هەرێمی کوردستان
لاتیڤیا كار بۆ كردنەوەی نوێنەرایەتی فەخری خۆی لە هەرێمی كوردستاندا دەكات
بە مەبەستی پەرەپێدانی پەیوەندیە دوو قۆڵیەكان لەگەڵ هەرێمی كوردستان لە بوارە جیاجیاكاندا ، ئەمڕۆ شاندێكی فەرمانگەی پەیوەندیە ئابوریەكانی سەر بە وەزارەتی دەرەوەی لاتیڤیا بە سەرۆكایەتی رۆدۆڵف بریماینس بەرپرسی فەرمانگە، سەردانی فەرمانگەی پەیوەندیەكانی دەرەوەی كرد و لەلایەن فەلاح مستەفا بەرپرسی پەیوەندیەكانی دەرەوە پێشوازیان لێكرا .
لە دیدارێكدا كە كاروان جەمال جێگری بەرپرسی فەرمانگە و خاتوو سوهام جەبەلی یاریدەدەری بەرپرسی فەرمانگە ئامادەی بوون ، شاندی میوان خۆشحاڵی خۆیان بۆ سەردانی هەرێمی كوردستان نیشاندا و سەرۆكی شاند ئاماژەی بەوەدا شاندی یاوەری نوێنەرانی چەندین كۆمپانیای بواری پیشەسازی خۆراك و دەرمانسازی و ئەندازە و كەلوپەلی كارەبا و دڵنیایی لەخۆوە گرتووە، هەروەها دووپاتیكردەوە بۆچوونیان لەبارەی هەرێمەوە زۆر ئیجابیە، چونكە لە پێشكەوتنی بەردەوامدایە.
ئاماژەی بەوەشدا وڵاتەكەی كار بۆ ئەوە دەكات وەكو هەنگاوی یەكەم كونسوڵگەری فەخری خۆی لە هەرێم بكاتەوە .
بەرپرسی پەیوەندیەكانی دەرەوە وێڕای بەخێرهێنانی شاندی میوان ئاماژەی بەوەدا هەرێمی كوردستان پێشكەوتنی بەرچاوی بەدەستهێناوە بەڵام هێشتا پێویستی بە ئەزموون و شارەزایی وڵاتانی جیهان، هەرێمی كوردستان دەخوازێ لەگەڵ لاتیڤیا پەیوەندیەكانی لەو بوارانە پەرە پێبدات كە سوودی بۆ هەردوولا بێت.
هاوكات تیشكی خستە سەر رەوشی هەرێمی كوردستان و ئەو قۆناغانەی هەرێمی كوردستان پێیدا تێپەڕیوەو تێڕوانینی هەرێمی بۆ ئایندە خستەڕوو.
هەر لەم دیدارەدا بەكورتی پرسی ئاوارەكانی سوریا لە هەرێمی كوردستان و پەرەسەندنە سیاسیەكانی رۆژهەڵاتی ناوەڕاست باسیان لێوەكرا.
یەک شەممە, 16 شوبات 2014
توركیا پابه‌ندیى خۆى به ڕێككه‌وتنى وزه‌ى هه‌ولێر ـ ئه‌نقه‌ره دووپات كرده‌وه
ئێواره‌ى دوێنێ هه‌ینى 14ى شوباتى 2014، نێچیرڤان بارزانى سه‌رۆك وه‌زیرانى هه‌رێمى كوردستان و شاندێكى یاوه‌رى له ئیستانبول له‌گه‌ڵ ڕه‌جه‌ب ته‌ییب ئه‌ردۆغان سه‌رۆك وه‌زیرانى توركیا كۆ بووه‌وه.
