هەرێمی کوردستان
هەنگاریا ئاستی پەیوەندیەكانی لەگەڵ هەرێمی كوردستان فراوانتر دەكات
لە دیدارێكی نێوان فەلاح مستەفا بەرپرسی پەیوەندیەكانی دەرەوەی حكومەت باڵیۆز تیبۆر زاتماری باڵیۆزی هەنگاریا لە عیراق و خاتوو ئیڤا لادانی راوێژكاری باڵا لە فەرمانگەی پەیوەندیەنێودەوڵەتیەكان لەبواری پەروەردە باس لە پتەوكردنی پەیوەندیە دوولایەنەكان و كردنەوەی كونسوڵگەری گشتی هەنگاریا لە هەرێم و هاوكاری زیاتری نێوان زانكۆكانی هەرێمی كوردستان و هەنگاریا كرا.
لە كۆبوونەوەكەدا كە خاتوو سوهام جەبەلی یاریدەدەری بەرپرسی فەرمانگە ئامادەبوو، باڵیۆزی هەنگاریا ئامانجی سەردانەكەی بۆ هەرێمی كوردستان روونكردەوەو گووتی لە ئامادەكاری كردنەوەی كوسوڵگەری گشتی وڵاتەكەمانین لە هەرێمی كوردستان و لە ئایندەیەكی نزیك مەڕاسیمی دەستبەكاربوونی كونسوڵی گشتی ئەنجام دەدەین.
هەروا گووتی ئێمە دەخوازین لە بوارەكانی پەروەردە و خوێندنی باڵاو كەلتوور و گەشتوگوزار پەرە بەپەیوەندیەكانمان بدەین، كردنەوەی نوێنەرایەتیمان رێگەخۆشكەرە بۆ ئەم جۆرە هاوكاریانە.
فەلاح مستەفا دەستخۆشی ئەم هەنگاوەی لێكردن و پشتگیری تەواوی فەرمانگەی پەیوەندیەكانی دەرەوەی خستەڕوو بۆ كردنەوەو سەرخستنی كارەكانی كونسوڵگەری گشتی هەنگاریا لە هەرێمی كوردستان.
دۆخی ئەمڕۆی هەرێمی كوردستان و پتەوكردنی پەیوەندیە دووقۆڵیەكان و بەرنامەكانی ئایندە، تەوەرێكی دیكەی دیداری نێوان هەردوولا بوو.
وەزیری دەوڵەت بۆ كاروباری دەرەوەی كەنەدا گەیشتە هەرێمی كوردستان
لە چوارچێوەی سەردانەكەی بۆ عیراق، ئێوارەی ئەمڕۆ خاتوو لین یالیچ وەزیری دەوڵەت بۆ كاروباری دەرەوەی كەنەدا هاوڕێ لەگەڵ بڕۆنۆ ساكۆمانی باڵیۆزی كەنەدا لە عیراق و عەبدولرەحمان حوسەینی باڵیۆزی عیراق لە كەنەدا و شاندێكی یاوەریان گەیشتنە هەرێمی كوردستان و لە فڕۆكەخانەی نێودەوڵەتی هەولێر لەلایەن فەلاح مستەفا بەرپرسی پەیوەندیەكانی دەرەوەو خاتوو سوهام جەبەلی یاریدەدەری بەرپرسی فەرمانگە پێشوازیان لێكرا.
لە دیدارێكی كورت لەگەڵ بەرپرسی پەیوەندیەكانی دەرەوەی حكومەت، وەزیری دەوڵەت بۆ كاروباری دەرەوەی كەنەدا ئامانجی سەردانەكەی روونكردەوە و گووتی: دەخوازین ئاستی پەیوەندیەكانمان لەگەڵ هەرێمی كوردستان بەرەوپێش ببەین. وێڕای دیدارو كۆبوونەوە لەگەڵ گەورە بەرپرسانی هەرێمی كوردستان، بڕیارمانداوە كۆڕبەندێكی ئابووری بە بەشداری ژمارەیەك كۆمپانیاو پیاوانی كاری هەردوولا سازبكەین و نووسینگەی بازرگانی وڵاتی كەنەدا بە فەرمی لە هەولێر بكەینەوە.
