ئێن.ئاڕ.تى - بڕیارە سبەینێ وەفدێکى یەکێتى نیشتیمانى کوردستان بە سەرۆکایەتى بەرهەم ساڵح سەردانى تاران بکات و لەگەڵ بەرپرسانى باڵاى ئەو وڵاتەدا کۆببێتەوە.
"نازم دەباغ" نوێنەرى حکومەتى هەرێم لە تاران بە ئێن.ئاڕ.تى ڕاگەیاند، وەفدەکەى یەکێتى بۆ تاوتوێکردنى دۆخى ناوخۆى هەرێم و عێراق و ناوچەکە سەردانى کۆمارى ئیسلامى ئێران دەکات، بەبێ ئەوەى ڕوونکردنەوە بدات لە سەر ناوەڕۆکى سەردانەکە و ئەو بەرپرسانەى ئێران کە لەگەڵیاندا کۆدەبنەوە.
دەربارەى ئەوەى سەردانى وەفدەکەى یەکێتى بۆ تاران تا چەند پەیوەندى بە ڕاکێشانى بۆرى نەوت و غازەوە هەیە بۆ ئێران، نازم دەباغ وتى، هێشتا دیار نییە وەفدەکە باس لەو بابەتەکە دەکات یاخود نا.
وتیشى، وەفدەکەى یەکێتی پێکهاتووە لە بەرهەم ساڵح جێگری دووەمی سکرتێری گشتی و ئەرسەلان بایز ئەندامى مەکتەبى سیاسى یەکێتى، شاڵاو کۆسرەت ڕەسوڵ و عەدنان حەمەى مینا ئەندامانى سەرکردایەتى یەکێتى، بڕیارە ڕۆژى چوارشەممەى داهاتووش وەفدەکە بگەڕێنەوە هەرێم.
سەردانى وەفدەکەى یەکێتى بۆ تاران لە کاتێکدایە، ئێستا لێکتێگەیشتنیک لە نێوان تاران و هەولێردا کراوە بۆ گواستنەوەى نەوت و غازى هەرێم بۆ تاران لە ڕێگەى بۆرییەوە، بەڵام تا ئێستا نەچوەتە بوارى جێبەجێکردنەوە.
روونکردنەوەی نوێنەری حکوومەتی هه‌رێمی کوردستان سه‌باره‌ت به داخستنی نوێنەرایەتی
"نازم دەباغ" نوێنەری حکوومەتی هەرێمی كوردستان لە تاران، سه‌باره‌ت به داخستنی نوێنەرایەتی حکوومەتی هه‌رێمی کوردستان له‌م وڵاته روونکردنەوەیه‌کدا که ده‌قه‌که‌ی له خواره‌وه‌دا هاتووه:
به هۆی کێشه‌و قه‌یرانه داراییه‌کانی هه‌رێمی کوردستان، هه‌موو نوێنه‌رایه‌تییه‌کان به تارانیشه‌وه ڕووبه‌ڕووی قه‌یرانی دارایی بوونه‌ته‌وه، به تایبه‌تی له کاتێکدا که له هه‌رێمی کوردستان باسی بودجه و موچه‌ی مانگی ٦ ده‌کرێت بۆ دابه‌شکردن، به‌ڵام نوێنه‌رایه‌تییه‌کان ١٠ مانگه بودجه‌یان بۆ نه‌هاتووه، واتا له مانگی ٨ی ٢٠١٥ه‌وه، هه‌رچه‌ند نووسینگه‌ی تاران بودجه‌ی مانگی ٩ی وه‌رگرتووه.
ئه‌مه‌ش بووه‌ته هۆی ئه‌وه که نه‌توانین پاره‌ی نوسینگه و کرێ خانووی نوسینگه و ئاو و کاره‌با و خه‌رجی رۆژانه دابین بکه‌ین، نه‌شمانتوانیوه گرێبه‌ستی خانووه‌که تازه بکه‌ینه‌وه و خاوه‌ن موڵکه‌که داوای کرێی ئه‌م چه‌ند مانگه و نوێکردنه‌وه‌ی ده‌کات، ئێمه‌ش نوسراومان ناردووه بۆ سه‌رۆکایه‌تی ئه‌نجوومه‌نی وه‌زیران و فه‌رمانگه‌ی په‌یوه‌ندییه‌کانی ده‌ره‌وه، له وه‌ڵامدا داوایان لێکردووین دان به خۆماندا بنێین و له هه‌وڵدا ده‌بن بۆ چاره‌سه‌رکردنی کێشه‌کان. به‌ڵام به دڵنیاییه‌وه ئه‌گه‌ر ئه‌م کێشهیه به زووترین کات چاره‌سه‌ر نه‌کرێت، ده‌بێت خانووه‌که چۆڵ بکه‌ین و شوێنێکی دیکه‌ی گونجاو دابین بکه‌ین بۆ راپه‌ڕاندنی کاره‌کانمان.
