هەرێمی کوردستان
هاوكارییە سەربازی و مرۆییەكانی ئەڵمانیا بۆ هەرێمی كوردستان بەردەوام دەبن
پاشنیوەڕۆی ئەمڕۆ سێشەممە 27/10/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوزای لە خاتوو ئۆرسۆلا ڤۆندێر لاین وەزیری بەرگریی ئەڵمانیا و شاندێكی سەربازی و دیپلۆماسیی یاوەری كرد.
لە دیدارێكدا كە بەڕێز قوباد تاڵەبانی جێگری سەرۆك وەزیران و ژمارەیەك لە وەزیرانی حكوومەتی هەرێمی كوردستان ئامادەیبوون، خاتوو لاین خۆشحاڵیی خۆی بە سەردانی هەرێمی كوردستان دەربڕی و ئاماژەی بەوە دا كە بە بەراورد لەگەڵ سەردانی پێشووی، پێشكەوتنێكی بەرچاو لە بواری مەشق و ڕاهێنانی پێشمەرگە هاتۆتە ئاراوە و ئەوان شانازی بە هێزی پێشمەرگەوە دەكەن كە ناوبانگێكی جیهانی بەدەست هێناوە و ئەو جۆش و خرۆشەی لە ناوەندەكانی مەشق و ڕاهێناندا لە پێشمەرگە بەدی دەكرێت، جێگەی خۆشحاڵی و شانازییە كە بە دیسپلین كارەكانی خۆیان ئەنجام دەدەن و توانیویانە ئەفسانەی تیرۆرستانی داعش تێكبشكێنن و ڕاهێنەرە ئەڵمانییەكانیش شانازی بە هێزی پێشمەرگەوە دەكەن.
لە بەشێكی دیكەی قسەكانیدا ئامادەییی وڵاتەكەی دەربڕی كە جگە لە بواری سەربازی، لە هەموو بوارەكانی دیكەشدا هاوكاریی هەرێمی كوردستان بكات بە تایبەتی هاوكارییكردنی ئەو ئاوارە و پەنابەرانەی لە ترسی تیرۆر ڕوویان لە هەرێمی كوردستان كردووە و دانانی پلانێك بۆ هاوكاریكردنی خەڵكی ئەو دەڤەرانەی لە دەستی تیرۆرستان ڕزگار كراون. جەختی لەوەش كردەوە كە پێویستە كێشە ناوخۆییەكانی هەرێمی كوردستان بە ڕێگەی دیالۆگ و گفتوگۆ چارەسەر بكرێن و ئەولەویەتی كارەكان لە قۆناغی ئێستادا ڕووبەڕووبوونەوە و نەهێشتنی مەترسیی تیرۆر بێت.
لای خۆیەوە بەڕێز سەرۆك وەزیرانی هەرێمی كوردستان دڵخۆشیی خۆی بەو سەردانە دەربڕی و سوپاسی خەڵك و حكوومەتی ئەڵمانیای كرد كە هەر لەسەرەتای هێرشەكانی تیرۆرستانی داعش بۆ سەر هەرێمی كوردستان، هاوكاریی هەرێمی كوردستانیان كردووە بە تایبەتی كە ناوەندێكی مەشق و ڕاهێنانیان بۆ هێزی پێشمەرگە كردووتەوە و لەم بارەیەشەوە هەماهەنگیی نێوان هێزی پێشمەرگە و ئەڵمانیا و وڵاتانی هاوپەیمانی بەرز نرخاند و هیوای خواست ئەو هاوكاری و هەماهەنگییە تۆكمەتر بكرێن و بە گوێرەی ئەو گۆڕانكارییانە بن كە لە بەرەكانی جەنگ دروست بوون.
سەبارەت بە كێشە ناوخۆییەكانیش، ئاشكرای كرد كە ئەو كێشانە هیچ كاریگەرییەكی نەرێنی لەسەر مۆراڵی پێشمەرگە لە بەرەكانی جەنگ نەبووە و لەگەڵ لایەنە سیاسییەكانیش بەردەوام دەبن بۆ چارەسەركردنیان. ئەوەشی خستە ڕوو كە حكوومەتی هەرێمی كوردستان پێشوازی لە هەر هاوكارییەكی سەربازی و مرۆیی دەكات بە تایبەت كە ژمارەیەكی یەكجار زۆر ئاوارە و پەنابەر لە ترسی تیرۆر ڕوویان لە هەرێمی كوردستان كردووە و سەرباری قەیرانی دارایی و ئابووری، بارگرانییەكی زۆری بۆ حكوومەتی هەرێم دروست كردووە.