چوار شەممە, 12 شوبات 2014
نێچیرڤان بارزانى پێشوازى له له‌یلا زانا و سڕڕى سوره‌ییا ئۆنده‌ر كرد
دواى نیوه‌ڕۆى ئه‌مڕۆ چوارشه‌ممه 12ى شوباتى 2014، نێچیرڤان بارزانى سه‌رۆك وه‌زیرانى هه‌رێمى كوردستان، پێشوازى له هه‌ردوو په‌رله‌مانته‌رى توركیا سیاسه‌تمه‌دارى كورد له‌یلا زانا و سڕڕى سوره‌ییا ئۆنده‌ر یارمه‌تیده‌رى هاوسه‌رۆكانى گشتیى HDP كرد.
له دیدارێكدا پرۆسه‌ى ئاشتى و هه‌وڵه‌كانى چاره‌سه‌ركردنى پرسى كورد له توركیا، ڕۆڵى هه‌رێمى كوردستان و پشتگیرى له پرۆسه‌ى ئاشتى و به‌رده‌وامبوونى و دوایین هه‌نگاوه‌كانى خرانه به‌ر باس و تاوتوێ كران. له‌مباره‌یه‌وه نێچیرڤان بارزانى دووپاتى كرده‌وه كه حكوومه‌تى هه‌رێمى كوردستان وه‌ك هه‌میشه له‌گه‌ڵ ئه‌وه‌دایه پرسى كورد له توركیا به شێوه‌یه‌كى ئاشتیانه و له ڕێگه‌ى دیالۆگه‌وه چاره‌سه‌ر بكرێت و بۆ ئه‌مه‌ش هه‌موو هه‌وڵێكى داوه و پشتگیرى له‌م پرۆسه‌یه كردووه و ده‌كات.
لاى خۆیه‌وه له‌یلا زانا و سڕڕى سوره‌ییا ئۆنده‌ر كه دواى سه‌ردانیان بۆ دوورگه‌ى ئیمرالى و چاوپێكه‌وتنیان له‌گه‌ڵ عه‌بدوڵڵا ئۆجالان ـ ى سه‌رۆكى به‌ندكراوى PKK، سه‌ردانى هه‌رێمى كوردستانیان كرد، وێڕاى سڵاو و ڕێز، هه‌روه‌ها ستایش و پێزانینى ئۆجالانیان گه‌یانده نێچیرڤان بارزانى بۆ ئه‌و ڕۆڵه ئه‌رێنییه‌ى كه له ده‌سپێكردنى پرۆسه‌ى ئاشتى و به‌رده‌وامبوونیدا له‌گه‌ڵ توركیا بینیویه‌تى و داواى كردووه له پشتگیریى پرۆسه‌ى ئاشتى به‌رده‌وام بێت. هه‌روه‌ها ڕۆڵى ئیدریس بارزانى ـ ى باوكیانى به‌بیر هێناوه‌ته‌وه كه چۆن سه‌ره‌تا و ناوه‌ڕاستى هه‌شتاكانى سه‌ده‌ى ڕابردوو ڕۆڵێكى كاریگه‌رى له ئاشتبوونه‌وه و یه‌كخستنى ڕیزه‌كانى هێز و لایه‌نه كوردستانیه‌كاندا گێڕاوه.
ڕه‌وشى هه‌رێمى كوردستان و هه‌وڵ و ئاماده‌كارییه‌كان بۆ دامه‌زراندنى كابینه‌ى هه‌شته‌مى حكوومه‌تى هه‌رێمى كوردستان و هه‌وڵه‌كان بۆ به‌ستنى كۆنگره‌ى نه‌ته‌وه‌یى و ڕه‌وشى ناوچه‌كه و كاریگه‌ریى ڕووداو و پێشهاته‌كان له‌سه‌ر پرسى كورد، لایه‌نێكى دیكه‌ى دیداره‌كه بوو.
