نێچیرڤان بارزانی پشتیوانی بە یاساییكردنى چارەسەری ئاشتیانەی كێشەی كورد لە توركیا نیشاندا
به‌ڕێز نێچیرڤان بارزانی سەرۆك وه‌زیرانى هه‌رێمى كوردستان، لە لێدوانێكدا بۆ ماڵپەڕی فەرمیی حكوومەتی هەرێمی كوردستان، پشتیوانی لە یاسای ژمارە 6551ی توركیا كرد لەپێناو چارەسەری ئاشتیانەی كێشەی كورد لە توركیا و پشتیوانیی خۆی نیشان دا بۆ هەنگاوە بوێرەكانی به‌ڕێز سەرۆك وەزیرانی توركیا لەپێناو كۆتاییهێنان بە شەڕ و هێنانەكایەی ئاشتی و تەباییی كۆمەڵایەتی.
ئەمەش دەقی لێدوانەكەی به‌ڕێز نێچیرڤان بارزانی، سەرۆك وه‌زیرانى هه‌رێمى كوردستانه:
هەوڵەكانی ئێستا و ئەو جموجۆڵەی هەیە بۆ هێنانەكایەی ئاشتی و چارەسەركردنی ئاشتیانەی كێشەی كورد لە توركیا مایەی دڵخۆشیی ئێمەیە و، هیوادارین ببێتە مایەی پێشڤەچوونی زیاتر بۆ هەموو گەلی توركیا.
هەروەها لەو چوارچێوەیەدا، دەركردنی یاسای ژمارە 6551 لە لایەن پەرلەمانی توركیاوە، بە پێشنیاز و پشتیوانیی پارتی داد و گەشەپێدان بە سەرۆكایەتیی بەڕێز ڕەجەب تەییب ئەردۆغان، هەنگاوێكی دیكەی زۆر گرنگە لەپێناو هێنانەكایەی ئاشتی و چارەسەركردنی كێشەی كورد لە توركیا، چونكە گفتوگۆكان و هەنگاوەكانی چارەسەری ئاشتیانەی خستە چوارچێوەیەكی سیاسیی یاساییەوە.
ئێمە وەك چۆن پێشتر پشتیوانیمان لە هەنگاوە بوێرەكانی بەڕێز ڕەجەب تەییب ئەردۆغان و حكوومەتی توركیا كردووه لەپێناو چارەسەری ئاشتیانە، پشتیوانی لەو هەنگاوە گرنگەش دەكەین و هیوادارین گەلی توركیا بەهۆی ئەو یاسایە بگاتە تەباییەكی تەواوی كۆمەڵایەتی و، ئاشتی دەرفەتی پێشكەوتنی زۆر زیاتر بۆ گەلی توركیا بڕەخسێنێت.
نێچیرڤان بارزانی پشتیوانی بە یاساییكردنى چارەسەری ئاشتیانەی كێشەی كورد لە توركیا نیشاندا
به‌ڕێز نێچیرڤان بارزانی سەرۆك وه‌زیرانى هه‌رێمى كوردستان، لە لێدوانێكدا بۆ ماڵپەڕی فەرمیی حكوومەتی هەرێمی كوردستان، پشتیوانی لە یاسای ژمارە 6551ی توركیا كرد لەپێناو چارەسەری ئاشتیانەی كێشەی كورد لە توركیا و پشتیوانیی خۆی نیشان دا بۆ هەنگاوە بوێرەكانی به‌ڕێز سەرۆك وەزیرانی توركیا لەپێناو كۆتاییهێنان بە شەڕ و هێنانەكایەی ئاشتی و تەباییی كۆمەڵایەتی.
ئەمەش دەقی لێدوانەكەی به‌ڕێز نێچیرڤان بارزانی، سەرۆك وه‌زیرانى هه‌رێمى كوردستانه:
هەوڵەكانی ئێستا و ئەو جموجۆڵەی هەیە بۆ هێنانەكایەی ئاشتی و چارەسەركردنی ئاشتیانەی كێشەی كورد لە توركیا مایەی دڵخۆشیی ئێمەیە و، هیوادارین ببێتە مایەی پێشڤەچوونی زیاتر بۆ هەموو گەلی توركیا.
هەروەها لەو چوارچێوەیەدا، دەركردنی یاسای ژمارە 6551 لە لایەن پەرلەمانی توركیاوە، بە پێشنیاز و پشتیوانیی پارتی داد و گەشەپێدان بە سەرۆكایەتیی بەڕێز ڕەجەب تەییب ئەردۆغان، هەنگاوێكی دیكەی زۆر گرنگە لەپێناو هێنانەكایەی ئاشتی و چارەسەركردنی كێشەی كورد لە توركیا، چونكە گفتوگۆكان و هەنگاوەكانی چارەسەری ئاشتیانەی خستە چوارچێوەیەكی سیاسیی یاساییەوە.
ئێمە وەك چۆن پێشتر پشتیوانیمان لە هەنگاوە بوێرەكانی بەڕێز ڕەجەب تەییب ئەردۆغان و حكوومەتی توركیا كردووه لەپێناو چارەسەری ئاشتیانە، پشتیوانی لەو هەنگاوە گرنگەش دەكەین و هیوادارین گەلی توركیا بەهۆی ئەو یاسایە بگاتە تەباییەكی تەواوی كۆمەڵایەتی و، ئاشتی دەرفەتی پێشكەوتنی زۆر زیاتر بۆ گەلی توركیا بڕەخسێنێت.
نێچیرڤان بارزانی پیرۆزبایی لە سەرۆك كۆماری تازەی عیراق دەكات
به‌ڕێز نێچیرڤان بارزانی سەرۆك وه‌زیرانى هەرێمی كوردستان، پیرۆزبایی لە د. فوئاد مەعسووم دەكات بە بۆنەی هەڵبژاردنی بە سەرۆك كۆماری عیراق و هیوای سەركەوتنی بۆ دەخوازێت، ئومێدی ئەوەش ده‌كات كە وەك سەرۆك كۆمار تەواوی هەوڵی خۆی بدات بۆ پاراستنی دەستوور و ڕێگرتن لە پێشێلكردنی دەستوور و یاساكانی عیراق.
ئەمەش دەقی پیرۆزبایینامەكەی به‌ڕێز سەرۆك وه‌زیرانى هەرێمی كوردستانە:
بۆ بەڕێز د. فوئاد مەعسووم سەرۆك كۆماری عیراق،
بە بۆنەی هەڵبژاردنتان لە لایەن پەرلەمانی عیراقەوە وەك سەرۆك كۆمار، لە دڵەوە پیرۆزباییتان لێ دەكەین و هیوای سەركەوتنتان بۆ دەخوازین.
ئێوەی بەڕێز لە كاری سیاسی و هەروەهاش لە كاری بەڕێوەبردن و حكوومەتداریدا لە كوردستان ئەزموونێكی باشتان تۆمار كردووە، لەو چەند ساڵەی دواییشدا لە پرۆسەی سیاسیی عیراق و داڕشتنی دەستووری تازەی عیراق و ژیانی پەرلەمانیدا؛ وەك سەرۆكی پەرلەمانی ئینتیقالیی عیراق و سەرۆكی فراكسیۆنی هاوپەیمانیی كوردستانی؛ ڕۆڵێكی بەرچاوتان هەبووە.
