نماینده اقلیم کردستان عراق در تهران گفت: سردار سلیمانی بر تمام تعاملات و روابط ایران و کردها اشراف کامل داشت و به جلال طالبانی به دلیل دفاع تمام‌قد از ایران در برابر آمریکا علاقه‌مند بود.

 بەبۆنەی جەژنی نەورۆز و سەری ساڵی نوێی کوردییەوە ، پیرۆزباییەکی گەرم ئاراستەی گەلی کوردستان و بەتایبەتی پێشمەرگە قارەمانەکان و بنەماڵەی سەربەرزی شەهیدان دەکەم. هیوادارم مایەی خێر و خۆشی بێت بۆ خەڵکی کوردستان.

وەک دەزانن ئەمساڵ بە هۆی بڵاوبوونەوەی پەتای ڤایرۆسی کۆرۆنا و لێکەوتە ئابوورییەکانی، لە دۆخێکی سەختدا یادی ئەم جەژنە نیشتمانییە دەکەینەوە . سوپاستان دەکەم بۆ پابەندبوونتان بە رێنماییە تەندروستییەکان و ئەو رێکارانەی بۆ سەلامەتی و پاراستنی ئێوەی خۆشەویست گرتوومانەتەبەر لەوانەش سنووردارکردنی هاتووچۆ . دڵنیاین بە هاوکاری یەکتر ئەم قەیرانەش تێدەپەڕێنین وەک چۆن لە رابردوودا بە خۆڕاگرییەوە بەسەر زۆر باردۆخی سەختدا زاڵ بووین.

هیوادارم ئەم ئاستەنگیانەی هاتوونەتە پێشمان، ببنە دەرفەتێک بۆ بەخۆداچوونەوە و خۆپارێزیی زیاتر لە داهاتوودا و، لە ئاستی ئابووریش زیاتر هانمان دەدات بۆ بەردەوامبوون لە سەر جێبەجێکردنی پرۆسەی چاکسازی دارایی و کارگێڕی کە یەکێک لە کارە لە پێشینەکانی کابینەی نۆیەمی حکومەتی هەرێمی کوردستانە. بە تایبەتی کە ئێمە هەر لە سەرەتای دەستبەکاربوونمانەوە جەختمان لە سەر سیاسەتی هەمەچەشەنکردنی ئابووری هەرێمی کوردستان و پشت نەبەستن بە تاکە سەرچاوەیەکی داهات کردووەتەوە و، ئەم دۆخەی ئێستاش، سوورترمان دەکات لە سەر بەردەوامبوون لەم چاکسازیانەدا.

نەورۆزتان پیرۆز بێت و ئومێدەوارم کوردستانیش بەهێزتر و ئاوەدانتر بێت .

مەسرور بارزانی
سەرۆکی حکومەتی هەرێمی کوردستان
2020/3/20

 https://dfr.gov.krd/a/d.aspx?l=13&a=50258

• لە چوارچێوەی جێبەجێكردنی یاسای چاكسازی، بڕیاردرا دارایی گشتی هەرێم بە ئاراستەی خزمەتكردنی هاووڵاتییان و کەمکردنەوەی خەرجییە گشتییەكان رێكبخرێتەوە.

• پەیوەندی و هەماهەنگی لەگەڵ حكومەتی فیدراڵی بەردەوام لە پێناو دابینكردنی شایستەی دارایی و مافە دەستوورییەكانی هەرێمی كوردستان دەبێت.

مەسرور بارزانی:
• سوپاسی هەموو ئەو خاوەن موڵك و سەرمایەدارانە دەكەم كە ئامادەییان دەربڕیوە بۆ پێشكەشكردنی ئاسانكاریی پێویست بۆ هاووڵاتییانی هەرێمی كوردستان لە رووبەڕووبوونەوەی ڤایرۆسی كۆرۆنادا.

هەولێر: رۆژی سێشەممە 2020/3/17، مەسرور بارزانی سەرۆكی حكومەتی هەرێمی كوردستان سەرپەرشتی كۆبوونەوەیەكی تایبەت بە هەڵسەنگاندنی جێبەجێكردنی ڕێكارەكانی ڕووبەڕووبوونەوەی ڤایرۆسی كۆرۆنا، و پلانی حكومەت بۆ دابینكردنی پێداویستییە سەرەكییەكانی خەڵك لە خۆراك و دەرمان و سووتەمەنی و شمەكی ڕۆژانە و هەروەها دۆخی ئابووری هەرێمی كوردستان بە گشتی کرد.

لە چوارچێوەی جێبەجێكردنی رێنماییە تەندروستییەکانیش، كۆبوونەوەكە لە ڕێگەی ڤیدیۆ كۆنفرانسەوە ئەنجامدرا.