تاوتوێكردنی پەیوەندییەكانی نێوان هەرێمی كوردستان و وڵاتانی دەوروبەر و دوا پێشهاتەكانی بارودۆخی ڕۆژهەڵاتی ناوەڕاست، لایەنێكی دیكەی دیدارەكە بوو.
نێچیرڤان بارزانی لەگەڵ نوێنەری تایبەتی ئۆباما لە هاوپەیمانیی نێودەوڵەتی كۆبووەوە
ئێوارەی ڕۆژی سێشەممە 27/10/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەڕێز برێت مەكگۆرك نوێنەری نوێی تایبەتی بەرێز باراك ئۆباما سەرۆكی ویلایەتە یەكگرتووەكانی ئەمەریكا لە هاوپەیمانیی دژی تیرۆرستانی داعش و شاندێكی سەربازی و دیپلۆماسیی یاوەری كرد.
لە دیدارێكدا باس لە بارودۆخی بەرەكانی جەنگ لە دژی تیرۆرستانی داعش و سەركەوتنەكانی پێشمەرگەی كوردستان كرا و لەمبارەیەوە بەڕێز مەكگۆرك دووپاتی كردەوە كە ئەمەریكا پاڵپشتی پێشمەرگەیە و لەو پاڵپشتیەشی بەردەوام دەبێت. هەروەها ئەو ئۆپەراسیۆنە هاوبەشەی بەرز نرخاند كە هێزی دژە تیرۆری هەرێمی كوردستان و سەربازانی ئەمەریكا لە حەویجە و لەناو جەرگەی دەسەڵاتی تیرۆرستانی داعش بۆ ڕزگاركردنی 69 بەندكراوی بە سەركەوتوویی ئەنجامیان دا و دووپاتی كردەوە ئەمە ئەوە دەردەخات كە هێزی پێشمەرگە پاراستنی هەموو هاووڵاتیانی عێراق بە بێ جیاوازی، بە ئەركی سەرشانی خۆی دەزانێت.
لە بەشێكی دیكەی قسەكانیدا تیشكی خستە سەر پەیوەندییەكانی نێوان هەولێر و بەغدا و كێشە ناوخۆییەكانی هەرێمی كوردستان و هیوای خواست هەموو كێشەكان چ ئەوانەی لە نێوان هەولێر و بەغدا و چ ئەوانەی لە ناوخۆی هەرێمدا هەن، بە ڕێگەی گفتوگۆ و دیالۆگ چارەسەر بكرێن.
لای خۆیەوە بەڕێز سەرۆك وەزیرانی هەرێمی كوردستان وێڕای پیرۆزباییكردن لە بەڕێز ماكگۆرك بۆ وەرگرتنی پۆستی نوێنەری تایبەتی سەرۆكی ئەمەریكا لە هاوپەیمانیی دژی تیرۆرستانی داعش كە بڕیارە مانگی داهاتوو بە شێوەیەكی فەرمی دەست بە كارەكانی بكات، سوپاسی ئەو سەردانە و هاوكارییە بەردەوامەكانی ئەمەریكای بۆ پێشمەرگە كرد و سەرەخۆشیی خەڵك و حكوومەتی هەرێمی كوردستانیشی بۆ گیانلەدەستدانی ئەو سەربازە ئەمەریكییە دەربڕی كە لە ئۆپەراسیۆنە هاوبەشەكەی حەویجەدا گیانی لەدەست دا.
لە بارەی كێشەكانی نێوان هەولێر و بەغدا و كێشە ناوخۆییەكانی هەرێمیشەوە، بەڕێزیان شاندی ئەمەریكی دڵنیا كردەوە كە حكوومەتی هەرێم هەوڵی جددی دەدات هەموو گرفتەكانی لەگەڵ بەغدا و كێشە ناوخۆییەكان بە ڕێگەی دیالۆگ و گفتوگۆ چارەسەر بكات.
تاوتوێكردنی دوا پێشهاتەكانی ناوچەكە بەگشتی و بەتایبەتی عێراق و هەرێمی كوردستان و تۆكمەكردنی زیاتری پەیوەندییەكانی نێوان هەردوولا، لایەنێكی دیكەی دیدارەكە بوو.