ده‌بێت بڵێم ئه‌م بابه‌ته ته‌نها په‌یوه‌ندی به کێشه‌ی داراییه‌وه هه‌یه و هیچ بابه‌تێکی دیکه له‌وانه بابه‌تی سیاسی له ئارادا نییه، نوێنه‌رایه‌تی حکومهتی هه‌رێم له تارانیش تا ئێستاش به‌رده‌وامه له تێپه‌ڕاندنی کاره‌کانیدا و کاری په‌ک نه‌خستووه‌و له هه‌وڵی پاراستنی پێگه‌ی نوێنه‌رایه‌تیدایه.
"نازم دەباغ" نوێنەری حکوومەتی هەرێمی كوردستان لە تاران
"نازم دەباغ" بەشداریی له جه‌ژنی نه‌ته‌وه‌یی وڵاتی میسردا کرد
"نازم دەباغ" نوێنەری حکوومەتی ھەرێمی کوردستان لە تاران، لە سه‌ر بانگهێشتی "خالید ئیبراهیم عه‌مارە" سەردانی باڵیۆزخانەی میسری کرد و بەشداریی له جه‌ژنی نه‌ته‌وه‌یی ئه‌م وڵاته‌دا کرد.
"نازم عومه‌ر دەباغ" نوێنەری حکوومەتی ھەرێمی کوردستان لە تاران، هاورێی لەگەڵ "سۆران عه‌لی ئه‌مین" بەرێوبەریی پەیوەندییەکان و ڕاگەیاندنی نوێنەرایەتی حکوومەتی ھەرێمی کوردستان لە ئێران، لە سه‌ر بانگهێشتی "خالید ئیبراهیم عه‌مارە" پارێزەریی بەرژەوەندییەکانی میسر لە تاران بە بۆنەی رۆژیی نه‌ته‌وه‌یی ئه‌م وڵاتە، کاتژمێر ٧ی ئێوارێی رۆژی شەممە رێکەوتی ٢٣/٧/٢٠١٦سەردانی باڵیۆزخانەی میسریان کرد لە تاران بۆ بەشداریکردن لەو بۆنەیەدا.
"خالید ئیبراهیم عه‌مارە" خۆشحاڵی خۆی نیشاندا بە ئامادەبوونی "نازم دەباغ" نوێنەری حکوومەتی ھەرێمی کوردستان لە تاران له‌و بۆنه‌یه‌دا و ئومێدی خواست کە سەردانەکان دووبارە بێتەوە.
هەر لە میانه‌ی ئەو سەردانەدا، نوێنەری حکوومەتی ھەرێمی کوردستان، دیدار و گفتووگۆی لەگەل هەندێک لە باڵیۆزی وڵاتانی بیانی له تاران کرد کە لەو بۆنەیەدا ئامادەبوون.
"نازم دەباغ" له‌گه‌ڵ "بێن فیندەر" جێگری شاندی نوێنەرایەتی بەریتانیا لە تاران کۆبۆوە
"نازم دەباغ" نوێنەری حکوومەتی ھەرێمی کوردستان لە تاران له‌گه‌ڵ"بێن فیندەر" جێگری شاندی نوێنەرایەتی بەریتانیا له وڵاتی ئێران و شاندی هاوڕێد دیداریی کرد.
"بێن فیندەر" جێگری شاندی نوێنەرایەتی بەریتانیا لە تاران به هاورێیه‌تی لەگەڵ خاتوو "شارلۆت والەر" بەرپرسی بەشی سیاسی باڵیۆزخانەی به‌ریتانیا له وڵاتی ئێران، کاتژمێر ٩ی سەرلەبەیانی ئەمرۆ یەکشەممە رێکەوتی ٢٤/٧/٢٠١٦سەردانی نوێنەرایەتی حکوومەتی ھەرێمی کوردستان لە تارانی کرد و لە لایەن "نازم عومه‌ر دەباغ" نوێنەری حکوومەتی ھەرێمی کوردستان لە تاران و "لوقمان لەتیف محه‌مه‌د" و "سۆران عه‌لی ئه‌مین" ئەندامانی نوێنەرایەتی حکوومەتی ھەرێمی کوردستان لە ئێران به گه‌رمی پێشوازیی لێکرا.