لە سەرەتای كۆبوونەوەكەدا كە قوباد تاڵەبانی جێگری سەرۆكی حكومەت و ژمارەیەك لە وەزیرەکان بەشدار بوون، سەرۆكی حكومەتی هەرێمی كوردستان بە ناوی ئەنجومەنی وەزیرانەوە سوپاسی خۆڕاگریی خەڵكی هەرێمی كوردستانی كرد و داواشی لێكردن كە بۆ پاراستنی ژیان و سەلامەتیی خۆیان بەردەوام بن لە هاوكاریی و پابەندبوون بە ڕێكار و ڕێنماییەكان.

هەروەها سوپاسی هەموو وەزارەت و لایەنە پەیوەندیدارەكانی حكومەتیشی كرد و رۆڵی هێزەكانی پۆلیس و ئاسایش و پێشمەرگە و پزیشك و كارمەند و فەرمانبەرانی تەندروستی لە ڕووبەڕووبونەوەی كۆرۆنا بەرز نرخاند. هەروەها سوپاسی هەموو ئەو خاوەن موڵك و سەرمایەدارانەی كرد كە بە دەنگ بانگەوازی سەرۆكی حكومەتەوە هاتوون و ئامادەییان دەربڕیوە بۆ پێشكەشكردنی ئاسانكاریی پێویست بۆ سووككردنی بارگرانی ئەو كەسانەی كە زەرەمەند بوون لە ئەنجامی جێبەجێكردنی ڕێكارەكانی خۆپارێزی و هەروەها پێشكەشكردنی هاوكاریی دارایی بۆ خەڵكی هەرێمی كوردستان بۆ ڕووبەڕووبوونەوەی ڤایرۆسی كۆرۆنا.

لە كۆبوونەوەكەدا بڕیاردرا كە هەڵمەتی كۆكردنەوەی پیتاك و هاوكاریی دارایی هەڵمەتێكی نیشتمانی بێت و لە ژێر سەرپەرشتی راستەوخۆی ئەنجومەنی وەزیران بێت و دواتر داهاتەكەی بە شێوەیەكی روون و دادپەروەرانە لەسەر ئاستی پارێزگا و قەزا و ناحیەكان لە پێناو پڕۆژەكانی ڕووبەڕووبوونەوەی ڤایرۆسی كۆرۆنا خەرج بکرێت. بۆ ئەم مەبەستەش، سەرجەم ئەو هەوڵانەی دەستپێكراون، لەم هەڵمەتە نیشتمانییەدا كۆدەكرێنەوە، هەروەها داواشی لە حكومەتی فیدراڵی عێراق و كۆمەڵگەی نێودەوڵەتی كرد لەمبارەیەوە هاوكاری هەرێمی كوردستان بكەن.

هەر لە كۆبوونەوەكەدا وەزارەتەكانی دارایی و ئابووری و ناوخۆ و كاروباری پێشمەرگە و دەزگای ئاسایش ڕاسپێردران لە نزیكترین دەرفەتدا میكانیزمی گونجاو بدۆزنەوە بۆ خەرجكردنی مووچە و بە تایبەتی مووچەی هێزەكانی پێشمەرگە و پۆلیس و ئاسایشی ناوخۆ بە مەرجێك ڕەچاوی رێكارەكانی خۆپارێزی لە ڤایرۆسی كۆرۆنا بكرێت.

كۆبوونەوەكە جەختی لەوەش كردەوە كە لە چوارچێوەی جێبەجێكردنی یاسای چاكسازی، دارایی گشتی ڕێكدەخرێتەوە بە ئاڕاستەی خزمەتکردنی هاووڵاتییان و دابینكردنی بژێوییان و خەرجییە گشتییەكانیش كەم دەكرێنەوە، كە ئەمەش بەشێكە لە كارنامەی كابینەی نۆیەمی حكومەتی هەرێمی كوردستان.

هەروەها بڕیاردرا كە پەیوەندی و هەماهەنگی لەگەڵ حكومەتی فیدراڵی بەردەوام بێت لە پێناو دابینكردنی شایستەی دارایی و مافە دەستوورییەكانی هەرێمی كوردستان.

هەر لە كۆبونەوەكەدا بڕیاردرا بەم زووانە كۆبوونەوەیەكی تایبەت بە نەوت و گاز ئەنجام بدرێت بە مەبەستی تاوتوێكردنی دەرفەتەكانی ڕێكخستنەوەی داهات و خەرجییەكانی نەوت وگاز بە ڕەچاوكردنی بارودۆخی دارایی و لێکەوتە داراییە نەرێنییەکانی ڤایرۆسی كۆرۆنا و دابەزینی نرخی نەوت لە بازاڕە جیهانییەكان.

https://dfr.gov.krd/a/d.aspx?l=13&a=50252

"نازم دەباغ" نوێنەری حکوومەتی هەرێمی کوردستان لە ئێران لە تەنیشت جەخت کردنەوەی سەرۆکی پارتی دیموکراتی کوردستانی عێراق لە خستەڕویی دووبارەی ئەم بابەتە گوتی: ئەگەر مەسەلەی کیمیابارانکردنی هەڵەبجە بەدواداچوونی یاسایی بۆ نەکرێت، ئەم بابەتە دووبارە دووپات دەبێتەوە.