ده‌رباره‌ى پرسى وزه و ڕێككه‌وتنى وزه‌ى هه‌ولێر ـ ئه‌نقه‌ره‌ى نێوان حكوومه‌تى هه‌رێمى كوردستان و توركیا و كێشه‌كانى هه‌ولێر و به‌غدا له‌سه‌ر ئه‌م پرسه، ئه‌ردۆغان دووپاتى كرده‌وه كه حكوومه‌ته‌كه‌ى پابه‌نده به‌و ڕێككه‌وتنه‌ى له‌گه‌ڵ حكوومه‌تى هه‌رێمى كوردستان مۆرى كردووه، هه‌روه‌ها پشتگیریى حكوومه‌ته‌كه‌ى بۆ ئه‌و دانوستان و گفتوگۆیانه‌ى هه‌ردوو حكوومه‌تى هه‌رێمى كوردستان و حكوومه‌تى عیراقى فیدرال دووپات كرده‌وه كه بۆ گه‌یشتن به چاره‌سه‌رێكى گونجاو له به‌رژوه‌ندیى هه‌موواندا، له نێوان هه‌ولێر و به‌غدا هه‌یه و هیواى خواست له‌مباره‌یه‌وه هه‌ردوولا بگه‌نه ڕێككه‌وتنێك.
له كۆبوونه‌وه‌كه‌دا كه له كه‌شێكى دۆستانه‌دا به‌ڕێوه چوو، هه‌ر یه‌ك له عیماد ئه‌حمه‌د جێگرى سه‌رۆك وه‌زیران، د. فوئاد حسێن سه‌رۆكى دیوانى سه‌رۆكایه‌تیى هه‌رێم، ئاشتى هه‌ورامى وه‌زیرى سامانه سروشتییه‌كان و سه‌فین دزه‌یى وته‌بێژى حكوومه‌ت له شاندى هه‌رێم و تانه‌ر یلدز وه‌زیرى وزه‌ى توركیا و ژماره‌یه‌ك له ڕاوێژكاران له لایه‌نى توركى ئاماده‌ى بوون.
په‌یوه‌ندییه‌كانى هه‌رێمى كوردستان و توركیا و هه‌وڵه‌كانى پێكهێنانى كابینه‌ى هه‌شته‌مى حكوومه‌تى هه‌رێمى كوردستان و ڕه‌وشى ئه‌منى و سیاسیى عیراق و هه‌ڵبژاردنه‌كانى داهاتووى عیراق و بارودۆخى ناوچه‌كه به‌گشتى گفتوگۆى له‌سه‌ر كرا. دواى كۆتاییهاتنى سه‌ردانه‌كه‌ش، دوێنێ شه‌و شاندى هه‌رێمى كوردستان گه‌ڕایه‌وه هه‌ولێر.
لێدوانی سەرۆكی دیوانی سەرۆكایەتیی هەرێمی كوردستان سەبارەت بە كۆبوونەوەی سەرۆكی هەرێمی كوردستان و ڕێكخەری گشتیی بزووتنەوەی گۆڕان
ڕۆژی پێنجشەممە 13ـی 2ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان بە گەرمی پێشوازی لە بەڕێز نەوشیروان مستەفا ڕێكخەری گشتیی بزووتنەوەی گۆڕان و شاندێكی یاوەری كرد و، لەگەڵیاندا كۆبوویەوە. شاندە یاوەرەكەی ڕێكخەری گشتیی بزووتنەوەی گۆڕان پێكهاتبوون لە عومەری سەید عەلی و مستەفا سەید قادر و جەلال جەوهەر و محەمەد حاجی و ئارام شێخ محەمەد و ئاكۆ حەمە كەریم.
لە دانیشتنێكی دۆستانە و ئیجابیدا ڕێكخەری گشتیی بزووتنەوەی گۆڕان و شاندی میوان بەخێرهاتنەوەی سەرۆك بارزانیان كرد و سەرەتا باسی ئەو سەردان و چالاكییانە كرا كە بەڕێز سەرۆكی هەرێم لە سەردانەكەی بۆ وڵاتانی ئەوڕووپایی ئەنجامی دابوو.
بەشێكی گرنگی كۆبوونەوەكە تایبەت بوو بە قسەكردن لەسەر دامەزراندنی كابینەی هەشتەمی حكوومەتی هەرێمی كوردستان و ئەو كۆسپ و تەگەرانەیش خرانە بەر باس كە كەوتوونەتە بەردەم پڕۆسەی دانوساندنی نێوان لایەنە سیاسییەكان و، هەردوولا جەختیان لەوە كردەوە كە پێویستە هەموو كۆسپێك لە پڕۆسەكەدا لابدرێت، بۆ ئەوەی بە زووترین كات پڕۆسەی دانوساندنی نێوان لایەنەكان ئەنجامی لێ بكەوێتەوە. بەڕێز سەرۆكی هەرێم و ڕێكخەری گشتیی بزووتنەوەی گۆڕان لەسەر ئەوە هاوڕا بوون كە پێویستە پەیوەندی و دانوساندنی بەردەوام لەگەڵ هەموو لایەنەكاندا هەبێت.
