ئەمشەو، شه‌ممه 2023/9/2 به‌ڕێزان نێچيرڤان بارزانى، سه‌رۆكى هه‌رێمى كوردستان و محه‌مه‌د شياع ئه‌لسوودانى، سه‌رۆك وه‌زيرانى عێراقى فيدراڵى، له په‌يوه‌ندييه‌كى ته‌له‌فۆنيدا دوايين پێشهاته‌كانى دۆخى ئه‌منيى كه‌ركووكيان تاوتوێ كرد.
هه‌ردوولا جه‌ختيان له پێويستيى گرتنه‌به‌رى ڕێكارى خێراى لايه‌نه په‌يوه‌نديداره‌كان كرده‌وه بۆ پاراستنى ئارامى و سه‌قامگيريى كه‌ركووك و ڕێگه‌گرتن له هه‌ر هه‌وڵێكى تێكدانى پێكه‌وه‌ژيان و ئاسايشى شاره‌كه و هاووڵاتييانى.
هه‌ردوولا داكۆييان له‌وه كرده‌وه كه ده‌بێ لايه‌نه ئه‌منييه‌كانى شاره‌كه، بێ جياوازى ئارامى و سه‌قامگيريى هه‌موو پێكهاته‌كانى كه‌ركووك بپارێزن و ڕێگه له پشێوى و ئاڵۆزكردنى زياترى دۆخى ئه‌منيى شاره‌كه بگيرێت، هه‌روه‌ها به‌دواداچوون و لێپێچينه‌وه‌ى ياسايى به‌رامبه‌ر ته‌قه‌كه‌ران بكرێت كه شه‌هيد و بريندارى لێكه‌وته‌وه.