لە دانیشتنەکەدا "بێن فیندەر"ی سوپاسی ئەو پێشوازیە گەرمەی کرد و پرسیاریی لە باروودۆخی هەرێمی کوردستان کرد بە تایبەت لە جەنگی دژ بە داعش.
"نازم دەباغ" ڕاوبۆچوونی حکومەتی هەرێمی کوردستانی لەمەر ڕووداوەکان بۆ میوانەکان ڕوونکردەوە و بە تایبەت چاوەڕوانی گەلی کوردی لە وڵاتانی زلهێز و نەتەوە یەکگرتووەکان خستەڕوو بەتایبەت لە بواری هاوکاریی کردنی پێشمەرگە قارەمانەکان کە لە بری جیهان بەرەنگاری تیرۆریستان بوونه‌تەوە سەرەرای ئەو بوارع دژوارەی دارایی و بوونی ژمارەیەکی زۆر لە ئاوارەکانی ناوەڕاستی عێراق کە بە هۆی جەنگەوە پەنایان بۆ هەرێمی کوردستان هێناوە.
نوێنەری حکوومەتی ھەرێمی کوردستان لە تاران هەروەها داوای کرد کە پێویستە بەریتانیا وەکوو وڵاتێکی زلهێزی دنیا رۆڵێکی کاریگەرتری هەبێت لە پشتیوانیکردنی کێشەی ڕەوای گەلی کورد لە مەیدانە نێودەڵەتیەکاندا.
له درێژه‌ی ئه‌م کۆبوونه‌وه‌دا جێگری شاندی نوێنەرایەتی بەریتانیا لە تاران رایگه‌یاند که بەریتانیا هەریمی کوردستانی بۆ گرنگە هەر لەبەر ئەوەش بوو زوو قونسولگەری لە هەولێر کردەوە و ووتەکانی نوێنەری حکومەتی ھەرێمی کوردستان بەرز نرخاند و بانگهێشتی نوێنەری حکومەتی هەرێمی کرد بۆ نیوەرۆ خوانێک له باڵیۆزخانەی بەریتانیا تاکوو زیاتر لەسەر باروودۆخەکە گفتووگۆ بکەن و سوپاسی میوانداریەکەی بەرێزیانی کرد.
"نازم دەباغ" له‌گه‌ڵ "کارا جۆنسۆن مالینا" جێگری بەرپرسی یۆنامی لە تاران کۆبۆوە
نازم دەباغ نوێنەری حکوومەتی ھەرێمی کوردستان لە تاران، له‌گه‌ڵ خاتوو "کارا جۆنسۆن مالینا" جێگری بەرپرسی یۆنامی لە تاران دیداریی کرد.
خاتوو "کارا جۆنسۆن مالینا" جێگری بەرپرسی "یۆنامی" واته نوێنه‌رایه‌تی نه‌ته‌وه یه‌کگرتووه‌کان لە تاران، کاتژمێر ١٠ی سەرلەبەیانی ئەمرۆ یەکشەمە ١٧/٧/٢٠١٦ سەردانی نووسینگەی نوێنەرایەتی حکوومەتی ھەرێمی کوردستان لە تارانی کرد و لە لایەن "نازم دەباغ" نوێنەری حکوومەتی ھەرێمی کوردستان لە تاران و هەر یەک لە "سۆران عه‌لی ئه‌مین" و "سەلام عارف روشدی" ئەندامانی نوێنەرایەتی حکوومەتی ھەرێمی کوردستان لە ئێران پێشوازی گەرمیان لێکرا.
لە دانیشتنەکەدا بە تایبەتی باس لە باروودۆخی هەرێمی کوردستان و هه‌روه‌ها بە گشتی باس لە بارودۆخی عێراق و ئێران کرا و خاتوو "کارا جۆنسۆن مالینا" پرسیاری هەبوو لەسەر دوایین پێشهاتەکانی هەرێمی کوردستان و بارودۆخی ناوچەکە.