نێچیرڤان بارزانى پێشوازى له شاندێكى كه‌نه‌دى كرد
ئێواره‌ى ئه‌مڕۆ چوارشه‌ممه 12ى شوباتى 2014 نێچیرڤان بارزانى سه‌رۆك وه‌زیرانى هه‌رێمى كوردستان، پێشوازى له "لین یه‌لیچ" وه‌زیرى ده‌وڵه‌ت بۆ كاروبارى ده‌ره‌وه‌ى كه‌نه‌داو شاندێكى یاوه‌رى كرد كه له باڵیۆزى كه‌نه‌دا له عیراق و چه‌ند دیپلۆماتكارێك پێكهاتبوو.
له دیدارێكدا وه‌زیرى كاروبارى ده‌ره‌وه‌ى كه‌نه‌دى وه‌ك یه‌كه‌م وه‌زیرى وڵاته‌كه‌ى كه سه‌ردانى هه‌رێمى كوردستان ده‌كات، خۆشحاڵیى خۆى به‌م سه‌ردانه و به پێشكه‌وتنه‌كان و به‌ڕێوه‌بردنى سه‌ركه‌وتووانه‌ى هه‌رێمى كوردستان ده‌ربڕى و خواستى وڵاته‌كه‌ى بۆ پته‌وكردنى په‌یوه‌ندیى دووقۆڵى و فراوانكردنیان له هه‌موو بواره‌كاندا دووپات كرده‌وه، به‌تایبه‌تیش له بواره‌كانى سیاسى، ئابوورى، ڕۆشنبیرى و كۆمه‌ڵایه‌تیدا.
وه‌زیرى كاروبارى ده‌ره‌وه‌ى كه‌نه‌دى هه‌روه‌ها ڕایگه‌یاند حكوومه‌تى وڵاته‌كه‌ى كۆمپانیا و وه‌به‌رهێنه‌ره‌كانى هان ده‌دات بۆ ئه‌وه‌ى بێن له هه‌رێمى كوردستان وه‌به‌رهێنان بكه‌ن و به‌شدارى له پرۆسه‌ى پێشخستن و گه‌شه‌سه‌ندن و بنیانانه‌وه‌ى هه‌رێمدا بكه‌ن، به تایبه‌تیش له هه‌ردوو بوارى وزه و كشتوكاڵدا. بۆ ئه‌م مه‌به‌سته‌ش هه‌وڵ ده‌ده‌ن سیاسه‌تى سه‌ركه‌وتووى وه‌به‌رهێنان له هه‌رێمى كوردستان كه بووه‌ته هۆى ڕاكێشانى سه‌رمایه‌ى بیانى، بۆ خاوه‌نكار و وه‌به‌رهێنه‌ره كه‌نه‌دییه‌كان ڕوون بكه‌نه‌وه.
لاى خۆیه‌وه نێچیرڤان بارزانى خۆشحاڵیى خۆى به سه‌ردانى شاندى كه‌نه‌دى بۆ هه‌رێمى كوردستان ده‌ربڕى و دووپاتى كرده‌وه كه حكوومه‌تى هه‌رێمى كوردستان خوازیارى په‌یوه‌ندیى هه‌مه‌لایه‌نه‌یه له‌گه‌ڵ كه‌نه‌دا، بۆیه‌شه به بایه‌خه‌وه سه‌یرى هاتنى شاندى كه‌نه‌دى ده‌كه‌ن. هه‌روه‌ها دڵنیاى كردنه‌وه كه ئه‌و كۆمپانیا و وه‌به‌رهێنه‌ره كه‌نه‌دیانه‌ى ده‌یانه‌وێ بێنه هه‌رێمى كوردستان، هاوكارى ده‌كرێن و ئاسانكارییان پێشكه‌ش ده‌كرێت، به تایبه‌تیش ئه‌وانه‌ى ده‌یانه‌وێت له بوارى كشتوكاڵدا له هه‌رێمى كوردستان كار و وه‌به‌رهێنان بكه‌ن.
ئەنجوومەنی رۆشنبیری بەریتانی پەرە بە توانا مرۆییەكانی فەرمانبەرانی حكومەتی هەرێم دەدات
فەلاح مستەفا بەرپرسی پەیوەندیەكانی دەرەوەی حكومەت پێشوازی لە گای چاپمان بەڕێوەبەری ئەنجوومەنی رۆشنبیری بەریتانی لە هەولێر كرد.
