هەرێمی کوردستان
لەمەودوا نەمسا ڤیزە بە هاوڵاتیانی هەرێم دەدات
بە مەبەستی پتەوكردنی پەیوەندیە دوو لایەنەكانی نێوانیان، ئەمڕۆ فەلاح مستەفا بەرپرسی پەیوەندیەكانی دەرەوەی حكومەت پێشوازی لە شاندێكی هاوبەشی نەمساو سلۆڤینیا كرد كە پێكهاتبوو ئەلفرێد براتانێك جێگری سەرۆكی نێردە لە باڵیۆزخانەی نەمسا لە عەممان و لودویچ موك بەرپرسی بەشی ڤیزە لە وەزارەتی دەرەوەی نەمسا و ئەنتۆن پیرینج لە بەشی ڤیزەی وەزارەتی دەرەوەی سلۆڤینیا.
لە دیدارێكدا كە خاتوو سوهام جەبەلی یاریدەدەری بەرپرسی فەرمانگە و د. مستەفا رەمەزان نوێنەری حكومەتی هەرێم لە نەمسا ئامادەبوون، بەرپرسی پەیوەندیەكانی دەرەوەی حكومەت پوختەیەكی سەبارەت بە پەیوەندیە مێژوویەكانی نێوان هەرێمی كوردستان و ووڵاتی نەمسا و رۆلیان لە بەرەو پێشچوونی هاوكێشەی سیاسی كورد لە ناوچەكە كرد.
بەڕێز براتانێك خۆشحاڵی خۆی بە سەردانەكەی بۆ هەرێمی كوردستان دەربڕی و پاشان مەبەستی سەردانەكەی روونكردەوە ئەویش كردنەوەی سەنتەرێكی تایبەت بوو بۆ پێدانی ڤیزە بە هاوڵاتیان لە هەرێمی كوردستان بۆ ئەوەی چیتر هاوڵاتیان بۆ وەرگرتنی ڤیزە سەردانی عەممان نەكەن.
ئەگەرچی (13) وڵاتی بیانی لە هەرێمی كوردستان ڤیزە دەدەن، بەڵام جیاوازی سەنتەرەكەی ئەوان ئەوەیە كە لەلایەن كەرتی تایبەتەوە بەڕێوەدەبرێت، ئەمەش وەكو بەشێك لە سیاسەتی كاركردنی هاوبەشە بۆ ناوچە هەرێمایەتیەكان و ووڵاتە نزیكەكان كە بەشێكی زۆر لە كاروباری پێدانی ڤیزە بە كەرتی تایبەت و سەنتەرە بازرگانیەكان دەدرێت.
لەم بارەیەوە، بەرێز ئەنتۆن پیرینج ڕایگەیاند كە بەرپرسانی سلۆڤینیا هاوكاری دەكەن لەگەڵ لایەنی پەیوەندیدار لە وەزارەتی دەرەوەی نەمسا بۆ ئاسانكاری و دابینكردنی ڤیزە بۆ هاوڵاتیانی هەرێمی كوردستان لە رێگەی سەنتەری ناوبراوەوە بۆ ئەوەی هاوڵاتیان بە ئاسانی سەردانی ووڵاتەكەیان بكەن.
لەم رووەوە، بەرپرسی پەیوەندیەكانی دەرەوەی حكومەت خوشحاڵی خۆی بۆ ئەو هەنگاوە دەربڕی و ستایشی رۆڵی هەردوو حكومەتی نەمسا و سلۆڤینیا كرد بۆ بەرەو پێشبردنی پەیوەندیەكانیان لەگەڵ هەرێمی كوردستان و بە جێگەیاندنی سیاسەتی كرانەوەی حكومەت بەرووی دونیای دەرەوەدا.
پاشان، هەریەك لە بابەتەكانی پەرەپێدانی هاوكاری لە بوارەكانی كشتوكاڵ و گەشتیاری و ئابووری و پەروەردە و ئاڵوگۆری كەلتوری و پەرەپێدانی توانا مرۆییەكان لە هەرێمی كوردستان تەوەرەیەكی تری كۆبوونەوەكە بوو.