له به‌شێکی دیکه‌ی ئه‌م کۆبوونه‌وه‌یه‌دا "نازم دەباغ" نوێنەری حکوومەتی ھەرێمی کوردستان لە تاران، راوبۆچوونی حکوومەتی هەرێمی کوردستانی بۆ جێگری بەرپرسی یۆنامی لە وڵاتی ئێران ڕوونکردەوە و چاوەڕوانی گەلی کوردیی لە نەتەوە یەکگرتووەکان خستەڕوو، بەتایبەت لە پشتیوانیکردنی کورد بۆ گەیشتن بە مافە ڕەواکانی و دۆزینەوەی چارەسەرییه‌کی ڕیشەیی دەستووری بۆ کێشەی کورد و هەروەها پشتیوانی لە هێزیی پێشمەرگەی کوردستان کە قارەمانانە بەرەنگاری تیرۆریستان بوونەتەوە وهاوکاریی کردنی ئاوارەکان.
لە کۆتاییدا خاتوو "کارا جۆنسۆن مالینا" بەڵێنیدا کە ئەو داواکارییانە بگەیەنێتە بەرپرسانی "یۆنامی" واته نوێنه‌رایه‌تی نه‌ته‌وه یه‌کگرتووه‌کان لە وڵاتی ئێران.
نازم دەباغ لەگەڵ یەحیا ئال ئێسحاق سەرۆکی ژووریی بازرگانی ئێران کۆبۆوە
نازم دەباغ نوێنەریی حکوومەتی هەرێمی کوردستان لە تاران، لەگەڵ "یەحیا ئال ئێسحاق" سەرۆکی ژووریی بازرگانی ئێران و شاندێکی هاوڕێی دیداریی کرد.
شاندێکی ژووریی بازرگانی هاوبەشی ئێران و عێراق بە سەرۆکایەتی "یەحیا ئال ئێسحاق" سەرۆکی ژووریی بازرگانی و وەزیری پێشووی بازرگامی کۆماری ئیسلامی ئێران و شاندیی هاوڕێی ڕۆژیی دووشەمە 4/7/2016 سەردانی نووسینگەی نوێنەرایەتی حکوومەتی هەرێمی کوردستان لە وڵاتی ئێرانیان کرد و لە لایەن "نازم عومەر دەباغ" نوێنەریی حکوومەتی هەرێمی کوردستان لە شاری تاران پێشوازییان لێکرا.
لە سەرەتای ئەم کۆبوونەوەیەدا "یەحیا ئال ئێسحاق" خۆشحاڵی خۆی دەربڕیی وەکوو شاندی هەڵبژێردراویی ژووریی بازرگانی هاوبەشی ئێران و عێراق و ئامادەیی خۆی نیشاندا بۆ ئەوەی کە بتوانێت زیاتر درێژە بە پەیوەندییەکانی نێوان کۆماری ئیسلامی ئێران و هەرێمی کوردستان بدات بە تایبەتی لە بواریی ئابووری و سەرمایەگوزاریدا.
لە درێژەدا سەرۆکی ژووریی بازرگانی ئێران دڵنیاییدا دەبێت بە هەموو لایەکمان بەرز بڕوانینە ئەم پەیوەندییەی حکوومەتی هەرێمی کوردستان و ئێران و نابێت ئەم رووداوە نەخوازراوانە کار بکاتە سەر پەیوەندییەکانیان.
"یەحیا ئال ئێسحاق" هیوای خواست کە دەبێت بە هەموو لایەک بە رێگای گفتووگۆ و ئاشتی چارەسەریی ئەو کێشە نەخوازراوانە بکەین بۆ ئەوەی زەمینەیەکی باش و پڕ لە ئاسایش بۆ بازرگانی و بازرگانان و هاوڵاتیانی خۆمان بەدیبهێنین.
لە بەشێکی دیکەی ئەم دانیشتنەدا "نازم دەباغ" نوێنەریی حکوومەتی هەرێمی کوردستان لە تاران، دوای پیرۆزبایی سەرکەوتن بۆ سەرۆکی ژووریی بازرگانی ئێران، دڵنیاییدا کە هەمیشە حکوومەتی هەرێمی کوردستان لەگەڵ پاڵپشتی و هاوکاریی بووە بۆ گەشەپێدانی بواریی ئابووری و بازرگانی و سەرمایەگوزاریی لەو بوارەدا بە دابینکردنی ئارامی و ئاسایش لە ناوچەکەدا بۆ بازاڕێکی ئارامی بازرگانان و هاووڵاتیان.
نوێنەریی حکوومەتی هەرێمی کوردستان لە وڵاتی ئێران، کار و ئەرکەکانی لە پێناو ئەم پڕۆسەیەی بە شاندیی ژووریی بازرگانی هاوبەشی ئێران و عێراق راگەیاند.