سەرۆک بارزانی لەگەڵ دیلە ئازادکراوەکانی ئۆپەراسیۆنەکەی حەویجە کۆبۆوە
ئه‌مڕۆ سێشه‌ممه 27/10/2015 به‌ڕێز مسعود بارزانی سه‌رۆكی هه‌رێمی كوردستان له لەگەڵ دیلە ئازادکراوەکانی دەستی داعش کۆبۆوە كه لە ئۆپەراسیۆنەکەی رۆژی 22/10/2015 لە ناوچەی حەویجە ئازادکران.
له دیدارەكەدا، كه به‌ڕێز مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان ئاماده‌ی بوو، سه‌رۆك بارزانی له وته‌یه‌كدا وێرای زۆر به گه‌رمی به خێرهاتنیان و پیرۆزبایی ئازادی وگەڕانەوەی ژیانی لە دیلە ئازادبووەکان کرد و خۆشحاڵیی خۆی نیشان دا کە تیمی دژه تیرۆری ئه‌نجوومه‌نی ئاسایشی هه‌رێمی كوردستان بە هاوکاریی هێزێکی تایبەتی ئەمریکا توانییان لە قوڵایی هێزی تیرۆریستاندا ئەو ئۆپەراسیۆنە سەرکەوتووە ئەنجام بدەن و ئەو دیلانە لە مەرگی حەتمی ڕزگار بکەن کە بەشی هەرە زۆریان لە لایەن تیرۆریستانەوە سزای مەرگیان بەسەردا سەپێندرابوو.
سەرۆک بارزانی ڕایگەیاند کە زانیارییمان هەبوو ژمارەیەکی زۆر دیل لەو شوێنە هەن و تیرۆریستان بڕیاری کوشتنی ئێوەیان دابوو، ئەگەرچی بەداخەوە ئەو برا پێشمەرگەکانەمان کە لەدەست تیرۆریستاندان لەو شوێنە نەمابوون، بەڵام ئازادکردنی ژیانی ئێوە سەرکەوتنێکی زۆر گەورە بوو و مایەی خۆشحاڵییە. سەرۆک بارزانی هەروەها ڕایگەیاند: لوتکەی خۆشحاڵیی مرۆڤ لەوەدایە کەسێک لە ناخۆشی ڕزگار بکات و خۆشحاڵی بکات. ژیانی مرۆڤ گرانبەهایە و خۆشحاڵین کە ئەو هێزەی کوردستان توانی ژیانی ئێوە ڕزگار بکات.
سەرۆک بارزانی دەستخۆشیی لە تیمەکەی دژه تیرۆری ئه‌نجوومه‌نی ئاسایشی هه‌رێمی كوردستان و هێزە تایبەتییەکەی ئەمریکا کرد بۆ ئەنجامدانی ئەو ئۆپەراسیۆنە و ڕایگەیاند کە تاکە پاڵنەری ئەنجامدانی ئۆپەراسیۆنەکە کارێکی مرۆڤانە بوو و بڕیارەکەش ئەوە بوو کە هەر دیلێک لەوێ هەبێت ئازاد بکرێت.
سەرۆک بارزانی جارێکی دیکە سەرەخۆشیی لە خانەوادەی ئەو ئەفسەرە ئەمریکاییە کرد کە لە ئۆپەراسیۆنەکەدا لە پێناوی مرۆڤایەتی گیانی خۆی بەخت کرد.
سەرۆک بارزانی ڕاشیگەیاند کە ئازادکردنی ئێوە بەبێ ئەوەی هیچ زیانێکتان پێ بگات سەرکەوتنێکی زۆر گەورە و کەموێنەیە.
هەر لە دیدارەکەدا دیلە ئازادکراوەکان سوپاسی سەرۆک بارزانی و ئەنجوومەنی ئاسایشی هەرێمی کوردستانیان کرد کە ژیانی ئەوانیان ڕزگار کردووە و دوای ئازادکردنیشیان ئازادی و ئارامییان بۆ مسۆگەر کردوون و هیوایان خواست هەرچی زووتر تیرۆریستانی داعش لە ناوچەکانیان دەربکرێن و هاووڵاتیانی ئەو ناوچانە لەو ترس و ئازارە ڕزگاریان بێت.