هیوادارین بتوانن بە شێوەیەكی تەواو دەستووری عیراق بپارێزن و هەموو ئەو پێشێلكارییانە ڕاست بكەنەوە كە بەرامبەر دەستوور ئەنجام دراون و لە ئەنجامدا پرۆسەی سیاسى و تەوافوقی نێوان لایەنەكان و پێكهاتەكانی عێراقییان تێك دا و ئەوەش شێوان و ئاڵۆزییەكی تەواوی لە عیراقدا دروست كردووە و ژیانی سەدان هەزار خێزان لە عیراق تێك چووە، هه‌روه‌ها ڕێگەی بۆ گرووپە توندڕەوەكان خۆش كرد كە شوێنی خۆیان لە عیراقدا بكەنەوە.
هیوادرین ئێوە بتوانن پارێزەری مافی هەموو گەلانی عیراق بن كە ئەوەش لە پاراستنی دەستووری عیراقدا خۆی دەبینێتەوە، هەروەها بە زووییش هەموو ئەو پێشێلكارییانە نەهێڵن كە بەرامبەر گەلی كوردستان ئەنجام دراون؛ بە تایبەتی ئه‌و پێشێلكاریانه‌ى ئەمساڵ ده‌رهه‌ق به گه‌لى كوردستان كراون.
جارێكی دیكە پیرۆزباییتان لێ دەكەم و هیوای سەركەوتنتان بۆ دەخوازم.
نێچیرڤان بارزانی
سەرۆك وه‌زیرانى هەرێمی كوردستان.
24ى ته‌ممووزى 2014
"نازم دەباغ" لەگەڵ "ئۆمیت یاردیم" باڵیۆزى وڵاتی تورکیا لە تاران دیداری کرد
"نازم دەباغ" نوێنەرى هەرێمى کوردستان لە تاران، لەگەڵ "ئۆمیت یاردیم" باڵیۆزى وڵاتی تورکیا لە ئێران کۆبۆوە.
"نازم عومەر دەباغ" نوێنەرى حکوومەتى هەرێمى کوردستان لە وڵاتی ئێران، کاتژمێر 10 پیش نیوەڕۆی ئەمرۆ پێنجشەمە (24/7/2014) لەسەر بانگهێشتی باڵیۆزى تورکیا لە ئێران، سەردانی باڵیۆزخانەی وڵاتی تورکیا لە تارانی پێتەختی ئێرانی کورد و لە لایەن "ئۆمیت یاردیم" باڵیۆزى وڵاتی تورکیا لە تاران بە گەرمی پێشوازیی لێکرا.
لە دانیشتنەکەدا هەر دوو لایەن بە دوورودرێژی باسیان لە بارودۆخى ئێستاى عێراق، ناوچەکە بە گشتیی و هەرێمی کوردستان بە تایبەتی کرد و پەیوەندیی ئابووری نێوان هەرێمی کوردستان و وڵاتی تورکیا خرایەوە بەر باس و ئاخاوتن.
هەر لەم دانیشتنەدا تیشک خرایە سەر پێشکەوتنە بەرچاوە ئابوورییەکانی هەرێمی کوردستان و باڵیۆزى وڵاتی تورکیا لە تاران، هیوای خواست کە ئەم جۆرە پەیوەندیی و سەردانانە لە نێوان دوو لایەندا بەردوام بێت و درێژەی پێبدرێت.
سەرۆكی هەرێمی كوردستان پێشوازی لە پاتریاكی كلدانی لە عێراق و جیهان و شاندێكی پیاوانی ئایینی مەسیحیی كوردستان و عێراق دەكات
ئەمڕۆ چوارشەممە 23ـی 7ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە پاتریاك لویس ڕۆفاییلی یەكەم ساكۆ پاتریاكی كلدانی لە عێراق و جیهان و شاندێكی یاوەری كرد كە لە ژمارەیەك مەتران و پیاوی ئایینی مەسیحیی كوردستان و عێراق پێكهاتبوو.
لە كۆبوونەیەكدا پاتریاك لویس ڕۆفاییلی یەكەم ساكۆ پاتریاكی كلدانی لە عێراق و جیهان سوپاسی سەرۆك بارزانیی كرد بۆ ڕەخساندنی ئەم دیدارە و سوپاسی سەرۆك بارزانی و حكوومەتی هەرێمی كوردستانی كرد بۆ پێشوازی و حەواندنەوەی مەسیحییەكانی نەینەوا و عێراق و هەروەها هاوكاریكردن و پاراستنیان لە هەڕەشەی تیرۆریستان. پاتریاكی كلدانی لە عێراق و جیهان نیگەرانیی خۆیشی نیشان دا بەرانبەر ڕووداوەكانی موسڵ و هەروەها ئەو هەڕەشە و جیاكارییەی لەسەر بنەمای ئایین و بەناوی ئیسلام لەدژی مەسیحییەكان دەكرێ و ئاماژەی بەوەدا كە ئەوەی ئێستا لە ئارادایە پەرەسەندنی كولتووری ئینكاری بەرانبەر و شێواندنی سیمای ئیسلامە و ڕایشیگەیاند كە دەركردن و تێكدانی كەنیسەكان و توراسی مێژوویی و ئایینیی مەسیحییەكان لە نەینەوا بوونی مەسیحییەكانی لەم ناوچەیە كردۆتە ئامانج. لە درێژەی قسەكانیدا پاتریاكی كلدانی لە عێراق و جیهان جەختی لەوە كردەوە كە پێویستە توراسی مێژوویی مەسیحییەكان و مانەوەی مەسیحییەكان بپارێزرێت و شێوەیەكی سەردەمیانە بۆ یەكلاییكردنەوەی گرفتەكانی عێراق بدۆزرێتەوە و داوایشی كرد كە لەگەڵ حكوومەتی هەرێمی كوردستان هەماهەنگی و بەدواداچوونی هاوبەش هەبێت بۆ چارەكردنی گرفتی ئاوارە و پەنابەرانی مەسیحی.
لەبەرانبەردا سەرۆك بارزانی بەخێرهاتنی شاندی میوانی كرد و سەبارەت بە دەركردنی خوشك و براكانی مەسیحی لە دەشتی نەینەوا بە توندی ئەو هەوڵانەی ئیدانە كرد كە لەدژی مەسیحییەكان لە لایەن تیرۆریستانەوە ئەنجام دەدرێت و ڕایگەیاند كە ئەم تەوژمە تەنیا هەڕەشە نییە بۆ سەر مەسیحییەكان بەڵكو هەڕەشەیە بۆ سەر هەموو پێكهاتەكانی عێراق و ناوچەكە و جیهان و دژی هەموو پڕەنسیپە ئایینی و مرۆڤییەكان و دژی ژیانە و لەو ماوەیەدا نەك تەنیا كەنیسەكان بەڵكو مەزارگە و شوێنە پیرۆزەكانی موسلمانانیش كەوتوونەتە بەر پەلاماری تیرۆریستانەوە. سەرۆك بارزانی لە درێژەی قسەكانیدا شاندی میوانی دڵنیا كردەوە كە هەرێمی كوردستان هەموو هەوڵێكی دەخاتەگەڕ بۆ یارمەتیدانی پەنابەران و ئاوارەكان و كوردستانیش وڵاتی هەمووانە و دەرگەی بۆ لێقەوماوان كرایەوە و ڕایگەیاند كە زۆر باش لە كێشە و گرفتەكانی خوشك و برا مەسیحییەكان دەگات و پێویستە هەموومان وڵاتی خۆمان بپارێزێن و گوتی: " یان هەموومان پێكەوە دەمرین یان پێكەوە بە ئازادی و سەربەرزی دەژیین". سەرۆك بارزانی داوایشی لە خوشك و برا مەسیحییەكان كرد كە خۆڕاگر بن و بیر لە كۆچكردن بۆ دەرەوەی وڵات نەكەنەوە و ئەوەی خستەڕوو كە دژایەتیكردنی تیرۆر و نەهێشتنی توندڕۆیی هەوڵێكی هەمەلایەنە و دەولیی پێویستە و هەرێمی كوردستانیش بەهەموو توانایەكیەوە ڕووبەڕووی تیرۆریستان دەبێتەوە و بەرگری لە خاك و ژیانی هاووڵاتیان دەكات.