"نازم دەباغ" نوێنەری حکوومەتی ھەرێمی کوردستان لە تاران، له سه‌ردانێکدابۆ باڵیۆزخانەی عراق له ئێران، هاوخەمی و هاوسۆزیی خۆی بە بۆنه‌ی تەقینەوە خوێناوییەکەی کراده لە بەغدا دەربڕیی.
"نازم عومەر دەباغ" نوێنەری حکوومەتی ھەرێمی کوردستان لە تاران و به هاورێیه‌تی لەگەڵ "شێرزاد خورشید" و "سۆران عه‌لی ئه‌مین" و "سەلام عارف روشدی" ئەندامانی نوێنەرایەتی حکوومەتی ھەرێمی کوردستان لە ئێران، رۆژی سێشەمە رێکەوتی٥-٧-٢٠١٦ بە بۆنه‌ی تەقینەوە خوێناوییەکەی کراده لە بەغدا بۆ دەربڕینی هاوخەمی و هاوسۆزیی بۆ ئەو کارەساتە دڵته‌زێنه، سەردانی باڵیۆزخانەی عراق لە شاری تارانی پێته‌ختی ئێرانیان کرد و له لایه‌ن "راجح سابر عه‌بود المووسه‌وی"باڵیۆزی عێراق لە وڵاتی ئێران پێشوازییان لێکرا.
"راجح سابر عه‌بود المووسه‌وی"پێزانینی خۆی بۆ سه‌ردانی "نازم دەباغ" نوێنەری حکوومەتی ھەرێمی کوردستان لە تاران و شاندی هاوڕێی بۆ باڵیۆزی عێراق لە شاری تاران ده‌ربڕیی.
دواڕۆژ: دەربارەی ئاڵۆزیەكانی ماوەی رابردووی ناوچه سنوورییه‌کانی نێوان ئێران و هه‌رێمی کوردستان "نازم عومه‌ر ده‌باغ" نوێنه‌ری حکوومه‌تی هه‌رێمی کوردستان له تاران دەڵێت: "له‌ڕاستیدا ئه‌م کێشهیه، کێشه‌ی ئه‌مڕۆ نییه و چه‌ند ساڵ جارێک رووده‌دات، به‌ڵام رووداوی ئه‌م جاره به پێی ئاڵوگۆڕه‌کان و بارودۆخی ئێستای ناوچه‌که و خۆرهه‌ڵاتی ناوه‌ڕاست جیاوازی هه‌یه له‌گه‌ڵ ئه‌وانه‌ی پێشوو".
"نازم دەباغ" نوێنه‌ری حکوومه‌تی هه‌رێمی کوردستان له تاران لە دیدارێكدا كە لە لایەن نووسینگەی حکومهتی هه‌رێمی کوردستان لە تاران بۆ دواڕۆژ نێردراوە، دەڵێت: "کۆماری ئیسلامی ئێران چه‌ندین مانگ پێشتر په‌یامی بۆ ئێمه ناردووه که زانیارییان هه‌یه لایه‌نه سیاسییه‌کانی کوردستان هه‌وڵی چالاکی سه‌ربازی ده‌ده‌ن و هێزه‌کانیان بۆ چالاکی سه‌ربازی له کۆماری ئیسلامی ئێران کۆده‌که‌نه‌وه، کۆماری ئیسلامی ئێران ئاگادارییان کردینه‌وه به پێی راگه‌یاندنه‌کانی "رووداو" و "کوردستان ٢٤" له گواستنه‌وه‌ی ئه‌م جۆره ده‌نگوباس و چالاکییانه‌دا که په‌یامێکی تێدابووه بۆ ئێران، بۆیه کۆماری ئیسلامی ئێران، جارێکی دیکه په‌یامی نارده‌وه که هه‌ر چالاکییه‌کی سه‌ربازی هێزه کوردییه‌کان له ناو ئێران ئه‌نجام بدرێت ئێمه به‌رپه‌رچدانه‌وه‌مان ده‌بێت و شوێنه‌کانیان له هه‌ر شوێنێکی هه‌رێمی کوردستان بێت بوردومان ده‌که‌ین".