لەكۆتاییدا، باسیان لە دۆزینەوەی میكانیزمێكی كارا كرد بۆ پێشخستنی پەیوەندیە دوولایەنەكانی نێوان هەردوولا و چالاككردن و زیاتر ئاڵوگۆر كردنی پەیوەندیەكان كرا.
سەرۆكی هەرێمی كوردستان پێشوازی لە وەزیری بەرگریی عێراق بەوەكالەت دەكات
ئەمڕۆ هەینی 10ـی 1ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە سەعدون ئەلدلێمی وەزیری بەرگریی عێراق بەوەكالەت و شاندێكی یاوەری كرد.
لەم دیدارەدا كە بابەكر زێباری سەرۆكی ئەركانی سوپای عێراق و ژمارەیەك بەرپرسی سوپای عێراقی ئامادەی بوون، وەزیری بەرگریی عێراق بەوەكالەت بە دوورودرێژی باسی كێشەكان و قەیرانی سیاسی و ئەمنیی پارێزگای ئەنباری كرد و سەرۆك بارزانی لە دواپەرەسەندنە ئەمنی و سەربازییەكانی پارێزگای ئەنبار و هەوڵەكانی سوپا و وەزارەتی بەرگری بۆ گەڕاندنەوەی ئاساییش و سەقامگیری لەم دەڤەرەدا ئاگادار كردەوە.
لەبەرانبەردا سەرۆك بارزانی جەختی لەوە كردەوە كە پێویستە هەموو لایەك لە ڕووبەڕووبوونەوەی تیرۆریستان هەماهەنگ بن و هاوكاری یەكتر بن.
سەرۆك بارزانی لەم دیدارەدا ئاماژەی بەوەدا كە پێویستە لەپێناو دەربازبوونی عێراق لە قەیران و مەترسییەكان و هەروەها گەڕاندنەوەی سەقامگیری ڕێگەی دیالۆگ لەگەڵ هۆز و لایەنەكانی پارێزگای ئەنبار بگیرێتە بەر.
سەرۆكی هەرێمی كوردستان لەگەڵ كونسوڵ و نوێنەری وڵاتانی بیانی لە هەرێمی كوردستان كۆبوویەوە
ئەمڕۆ شەممە 11ـی 1ـی 2014 لە سەلاحەدین بەڕێز مەسعود بارزانی لەگەڵ كونسوڵی گشتی و كونسوڵ و نوێنەران و بەرپرسی نووسینگەی وڵاتانی بیانی لە هەرێمی كوردستانی كۆبوویەوە.
لەو كۆبوونەوەیەدا كە وەك نەریتێكی ساڵانە بەڕێوە دەچێت و ئامانج لێی شیكردنەوەی سیاسەتی هەرێمی كوردستان و ئاگاداركردنەوەی كونسوڵ و نوێنەری وڵاتان لە دواپەرەسەندنە سیاسی و ئابووری و كۆمەڵایەتییەكانی هەرێمی كوردستان و عێراقی فیدڕاڵە، سەرەتا فەلاح مستەفا بەرپرسی فەرمانگەی پەیوەندییەكانی دەرەوەی حكوومەتی هەرێمی كوردستان كورتەیەكی لەبارەی پەیوەندییەكانی هەرێمی كوردستان لەگەڵ وڵاتانی دەرەوە و هەروەها ژمارە و ئاستی نوێنەرایەتی دیپلۆماسیی وڵاتان لە هەرێمی كوردستان باس كرد و ئاماژەی بەوەدا كە دەرگەكانی هەرێمی كوردستان بەڕووی فراوانتركردنی پەیوەندییەكان لەگەڵ جیهانی دەرەوە و وڵاتانی دراوسێ كراوەیە و حكوومەتی هەرێمی كوردستان ئامادەیە هەموو جۆرە ئاسانكارییەك بۆ گەشەپێدان و پتەوتركردنی پەیوەندی لەگەڵ وڵاتان بخاتەڕوو، هەروەها سوپاسی ئەو وڵاتانەشی كرد كە لەسەر بابەتی بەجینۆسایدناساندنی نەهامەتییەكانی گەلی كورد كاریان كردووە و هەنگاوی باشیان ناوە.