لە دیدارێكدا دوای پێشكەشكردنی كورتەیەك لەبارەی كاروباری ئەنجومەنەكەیان لە هەرێم، مەبەستی سەردانەكەی روونكردەوە كە بۆ زیاتر فراوانكردنی پەیوەندیەكان و خستنەڕووی پڕۆگرامەكانیانە. هاوكات سوپاسی فەرمانگەی پەیوەندیەكانی دەرەوەی كرد بۆ ئەو ئاسانكاریانەی تا ئێستا پێشكەشیان كردوون و هیوای خواست هەماهەنگی نیوان هەردولا بەردەوام بێت.
بەرپرسی پەیوەندیەكانی دەرەوە دووپاتیكردەوە كە بە بایەخەوە سەیری رۆڵ و كاری ئەم ئەنجوومەنە دەكرێت. هەروا گوتی : ئێمە دەمانەوێ بە باشترین شێوە سوود لە ئەزموون و شارەزایی ئەنجوومەنی رۆشنبیری بەریتانی وەربگرین بۆ زیاتر پەرەدان بەتوانای كارمەندانی فەرمانگە حكومیەكان لە هەرێمی كوردستان و پەرەدان بە توانای مرۆیی بە شێوەیەكی گشتی. هاوكات پاڵپشتی فەرمانگەی پەیوەندیەكانی دەرەوەی بۆ سەرخستنی كارەكانی ئەنجوومەنی ناوبراو دووپاتكردەوە .
هەر لەو دیدارەدا بیروڕا ئاڵوگۆڕ كرا لەبارەی بەرنامەكانی حكومەت بۆ بونیاتنان و پەرەدان بە توانا مرۆییەكان و كردنەوەی خولی جۆراوجۆر بۆ فەرمانبەرانی حكومەت.
فەلاح مستەفا پێشوازی لە بەرپرسی نووسینگەی باڵیۆزخانەی ئیتاڵیا و شاندێكی كۆمپانیاكانی ئیتاڵیا كرد
ئەمڕۆ2014/2/10 فەلاح مستەفا بەرپرسی پەیوەندیەكانی دەرەوەی حكومەتی هەرێم پێشوازی لە كارمێلۆ فیكارا بەرپرسی نووسینگەی باڵیۆزخانەی ئیتاڵیا لە هەولێر و شاندێكی كۆمپانیاكانی ئەو وڵاتە كرد، كە لە بوارەكانی بیناكردن و رێگاوبان و هێڵەكانی گواستنەوە وەك شەمەندەفەر و پەرەپێدانی باخچەكان و بواری سەوزایی و رووناك كردنەوە و پیشەسازی كار دەكەن.
لە دیدارێكدا كە كاروان جەمال جێگری بەرپرسی فەرمانگەی پەیوەندیەكانی دەرەوە ئامادەی بوو، كارمێلۆ فیكارا بەرپرسی نووسینگەی باڵیۆزخانەی ئیتاڵیا لە هەولێر ئاماژەی بۆ ئەوە كرد كە ئەمە یەكەمین شاندی بەرفراوانی كۆمپانیاكانی ئیتاَلیایە كە سەردانی هەرێم دەكەن. دواتر ئاماژەیان بە سەردان و كۆبوونەوەكانیان لەگەڵ لایەنە پەیوەندیدارەكان لە حكومەتی هەرێم كردو بە ئەرێنی و بەرهەمهێنیان ناوبرد. پاشان شاندی ناوبراو ئاماژەیان بەو بوارانە كرد كە هەریەك لە كۆمپانیاكان كاری تێدا دەكەن و شارەزاییان تێیدا هەیە. هاوكات بەشێكیشیان ئاماژەیان بۆ ئەوە كرد كە بڕیاری كاركردن و خستنەگەڕی سەرمایەكانیان لە هەرێمی كوردستان داوە.
