگانی زۆر لەبارە".
وەزیری بازرگانی بەباشی زانی لەقۆناغی ئایندەدا حکومەتی هەرێمی کوردستان بەشێوەیەکی چالاکتر کار بۆ سەرنجڕاکێشانی کۆمپانیای بیانی بکات بۆ هەرێم ودووپاتیکردەوە ئێستا بارودۆخی ئابوری هەرێمی کوردستان بەرەو قۆناغێکی باشتر دەچێت.
گەیشتنی هەردوو حکومەتی بەغدا وهەولێر بەڕێککەوتنێکی سەرەتایی لەبارەی چارەسەرکردنی کێشەکانی نێوانیان، بووە هۆی دەستپێکردنەوەی چالاکی ئابووری وبازرگانی لە هەرێم وبازاڕ بوژانەوەیەکی بەخۆیەوە بینی.
عەبدوڵلا ئەحمەد عەبدولڕەحیم، سەرپەرشتیاری پیشانگای نێودەوڵەتی هەولێر، لەلێدوانێکی تایبەت بەماڵپەڕی حکومەتی هەرێمی کوردستانی رایگەیاند، "گرێدانی ئەم پیشانگایە بەو بارودۆخەی ئێستادا وبەتایبەتی دوای هەولێر وبەغدا گەیشتن بەڕێککەوتنێکی سەرەتایی بۆ چارەسەرکردنی کێشەکانی نێوانیان، بۆ هەموو لایەکی دەسەلمێنێت کوردستان دەتوانێت پێگەی ئابووری خۆی بپارێزێت ونەکەوێتە بەر کاریگەری هیچ قەیرانێک".
عەبدوڵلا ئەحمەد عەبدولڕەحیم ئاماژەی بەوەدا، "لەماوەی دە ساڵی رابردوودا، پیشانگای هەولێر توانیویەتی ئەو متمانەیە دروستبکاک وحکومەتیش رۆڵی لە پێشخستنی هەبووە بەشێوەیەک کە ئێستا رووبەری هۆڵە داخراوەکانی پیشانگا 17000 مەتری دووجایە ورووبەری گۆڕەپانەکان نزیکەی 25000 مەتری دووجایە، وتائێستاش لەو ماوەیەدا زیاتر لە 60 پیشانگای تایبەتمەند ئەنجامدراون لەچەندین بواری گرنگ وپێویست کە کاریگەری بەسەر ژیانی هاوڵاتیاندا هەبووە".
نوێنەر وسەرپەرشتیارانی کۆمپانیاکانی کەرتی تایبەت لەهەرێمی کوردستان، ئاماژەیان بەوەدا قەیرانی دارایی وهەڕەشەی تیرۆریستان، کاریگەری بەسەر هەبوونی لاوازی لەچالاکیەکانیاندا هەبوو وتا رادەیەکیش پلانە تازەکانیانی وەستاند، بەڵام ئەو وەستانە یەکجارەکی نەبوو بەبەڵگەی هەبوونی چەندین نمایشی کۆمپانیای گەورەی جیهانی بۆ کاڵا وبەرهەمەکانیان لەهەرێمی کوردستان.
سامان بریفکانی به‌ڕێوه‌به‌ری گشتی کۆمپانیای "ماجیک ئارت" بۆ پەخش ونمایشی میدیایی، بەسایتی حکومەتی هەرێمی راگەیاند، "لەگەڵ هەبوونی شێوەیەک لە دوو دڵی لەلایەن بەشێک لەکۆمپانیاکانەوە، لەماوەی رابردوودا چەندین کۆمپانیا ومارکەی گەورە لەهەرێمی کوردستان وبەتایبەتیش لەهەولێر نمایشی گەورەیان ئەنجامداوە، بەتایبەتی کۆمپانیاکانی لاندرۆڤەر ورێنجرۆڤەر وبی ئێم دەبڵیوو کە تازەترین بەرهەمی خۆیان خستە بەردەم هاوڵاتیانی هەرێمی کوردستان. هەروەها چەندین مارکەی جیهانیش لە وڵاتانی فەرەنسا وئەمەریکا وبەریتانیاش لەبازاڕ ومۆڵەکانی هەولێردا لقی خۆیان کردەوە".