دواتر سەرۆك بارزانی وێڕای بەخێرهێنانی گەرمی كونسوڵ و دیپلۆمات و نوێنەرانی وڵاتان پیرۆزبایی ساڵی تازەی لە ئامادەبووان كرد و هیوای خواست كە ساڵی تازە ببێتە مایەی بڵاوبوونەوەی ئاشتی و دووركەوتنەوە لە شەڕ و كاولكاری لەسەرانسەری جیهاندا. لەم كۆبوونەوەیەدا سەرۆك بارزانی ئامادەبووانی لە دوایین هەوڵەكانی پێكهێنانی حكوومەتی تازەی هەرێمی كوردستان ئاگادار كردەوە و هێمای بەوەدا كە حكوومەتی نوێ حكوومەتێكی بنكەفراوان و بە بەشداری هەموو لایەنە سیاسییەكان دەبێت و ئامانجیش بەرەوەپێشبردنی سەقامگیری و ئارامی و خزمەتگوزاری بۆ هاووڵاتیان و بووژانەوە دەبێت. هەر پەیوەست بەم باسەوە سەرۆك بارزانی ئەوەی بۆ ئامادەبووان ڕوونكردەوە كە هەڵبژاردنی ئەیلوولی ڕابردووی هەرێمی كوردستان لە كاتی دیاریكراوی خۆی ئەنجامدراو و چاوەڕوانیش نەدەكرا پێكهێنانی حكوومەت ئەوەندە دوابخرێ بەڵام دەرفەت بە گشت لایەك دراوە قسەی خۆیان بكەن و بەشداریی هەموو لایەك لەم حكوومەتەدا یەكلایی بووەتەوە و چوار ساڵی ئاییە چوارساڵی هێمنی و بووژانەوە دەبێت.
سەبارەت بە بارودۆخی سیاسی و ئەمنیی عێراقیش سەرۆك بارزانی گوتی: " ئێمە نیگەرانین لە ڕەوشی سیاسی و ئەمنیی عێراق بە تایبەت لە پارێزگای ئەنبار. ئەو بارودۆخە لە ئەنجامی كەڵەكەبوونی كێشەكان هاتووەتە كایەوە و پێویستە حكوومەتی عێراقی مامەڵەیەكی ژیرانەتری لەگەڵ گرفتەكان كردبا". هەر لەبارەی بارودۆخی پارێزگای ئەنبار سەرۆك بارزانی ڕایگەیاند كە بارودۆخێكی مەترسیدار لەم ناوچەیەدا هاتووەتە ئارا و لەوانەیە بۆ پارێزگاكانی دیكەی عێراقیش بگوازرێتەوە و چارەكردنی كێشەكان لەڕێی هێزی سەربازی ڕەنگە گرفتەكان قووڵتر بكاتەوە. سەرۆك بارزانی ئەوەشی بۆ ئامادەبووان ڕوونكردەوە كە پێویستە حكوومەتی ناوەندی گرنگی بە داواكارییەكانی خەڵك بدات و ڕێزی لێ بگرێت و بەهەموو شێوەیەكیش ڕێگە لەوە بگیرێت كە شەڕی دژی تیرۆریستان ببێتە شەڕی تاییفی و شەڕی نێوان شیعە و سووننە.