حكوومه‌تى هه‌رێم سوپاسى هاوكارییه‌كانى ئیمارات ده‌كات
پێشنیوه‌ڕۆى ئه‌مڕۆ چوارشه‌ممه 23ى ته‌ممووزى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان، پێشوازى له به‌ڕێز ڕاشد ئه‌لمه‌نسوورى كونسلى گشتیى ئیمارات له هه‌رێمى كوردستان كرد.
له دیدارێكدا بارودۆخى په‌نابه‌رانى كوردى سووریا و ئاواره‌كانى ناوخۆى شاره‌كانى عیراق له كه‌مپه‌كانى هه‌رێمى كوردستان تاوتوێ كرا و به‌ڕێز سه‌رۆك وه‌زیران سوپاس و پێزانینى حكوومه‌تى هه‌رێمى كوردستانى پێشكه‌ش به ئیمارات كرد كه به پیر بانگه‌وازیى حكوومه‌تى هه‌رێمه‌وه هاتووه و هاوكارى و یارمه‌تى پێشكه‌ش به په‌نابه‌ران و ئاواره‌كان كردووه، به تایبه‌تیش ڕۆڵى مانگى سوورى ئیماراتى له ئه‌نجامدانى چه‌ندین پڕۆژه‌ى خێرخوازى بۆ په‌نابه‌ران به‌رز نرخاند.
به‌ڕێز سه‌رۆك وه‌زیران هه‌روه‌ها دووپاتى كرده‌وه كه په‌نابه‌ران و ئاواره‌كانى ناوخۆى عیراق له هه‌رێمى كوردستان پێویستییان به كۆمه‌ك و هاوكاریى نه‌ته‌وه یه‌كگرتووه‌كان و كۆمه‌ڵگه‌ى نێوده‌وڵه‌تى هه‌یه و هیواى خواست كه هه‌موو لایه‌ك وه‌ك ئیمارات ئاوڕ له په‌نابه‌ران و ئاواره‌كان بده‌نه‌وه و له‌م ئه‌ركه قورسه‌دا؛ هاوكاریى حكوومه‌تى هه‌رێمى كوردستان بكه‌ن تا بتوانێت پێداویستییه‌كانى په‌نابه‌ران دابین بكات.
له به‌شێكى دیكه‌ى دیداره‌كه‌دا په‌یوه‌ندییه‌كانى نێوان هه‌رێمى كوردستان و ئیمارات خرایه به‌ر باس و هه‌ردوولا داكۆكییان له‌سه‌ر پته‌وكردنى زیاترى په‌یوه‌ندییه‌كان به تایبه‌تیش له بواره‌كانى بازرگانى وه وه‌به‌رهێناندا كرده‌وه.
نێچیرڤان بارزانى پشتگیرى له پرۆسه‌ى ئاشتى له توركیا دووپات كرده‌وه
سه‌رله‌به‌یانیى ئه‌مڕۆ چوارشه‌ممه 23ى ته‌ممووزى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان، پێشوازى له خاتوو له‌یلا زانا په‌رله‌مانته‌رى سه‌ربه‌خۆى ئامه‌د و به‌ڕێز سڕڕى سوره‌ییا ئۆنده‌ر په‌رله‌مانته‌رى هه‌ده‌په‌ى ئیستانبول كرد.
له دیدارێكدا دوایین پێشهاته‌كانى پرۆسه‌ى ئاشتى له توركیا و ئه‌و هه‌نگاوه یاساییه‌ى ئه‌م دواییه بۆ چاره‌سه‌ركردنى پرسى كورد له توركیا نرا؛ خرایه به‌ر باس و به‌ڕێز نێچیرڤان بارزانى ئه‌م هه‌نگاوه یاساییه‌ى به ته‌كانێكى گه‌وره به‌ره‌و چاره‌سه‌ركردنى پرسى كورد له توركیا به شێوه‌یه‌كى ئاشتیانه‌ى سیاسى له قه‌ڵه‌م دا و هه‌موو پشتگیرییه‌كى خۆى و حكوومه‌تى هه‌رێمى كوردستانى بۆ پرۆسه‌ى ئاشتى و دانانى ئه‌و چوارچێوه یاسایییه بۆ پرۆسه‌كه دووپات كرده‌وه.
لاى خۆیانه‌وه خاتوو له‌یلا زانا و به‌ڕێز سڕڕى سوره‌ییا ئۆنده‌ر كه دوایین جار سه‌ردانى دوورگه‌ى ئیمرالییان كردبوو، وێڕاى سڵاو و ڕێز، هه‌روه‌ها پێزانینى به‌ڕێز ئۆجالانیان گه‌یانده به‌ڕێز نێچیرڤان بارزانى به‌رامبه‌ر به‌و هه‌وڵ و كۆششه‌ى كه بۆ ده‌سپێكردن و به‌رده‌وامى و سه‌ركه‌وتنى پرۆسه‌ى ئاشتى له توركیا داویه‌تى و داوایان كرد وه‌ك هه‌میشه له پشتگیریكردنى پرۆسه‌ى ئاشتى و چاره‌سه‌ركردنى ئاشتیانه‌ى پرسى كورد له توركیا به‌رده‌وام بێت.
له به‌شێكى دیكه‌ى دیداره‌كه‌دا ڕه‌وش و پێشهاته‌كانى ناوچه‌كه به گشتى و دواڕۆژى پرۆسه‌ى ئاشتى و چاره‌سه‌رى و هه‌ڵبژاردنه‌كانى ناوه‌ڕاستى مانگى داهاتووى سه‌رۆكایه‌تیى كۆمار له توركیا، تاوتوێ كران.
سه‌رۆك وه‌زیران پێشوازى له شاندێكى فراكسیۆنه‌كانى په‌رله‌مانى كوردستان كرد
سه‌رله‌به‌یانیى ئه‌مڕۆ سێشه‌ممه 22ى ته‌ممووزى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان پێشوازى له شاندى فراكسیۆنه‌كانى په‌رله‌مانى كوردستان كرد.
له دیدارێكدا فراكسیۆنه‌كانى په‌رله‌مانى كوردستان پیرۆزبایى ده‌مه‌زران و ده‌ستبه‌كاربوونى كابینه‌ى هه‌شته‌مى حكوومه‌تى هه‌رێمى كوردستانیان له به‌ڕێز سه‌رۆك وه‌زیران و ئه‌نجومه‌نى وه‌زیران كرد و هیواى سه‌ركه‌وتنیان بۆ خۆى كابینه‌كه‌ى خواست. هه‌روه‌ها دووپاتیان كرده‌وه كه خوازیارى هه‌بوونى هه‌ماهه‌نگییه‌كى باشن له‌گه‌ڵ حكوومه‌ت بۆ ئه‌وه‌ى بتوانن پێكه‌وه كار و خزمه‌تى باشتر پێشكه‌ش به هاووڵاتیانى هه‌رێمى كوردستان بكه‌ن.