لە وەڵامیشدا سەرۆک بارزانی دیلە ئازادکراوەکانی دڵنیا کردەوە کە مانەوەی ڕێکخراوی تیرۆریستیی داعش تەنیا پەیوەستی کاتە و تیرۆریستان هیچ ئایندەیەکیان نییە و لەناو دەچن و ئاشتی و سەقامگیری بۆ ناوچەکانتان دەگەڕێتەوە.
سه‌رۆكی هه‌رێمی كوردستان رێز له رۆڵی قاره‌مانانه‌ی تیمی دژه تیرۆری ئه‌نجوومه‌نی ئاسایش ده‌گرێت
ئه‌مڕۆ سێشه‌ممه 27/10/2015 به‌ڕێز مسعود بارزانی سه‌رۆكی هه‌رێمی كوردستان له سه‌لاحه‌دین به مه‌به‌ستی رێزگرتن و خه‌ڵاتكردنیان پێشوازی له تیمی دژه تیرۆری ئه‌نجوومه‌نی ئاسایشی هه‌رێمی كوردستانی به‌شدار له ئۆپه‌راسیۆنی رزگاركردنی شەست و نۆ دیلی ناو زیندانی داعش له حه‌ویجه كرد، كه كاتژمێر 2ی به‌ره‌به‌یانی رۆژی 22/10/2015 به هاوكاری هێزێكی تایبه‌تی ئه‌مریكا به سه‌ركه‌وتوویی ئه‌نجام درا و زیاتر لە ٢٠ چەکداری داعش کوژران و ٦ تیرۆریست بە دیل گیران و سەربازێکی هاوپەیمانان گیانی لە دەست دا و سێ پیشمەرگەی هێزی دژە تیرۆر بریندار بوون.
له دیدارەكەدا، كه به‌ڕێز مه‌سرور بارزانی راوێژكاری ئه‌نجوومه‌نی ئاسایشی هه‌رێمی كوردستان ئاماده‌ی بوو، سه‌رۆك بارزانی له وته‌یه‌كدا وێرای زۆر به گه‌رمی به خێرهاتنیان و پیرۆزبایی و ده‌ستخۆشی لێكردنیان و ئاماژه‌دان به رۆڵی قاره‌مانانه‌ی دژه تیرۆر رایگه‌یاند، ئه‌و شه‌وه‌ی ئۆپەراسیۆنەکەتان ئەنجام دا، من سات بە سات بەدواداچوونم دەکرد و دڵم لەلاتان بوو. بۆیه دوای تەواوبوونی ئۆپەراسیۆنەکە ویستم له نزیكه‌وه بتانبینم و دەستخۆشیتان لێ بکەم. سەرۆک بارزانی هەروەها ڕایگەیاند: ئێوه مایەی سەربەرزیی گەلەکەتانن و مێژوویه‌كتان بۆ خۆتان و گەلەکەتان تۆماركرد، كه به مه‌شق و راهێنانی خۆتان قه‌ناعه‌تێكتان له‌لای هاوپه‌یمانان دروست كرد بێن له‌گه‌ڵ ئێوه‌دا له‌ناو جه‌رگه‌ی دوژمن ئه‌م ئۆپه‌راسیۆنه ئەنجام بدەن.
سه‌رۆك بارزانی هه‌ر له وته‌كه‌یدا باسی له گه‌وره‌یی و ئامانجی ئۆپه‌راسیۆنه‌كه كرد و رایگه‌یاند، به‌پێی زانیاری و به‌دواداچوونه‌كان، ئه‌و ئامانجه‌ی ئێوه بۆی چووبوون ئامانجێكی زۆر گه‌وره بوو، به‌ڵام كاری مرۆیی و خێر له‌گه‌ڵ هه‌ر كه‌سێك بێت، زۆر گه‌وره‌یه، كه ئێوه بوونه هۆی رزگاركردنی شەست و نۆ كه‌س، كه لەلایەن تیرۆریستانەوە بڕیاری کوشتنیان درابوو.
سه‌رۆكی هه‌رێمی كوردستان له به‌شێكی دیكه‌ی وته‌كه‌یدا رایگه‌یاند، هه‌رچه‌نده ناوبانگی گه‌لی كورد و پێشمه‌رگه به‌رزه، به‌ڵام به‌م ئۆپه‌راسیۆنه، ئێوه ناوبانگی گه‌لی كوردتان زیاتر به‌رز كرده‌وه و ئاماژه‌ی بەو وتار و راپۆرتانه كرد، كه له ئاستی میدیای جیهانیدا باس له گه‌وره‌یی ئۆپه‌راسیۆنه‌كه ده‌كه‌ن، كه له ناوچه‌كه‌دا كه‌موێنه بوو.