كێشەكانی نێوان هەولێر و بەغدا تەوەرێكی دیكەی قسەكانی سەرۆك بارزانی بوون و سەرۆك بارزانی لەوبارەیەوە ڕایگەیاند كە هەرێم پێشوازی لەوە دەكات كێشەی نەوت و گاز و مادەی 140 و پێشمەرگە و گرفتەكانی دی چارەسەر بكرێت و شاندەكانی هەولێر و بەغدا بەردەوام سەردانی یەكتر بكەن و دانوساندن بەردەوام بێت. سەرۆك بارزانی لەبارەی پەیوەندییەكانی هەرێم و بەغدا گوتی:" ئێمە حەز دەكەین یارمەتیی پڕۆسەی سیاسی بدەین و كار لەسەر نەهێشتنی كێشەكانی عێراق بكەین بەڵام پێویستیشە لە عێراقدا چەمكی شەراكەتی ڕاستەقینە جێبەجێ بكرێت و هەموو خەڵكی عێراق هەست بكەن كە شەریكن لە وڵاتدا". سەرۆك بارزانی هیواشی خواست كە هەڵبژاردنەكانی ئەنجوومەنی نوێنەرانی عێراقی لە كاتی دیاریكراوی خۆی ئەنجام بدرێت.
لەبارەی ڕەوشی سووریا و ئاییندەی ئەم وڵاتە سەرۆك بارزانی هیوای ئەوەی خواست كە بەزووترین كات كۆتایی بە خوێنڕشتن و نەهامەتییەكانی گەلانی سووریا بهێنرێت و لە ئاییندەی سووریادا مافی هەموو پێكهاتەكان ڕەچاو بگیرێت. سەرۆك بارزانی كورتەیەكیشی لەبارەی ڕۆژئاوای كوردستان بۆ ئامادەبووان باس كرد و ڕایگەیاند كە كورد بە یەك شاند بەشداری كۆنفڕانسی ژێنێڤ 2 دەبێت. داواشی لە وڵاتان كرد كە لە یارمەتیدانی ئاوارەكانی سووریا هاوكاریی هەرێمی كوردستان بكەن چونكە بەهۆی هاتنی ژمارەیەكی زۆری پەنابەر و هەروەها خێزانی عەرەب لە باشوور و ناوەندی عێراق و مەسیحییەكان و ئاوارەكانی ئەنبار ئێستا گوشارێكی زۆر لەسەر هەرێمی كوردستانە بۆ حەواندنەوەی ئەم ژمارە زۆرەی پەنابەر. لە كۆتایی قسەكانیدا سەرۆك بارزانی ڕایگەیاند كە هەرێمی كوردستان كێشەی لەگەڵ هیچ وڵاتێكدا نییە و دەست لە كاروباری كەس وەرنادات و نەبووەتە سەرچاوەی هەڕەشە بۆ هیچ وڵاتێك بەڵكو فاكتەری بووژانەوە و پێشخستنی ناوچەكەیە و دەرگاكانی بەڕووی جیرانەكان و هەموو جیهاندا كراوەیە.
لەبەشی كۆتایی كۆبوونەوەكەی ئەمڕۆی سەرۆك بارزانی و نوێنەرانی وڵاتان لە هەرێمی كوردستان نوێنەرانی وڵاتانی بیانی سوپاسی میوانداریی سەرۆك بارزانیان كرد و دەستخۆشیشیان لە هەوڵەكانی سەرۆك بارزانی كرد بۆ چارەسەركردنی كێشەكانی عێراق و هەروەها یارمەتیدان و حەواندنەوەی ئاوارە و پەنابەران. نوێنەر و كونسۆڵی وڵاتان ئامادەیی وڵاتەكانیان نیشاندا بۆ پاراستن و یارمەتیدانی ئەو سەقامگیری و پێشكەوتنەی لە هەرێمی كوردستان هاتووەتە ئاراوە.
په‌یامی پیرۆزبایی كۆسره‌ت ره‌سول عه‌لی به بۆنه‌ی به پارێزگا بوونی هه‌ڵه‌بجه
خه‌ڵكی كوردستان
خه‌ڵكی به شه‌ره‌فی شاری هه‌ڵه‌بجه‌ی خۆشه‌ویست...