هەروەها ئاماژەی بەوەشدا "ئێستا بەتایبەتی دوای رێککەوتن بۆچارەسەری کێشەکانی نێوان هەولێر وبەغدا متمانەکە زیاتر بوو وبێگومان چالاکیەکانیش زیاتر دەبن".
لەچوارچێوەی چالاکیەکانی پیشانگاشدا، کونسوڵگەری گشتی کۆماری چیک لەهەرێمی کوردستان بەیاوەری شاندێکی وەزارەتی بازرگانی وپیشەسازی چیک، کۆبوونەوەیەکیان لەگەڵ ژمارەیەکی زۆر لەدەزگاکانی راگەیاندن ئەنجامدا بۆ باسکردنی چالاکیەکانیان لەهەرێمی کوردستان.
جیرۆسلاڤ رایف، کونسوڵی گشتی چیک لەهەرێمی کوردستان، لەلێدوانێکدا بە ماڵپەڕی حکومەتی هەرێمی کوردستانی راگەیاند، " کۆمپانیاکانی وڵاتەکەمان بەهاوبەشی لەگەڵ بانکی چیک چەندین چالاکی گەورەی لەهەرێمی کوردستان ئەنجامداوە بەتایبەتی لەبواری کارەبا. بەئەنجامدانی ئەم چالاکیەش ئێمە دەمانەوێ بازاڕی وەبەرهێنان لەهەرێمی کوردستان بە وەبەرهێنەرانی ووڵاتی خۆمان وئەورووپاش بناسێنین وباس لەبارودۆخی ئەم هەرێمە بکەین ولەلایەکی دیکەشەوە پاڵپشتی خۆمان بۆ چالاکیەکانی وەبەرهێنان لەهەرێمی کوردستان دووپات بکەینەوە".
کۆماری چیک، یەکێکە لەو وڵاتانەی کە بوونێکی کاریگەری لەبازاڕی وەبەرهێنانی هەرێمی کوردستاندا هەیە وهەمیشە پاڵپشتی چالاکی وەبەرهێنانیان لەهەرێمی کوردستاندا کردووە.
لوبنانیش یەکێک بوو لەو وڵاتانەی کە لەگەڵ هەبوونی کێشەکانی ماوەی رابردوودا، کار وچالاکیەکانی وەبەرهێنانی نەوەستاند وهەمیشە پشتگیری خۆی بۆ هەرێمی کوردستان دووپاتدەکردەوە.
جاک سەراف سەرۆکی گرووپی مالیای لوبنانی کە ماوەیەکە لە هەرێمی کوردستان لەچەندین کەرتدا کاردەکات بەتایبەتی لەکەرتی گەشتوگوزار، لەلێدوانێکی تایبەت بەماڵپەڕی حکومەتی هەرێمی کوردستان، دووپاتیکردەوە "کەرتی تایبەتی لوبنان زۆر بەگرنگیەوە سەیری کوردستان دەکات وچالاکیەکانی خۆی لەهەرێمی کوردستان رانەگرت".
سەراف رایگەیاند، "گروپەکەی کە هەناردەکاری سەرەکی لوبنانیە بۆ هەرێم هەوڵی ئەوە دەدات بەدیلێک بۆ هێنانی کاڵاکانیان بۆ هەرێم بدۆزنەوە بەتایبەتی لەڕێگەی ئاسمانیەوە، بەهۆی کۆنترۆڵکردنی بەشێکی زۆری سنوری نێوان سوریا ولوبنان لەلایەن تیرۆریستانی داعشەوە."
هەروەها ئاماژەی بەوەدا کە "لوبنان زیاتر لەبواری بانکی وئاوەدانکردنەوە وگەشتوگوزارەوە رۆڵیان لە پێشخستنی بواری وەبەرهێنان هەیە لە هەرێمی کوردستان، ئەمەش جگە لە بوارەکانی پەروەردە وخوێندنی باڵا".