بەرپرسی پەیوەندیەكانی حكومەت وێڕای دەربڕینی خۆشحاڵی بۆ بڕیاری ئەو كۆمپانیانە بۆ كار كردن لە هەرێم، هاوكات ئەو سەردانە و بەردەوامبوونی سەردانی لەم شێوەیە لەلایەن كۆمپانیا بیانیەكانەوە بە گرینگ و پڕبایەخ وەسف كرد و گووتی كە ئەمە دەرفەتێكی باشە تاوەكو دۆخی ئارام و سەقامگیری ئاسایش و هەلی وەبەرهێنان لە كوردستان راستەوخۆ و لە نزیكەوە ببینن، هەروەها دەرفەتێكە بۆ بینینی لایەنە پەیوەندیدارەكانی حكومەت و كەرتی تایبەت و دواتر گواستنەوەی راستی هەلی كارو ئەو پرۆژانەی وەبەرهێنان كە لە هەرێم هەیە بۆ كۆمپانیاكانی دیكەش لە ئیتاڵیا تاوەكو سەرمایەكانیان لە هەرێم بخەنەگەڕ.
پاشان بەرپرسی پەیوەندیەكانی حكومەت تیشكی خستەسەر یاسای وەبەرهێنان و ئەو هەلەی كە بۆ كاركردنی وەبەرهێنەرانی بیانی هەیە لە هەرێم، هەروەها گوتی كە دەرفەتی باش هەیە بۆ كار كردن لە رووی پیشەسازی و بازرگانی و كشتوكاڵ و گەشتوگوزار بۆ پەرەپێدانی ژێرخانی ئابووری هەرێم، هاوكات بەپێویست و گرینگی زانی كە كۆمپانیا بیانیەكان كارو پرۆژەی هاوبەش لەگەڵ كۆمپانیا ناوخۆییەكان لە هەرێم ئەنجام بدەن، كە ئەمەش دەبێتە هۆی تەواوكردنی تواناو شارەزاییەكانی یەكتری بۆ ئەنجامدانی پرۆژەیەكی سەركەوتوو لە هەرێم.
هەروەها گووتی كە حكومەتی هەرێمی كوردستان وەك هاوبەش لە وڵاتی ئیتاڵیا دەڕوانێت و خۆشحاڵە بە ئاستی پەیوەندیەكان لەگەڵ ئیتاڵیا كە لەبەروپێشچوونی بەردەوامدایە. هاوكات سوپاسی كارو هەوڵەكانی نووسینگەی باڵیۆزخانەی ئیتاڵیا لە هەرێم كرد بۆ پەپێدانی پەیوەندیەكانی نێوان هەردوولا. گووتیشی كە لە رێگەی نوێنەرایەتی حكومەتی هەرێم لە ئیتاڵیا و نووسینگەی باڵیۆزخانەی ئەو وڵاتە لە هەرێم دەتوانین كاری هاوبەش ئەنجام بدەین و برەو بە پەیوەندیەكانی نێوان بدەین.
دوایین هەواڵەکان
- نازم دەباغ: سەردانی سەرۆککۆماری ئێران بۆ هەولێر گرنگ دەبێت
- «نازم دهباغ» له‌گه‌ڵ خاتوو «مایرا کوپێرز» جێگری نوێنەری «یونامی» لە تاران دیداریی کرد
- سهركۆمارى توركيا بهردهواميى پشتگيريى وڵاته‌كه‌ى بۆ عێراق و هه‌رێمى كوردستان دووپات كرده‌وه
- پەیامی سەرۆک نێچیرڤان بارزانی لە ساڵیادی ڕۆژنامەگەریی کوردیدا
- نێچيرڤان بارزانى: دهبێ نيشتمان كۆكهرهوهى ههموومان بێت
- سه‌رۆك نێچيرڤان بارزانى له‌گه‌ڵ باڵيۆزى يهكێتيى ئهورووپا كۆبووهوه
- سه‌رۆكى هه‌رێمى كوردستان پێشوازى له باڵيۆزى فهرهنسا كرد
- سه‌رۆك نێچيرڤان بارزانى پێشوازى له باڵيۆزى بهريتانيا كرد
- سەرۆکی حکومەتی هەرێمی کوردستان پێشوازی لە باڵیۆزی بەریتانیا لە عێراق دەکات
- عەباس غەزالی: نووسین و چاپکردنی "فەرھەنگیی زارەکیی موکریان" شانازییەکی بێ پایانە