لاى خۆیه‌وه به‌ڕێز سه‌رۆك وه‌زیران، وێڕاى به‌خێرهێنان و ده‌ربڕینى خۆشحاڵیى خۆى به‌م سه‌ردانه، دووپاتى كرده‌وه كه هه‌بوونى چاودێریى په‌رله‌مانى كوردستان به‌سه‌ر حكوومه‌تى هه‌رێمى كوردستانه‌وه، هه‌م وا ده‌كات ڕۆڵى په‌رله‌مان كاراتر ببێت و هه‌م حكوومه‌تیش هان ده‌دات به‌رده‌وام هه‌وڵى پێشكه‌شكردنى باشترین كار و خزمه‌ت بۆ هاووڵاتیان بدات. جه‌ختیشى له‌وه كرده‌وه كه نه‌بوونى ئۆپۆزسیۆن و به‌شداریى هه‌مووان له كابینه‌ى حكوومه‌تدا، به‌و مانایه نیه كه په‌رله‌مانى كوردستان ڕۆڵى كاراى خۆى له چاودێریكردنى حكوومه‌ت نه‌گێڕێت.
له دیداره‌كه‌دا هه‌ردوولا داكۆكییان له‌وه كرده‌وه كه ئه‌م قۆناغه‌ى ئێستا هه‌رێمى كوردستانى پێدا تێده‌په‌ڕێت، پێویستى به‌وپه‌ڕى كارى پێكه‌وه‌یى و هه‌ماهه‌نگیى نێوان لایه‌نه‌كان و ده‌زگاكانى هه‌رێمى كوردستان هه‌یه بۆ ئه‌وه‌ى هه‌مووان پێكه‌وه به‌شدار بن له گه‌یاندنى هه‌رێمى كوردستان به كه‌نارى ئارامى و پێشكه‌شكردنى باشترین خزمه‌تگوزارى به كوردستانیان و چاره‌سه‌ركردنى كێشه و قه‌یرانه‌كان.
له به‌شێكى دیكه‌ى دیداره‌كه‌دا باس له ده‌ركردنى خوشك و برایانى مه‌سیحى له شارى مووسڵ و په‌ناهێنانیان بۆ هه‌رێمى كوردستان كرا و له‌مباره‌وه به‌ڕێز سه‌رۆك وه‌زیران دووپاتى كرده‌وه كه ئه‌وه‌ى له تواناى حكوومه‌تى هه‌رێمى كوردستاندا بێت بۆ به‌هاناوه‌چوون و هاوكارى و یارمه‌تیدانى ئه‌وان؛ هیچ درێغییه‌كى نه‌كردووه و ناكات، هه‌روه‌ها حكوومه‌ت هه‌وڵ ده‌دات له ڕێگه‌ى كۆمه‌ڵگه‌ى نێوده‌وڵه‌تى و نه‌ته‌وه یه‌كگرتووه‌كانه‌وه، كۆمه‌ك و هاوكاریى باشتریان بكرێت.
نێچیرڤان بارزانى یه‌كه‌مه‌كانى هه‌رێمى كوردستان خه‌ڵات ده‌كات
پێشنیوه‌ڕۆ ئه‌مڕۆ سێشه‌ممه 22ى ته‌ممووزى 2014، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان، به‌شدارى له ڕێوڕه‌سمى خه‌ڵاتكردنى قوتابییه ده‌رچووه‌كانى یه‌كه‌م و دووه‌م و سێیه‌مى قۆناغه‌كانى ئاماده‌یى له‌سه‌ر ئاستى هه‌رێمى كوردستان و یه‌كه‌مى سه‌ر ئاستى عیراق كه كچه خوێندكارێكى شارى خانه‌قین بوو كرد، كه له لایه‌ن وه‌زاره‌تى په‌روه‌رده‌ى حكوومه‌تى هه‌رێمى كوردستانه‌وه له هه‌ولێر ساز كرا.
له سه‌ره‌تاى ڕێوڕه‌سمه‌كه‌دا به‌ڕێز پشتیوان سادق وه‌زیرى په‌روه‌رده، له وته‌یه‌كدا تیشكى خسته سه‌ر پلان و به‌رنامه‌ى وه‌زاره‌تى په‌روه‌رده و ئاماژه‌ى به‌وه دا كه له‌و ڕێوڕه‌سمه‌دا 44 قوتابى خه‌ڵات ده‌كرێن.
پاشان به‌ڕێز سه‌رۆك وه‌زیران له وته‌یه‌كدا وێڕاى پیرۆزبایى له‌و خوێندكارانه و ده‌ربڕینى خۆشحاڵى به سه‌ركه‌وتنیان، هیواى خواست ئه‌م سەركەوتنەیان هاندەرێك بێت بۆ ئەوەی لە قۆناغی ترى ژیاندا، له قۆناغى ترى خوێندندا بە هەمان شێوەی ئەمڕۆ، لە ئایندە و لە قۆناغەكانی تریشدا سەركەوتوو بن .هه‌روه‌ها سوپاسی هەوڵی بەڕێوەبەر و مامۆستایان و خێزان و كەسوكارى قوتابیانى كرد كە ئەوانیش هاوبەش بوون لەو سەركەوتنەیان و بارودۆخێكی وایان بۆ ڕه‌خساندوون كه بتوانن لەم بارودۆخەدا ئەم سەركەوتنە بە دەست بهێنن.
به‌ڕێز نێچیرڤان بارزانى هه‌روه‌ها ئاماژه‌ى به‌وه دا كه حكوومەتی هەرێمی كوردستان خاوەن ستراتیژیەتی درێژخایەنە لە بواری پەروەردە و خوێندندا بۆ پێشخستنی كۆمەڵگە، لەو پێناوەشدا چەندین ساڵە هەوڵێكی نەپساوەی دەست پێكردووە بۆ پێشخستنی بواری پەروەردە و خوێندن لە هەموو ئاست و قۆناغەكاندا .
ڕوونیشى كرده‌وه كه هۆشیاریی كۆمەڵایەتی، پێشكەوتنی ئابووری، بەڕێوەبردنی باش و سیاسەتكردن و دەوڵەتداریی سەركەوتووش، هەموویان پەیوەستن بە پێشكەوتووییی بواری پەروەردە و خوێندن لە هەر وڵاتێكدا. بۆیه حكوومەتی هەرێمی كوردستان ئەو ڕاستییه‌ى بە تەواوی لەبەر چاوە، هەر لەبەر ئەوەش بە هیچ شێوەیەك و لە هیچ بارودۆخێكدا؛ گرنگیی بواری پەروەردە لەبیر ناكرێت.
هه‌روه‌ها دووپاتى كرده‌وه كه لە چوارچێوەی ئەو ستراتیژیەى لە بواری پەروەردەدا هه‌یه‌تى، حكوومه‌تى هه‌رێمى كوردستان بایەخێكی زۆر بە بنیاتنانی ژێرخانی پەروەردەیی ده‌دات و بەشێكی داهاتی نەوتی لە چەند ساڵی ڕابردوودا بۆ دروستكردنی قوتابخانە و بینایەی نوێ بۆ زانكۆكان و نۆژەنكردنەوە و دابینكردنی پێداویستییەكانی دیكەی خوێندن، تەرخان كرد كه ڕەنگدانەوەیەكی زۆر باشی هەبووە بەسەر بواری پەروەردە و خوێندن لە كوردستاندا. به‌ڵام ئه‌ویشى نه‌شارده‌وه كە هێشتا كەموكوڕی و پێداویستیی زۆره و دەبێ لەو بوارەدا جێبەجێ بكرێن، بۆ ئه‌مه‌ش كار و هەوڵی حكوومەتی هەرێمی كوردستان لە ئایندەدا بەردەوام دەبێ.