به بۆنه‌ی ده‌رچووی بڕیاری به پارێزگابوونی شاری هه‌ڵه‌بجه له ئه‌نجومه‌نی وه‌زیرانی عێراق و ره‌وانه‌كردنی بڕیاره‌كه بۆ ئه‌نجومه‌نی نوێنه‌رانی عێراق، له دڵه‌وه گه‌رمترین پیرۆزبایی ئاراسته‌ی كۆمه‌ڵانی خه‌ڵكی كوردستان به گشتی و خه‌ڵكی به شه‌ره‌ف و خۆڕاگری هه‌ڵه‌بجه ده‌كه‌م و لێره‌وه سه‌رجه‌م نوێنه‌رانی كورد له ئه‌نجومه‌نی نوێنه‌رانی عێراق هه‌موو هه‌وڵه‌كانیان بخه‌نه‌گه‌ڕ بۆ به‌زوویی ده‌رچوونی ئه‌م بڕیاره له ئه‌نجومه‌نی نوێنه‌رانی عێراق.
ئه‌گه‌ر ساڵی رابردوو به كۆمه‌ڵێك رووداو و كاره‌ساتی ناخۆشدا تێپه‌ڕبووبین ئه‌وا خۆشترین بڕیاری ئه‌م ساڵه ره‌زامه‌ندی ئه‌نجومه‌نی وه‌زیرانی عێراق بوو له‌سه‌ر پرۆژه‌یاسای به پارێزگابوونی هه‌ڵه‌بجه و نكۆڵیش له‌وه ناكرێ كه ئێمه‌و مانان هه‌ر له سه‌ره‌تاوه‌و وه‌ك مافێكی هه‌ره سه‌ره‌تایی هه‌ڵه‌بجه‌ییه‌كان ئه‌م هه‌وڵه‌ی داوه‌و وا ئه‌مڕۆش به دڵخۆشیه‌وه هه‌وڵه‌كانمان ئه‌نجامی ده‌بێ و هه‌ڵه‌بجه‌ی خۆشه‌ویست به پارێزگا ده‌بێ.
لێره‌وه‌و له‌میانی ده‌رچوونی ئه‌م بڕیاره گرنگه به پێویستی ده‌زانم ئه‌وه بڵێم كه هه‌ڵه‌بجه‌و هه‌ڵه‌بجه‌ییه‌كان شایسته‌ی زۆر له‌وه زیاترن و ئه‌و هه‌ڵه‌بجه‌یه‌ی ئێمه بوو كه كوردو كێشه ره‌واكانی به دنیا ناساند و ئه‌مڕۆش خشتێكی تر ده‌خاته سه‌ر خه‌رمانی پارێزگاكانی هه‌رێمی كوردستان له عێراقی فیدرالدا.
له‌كۆتاییدا وێڕای دووباره پیرۆزباییم له خه‌ڵكی به شه‌ره‌ف و دڵسۆزو كوردپه‌روه‌ری هه‌ڵه‌بجه، ده‌ستخۆشی و پیرۆزبایی خۆشم ئاراسته‌ی سه‌رجه‌م ئه‌و كه‌س و لایه‌نانه ده‌كه‌م كه رۆڵیان هه‌بووه‌و ده‌بێ له به‌ره‌و پێشبردنی ئه‌م كه‌یسه و ده‌رچوونی ئه‌م بڕیاره گرنگه مێژووییه.
دووباره پیرۆزه‌و با لێره‌وه هه‌موومان به‌ڵێنی زیاتر خزمه‌تكردنی هه‌ڵه‌بجه بده‌ین، چونكه هه‌ڵه‌بجه‌ییه‌كان جگه له به پارێزگابوونیان شایسته‌ی باشترین خزمه‌تكردنن.