سه‌رۆك بارزانی سه‌ره‌خۆشی له سوپای ئه‌مریكا و كه‌سوكاری ئه‌و سه‌ربازه ئه‌مریكییه كرد، كه له‌و ئۆپه‌راسیۆنه‌دا گیانی به‌خشی و هیوای به په‌له چاكبوونه‌وه‌شی بۆ بریندارانی تیمه‌كه‌ی دژه تیرۆری ئه‌نجوومه‌نی ئاسایشی هه‌رێمی كوردستان خواست.
لە کۆتاییدا سه‌رۆك بارزانی خه‌ڵاتی رێزلێنانی به تیمه به‌شداره‌كه‌ی دژه تیرۆر به‌خشی و هیوای سه‌ركه‌وتنی زیاتری بۆ خواستن.
سەرۆكی هەرێمی كوردستان پێشوازی لە وەزیری بەرگریی ئەڵمانیا دەكات
ڕۆژی سێشەممە 27ـی 10ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە خاتوو ئۆرسلا ڤۆن دێرلاین وەزیری بەرگریی ئەڵمانیا و شاندێكی یاوەری كرد.
لە دیدارەكەدا وەزیری بەرگریی ئەڵمانیا خۆشحاڵیی خۆی بۆ ڕەخساندنی دیدار لەگەڵ سەرۆك بارزانی نیشاندا و وێڕای ئاماژەدان بە هەماهەنگیی نێوان هێزەكانی ئەڵمانیا و پێشمەرگە ڕەزامەندیی خۆی لە ئاستی باڵای هەماهەنگییەكە و كاری هاوبەشی نێوانیان نیشاندا و جەختیشی لەوە كردەوە كە هاوكاری و هەماهەنگیی سوپای وڵاتەكەی لەگەڵ هێزی پێشمەرگەی كوردستان بەردەوام دەبێت و ئەوەیشی خستەڕوو كە كاركردن لەگەڵ هێزی پێشمەرگە متمانە و دۆستایەتیی هەردوولای بەهێزتر كردووە و ئێستا ئەڵمانیا و هەرێمی كوردستان كێشە و خەم و كاری هاوبەش بە یەكەوەیان دەبەستێتەوە و دەبێ لەسەر ئەو كار هاوبەشە و هەماهەنگییە مكوڕتر بین.
وەزیری بەرگریی ئەڵمانیا ئاماژەیشی بەو شەپۆلە مرۆییەی ئاوارەكان كرد كە ڕووی لە ئەڵمانیا و وڵاتانی ئەوروپایی كردووە و دەستخۆشی لە سەرۆك بارزانی و حكوومەتی هەرێم و گەلی كوردستان كرد كە سەرباری دۆخی خەراپی ئابووری سەدانهەزار ئاوارەیان حەواندووەتەوە. هێماشی بەوەدا كە پێویستە وڵاتانی ئەوروپایی یارمەتیی هەرێمی كوردستان بدەن و باری قورسی ئاوارەكان كە لەسەر شانی چەند لایەنێكە دابەش بكرێت.
لەبەرانبەردا سەرۆك بارزانی بە گەرمی بەخێرهاتنی شاندی میوانی كرد و سەردانی وەزیری بەرگریی ئەڵمانیای بۆ جاری سێیەم بە نیشانەی قووڵبوونی پەیوەندییەكانی گەلی كوردستان و ئەڵمانیا لە قەڵەمدا.سەرۆك بارزانی لە درێژەی قسەكانیدا باسی لە بارودۆخی مەیدانیی بەرەكانی ڕووبەڕووبوونەوەی تیرۆریستان كرد و ئاماژەیشی بە كێشەكان و بارودۆخی ئابووریی هەرێمی كوردستان كرد و جەختی لەوە كردەوە كە ڕێكخراوی تیرۆریستیی داعش هەڕەشەیەكە بۆسەر هەموو جیهان و لەسەر ئەرزی واقعیشدا باری قورسی شەڕی داعش كەوتووەتە سەر شانی پێشمەرگە و ئەولەویەتی ئێستای هەرێم شكستدانی تیرۆریستانی داعشە.