به‌ڕێز نێچیرڤان بارزانى هه‌روه‌ها تیشكى خسته‌ر ئه‌وه‌ى كه دوو ئامانج لە حكوومەتداریدا هەمیشە لە هزری ئه‌ودان و لە هەموو پڕۆژە و هەنگاوێكدا حیسابیان بۆ دەكه‌ن، ئەوانیش خوێندن و تەندروستین. بۆیه هەموو ئامانجیان ئەوەیە كوردستان لە ڕووی پەروەردە و خوێندن و لە ڕووی تەندروستییەوە تەواو پێشكەوتوو بێت، چونكە بەو شێوەیە كۆمەڵگەیەكی پێشكەوتوو دروست ده‌بێت و هەر بەو شێوەیەش ئایندە و كوردستانێكی پێشكەوتوو بۆ نەوەكانی داهاتوو دابین ده‌كرێت .
هەر لەبه‌ر ئه‌مه داواى لە سەرمایەداران و وەبەرهێنەران كرد وەبەرهێنان لە بواری خوێندندا بكەن بە دانانی كۆلیژ و زانكۆ و قوتابخانەی پێشكەوتوو و ئاست بەرز. هەروەها هاوكاری حكوومەتیش بن بە بنیاتنانی قوتابخانە لە گەڕەكە میللییەكان و گوندەكانی كوردستان و لە كەمپەكانی ئاوارەكاندا، چونكه بەو شێوەیە لەم قۆناغەدا هاوكاریی خەڵك و حكوومەتی هەرێمی كوردستان دەكەن، بە تایبەتی كە ئێستا حكوومەتی عیراق بە بڕینی بودجە و مووچەی خەڵكی هەرێمی كوردستان، حكوومەتی هەرێمی كوردستانی خستووەتە ژێر بارێكی زۆر گران.
به‌ڕێز سه‌رۆك وه‌زیران هەروەها ڕوونى كرده‌وه كه لەبەر ئەو هەموو ئاوارە زۆرانەی لە ناوچە كوردییەكانی سووریا و لە پارێزگاكانی مووسڵ و دیالە و ئەنبار و شارەكانی دیكەی عێراقەوە ڕوویان كردووەتە هەرێمی كوردستان، ئەركی حكوومەتی هەرێمی كوردستان لە هەموو بوارێكدا زۆر گران بووە، لەوانەش بواری خوێندن و پەروەردە.
له‌باره‌ى ڕه‌وشى عیراقیشه‌وه ئاماژه‌ى به‌وه دا كه عیراق بە بارودۆخێكی زۆر ئاڵۆزدا تێدەپەڕێت و ئەو ئاڵۆزبوون و تێكچوونەش ئەنجامێكی زۆر سروشتیی سیاسەتەكانی دەسەڵاتدارانی عێراقە كە تەوافوقی نێوان پێكهاتەكانی عێراقیان تێكدا و دەستووری عێراقیان پێشێل كرد، ئەو دەستوورەى بنەمای پرۆسەی سیاسیی عێراق بوون.
زیاتریش گوتى: "بەداخەوە نە سەرۆك وەزیران و نە هاوپەیمانەكانی عێراقیش گوێیان نەدایە ئاگاداركردنەوە و هۆشدارییەكانی لایەنی كوردی لە مەترسیی درێژەدان بەو پێشێلكاریانە، ئەنجامی ئەو گوێنەدانەش ئەو كوشتار و تێكچوونەیە كە ئەمڕۆ بەسەر گەلی عێراقدا هاتووە."
به‌ڕێز نێچیرڤان بارزانى ڕوونیشى كرده‌وه كه لە ئەنجامی ئەو بارودۆخە و شكست و پاشەكشەی سوپای عێراق، هێزەكانی پێشمەرگە چوونەتە زۆر لە ناوچە كوردستانییەكانی پارێزگای مووسڵ و كەركووك و دیالە، جێگەی سەربەرزیشە كه ئێستا هەموو خەڵكی ئەو ناوچه‌یە و پێكهاتەكانی ئەم ناوچەیە بە كورد، عەرەب، توركمان و مەسیحییەوە زۆر لە ڕەفتار و پاراستنی پێشمەرگە ڕازین.
دووپاتیشى كرده‌وه كه بەڵێنی پێشمەرگە و سەركردایەتیی كوردستان ئەوەیە هیچ جیاوازییەك لە نێوان پێكهاتەكانی گەلی كوردستاندا نەكات و هه‌رێمى كوردستان پێى وایە هەموویان وەك یەك هاوبەشن لەم وڵاتەدا، بۆیه بە هەموو شێوەیەك تایبەتمەندیی هەر یەكێك لەو ناوچانە لەبەرچاو دەگیرێت. هەروەها هەموو لایەنە كوردستانییەكانیش ئەمڕۆ یەكدەنگن لەسەر ئەوەی كە خاك و خەڵكی ئەو ناوچانە ناخەنەوە بەر مەترسیی گرووپە چەكدارە تیرۆریستییەكان و وەك شوێنەكانی دیكەی كوردستان؛ ئەو شوێنانەش دەپارێزن.
هه‌روه‌ها گوتى: "بێگومان چوونی پێشمەرگە بۆ ئەو سنوورانە بۆ داگیركردن نەبووە، بۆ پاراستن بووە و ئەوەی حكوومەتی هەرێمی كوردستان و پێشمەرگە قارەمانەكانمان پێیان بكرێت بۆ پاراستنی ئەو ناوچانە لە تیرۆر و تیرۆریستان، بە هیچ شێوەیەك درێغی ناكەن."
به‌ڕێز سه‌رۆك وه‌زیران دووباره خەڵكی كوردستانى دڵنیا كرده‌وه كە زەحمەتییەكانیان زۆر درێژە ناكێشن و ئەو دواكەوتنەی مووچەی فەرمانبەرانیش بەردەوام نابێت و چارەسەری دەكەن و خەڵكی كوردستانیش بەرەو ژیان و خۆشگوزەرانییەكی باشتر هەنگاو دەنێت.
سوپاسی خۆڕاگریی هەموو ئەوانه‌یشى كرد خۆڕاگر بوون و چۆكیان دانەدا لەبەر هەموو ئەو گوشارانەی لێیان كراوە لە بڕینی مووچه و بودجەی هەرێمی كوردستاندا. هه‌مووانیشى دڵنیا كرده‌وه حكوومه‌تى هه‌رێمى كوردستان پلانى هەیە بۆ ئه‌وه‌ى به زووترین كات چارەسەرى ئه‌و بابه‌ته بكات. ده‌رباره‌ى مووچه‌ش گوتى: "پێشتریش وەزیری دارایی باسی كردووە و خۆشم باسم كردووە و دەمەوێ دڵنیاتان بكەمەوە كه مووچەی هیچ كەسێك لە هەرێمی كوردستان نافەوتێ، ئێمە پابەندیمان بەرامبەر بە خەڵكی كوردستان و ئەوانە هەیە كە مووچەیان هەیە و بە دڵنیاییەوە پێیان دەدرێت."