نوێنه‌ری حکوومه‌تی هه‌رێمی کوردستان له تاران دەشڵێت: "ئەوەی لێره‌دا پێویسته باسی بکه‌ین ئەوەیە كە رێککه‌وتنی نێوان حکوومه‌تی هه‌رێمی کوردستان و کۆماری ئیسلامی ئێران و هه‌روه‌ها حکوومه‌تی هه‌رێمی کوردستان و هێز و لایه‌نه ئێرانییه‌کانی ناو هه‌رێمی کوردستان ده‌گه‌ڕێته‌وه بۆ به‌ر له ساڵی ١٩٨٦ که ئه‌و کاته وه‌کوو لایه‌نه سیاسییه‌کان و به تایبه‌ت یه‌کێتیی نیشتمانیی کوردستان له‌گه‌ڵ لایه‌نه سیاسییه‌کانی ئێرانی چ کورد و چ فارس باسی لێوه کراوه و رێککه‌وتین نه ئێران له ناو خاکی هه‌رێمی کوردستان و له ناوچه‌ی ژێرده‌سه‌ڵاتی یه‌کێتیی نیشتمانیی په‌لاماری هێزه ئێرانییه‌کان بدات و نه هێزه ئێرانییه‌کان له سنووره‌کانی ئێمه په‌لاماری ئێران بده‌ن، ئه‌و رێککه‌وتنه له‌و سه‌رده‌مه‌دا جێبه‌جێ‌کرا و به‌رده‌وام بوو تا پێکهاتنی حکوومه‌تی هه‌رێمی کوردستان و رێککه‌وتنه‌که گواسترایه‌وه بۆ ناو سیستمی حکومهتی هه‌رێمی کوردستان، تا ئێستاش حکوومه‌ت و حزبه‌کانیش سوورن و دڵنیاییان داوه که پێویسته ئه‌م رێککه‌وتنه رێزی لێبگیردرێت و مافه سیاسی، کۆمه‌ڵایه‌تی و فه‌رهه‌‌نگییه‌کانی لایه‌نه سیاسییه‌کان له هه‌رێمی کوردستان بپارێزرێت. پێویست ده‌کات باسی ئه‌وه‌ش بکه‌م که کڕۆکی ئه‌م رێککه‌وتنه ده‌گه‌ڕێته‌وه بۆ بیروبۆچوونه‌کانی جه‌نابی مام جه‌لال له‌و سه‌رده‌مه‌دا".
دەیشڵێت: "به پێی ئه‌زموونی رابردوو، هه‌میشه له‌م کاتانه‌دا حکوومه‌تی هه‌رێم توانیوییه‌تی کێشه‌کان چاره‌سه‌ر بکات و لایه‌نه سیاسییه‌کانی کوردی ئێرانی، پابه‌ندی خۆیان بۆ پاراستنی به‌رژه‌وه‌ندییه‌کانی هه‌رێمی کوردستان و رێزگرتن له بنه‌ماکان ئه‌نجامداوه و وه‌ڵامی ئه‌رێنییان بووه بۆ چاره‌سه‌رکردن. به‌ڵام ئه‌مجاره هه‌ست ده‌که‌ین بیروڕای جیاجیا هه‌یه چ له نێو لایه‌نه‌که خۆی و چ له نێوان لایه‌نه جیاوازه‌کان، به تایبه‌تی له که‌شی ئارامدا ئه‌وانه‌ی دوورن له مه‌یدان، به شێوه‌یه‌کی دیکه بیر ده‌که‌نه‌وه‌و پێیانوایه دژایه‌تی جووڵانه‌وه‌که‌یان ده‌کرێت، نازانن ئێمه وه‌كوو حکومهتی هه‌رێمی کوردستان به‌رژه‌وه‌ندییه‌کانی میلله‌تی کورد له چوارچێوه‌ی پرۆسه‌‌یه‌کی گشتیدا له‌به‌رچاو ده‌گرین و نامانه‌وێت به کاری که‌م شته گه‌وره‌کان تووشی شکست بکه‌ین.
"نازم عومەر دەباغ" دەڵێت: "هه‌ڵه‌یه‌کی گه‌وره‌یه که هه‌موو سه‌رکرده‌کان ده‌یکه‌ن، که به‌داخه‌وه شیوازی ئیشکردنمان له ناو هێزه سیاسییه ئه‌ساسییه‌کان بێ متمانه‌یی پێوه دیاره ته‌نانه‌ت له‌ناو که‌سایه‌تییه‌کانی یه‌ک حزب و لایه‌نیشدا. له ناو لایه‌نێکی سیاسیدا که‌سێک به‌رپرسه ناوێرێت کورسییه‌که‌ی خۆی به‌جێبێڵێت چونکه پێیوایه له‌مه‌ودوا که‌س حه‌سێبی بۆ ناکات و ته‌نانه‌ت زه‌ربه‌شی لێده‌ده‌ن. بۆیه پێویسته ئه‌م متمانه له‌ناو یه‌کێتی و پارتی و گۆڕان دروست بێت که مه‌ترسییان بۆ داهاتووی یه‌کتریی نه‌بێت. وه‌کو وڵاتانی رۆژئاوایی، بارودۆخه‌که ده‌گۆڕدرێت و ده‌بێت به‌رژه‌وه‌ندییه گشتییه‌کان له سه‌رووی هه‌ر به‌رژه‌وه‌ندییه‌کی دیکه‌وه بێت. کاتێک له رۆژئاوا لایه‌نه‌كان حوکم ده‌ستاوده‌ست ده‌که‌ن رێز له یه‌کتر و به‌رنامه‌و پلانی یه‌کتر ده‌گرن".