كۆسره‌ت ره‌سول عه‌لی
جێگری سه‌رۆكی هه‌رێمی كوردستان
1/1/2014
دوای سەردانەكەی نێچیرڤان بارزانی بۆ بەغدا ،ئەنجومەنی وەزیران عیراق رەزامەندی لەسەر بە پارێزگابوونی هەڵەبجە دا
دوای ئەوەی لە 25ى دیسه‌مبه‌رى 2013، نێچیرڤان بارزانى سه‌رۆك وه‌زیرانى هه‌رێمى كوردستان پڕۆژه یاساى به پارێزگاكردنى هه‌ڵه‌بجه‌ى به فه‌رمى ڕاده‌ستى سه‌رۆك وه‌زیرانى عیراقى فیدرال نوورى مالیكى كرد، پاش ئه‌وه‌ى ئه‌ویش ڕه‌زامه‌ندى له‌سه‌ر نیشان دا و بڕیار درا بخرێته كارنامه‌ى كۆبوونه‌وه‌ى داهاتووى ئه‌نجومه‌نى وه‌زیرانى عیراقه‌وه بۆ ئه‌وه‌ى بڕیارى له‌سه‌ر بدرێت و بنێردرێته په‌رله‌مانى عیراق، له دانیشتنی ئه‌مڕۆی ئه‌نجومه‌نی وه‌زیرانی عیراقدا پرسی به پارێزگابوونی هه‌ڵه‌بجه‌ی شه‌هید گفتوگۆی له‌سه‌ر كرا، دواتر به زۆرینه‌ی ده‌نگ بڕیاری به پارێزگابوونی درا.
د. خه‌یروڵا حه‌سه‌ن، وه‌زیری بازرگانی عیراق، رایگه‌یاند: له كۆبوونه‌وه‌ی ئه‌مڕۆی ئه‌نجومه‌نی وه‌زیراندا، به زۆرینه‌ی ده‌نگ ره‌زامه‌ندی درا له‌سه‌ر به پارێزگابوونی هه‌ڵه‌بجه‌ی شه‌هید و كۆبوونه‌وه‌كه‌ش به‌رده‌وامه".
پێشتریش وه‌زیری بازرگانی عیراق رایگه‌یاندبوو، بڕیاره ئه‌مڕۆ دانیشتنی ئه‌نجومه‌نی وه‌زیران به‌ڕێوه‌بچێت و به‌پێی كارنامه‌ی دانیشتنه‌كه، بڕگه‌ی یه‌كه‌م گفتوگۆكردن ده‌بێت له‌سه‌ر پرۆژه‌یاسای بودجه‌‌و بڕگه‌ی حه‌وته‌میش گفوگۆكردن ده‌بێت له‌سه‌ر پرۆژه‌یاسای به‌پارێزگاركردنی هه‌ڵه‌بجه.
ئه‌و وه‌زیره كورده، ته‌ئكیدیشكرده‌وه، كه بڕیاری به‌پارێزگاركردنی هه‌ڵه‌بجه له‌ده‌سه‌ڵاتی نوری مالیكی، سه‌رۆكی وه‌زیراندا نییه، ده‌بێت له ئه‌نجومه‌نی وه‌زیراندا وه‌ك هه‌ر پرۆژه‌یاسایه‌كی دیكه گفتوگۆی له‌باره‌وه بكرێت و پاشان بخرێته ده‌نگدانه‌وه، بۆ ئه‌و مه‌به‌سته‌ش مالیكی له‌سه‌ر پرۆژه‌یاساكه نوسیویه‌تی، له ئه‌نجومه‌نی وه‌زیران بخرێته‌ڕوو، به‌مانای گفتوگۆكردن له‌سه‌ری دێت.
جه‌ختیشیكرده‌وه، كه ئه‌وان وه‌كو وه‌زیره كورده‌كانی ئه‌نجومه‌نی وه‌زیران، هه‌وڵی ته‌واوی خۆیان داوه بۆ ئه‌وه‌ی وه‌زیره‌كانی دیكه رازی بكه‌ن به ده‌نگدان له به‌رژه‌وه‌ندی پرۆژه یاساكه.