به‌ڕێز نێچیرڤان بارزانى دووباره ڕووى قسه‌ى له خوێندكاران كرد و گوتى: "ئێوە بەشدارن لە قۆناغێکی مێژوویی و هەستیار لە مێژووی گەلی كوردستاندا، بەشدارن لە وەدیهێنانی ئەو خەونەی باوک و باپیرانمان سەریان لەسەر دانا و خەونیان پێوە دەبینی. ئێوە دەبنە زانا و سەرکردە و خەباتکارانی سبەینێ. ئێوە لە ئایندەدا ئەم وڵاتە بەڕێوە دەبەن و واش دەکەن گەلی کوردستان سەرفرازیی خۆی بپارێزێت. ئومێدی ئێمە و نەوەی پێش ئێمەش بە ئێوە بووە. هیوای من ئەوەیە ئێوە خۆشەویستان و ئازیزان لە ئاستی ئەو ئومێدە بن كە گەلی كوردستان بە ئێوەی هەیه."
هه‌روه‌ها هیواى خواست كه زۆر بایەخ بە خوێندن بدەن، لە بواری خوێندنی باڵادا زۆر بایەخ بە بوارە تەكنیكییەكان و ئەو زانستانە بدەن كە بۆ قۆناغی كوردستان زۆر پێویستن، حكوومه‌تی هەرێمی كوردستانیش بە تەواوی هاوكاریان دەبێت بۆ سەركەوتن لەم پرۆسەیەدا.
هه‌روه‌ها به بیر قوتابیانى هێنایه‌وه كه دەرفەتی باش بۆ خوێندن و سەركەوتن لە بەردەمیاندایه و ئەوەی بۆ ئه‌وان ڕەخساوە بۆ نەوەكانی پێش ئه‌وان نەڕەخساوە، بۆیه ده‌بێ قەدری ئەم دەرفەتە بزانن و سوود لەو دەرفەتە وەربگرن و بە شێوەیەكی زۆر سەركەوتووانە بەشداری لە پێشخستنی وڵات و كۆمەڵگەی كوردستاندا بكەن.
به‌ڕێز سه‌رۆك وه‌زیران جه‌ختى له‌وه كرده‌وه كه وه‌زاره‌تی په‌روه‌رده به تایبه‌تی گرنگییه‌كی به‌رچاو به خوێندنی پیشه‌یی ده‌دات، بۆ ئه‌وه‌ی بواری فێربوونی پیشه جۆراوجۆره‌كان بۆ خوێندكارانی بڕه‌خسێنێت و گه‌نجانی وڵات؛ هه‌موو ئه‌و كار و پیشانه فێر ببن كه خزمه‌ت به كوردستان و ئاوه‌دانكردنه‌وه و پێشخستنی وڵات ده‌كه‌ن. ڕوونیشى كرده‌وه كه ئه‌مە بۆ ئه‌مڕۆ و دواڕۆژی كوردستان زۆر گرنگه و ده‌بێ هه‌موو لایه‌ك ئه‌وپه‌ڕی گرنگی پێ بده‌ن و قوتابیان هان بده‌ن بواره پیشه‌ییه‌كان بخوێنن.
له دوایین به‌شى وته‌كه‌یدا خۆشحاڵیى خۆى ده‌ربڕى به‌وه‌ى كه لەناو ئەوانەی لەسەر ئاستی هەرێمی كوردستاندا پلەی یەكەم و دووەم وسێیەمیان بە دەست هێناوە، هەروەها ئەوەی پلەی یەكەمی عیراق بە دەست هێناوە زیاتریان كچانن. پاشان خه‌ڵاتى به‌سه‌ر یه‌كه‌یه‌كه‌ى قوتابیاندا دابه‌ش كرد.
دەقی وتەی سەرۆك وەزیران لەڕێوڕەسمی خەڵاتكردنی یەكەمەكانی كوردستان
میوانە بەڕێزەكان،
كەسوكاری قوتابییە خۆشەویست و یەكەمەكانی كوردستان،
هەموو لایەكتان بە خێر بێن بەسەرچاو، بە خێربێن بۆ ئەم ڕێوڕەسمە گرنگە كە تێیدا دەمانەوێ ڕێز لە هەوڵ و سەركەوتنی ژمارەیەك لە قوتابیانی كوردستان بگرین كە ئەمڕۆ شانازیی ئەوەیان بەر كەوتووە ببن به یه‌كه‌م له كوردستاندا. هەموومان لە دڵەوە ئەوانه‌مان خۆش دەوێت، چونكە لە بوارێكدا یەكەم بوون كە هەموو پێشكەوتنەكانی وڵاتی ئێمە لەوێوە دەست پێدەكات، كە ئەویش بواری پەروەردە و خوێندنە.
بە ناوی ئێوەی ئامادەبووان، بە ناوی حكوومەتی هەرێمی كوردستانه‌وه، پیرۆزبایی لەو (44) قوتابییەى یەكەمی قۆناغی ئامادەیی كوردستان دەكەم كە بوونەتە یەكەم و دووەم و سێیەمی قۆناغەكانی ئامادەیی لەسەر ئاستی هەرێمی كوردستان. هەروەها پڕ بەدڵ پیرۆزبایی لەو كچە قوتابیە دەكەم كە لەسەر ئاستی عیراقدا بۆتە یەكەم، ئەویش خۆشەویستێكی خۆمانە، كچێكی شاری خۆشەویستی خانەقینە، پڕ بەدڵ پیرۆزبایی لێ دەكەم.
پیرۆزتان بێ و بە ڕاستی شانازییە، شانازی بە سەركەوتنەكەتانەوە دەكەین. دەبێ ئەو سەركەوتنانە هاندەرێك بێت بۆ ئەوەی لە قۆناغی ترى ژیاندا، له قۆناغى ترى خوێندندا بە هەمان شێوەی كە ئەمڕۆ سەركەوتوو بوون، بە هەمان شێوە لە ئایندەشدا و لە قۆناغەكانی تردا سەركەوتوو بن .
هەر لێرەدا بە پێویستی دەزانم زۆر سوپاسی هەوڵی بەڕێوەبەر و مامۆستاكانی قوتابخانەكانتان بكەم، كە ئەوانیش هاوبەشن لەو سەركەوتنەی ئەمڕۆ ئێمە ڕێوڕەسممان بۆی كردووە و جەژنى پێ ده‌كه‌ین. زۆر سوپاسی خێزان و كەسوكارتان دەكەم كە توانیویانە بارودۆخێكی وا لەبار بۆ ئێوە بڕەخسێنن تا بتوانن لەم بارودۆخەدا ئەم سەركەوتنە بە دەست بهێنن، پڕ بەدڵ سوپاسیان دەكەم.
بەڕێزان ..
حكوومەتی هەرێمی كوردستان، خاوەن ستراتیژیەتی درێژخایەنە لە بواری پەروەردە و خوێندندا بۆ پێشخستنی كۆمەڵگە، لەو پێناوەشدا چەندین ساڵە هەوڵێكی نەپساوەی دەست پێكردووە بۆ پێشخستنی بواری پەروەردە و خوێندن لە هەموو ئاست و قۆناغەكاندا .
هۆشیاریی كۆمەڵایەتی، پێشكەوتنی ئابووری، بەڕێوەبردنی باش و سیاسەتكردن و دەوڵەتداریی سەركەوتووش، هەموویان پەیوەستن بە پێشكەوتووییی بواری پەروەردە و خوێندن لە هەر وڵاتێكدا. ئێمە لە حكوومەتی هەرێمی كوردستان ئەو ڕاستییەمان بە تەواوی لەبەر چاوە، هەر لەبەر ئەوەش بە هیچ شێوەیەك و لە هیچ بارودۆخێكدا؛ گرنگیی بواری پەروەردە لەبیر ناكرێت.