هەر لە چوارچێوەی گەڕانەوەی چالاکی ئابووری وبەمەبەستی نزیککردنەوە وپەرەپێدانی ئالیکاری نێوان کۆمپانیاکانی بریتانی وهەرێم، گروپی بزنسی بریتانی – کوردستان، ئێوارەی 10ی دیسەمبەر/کانونی یەکەم، راگەیەندرا.
لە رێورەسمی راگەیاندنی گروپەکە، باڵیۆزی بریتانیا لە بەغدا، فرانک بەیکەر، جەختی کردە سەر گرنگی سەقامگیری وژینگەیەکی دروست بۆ ئەنجامدانی چالاکی ئابووری و بازرگانی لە هەرێمی کوردستان.
هەر لە رێورەسمەکەدا، وتەبێژی حکومەتی هەرێم، سەفین دزەیی، ئاماژەی بەوەدا کە، هەروەک لە رابردوودا، حکومەتی هەرێمی کوردستان پشتیوانی لە بازاری ئازاد وئاسانکردنی هەلومەرجی وەبەرهێنانی بیانی دەکات.
بەبۆنەى دەستبەکاربوونى وەک کونسوڵى گشتیى ئەڵمانیا لە هەرێمى کوردستان، ئەمڕۆ دووشەممە 15ى دیسه‌مبه‌رى 2014، بەڕێز نێچیرڤان بارزانى سەرۆک وەزیرانى هەرێمى کوردستان، پێشوازى لە به‌ڕێز جۆرج ئنزوێیلەر كونسوڵی گشتیى تازەى ئەڵمانیا لە هەرێمى كوردستان کرد.
له سه‌ره‌تاى دیداره‌كه‌دا، بەڕێز ئنزوێیلەر بە بۆنەى دەستبەكاربوونی وەك كونسوڵی گشتیی وڵاته‌كه‌ى لە هەرێمی كوردستان، خۆشحاڵیی خۆی دەربڕی و هیواى خواست بتوانێ ئاستى پەیوەندییەکانى نێوان ئەڵمانیا و هەرێمی كوردستان بباتە قۆناغێکى پێشکەوتووتره‌وه. هەروەها ستایشى حكوومەت و گەلی كوردستان و پێشمەرگەی كرد بۆ بەرەنگاربوونەوەى تیرۆرستانی داعش و پێشوازیكردن لەو ژمارە زۆرەی ئاوارە لە هەرێمی كوردستان. هاوكات پشتیوانی و پشتگیریی حكوومەتی ئەڵمانیاى بۆ حكوومەتی هەرێم، لە ڕووی مرۆیی و سەربازییه‌وه، دووپات كردەوە.
به‌ڕێز کونسوڵى گشتیى ئەڵمانیا خواستى وڵاتەکەیشى بۆ پتەوکردنى پەیوەندییەکان لەگەڵ هەرێمى کوردستان لە ڕووى سیاسى و ئابوورى و بازرگانییه‌وه دووپات کردەوە و لەمبارەیەوە گوتى: ژمارەیەکى زۆرى کۆمپانیاى ئەڵمانی، بەشداریى کارایان لە پیشانگاى هەولێرى نێودەوڵەتیدا کرد کە ئەم هەفتەیە بەڕێوە چوو. هەروا گوتى: ئێمە هانى کۆمپانیاکانمان دەدەین بۆ کارکردن لە هەرێمى کوردستان.
لاى خۆیه‌وه به‌ڕێز نێچیرڤان بارزانى پیرۆزباییى دەستبەکاربوونى لێكرد و و پشتیوانی و پشتگیریی حکوومەتى هەرێمى بۆ بەڕێزیان دووپات كردەوە بۆ سەرخستنى کارەکانیان لە هەرێمى کوردستان. هاوكات سوپاس و پێزانینی گەل و حكوومەتی هەرێمی کوردستانى بۆ پشتگیریی حكوومەتی ئەڵمانیا بۆ هەرێمی كوردستان و پێشكەشكردنی هاوكاریی سەربازی و مرۆیی و كردنەوەی خولی مەشق و ڕاهێنان بۆ پۆلێك لە ئەفسەرانی وەزارەتی پێشمەرگە، دەربڕی. لەمبارەیەوە گوتى: ئێمە زۆر بە بایەخەوە دەڕوانینە تەواوى یارمەتییە سەربازى و مرۆییەکانى حکوومەتى ئەڵمانیا و ئومێدەوارین ئەو هاوكاریانە بەردەوام بن.