لە كۆتایی دیدارەكەیشیدا نوێنه‌ری حکوومه‌تی هه‌رێمی کوردستان له تاران دەڵێت: "هیوادارم سه‌رکرده‌کانمان ئه‌وه‌نده بیرتیژتر بن که ئه‌وه‌ی ئێمه هه‌ستی پێده‌که‌ین ئه‌وان به کرده‌وه هه‌نگاویان بۆ نابێت. له رابردوودا له ١٩٨٤ له "سورداش" جه‌نابی مام جه‌لال بانگه‌وازیی ئاشتبوونه‌وه‌ی گشتیی راگه‌یاند، ئه‌مه یه‌ک لایه‌نه بوو له کاتێکدا جه‌نابی کاک مه‌سعود و خوالێخۆشبوو "ره‌سوڵ مامه‌ند" و سه‌رکرده‌کانی‌تر، به ده‌نگ بانگهێشتنه‌که هاتن و به‌رنامه‌ی ئاشته‌وایی گشتیی به‌رهه‌مه‌که‌ی دروستکردنی به‌ره‌ی کوردستانیی و راپه‌ڕین و حکومه‌ت بوو، واتا هه‌موو داخوازییه‌کان وه‌کوو خۆی جێبه‌جێ ناکرێت، پێویستی به لێبورده‌یی هه‌یه له داخوازییه‌کان و له ده‌سه‌ڵاته‌کان".
نازم دەباغ بۆ رووداو: وەڵامی هەرێمی كوردستان بۆ ئێران نەرم و دۆستانەیە
رووداو- هەولێر /لە لایەن سەرباز سیامەند 2/7/2016: "نازم دەباغ" نوێنەری حکوومەتی هەرێمی كوردستان لە ئێران رایدەگەیێنێ: "هەڕەشەکانی سەردار سەلامی پەیامی فەرمی ئێرانە، بەڵام بەرپرسانی ئێران بەمنیانگوت، مەبەستمان هەرێمی کوردستان نییە، بەڵکوو مەبەستان ئەو لایەنانەیە هێرشەکان ئەنجام دەدەن."
"نازم دەباغ" نوێنەری حکوومەتی هەرێمی كوردستان لە تاران بە (تۆڕی میدیایی رووداوی) راگەیاند: "ناکرێت بڵێین هەڕەشەکانی سەردار سەلامی هی ئێران نییە، چونكە سەردار سەلامی جێگری فەرماندەی سوپای پاسدارانە. بەیانەكەی حكوومەتی هەرێمی كوردستان لە وەڵامی سەردار "حوسێن سەلامی"یە. زمانی بەیاننامەكە دۆستانەیە و هەرێمی كوردستان جەخت لەسەر بەردەوامی پەیوەندیی دۆستانە لەگەڵ ئێران دەكاتەوە."
"نازم دەباغ" زۆرتر گوتی: "خۆم سەردانی بەرپرسانی ئێرانم کردووە و سەبارەت بە هەڕەشەکانی سەردار سەلامی لەگەڵیان کۆبوومەتەوە. ئەوان گوتیان مەبەستمان هەرێمی کوردستان نییە، بەڵکوو مەبەستمان ئەوانەیە کە هێرشەکان ئەنجام دەدەن."
ناوبراو گوتیشی: "بەیانەكەی حكوومەتی هەرێمی کوردستان رەنگدانەوەی ئەو قسانەیە كە سەردار سەلامی كردوونییەتی. بەیانەكەی حكوومەتی هەرێم بەراورد بە قسەكانی ئەو، نەك هەر نەرمە، بەڵكو زۆر نەرمترە. هەرێمی کوردستان لەم بەیاننامەیەدا داوایکردووە بەردەوامی بە پەیوەندییە دۆستانەکانی نێوان هەرێمی كوردستان و کۆماری ئیسلامیی ئێران بدرێت."