سەرۆك بارزانی لەبارەی گرفتی ئاوارەكان وێڕای دەربڕینی پێزانین بۆ گەل و حكوومەتی ئەڵمانیا كە بە دڵفراوانی باوەشیان بۆ پەنابەران كردووەتەوە، ڕایگەیاند كە پێویستە هۆكارەكانی دیاردەی ئاوارەبوون لە ڕۆژهەڵاتی ناوەڕاست چارەسەر بكرێت و تەنیا مامەڵە لەگەڵ دەرئەنجامەكانی كۆچ نەكرێت و وڵاتانی یارمەتیدەر پێویستە هاوكاریی ئاوارەكانی نیشتەجێی كەمپەكان بدەن بۆ ئەوەی گوزەرانی ژیانیان باشتر ببێت.
هەر لەم كۆبوونەویەدا پێداویستییەكانی هێزی پێشمەرگەی كوردستان و ئاستی هەماهەنگیی نێوان حكوومەتی فیدڕاڵی عێراق و هەرێمی كوردستان خرایە بەر باس و گفتوگۆ و بارودۆخی سیاسیی و ئەمنی ناوچەكە بە گشتی و سووریا بە تایبەتی، ئەو تەوەرانە بوون كە لە كۆوونەوەی نێوان سەرۆك بارزانی و وەزیری بەرگریی ئەڵمانیا باس كران.
جێگەی ئاماژەپێكردنە لەدوای كۆبوونەوەكە سەرۆك بارزانی و وەزیری دەرەوەی ئەڵمانیا لە پڕێسكۆنفرانسێكدا ناوەڕۆكی كۆبوونەوەكەیان بۆ دەزگاكانی ڕاگەیاندن خستەڕوو.
پەیامی سەرەخۆشیی سەرۆک بارزانی بۆ خانەوادەی هاوسەری خوالێخۆشبوو سەعید ئاڵچی
بەناوی خودای مەزن و دلۆڤان
بەڕێزان خانەوادەی سایمە ئاڵچی، هاوسەری خوالێخۆشبوو سەعید ئاڵچی
بەداخەوە هەواڵی كۆچی دوایی خاتوو سایمە ئاڵچی هاوسەری خوالێخۆشبوو سەعید ئاڵچی سکرتێری پێشووی پارتی دیموکراتی کوردستان – تورکیا مان پێ گەییشت.
لەم بۆنە خەمناکەدا پرسە و سەرەخۆشیی خۆم بە خانەوادە تێکۆشەرەکەتان و سەرجەم خزم و كەسوكار و هاوڕێیانی کۆچکردوو ڕادەگەیەنم و بەشداری خەمتانم.
لە خودای گەورە داواكارم خاتوو سایمە بباتە بەر دلۆڤانیی خۆی و دڵنەوایی و ئارامییش بە گشت لایەك ببەخشێت.
انا لله و انا الیه راجعون
مسعود بارزانی
سەرۆكی هەرێمی كوردستان
27ـی10ـی2015
دوایین هەواڵەکان
- نوێنەری حکومەتی هەرێم لە ئێران: سەردانەکەی پزیشکیان ئاماژەیە بۆ گرنگیدانی ئێران بە هەرێمی کوردستان
- ههرێمى كوردستان و ئێران جهخت له برهودان به پهيوهندييهكانيان دهكهنهوه
- سهرۆک نێچیرڤان بارزانی: سەردانی سەرۆک کۆماری ئێران مێژوویی بوو
- نازم دەباغ له وتووێژ له‌گه‌ڵ ئاژانسی ئیرنا: مەسعوود پزشکیان سەردانی هەولێر دەکات
- نازم دەباغ: کاتی سەردانی پزیشکیان بۆ عێراق دیار نییە
- «سەلام رشدی» له‌گه‌ڵ شاندی یهکێتی هاورده و ناردنکارانی لقی ههولێر کۆبۆوه
- سه‌رۆك نێچيرڤان بارزانى: ههميشه پشتيوانى و بهرگرى له مافهكانى ئێزدييان دهكهين
- سهرۆک نێچیرڤان بارزانی له‌گه‌ڵ باڵیۆزی یهکێتیی ئهورووپا کۆبووهوه
- سه‌رۆك نێچيرڤان بارزانى له‌گه‌ڵ باڵيۆزى نهمسا كۆبووهوه
- سه‌رۆك نێچيرڤان بارزانى سوپاسى جهنهرال ڤاول دهكات