نێچیرڤان بارزانی سەردانی بەغدای كرد و ئەمڕۆش لەگەڵ مالیكی كۆ دەبێتەوە
شاندێكی حكومەتی هەرێمی كوردستان بە سەرۆكایەتی نێچیرڤان بارزانی سەرۆكی حكومەتی هەرێمی كوردستان ئەمڕۆ بەرەو بەغدا رۆیشت و چاوەرَوان دەكرێت ئێوارەی ئەمڕۆش لەگەڵ نوری مالیكی سەرۆك وەزیرانی عیراق كۆببێتەوە .
لەمبارەیەوە سەفین دزەیی گوتەبێژی فەرمی حكومەتی هەرێمی كوردستان رایگەیاند لەو سەردانەی سەرۆكی حكومەت بۆ عیماد ئەحمەد جێگری سەرۆكی حكومەت و ژمارەیەك لە وەزیرانی تایبەتمەند بەو پرسانەی لە كۆبوونەوەكاندا باس دەكرێن یاوەری سەرۆكی حكومەت دەكەن .
كارنامەی كۆبوونەوەی سەرۆك وەزیرانی كوردستان لەگەڵ نوری مالیكی سەرۆك وەزیرانی عێراق ، پێكدێت لە گفتوگۆكردن لەسەر باری ئەمنیی كەركووك و كێشەی ناوچە ناكۆكی لەسەرەكان بەپێی دەستووری عێراق ، هەروەها رێككەوتنی هەناردەكردنی نەوت وغازی هەرێمی كوردستان لەگەڵ توركیا، لە رێگەی هێڵی نەوتیی هەرێمی كوردستان – توركیاوە ، كە 50%ی بە نرخێكی هەرزانتر بۆ توركیا دەبێت و 50%یشی بۆ بازاڕەكانی جیهان دەبێت .
لەو سەردانەدا باسی بەشی هەرێمی كوردستان لە بودجەی عێراقدا دەكرێت ، كە بەپێی هەندێ لێكۆلینەوەی بێلایەنانە لەسەر بودجە، بەشی دانراو بۆ هەرێمی كوردستان تەنیا 10.5%ی بودجەی عێراقە نەك 17%، هەر بۆ ئەو مەبەستەش چەند بەڕێوەبەرێكی وەزارەتی دارایی هەرێمی كوردستان كە لە شاندەكەی هەرێمی كوردستاندان ئەوە رووندەكەنەوەو گفتوگۆی لەسەر دەكەن.
دوایین هەواڵەکان
- نوێنەری حکومەتی هەرێم لە ئێران: سەردانەکەی پزیشکیان ئاماژەیە بۆ گرنگیدانی ئێران بە هەرێمی کوردستان
- هه‌رێمى كوردستان و ئێران جهخت له برهودان به پهيوهندييهكانيان دهكهنهوه
- سهرۆک نێچیرڤان بارزانی: سەردانی سەرۆک کۆماری ئێران مێژوویی بوو
- نازم دەباغ له وتووێژ لهگهڵ ئاژانسی ئیرنا: مەسعوود پزشکیان سەردانی هەولێر دەکات
- نازم دەباغ: کاتی سەردانی پزیشکیان بۆ عێراق دیار نییە
- «سەلام رشدی» لهگهڵ شاندی یهکێتی هاورده و ناردنکارانی لقی ههولێر کۆبۆوه
- سه‌رۆك نێچيرڤان بارزانى: ههميشه پشتيوانى و بهرگرى له مافهكانى ئێزدييان دهكهين
- سهرۆک نێچیرڤان بارزانی لهگهڵ باڵیۆزی یهکێتیی ئهورووپا کۆبووهوه
- سه‌رۆك نێچيرڤان بارزانى لهگهڵ باڵيۆزى نهمسا كۆبووهوه
- سه‌رۆك نێچيرڤان بارزانى سوپاسى جهنهرال ڤاول دهكات