لە كۆبوونەوەكەدا بارودۆخی سیاسیی ناوچەكە بە گشتی و پەیوەندییەكانی نێوان هەرێمی كوردستان و حكوومەتی عێراقی فیدڕالیش تاوتوێ كران.
د. فواد حوسێن
سەرۆكی دیوانی سەرۆكایەتیی هەرێمی كوردستان
13ـی 2ـی 2014
هەنگاریا جەخت لەسەر پەیوەندی هەمە لایەنە لەگەڵ هەرێمی كوردستان دەكات
بە مەبەستی تیشك خستنەسەر پەپوەندیە دووقۆڵیەكانی نێوان هەنگاریا و هەرێمی كوردستان و باسكردنی ئەنجامی سەردانی شاندی وڵاتی ناوبراو بۆ هەرێم و دیدارەكانیان لەگەڵ بەرپرسان، ئەمڕۆ فەلاح مستەفا بەرپرسی پەیوەندیەكانی دەرەوەی حكومەت پێشوازی لە تیبۆر ساتماری باڵیۆزی هەنگاریا لە عیراق و شاندی یاوەری كرد .
لە دیدارێكدا كە كاروان جەمال جێگری بەرپرسی فەرمانگە و دیندار زێباری جێگری بەرپرسی فەرمانگە بۆ كاروباری رێكخراوە نێودەوڵەتیەكان ئامادەی بوون، باڵیۆز ساتماری ئەنجامی دیدار و دانیشتنەكانی لەگەڵ سەرۆكی حكومەتی هەرێم و وەزیرانی سامانە سروشتیەكان و خوێندنی باڵا خستەڕوو و بە ئیجابی و بەرهەمداری لە قەڵەمدا ، بەتایبەتی دوای ئیمزاكردنی یاداشتێك لەگەڵ وەزارەتی خوێندنی باڵا لەبارەی ناردنی قوتابیانی كورد بۆ خوێندن لە هەنگاریا كە بە پێی یاداشتنامەكە ساڵانە 30 قوتابی دەنێردرێن .
باڵیۆزی هەنگاریا دووپاتیكردەوە وڵاتەكەی هیواخوازە لە چەندین بواری دیكەی وەكو ئابووری و شوێنەوارناسی و گەشتیاری هاوكاری هەرێم بكات و پەیوەندیەكانی خۆی لەگەڵ هەرێم لەم بوارانەدا فراوانتر بكات .
بەرپرسی پەیوەندیەكانی دەرەوەی دەستخۆشی لە باڵیۆزی هەنگاریا كرد و هیوای خواست وڵاتەكەی سوود لە دەرفەتی وەبەرهێنان لە هەرێم وەربگرێت بەتایبەتی لەو سێكتەرانەی كە هەرێم وەكو ئەولەویەت سەیریان دەكات و دووپاتیكردەوە حكومەت هەمیشە هاوكاریان دەبێت .
هەر لەم دیدارەدا تیشك خرایە سەر پرسی ئاوارەكانی سوریا لە هەرێمی كوردستان و پێویستی گەیاندنی یارمەتی مرۆیی بۆیان هەروەها پرسی پێكهێنانی كابینەی هەشتەمی حكومەت و هەڵبژاردنی چاوەڕوانكراوی ئەنجوومەنی نوێنەران و ئەنجوومەنی پارێزگاكانی هەرێم كە لە نیسانی ئەمساڵدا بەڕێوە دەچێت باسیان لێوە كرا .
هاوكات تیشك خرایە سەر پرسی كردنەوەی نوێنەرایەتی هەنگاریا لە هەرێمی كوردستان كە ئێستا لە دوایین هەنگاویدایە .
