به‌ڕێز نێچیرڤان بارزانی سەرۆك وه‌زیرانى هه‌رێمى كوردستان، لە لێدوانێكدا بۆ ماڵپەڕی فەرمیی حكوومەتی هەرێمی كوردستان، پشتیوانی لە یاسای ژمارە 6551ی توركیا كرد لەپێناو چارەسەری ئاشتیانەی كێشەی كورد لە توركیا و پشتیوانیی خۆی نیشان دا بۆ هەنگاوە بوێرەكانی به‌ڕێز سەرۆك وەزیرانی توركیا لەپێناو كۆتاییهێنان بە شەڕ و هێنانەكایەی ئاشتی و تەباییی كۆمەڵایەتی.
ئەمەش دەقی لێدوانەكەی به‌ڕێز نێچیرڤان بارزانی، سەرۆك وه‌زیرانى هه‌رێمى كوردستانه:
هەوڵەكانی ئێستا و ئەو جموجۆڵەی هەیە بۆ هێنانەكایەی ئاشتی و چارەسەركردنی ئاشتیانەی كێشەی كورد لە توركیا مایەی دڵخۆشیی ئێمەیە و، هیوادارین ببێتە مایەی پێشڤەچوونی زیاتر بۆ هەموو گەلی توركیا.
هەروەها لەو چوارچێوەیەدا، دەركردنی یاسای ژمارە 6551 لە لایەن پەرلەمانی توركیاوە، بە پێشنیاز و پشتیوانیی پارتی داد و گەشەپێدان بە سەرۆكایەتیی بەڕێز ڕەجەب تەییب ئەردۆغان، هەنگاوێكی دیكەی زۆر گرنگە لەپێناو هێنانەكایەی ئاشتی و چارەسەركردنی كێشەی كورد لە توركیا، چونكە گفتوگۆكان و هەنگاوەكانی چارەسەری ئاشتیانەی خستە چوارچێوەیەكی سیاسیی یاساییەوە.
ئێمە وەك چۆن پێشتر پشتیوانیمان لە هەنگاوە بوێرەكانی بەڕێز ڕەجەب تەییب ئەردۆغان و حكوومەتی توركیا كردووه لەپێناو چارەسەری ئاشتیانە، پشتیوانی لەو هەنگاوە گرنگەش دەكەین و هیوادارین گەلی توركیا بەهۆی ئەو یاسایە بگاتە تەباییەكی تەواوی كۆمەڵایەتی و، ئاشتی دەرفەتی پێشكەوتنی زۆر زیاتر بۆ گەلی توركیا بڕەخسێنێت.