لە چوارچێوەی ئەو ستراتیژیەى ئێمە لە بواری پەروەردەدا، بایەخێكی زۆر بە بنیاتنانی ژێرخانی پەروەردەیی دەدەین لە كوردستان. حكوومەتی هەرێمی كوردستان، بەشێكی داهاتی نەوتی لە چەند ساڵی ڕابردوودا تەرخان كرد بۆ دروستكردنی قوتابخانە و بینایەی نوێ بۆ زانكۆكان و نۆژەنكردنەوە و دابینكردنی پێداویستییەكانی دیكەی خوێندن، ئەوەش ڕەنگدانەوەیەكی زۆر باشی هەبووە بەسەر بواری پەروەردە و خوێندن لە كوردستاندا.
بەڵام بە دڵنیاییەوە دەبێ ئەوەش بڵێین كە هێشتا كەموكوڕی و پێداویستیی زۆرمان ماوه كە دەبێ لەو بوارەدا جێبەجێیان بكەین، به‌ڵام كار و هەوڵی حكوومەتی هەرێمی كوردستانیش لەو بوارەدا به دڵنیاییه‌وه لە ئایندەدا بەردەوام دەبێ.
دوو ئامانج لە حكوومەتداریدا هەمیشە لە هزری مندان و، لە هەموو پڕۆژە و هەنگاوێكدا حیسابیان بۆ دەكەین، ئەوانیش خوێندن و تەندروستین. هەموو ئامانجی ئێمه ئەوەیە كوردستان لە ڕووی پەروەردە و خوێندن و لە ڕووی تەندروستییەوە تەواو پێشكەوتوو بێت، چونكە بەو شێوەیە دەبینە خاوەن كۆمەڵگەیەكی پێشكەوتوو، هەر بەو شێوەیەش ئایندە و كوردستانێكی پێشكەوتوو بۆ نەوەكانی دوای خۆمان دابین دەكەین .
هەر لەو چوارچێوەیەدا داوا لە سەرمایەدران و وەبەرهێنەران دەكەم كە وەبەرهێنان لە بواری خوێندندا بكەن لە كوردستان بە دانانی كۆلیژ و زانكۆ و قوتابخانەی پێشكەوتوو و ئاست بەرز. هەروەها هاوكاری حكوومەتیش بن بە بنیاتنانی قوتابخانە لە گەڕەكە میللییەكان و گوندەكانی كوردستان، هەروەها لە كەمپەكانی ئاوارەكاندا، بەو شێوەیەش لەو قۆناغەدا هاوكاریی خەڵك و حكوومەتی هەرێمی كوردستان دەكەن، بە تایبەتی كە ئێستا حكوومەتی عیراق بە بڕینی بودجە و مووچەی خەڵكی هەرێمی كوردستان، حكوومەتی هەرێمی كوردستانی خستووەتە ژێر بارێكی زۆر گران.
هەروەها لەبەر ئەو هەموو ئاوارە زۆرانەی لە ناوچە كوردییەكانی سووریا و لە پارێزگاكانی مووسڵ و دیالە و ئەنبار و شارەكانی دیكەی عێراقەوە ڕوویان كردووەتە هەرێمی كوردستان، ئەركی حكوومەتی هەرێمی كوردستان لە هەموو بوارێكدا زۆر گران بووە، لەوانەش بواری خوێندن و پەروەردە.
ئامادەبووانی بەڕێز،
خەڵكی خۆشەویستی كوردستان ..
هەروەك هەمووتان ئاگادارن، عیراق بە بارودۆخێكی زۆر ئاڵۆزدا تێدەپەڕێت، ئەو ئاڵۆزبوون و تێكچوونەی بارودۆخی عێراقیش ئەنجامێكی زۆر سروشتیی سیاسەتەكانی دەسەڵاتدارانی عێراقە كە تەوافوقی نێوان پێكهاتەكانی عێراقی تێكدا و دەستووری عێراقی پێشێل كرد، كە ئەو دەستوورەش بنەمای پرۆسەی سیاسیی عێراق بوون.
بەداخەوە نە سەرۆك وەزیران و نە هاوپەیمانەكانی عێراقیش گوێیان نەدایە ئاگاداركردنەوە و هۆشدارییەكانی لایەنی كوردی لە مەترسیی درێژەدان بەو پێشێلكاریانە، ئەنجامی ئەو گوێنەدانەش ئەو كوشتار و تێكچوونەیە كە ئەمڕۆ بەسەر گەلی عێراقدا هاتووە.
هەروەها هەر لە ئەنجامی ئەو بارودۆخە و شكست و پاشەكشەی سوپای عێراق، هێزەكانی پێشمەرگە چوونەتە زۆر لە ناوچە كوردستانییەكانی پارێزگای مووسڵ و كەركووك و دیالە، ئەوەی جێگەی سەربەرزییە ئێستا هەموو خەڵكی ئەو ناوچه‌یە و پێكهاتەكانی ئەم ناوچەیە بە كورد، عەرەب، توركمان و مەسیحییەوە زۆر لە ڕەفتار و پاراستنی پێشمەرگە ڕازین. هەر لێرەوە بە ناوی ئێوەشەوە، سڵاو و ڕێزی تایبەتی بۆ ئەو قارەمانانە دەنێرین كە ئەمڕۆ شەونخونی دەكەن لە هه‌موو بەرەكان بۆ پاراستنی سەروماڵ و گیانی هەموو هاووڵاتیان بەبێ جیاوازی.
بەڵێنی پێشمەرگە و سەركردایەتیی كوردستانیش ئەوەیە هیچ جیاوازییەك لە نێوان پێكهاتەكانی گەلی كوردستاندا نەكات و پێمان وایە هەموویان وەك یەك هاوبەشن لەم وڵاتەدا. بە هەموو شێوەیەك تایبەتمەندیی هەر یەكێك لەو ناوچانە لەبەرچاو دەگرین. هەروەها هەموو لایەنە كوردستانییەكانیش ئەمڕۆ یەكدەنگن لەسەر ئەوەی كە خاك و خەڵكی ئەو ناوچانە ناخەینەوە بەر مەترسیی گرووپە چەكدارە تیرۆریستییەكان و وەك شوێنەكانی دیكەی كوردستان ئێمە ئەو شوێنانەش دەپارێزین.
بێگومان چوونی پێشمەرگە بۆ ئەو سنوورانە بۆ داگیركردن نەبووە، بۆ پاراستن بووە و ئەوەی حكوومەتی هەرێمی كوردستان و پێشمەرگە قارەمانەكانمان پێیان بكرێت بۆ پاراستنی ئەو ناوچانە لە تیرۆر و تیرۆریستان، بە هیچ شێوەیەك درێغی ناكەن.
ئێمە لە حكوومه‌تی هەرێمی كوردستان دڵنیایی دەدەینە خەڵكی كوردستان كە زەحمەتییەكانیان زۆر درێژە ناكێشن و ئەو دواكەوتنەی مووچەی فەرمانبەرانیش بەردەوام نابێت و چارەسەری دەكەین و خەڵكی كوردستانیش بەرەو ژیان و خۆشگوزەرانییەكی باشتر هەنگاو دەنێت.
دەمەوێ سوپاسی خۆڕاگریی هەموو ئەو بەڕێزانە بكەم كه دەزانم باری ژیانیان قورسە، بەڵام خۆڕاگر بوون و چۆكیان دانەدا لەبەر هەموو ئەو گوشارانەی لێیان كراوە لە بڕینی مووچه و بودجەی هەرێمی كوردستاندا، ئێمەش بێگومان پلانمان هەیە بۆ ئه‌وه‌ى به زووترین كات چارەسەرى ئه‌و بابه‌ته بكه‌ین.