پێنج شەممە, 13 شوبات 2014
نێچیرڤان بارزانى پێشوازى له باڵیۆزى هه‌نگاریا له عیراق كرد
پێشنیوه‌ڕۆى ئه‌مڕۆ پێنجشه‌ممه 13ى شوباتى 2014، نێچیرڤان بارزانى سه‌رۆك وه‌زیرانى هه‌رێمى كوردستان، پێشوازى له د. تیبۆر ساتمارى؛ باڵیۆزى هه‌نگاریا له عیراق و شاندێكى یاوه‌رى كرد.
له دیدارێكدا په‌یوه‌ندییه‌كانى هه‌رێمى كوردستان و هه‌نگاریا و هه‌ماهه‌نگیى داموده‌زگاكانى هه‌ردوولا، به‌تایبه‌تیش له بواره‌كانى ئه‌كادیمى و كه‌لتووریدا و دروستكردنى پردى زانستى له نێوان زانكۆكانى هه‌رێمى كوردستان و هه‌نگاریا و دابینكردنى كورسى خوێندن له زانكۆكانى ئه‌وێ بۆ قوتابیانى هه‌رێم و فراونكردنى بواره‌كانى وه‌به‌رهێنان له هه‌رێم و پێشخستنى ئاڵوگۆڕى بازرگانى له نێوان هه‌ردوودا تاوتوێ كران.
ناردنى تیمى پشكنین و به‌دواداگه‌ڕانى شوێنه‌واره‌كان له هه‌نگاریاوه بۆ هه‌رێمى كوردستان و فراونكردنى كارى ئه‌و تیمه هه‌نگارییه‌ى كه ماوه‌یه‌كه له هه‌رێمى كوردستان كار ده‌كات، هه‌روه‌ها پشتگیریى حكوومه‌تى هه‌رێم له ئه‌نجامدانى ڕووپێوكردنى زیاترى شوێنه‌واره‌كان و سوودوه‌رگرتن له پسپۆڕى و شاره‌زایى هه‌نگاریا له بوار و كه‌رته جیاكانى گه‌شتیاریدا له هه‌رێمى كوردستان، لایه‌نێكى دیكه‌ى دیداره‌كه بوو.
هه‌ر له دیداره‌كه‌دا شاندى میوان ڕایگه‌یاند كه له‌پێناو پته‌وكردنى په‌یوه‌ندییه‌كان له‌گه‌ڵ هه‌رێمى كوردستان، حكوومه‌تى هه‌نگارى بڕیارى داوه كونسلخانه‌یه‌كى گشتیى وڵاته‌كه‌ى له هه‌ولێر بكاته‌وه. لاى خۆیه‌وه نێچیرڤان بارزانى به‌گه‌رمى پێشوازى له‌م بڕیاره كرد و هه‌موو هاوكارى و هه‌ماهه‌نگیى لایه‌نه په‌یوه‌نداره‌كانى حكوومه‌تى هه‌رێمى كوردستانى له‌گه‌ڵ لایه‌نه هه‌نگارییه‌كان دووپات كرده‌وه، هه‌روه‌ها ڕایگه‌یاند كه حكوومه‌تى هه‌رێمى كوردستان بایه‌خ و گرنگییه‌كى زۆر به په‌یوه‌ندییه‌كانى له‌گه‌ڵ هه‌نگاریا ده‌دات.
پێنج شەممە, 13 شوبات 2014
سەرۆكی هەرێمی كوردستان پێشوازی لە وەزیری دەوڵەت بۆ كاروباری دەرەوەی كەنەدا دەكات
پێشنیوەڕۆی ئەمڕۆ پێنجشەممە 13ـی 2ـی 2014لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە خاتوو لین ییلچ وەزیری دەوڵەت بۆ كاروباری دەرەوەی كەنەدا و شاندێكی یاوەری كرد.