له دیداره‌كه‌دا هەردوولا باسیان لە پەیوەندیى نێوان هەولێر و بەغدا و ڕەوشی ئێستای هەرێمى کوردستان و عێراق و ناوچەكە لە ڕووی سیاسی و مرۆییه‌وه کرد و مەترسییەکانى داعشیان بۆ سەر ئاسایش و سەقامگیریى تەواوى ناوچەکه تاوتوێ كرد. لەمبارەیەوە به‌ڕێز کونسوڵى گشتیى ئەڵمانیا پشتیوانیى وڵاتەکەى بۆ ئەو ڕێکكەوتنەى لە نێوان هەرێمى کوردستان و حکوومەتى فیدڕاڵ ئەنجام دراوە، دووپات کردەوە و هیواى خواست ئاکامى باشى لێ بکەوێتەوە.
هەردوولا هاوڕابوون لەسەر زیاتر بەرەوپێشبردنی هاوكاری و هەماهەنگی لە نێوان هەرێمی كوردستان و ئەڵمانیادا بە لەبەرچاوگرتنی ئەو پەیوەندییە مێژووییەی كە لە نێوان هەردوو گەلی كورد و ئەڵماندا هەیە.
ئەمڕۆ سێشەممە 9ـی 12ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان لە مەراسیمێكی تایبەت و بە ئامادەبوونی مستەفا سەید قادر وەزیری پێشمەرگە و ئەنوەر حاجی عوسمان بریكاری وەزیری پێشمەرگە و ژمارەیەك لە بەرپرسانی وەزارەتی پێشمەرگە، بە مەبەستی بەخێرهێنانەوەیان پێشوازی لەو پێشمەرگانە كرد كە پاش بەجێگەیاندنی ئەركەكانیان لە كۆبانێ گەڕاونەتەوە هەرێمی كوردستان.
لە دیدارەكەدا سەرۆك بارزانی گوتەیەكی پێشكەش كرد و تێیدا بە گەرمی بەخێرهاتنی ئەو پێشمەرگە قارەمانانەی كرد كە دوای بەجێگەیاندنی ئەرك و ڕاسپاردە سەربازییەكان بە سەركەوتوویی بۆ هەرێمی كوردستان گەڕاونەتەوە. سەرۆك بارزانی ئەركی پێشمەرگەی لە كۆبانێ بە پیرۆز و بەرز وەسف كرد و گوتی: " ئێوە سەروەرییەكی گەورەتان بۆ خۆتان و خانەوادە و وڵاتەكەتان تۆمار كردووە، شەرەفی یارمەتیدانی خوشك و براكانمان لە پارچەیەكی دیكەی كوردستان بەر ئێوە كەوتووە و ئەوە سەروەرییەكی زۆر مەزنە". سەرۆك بارزانی ئەوەیشی بە پێشمەرگەكان گوت كە جێگەتان لە دڵی میللەتی كوردە و سەری ئێمەتان بەرز كرد و دەستتان خۆش بێت. سەرۆك بارزانی ئەوەیشی دووپات كردەوە كە ئەو پێشمەرگانەی دەچنە كۆبانێ و بەرگری لە خوشك و براكانیان دەكەن نوێنەری هەموو پێشمەرگە و هەموو كوردستانییەكی دڵسۆزن و ڕایشیگەیاند كە چوونی پێشمەرگە بۆ كۆبانێ دوژمنی تووشی نائومێدی كرد و دەستكەوت و سەركەوتنی مەزن لە كۆبانێ بەدیهات.