پێشتریش وەزیری دارایی باسی كردووە و خۆشم باسم كردووە و دەمەوێ دڵنیاتان بكەمەوە كه مووچەی هیچ كەسێك لە هەرێمی كوردستان نافەوتێ، ئێمە پابەندیمان بەرامبەر بە خەڵكی كوردستان و ئەوانە هەیە كە مووچەیان هەیە و بە دڵنیاییەوە پێیان دەدرێت. بەڵێ دواكەوتن هەیە، گرفت هەیە و ئێمە هیچ كاتێك پێشبینیی ئەوەمان نەدەكرد لە وڵاتێكدا ده‌ژین و سەرۆك وەزیرانی وڵاته‌كە بە بڕیاری تاكەكەسی مووچەی هه‌رێمى كوردستان ده‌بڕێت.
سوپاسی خۆڕاگریی خەڵكی كوردستان دەكەم، چونكە پێشبینی وابوو كە مووچەیان بڕی؛ هاووڵاتیانی هەرێمی كوردستان تووشی چۆكدادان دەبن، سەربەرزین بە خۆڕاگریی ئێوە بەوەی كە خۆتان ڕاگرتووە، سوپاسی خۆڕاگریتان دەكەین و دڵنیاشتان دەكەینەوە كە ئەو كێشەیە چارەسەر دەكەین.
قوتابیانی خۆشەویست..
ئێوە بەشدارن لە قۆناغێکی مێژوویی و هەستیار لە مێژووی گەلی كوردستاندا، بەشدارن لە وەدیهێنانی ئەو خەونەی باوک و باپیرانمان سەریان لەسەر دانا و خەونیان پێوە دەبینی. ئێوە دەبنە زانا و سەرکردە و خەباتکارانی سبەینێ. ئێوە لە ئایندەدا ئەم وڵاتە بەڕێوە دەبەن و واش دەکەن گەلی کوردستان سەرفرازیی خۆی بپارێزێت. ئومێدی ئێمە و نەوەی پێش ئێمەش بە ئێوە بووە. هیوای من ئەوەیە ئێوە خۆشەویستان و ئازیزان لە ئاستی ئەو ئومێدە بن كە گەلی كوردستان بە ئێوەی هەیه.
هیوادارم زۆر بایەخ بە خوێندن بدەن، لە بواری خوێندنی باڵادا زۆر بایەخ بە بوارە تەكنیكییەكان و ئەو زانستانە بدەن كە بۆ قۆناغی ئێستای كوردستان زۆر پێویستن بۆ كوردستان، حكوومه‌تی هەرێمی كوردستانیش بە تەواوی هاوكارتان دەبێت بۆ سەركەوتن لەم پرۆسەیەدا.
دەرفەتی باش بۆ خوێندن و سەركەوتن لە بەردەم ئێوەدایە، ئەوەی بۆ ئێوە ڕەخساوە بۆ نەوەكانی پێش ئێوە نەڕەخساوە لە كوردستان، قەدری ئەم دەرفەتە بزانن، بۆیەش ده‌بێ سوود لەو دەرفەتە وەربگرن و بە شێوەیەكی زۆر سەركەوتووانە بەشداری لە پێشخستنی وڵات و كۆمەڵگەی كوردستاندا بكەن.
وه‌زاره‌تی په‌روه‌رده به تایبه‌تی گرنگییه‌كی به‌رچاو به خوێندنی پیشه‌یی ده‌دات، بۆ ئه‌وه‌ی بواری فێربوونی پیشه جۆراوجۆره‌كان بۆ خوێندكارانی بڕه‌خسێنێت و گه‌نجانی وڵات؛ هه‌موو ئه‌و كار و پیشانه فێر ببن كه خزمه‌ت به كوردستان و ئاوه‌دانكردنه‌وه و پێشخستنی وڵات ده‌كه‌ن. ئه‌مە بۆ ئه‌مڕۆ و دواڕۆژی كوردستان زۆر گرنگه و ده‌بێ هه‌موو لایه‌ك ئه‌وپه‌ڕی گرنگی پێ بده‌ن و قوتابیانمان هان بده‌ن بواره پیشه‌ییه‌كان بخوێنن.
دیسانەوە پڕ بەدڵ پیرۆزبایی لە یەكە یەكەی ئێوەی خۆشەویست دەكەم و زۆر دڵخۆشیشم كە دەبینم لەناو ئەوانەی لەسەر ئاستی هەرێمی كوردستاندا پلەی یەكەم و دووەم وسێیەمیان بە دەست هێناوە، هەروەها ئەوەی كە پلەی یەكەمی عیراق بە دەست هێناوە زیاتریان كچەكانی خۆمانن كە لە كۆڕەكانمان زیاترن. ئەمە جێی دڵخۆشیە و زۆر بەوە دڵخۆش بووم كە سەیرم كرد بینیم كچەكان لەم بوارەدا لە كوڕان سەركەوتووترن و بە داوای لێبوردنەوە، بێگومان كوڕه‌كانیش زۆر زیرەكن.
هیوادارم ئەوە بەردەوام بێت و ئێوەش لە هەموو قۆناغەكاندا سەركەوتوو بن وهەست بەوە بكەن ئەركی سەرشانتان قورسە. ئێوە ئایندەی ئەم گەلەن، ئێوە ئایندەی ئەم وڵاتەن، كوردستان بە قۆناغێكی زۆر هەستیاردا تێدەپەڕێت و بێگومان بە هاوكاریی ئێوە، به دڵسۆزیى ئێوه، بە ئیشكردنی ئێوە لە ئایندەدا، ئەم گەلە ده‌توانێ بگاته قۆناغی پێشكەوتوو.
دیسانەوە پیرۆزباییتان لێ دەكەم و هەر سەركەوتوو بن.
زۆر سوپاس.
More...
سەرۆكی هەرێمی كوردستان سەردانی سەرۆك مام جەلال دەكات
لێدوانی گوتەبێژی فەرمیی سەرۆكایەتی هەرێمی كوردستان لەبارەی دەركردنی خوشك و برایانی مەسیحی لە موسڵ
نێچیرڤان بارزانی داوای هاوكاریكردنی خێزانە ئاوارە مەسیحییەكان دەكات
دوایین هەواڵەکان
- نوێنەری حکومەتی هەرێم لە ئێران: سەردانەکەی پزیشکیان ئاماژەیە بۆ گرنگیدانی ئێران بە هەرێمی کوردستان
- هه‌رێمى كوردستان و ئێران جهخت له برهودان به پهيوهندييهكانيان دهكهنهوه
- سهرۆک نێچیرڤان بارزانی: سەردانی سەرۆک کۆماری ئێران مێژوویی بوو
- نازم دەباغ له وتووێژ له‌گه‌ڵ ئاژانسی ئیرنا: مەسعوود پزشکیان سەردانی هەولێر دەکات
- نازم دەباغ: کاتی سەردانی پزیشکیان بۆ عێراق دیار نییە
- «سەلام رشدی» له‌گه‌ڵ شاندی یهکێتی هاورده و ناردنکارانی لقی هه‌ولێر کۆبۆوه
- سه‌رۆك نێچيرڤان بارزانى: ههميشه پشتيوانى و بهرگرى له مافهكانى ئێزدييان دهكهين
- سهرۆک نێچیرڤان بارزانی له‌گه‌ڵ باڵیۆزی یهکێتیی ئهورووپا کۆبووهوه
- سه‌رۆك نێچيرڤان بارزانى له‌گه‌ڵ باڵيۆزى نهمسا كۆبووهوه
- سه‌رۆك نێچيرڤان بارزانى سوپاسى جهنهرال ڤاول ده‌كات