لە دیدارێكدا سەرەتا وەزیری دەوڵەت بۆ كاروباری دەرەوەی كەنەدا خۆشحاڵیی خۆی بۆ ڕەخساندنی ئەو دیدارە و سەردانی بۆ هەرێمی كوردستان ڕاگەیاند و هیوایشی خواست كە دیدار و پەیوەندییەكانی نێوان هەردوولا ببێتە هۆی گەشەسەندنی پەیوەندییەكانی نێوان وڵاتەكەی و هەرێمی كوردستان. هەروەها ئاماژەشی بەوەدا كە لە هەرێمی كوردستاندا دەرفەتی زۆر باش هەیە بۆ وەبەرهێنانی كۆمپانیاكانی كەنەدا لە بوارە جۆراوجۆرەكان و بە تایبەتی لەبواری كشتوكاڵدا. هەر لەم دیدارەدا وەزیری دەوڵەت بۆ كاروباری دەرەوەی كەنەدا، سەرۆك بارزانی لە كردنەوەی نووسینگەی بازرگانیی كەنەدا لە هەرێمی كوردستان ئاگادار كردەوە و، ڕایشیگەیاند وڵاتەكەی بە حوكمی ئەزموونی جۆراوجۆری لەبواری پەروەردە و پیشەسازی و تەندروستی و هەروەها سیستەمی فیدڕاڵی، ئامادەیە یارمەتیی عێراق و هەرێمی كوردستان بدات.
لە بەرانبەردا سەرۆك بارزانی وێڕای بەخێرهێنانی شاندی میوان پێشوازی لە گەشەسەندنی پەیوەندییەكان و سوودوەرگرتنی هەرێمی كوردستان لە ئەزموونەكانی وڵاتی كەنەدا كرد و هێمای بەوەدا كە لەنێوان هەردوولادا دەرفەتی زۆر باش هەن كە بەیەكەوە كاری لەسەر بكەن و ببێتە هۆكارێك بۆ بەهێزكردنی پەیوەندییەكان. لە بەشێكی دیكەی قسەكانیدا سەرۆك بارزانی سوپاسی حكوومەت و گەلی كەنەدای كرد كە لە ڕۆژانی تەنگانەدا ژمارەیەكی زۆری هاووڵاتیی هەرێمی كوردستانیان لە وڵاتەكەیاندا حەواندووەتەوە و بواری خوێندن و پێگەییشتنیان بۆ ڕەخساندووە.
لە تەوەرێكی دیكەی ئەم دیدارەدا بارودۆخی پەنابەرانی سووریا لە هەرێمی كوردستان خرایە بەر باس و، وەزیری دەوڵەت بۆ كاروباری دەرەوەی كەنەدا سوپاسی گەل و حكوومەتی هەرێمی كوردستان كرد بۆ یارمەتیدانی ئاوارەكان و نیشتەجێكردنیان لە هەرێمی كوردستاندا و ڕایگەیاند كە كارێكی گەورە لەوبارەیەوە لە هەرێمی كوردستان كراوە و، بەڵێنی ئەوەیشی بە سەرۆك بارزانی دا كە لە ڕێگەی خۆیانەوە هەوڵ بدەن كە ناوەندە دەولییەكان و وڵاتان یارمەتیی زیاتر پێشكەشی هەرێمی كوردستان بكەن لە حەواندنەوە و نیشتەجێكردنی پەنابەرانی سووریا.
پێنج شەممە, 13 شوبات 2014
دوایین هەواڵەکان
- نوێنەری حکومەتی هەرێم لە ئێران: سەردانەکەی پزیشکیان ئاماژەیە بۆ گرنگیدانی ئێران بە هەرێمی کوردستان
- هه‌رێمى كوردستان و ئێران جهخت له برهودان به پهيوهندييهكانيان دهكهنهوه
- سهرۆک نێچیرڤان بارزانی: سەردانی سەرۆک کۆماری ئێران مێژوویی بوو
- نازم دەباغ له وتووێژ له‌گه‌ڵ ئاژانسی ئیرنا: مەسعوود پزشکیان سەردانی هەولێر دەکات
- نازم دەباغ: کاتی سەردانی پزیشکیان بۆ عێراق دیار نییە
- «سەلام رشدی» له‌گه‌ڵ شاندی یهکێتی هاورده و ناردنکارانی لقی هه‌ولێر کۆبۆوه
- سه‌رۆك نێچيرڤان بارزانى: ههميشه پشتيوانى و بهرگرى له مافهكانى ئێزدييان دهكهين
- سهرۆک نێچیرڤان بارزانی له‌گه‌ڵ باڵیۆزی یهکێتیی ئهورووپا کۆبووهوه
- سه‌رۆك نێچيرڤان بارزانى له‌گه‌ڵ باڵيۆزى نهمسا كۆبووهوه
- سه‌رۆك نێچيرڤان بارزانى سوپاسى جهنهرال ڤاول ده‌كات