نازم دەباغ: ئێمە داوای ڕەچاوکردنی ڕەوشی هەرێمین نەک داوای دەستبەرداربوون لە خەبات و تێکۆشان
ده‌نگی کوردی ئه‌مه‌ریکا: هه‌رێمه کوردیـیه‌کان / گفتوگۆکان: 3ی مانگی حه‌وت 2016 / Balen Salih: جێگری سەرکردەی سوپای پاسدارانی شۆڕشی ئیسلامی ئێران دەڵێت: ماوەیەکە چەند لایەنێکی چەکدار لە هەوڵێ تێکدانی باری ئاسایشی ئێراندان.
"حوسەین سەلامی" لەو ڕاگەیاندنەیدا داوا لە کاربەدەستانی کورد دەکات لە هەرێمی کوردستان کە پابەندی ڕێککەوتنەکانیان بن و ئاگاهیش دەدات کە ئێران بۆردومانی هەر شوێنێک دەکات گەر ببێتە سەرچاوەیەک بۆ مەترسی ئاسایشی لەسەر ئێران.
"نازم عومەر ده‌باغ" نوێنەری حکوومەتی هەرێمی کوردستان لە تاران دەڵێت: ئەم ڕاگەیاندنەی سەلامی بە ڕژدی وەرگیراوە و وەک لە ڕاگەیاندنەکەی حکوومەتی هەرێمدا ئاماژەی پێکراوە "هیچ هەڕەشەیەکی ناهەق لە هیچ کەسێک قەبوڵ ناکات" و دەشڵیت لە هەمان ڕاگەیاندنی حکومەتی هەرێمدا هاتووە کە پێویستە تەواوی کێشەکان لە ڕێگای دیالۆگەوە چارەسەر بکرێن.
ئایا لایەنە سیاسییەکانی ڕۆژهەڵاتی کوردستان دەبنە بەشێک لەو دیالۆگە؟
"نازم ده‌باغ" دەڵێت: تا ئێستا وتووێژ و دانووستاندنەکان وەها بەڕێوەچوون کە حکوومەتی هەرێمی کوردستان ڕێککەوتنی لەگەڵ کۆماری ئیسلامیدا کردووە و لە لایەکی تریشەوە هەر حکوومەتی هەرێمی کوردستان ڕێککەوتنی لەگەڵ لایەنە سیاسییەکانی ڕۆژهەڵاتدا کردووە و وەک دەڵێت حکوومەتی هەرێم وەک دوو لایەن ئەژمار دەکرێت، یەکەمیان لایەنێکی سەرەکی لە دانووستاندنەکاندا و دووهەمیشیان وەک ناوبژیوانێک.
ئایا ئێران جارێکی دیکه هەنگاوێکی لەو شێوەیە دەنێت بۆ بۆردومان کردنی ئەو شوێنانەی لایەنە سیاسییەکانی ڕۆژهەڵاتی کوردستانی لێن؟
نوێنەری حکوومەتی هەرێمی کوردستان لە تاران دەڵیت: بەپێی ئەو زانیارییانەی لەبەردەستیدان زۆرینە لەو بڕوایەدان پارێزگاری لە ڕەوشی ئاسایشی هەرێم بکرێت بەتایبەتی لەم قۆناغەی ئێستادا کە هەرێم لە چەند قەیرانێکدایە وەک شەڕی داعش و قەیرانی بڕینی بودجە و دەشڵێت هەر بۆیە ئیتر پێویست ناکات کێشە و گرفتی تر بۆ هەرێم زیاد بکرێت و ئەمەش وەک دەڵێت "سەپاندنی تیادا نییە بەڵکو ڕێککەوتنە" ئاماژەش بەوە دەکات هەرچییەک دەیڵێت ڕای حکوومەتی هەرێمن نەک ڕای خۆی بن.
لە وەڵامی پرسیارێکی "بەڵێن ساڵح" سەبارەت بە هەبوونی بنکە سەربازیەکانی تورکیا لە ناو خاکی هەرێمدا ئایا ئێرانییەکان هیچ پەیامێکیان پێداوە؟
"نازم عومەر دەباغ" دەڵێت بەڵێ بەرپرسانی کۆماری ئیسلامی ئێران چەندان جار ئەم دۆسێیەیان باسکردووە و دەڵێن بۆچی ڕێگە بە پایگا و سەربازگە و تۆپخانەی تورکیا دەدرێت، بەڵام کاتێک ئێران ئاگاهیەک دەدات لەگەڵ ئەوەشدا کە ڕێککەوتن هەن دەکەونە ئەم هاوار هاوار کردنە.