سەرۆك بارزانی لە درێژەی قسەكانیدا ڕۆڵی پێشمەرگەی لە ڕووبەڕووبوونەوەی تیرۆریستان بەرز نرخاند و ئاماژەی بەوەدا كە تەنیا پێشمەرگەیە توانیویەتی هێرشی تیرۆریستان ڕابگرێت و تێكیانبشكێنێت و ئەوەیش شەرەفێكی گەورەیە كە بە دەست و بازووی پێشمەرگە ئەو سەركەوتنانە تۆمار كراون. سەرۆك بارزانی لە قسەكانیدا جەختیشی لەوە كردەوە كە لە هەموو حاڵەتێكدا نابێ ئێرادەی گەلەكەمان بشكێت و ئیرادەی گەلی كوردستانیش خۆی لە ئیرادەی پێشمەرگە دەبینێتەوە و سەركەوتنی پێشمەرگە بە مانای سەركەوتنی ئێرادەی گەلی كوردستانە.
سەرۆك بارزانی لە قسەكانیدا باسی لە هەڕەشەكان و سەرەتای دروستبوونی داعش كرد و ئەوەی خستەڕوو كە دوژمن تەوەقوعی ئەوەی نەدەكرد پێشمەرگە و گەلی كوردستان خۆیان بگرن و هەروەها جیهانیش یارمەتیی گەلی كوردستان بدات بۆیە پەلاماری كوردستانیدا. سەرۆك بارزانی جەختیشی لەوە كردەوە كە خۆڕاگریی پێشمەرگە پێگە و ناوبانگێكی بەرزی بۆ گەلی كوردستان بەدیهێناوە و ئەو پێگەیە بە هیچ سامانێك دروست نابێ تەنیا بە خۆڕاگری و قوربانیدان نەبێ.
سەرۆك بارزانی لەدرێژەی قسەكانیدا باسی ئەوەیشی كرد كە لە یارمەتیدانی خوشك و براكانمان لە كۆبانێ بەردەوام دەبین و گوتی: " ئەركێكی نەتەوەیی و نیشتیمانییە ئەگەر ڕێگە هەبێت ، خوشك و برایانمان لە كۆبانێ پێویستیان بە یارمەتی هەبێت ئێمە یارمەتیان دەدەین.
لە كۆتایی قسەكانیدا سەرۆك بارزانی سڵاوی بۆ گیانی پاكی ئەو شەهیدە قارەمانانە نارد كە لە شەڕی دژی تیرۆریستاندا گیانی خۆیان بەخت كردووە و هیوای خواست خودای مەزن بە بەهەشتی خۆی شادیان بكات.
دوایین هەواڵەکان
- سهركۆمارى توركيا بهردهواميى پشتگيريى وڵاته‌كه‌ى بۆ عێراق و هه‌رێمى كوردستان دووپات كرده‌وه
- پەیامی سەرۆک نێچیرڤان بارزانی لە ساڵیادی ڕۆژنامەگەریی کوردیدا
- نێچيرڤان بارزانى: دهبێ نيشتمان كۆكهرهوهى ههموومان بێت
- سه‌رۆك نێچيرڤان بارزانى له‌گه‌ڵ باڵيۆزى يهكێتيى ئهورووپا كۆبووهوه
- سهرۆكى هه‌رێمى كوردستان پێشوازى له باڵيۆزى فهرهنسا كرد
- سه‌رۆك نێچيرڤان بارزانى پێشوازى له باڵيۆزى بهريتانيا كرد
- سەرۆکی حکومەتی هەرێمی کوردستان پێشوازی لە باڵیۆزی بەریتانیا لە عێراق دەکات
- عەباس غەزالی: نووسین و چاپکردنی "فەرھەنگیی زارەکیی موکریان" شانازییەکی بێ پایانە
- پەیامی پیرۆزبایی سەرۆکی حکومەتی هەرێمی کوردستان بەبۆنەی جەژنی نەورۆز
- سهرۆكى هه‌رێمى كوردستان نامهيهكى پيرۆزبايى له وهزيرى دهرهوەى توركياوه پێدهگات