"نازم دەباغ" نوێنەری حکوومەتی هەرێمی کوردستان لە ئێران، لە وڵامی دواکاریی مەسعوود بارزانی لە دەوڵەتی عێراق بەلەبەرچاوگرتنی قەرەبووکردنەوەی خەسارەی هێرشی کیمیایی هەڵەبجە بە پەیامنێری سیاسی ئاژانسی بۆڕنای ڕاگەیاند: ئەرکی بەرپرسانی کورد ئەوەیە کە وەبیری دەوڵەتی عێراق بهێننەوە کە لە حکومەتەکانی پێشوودا و بە تایبەت لە سەردەمی سەدام حسێندا چ نەهامەتییەک بەسەر کوردەکان هاتووە.

ئەو لە درێژەی قسەکانیدا گوتی: لە پەیوەندیی وڵاتەکاندا مەسەلە سیاسی و مێژووییەکان بوونی هەیە و بۆ نموونە مەسەلەی یەگجار زۆر لە پەیوەندیی نێوان ئێران و عێراق و یا وڵاتانی دیکەدا بوونی هەیە کە ئەم مەسەلە و گیروگرفتانە دەبێت لە بۆنە جۆراوجۆرەکاندا بخرێتەڕوو. هەر لەم پێناوەدا پێدانی قەرەبووکردنەوەی کیمیابارانکردنی هەڵەبجە، غەرامەیەکە کە هەمیشە دەبێت وەبیر بهێندرێتەوە وەکوو کوشتنی ئەرمەنییەکان لە تورکیا کە بابەتێکی بڕەودار و ئابڕوومەندایە.

نوێنەری حکوومەتی هەرێمی کوردستان لە تاران دەربارەی بە هۆی درێژبوونەوەی ناساندنی سەرۆک وەزیری نوێی لە عێراق ڕایگەیاند: بە لەبەرچاوگرتنی یاسای بنەڕەتی عێراق، سەرۆک وەزیر دەبێت لە نێوان شیعەکانی ئەم وڵاتە دەستنیشان بکرێت، ئەم ڕەوتە هێشتا ڕێکنەکەوتوون و تا ئەمڕۆ کە دوایین مۆڵەتە هیچ ڕێکارێک لەم پێناوە نابینرێت. لەڕاستیدا هەواهەنگی، ڕێککەوتن و هاوڕایی لە نێوان گرووپە شیعەکاندا لە عێراق بۆتە هۆی درێژبوونەوەی ناساندنی سەرۆک وەزیری نوێی لە عێراقدا.

دەباغ سەبارەت بە هەڵوێستی کوردەکان لە بەرانبەر سەرۆک وەزیری نوێیدا گوتی: یەکێک لەو مەرجانەی کە فڕاکسیۆنی کورد وەکوو بەشێک لە ڕێکخراوەی پەڕڵەمانی عێراق بۆ سەرۆک وەزیری داهاتوو لەبەرچاوگیراوە ئەوەیە کە هەر کەس دەبێتە سەرۆک وەزیر، دەبێت لە چوارچێوەی یاسای بنەڕەتی عێراقدا پابەند بە داواکاری و مافەکانی کوردەکان بێت.

"نازم دەباغ" نوێنەری حکوومەتی هەرێمی کوردستان لە تاران سەبارەت بە هەڵسەنگاندی هاوپەیمانی شیعەکان لەگەڵ کوردەکان بۆ ناساندنی سەرۆک وەزیری نوێی گوتی: ئەم هاوپەیمانییە دەبێت پێکبێت و هیوادارم کە پێکبێین، بەڵام تا ئەم کاتە هێمایەک لە پێکهێنانی ئەم هاوپەیمانییە بوونی نییە.

پەیامنێر: فرشتە سائمی

لێنکی هەواڵ:

https://www.borna.news/بخش-سیاسی-3/978487-طرح-ادعای-جبران-خسارت-ناشی-از-شیمیایی-کردن-حلبچه-مسئله-حیثتی-ردها-است-اختلاف-نظر-شیعیان-عراقی-منجر-به-طولانی-شدن-معرفی-نخست-وزیر-شد

 k24 هه‌ولێر: // نووسینگه‌ی راگه‌یاندنی سه‌رۆك وه‌زیرانی هه‌رێمی كوردستان رایگه‌یاند، سەرۆکی حکومەتی هەرێمی کوردستان مەسرور بارزانی مووچە و شایستە داراییەکانی خۆی بە هەڵمەتی رووبەڕووبوونەوەی ڤایرۆسی کۆرۆنا و هاوکاریکردنی هاووڵاتییانی کەمدەرامەت دەبەخشێت.

سەرۆکی حکومەتی هەرێمی کوردستان مەسرور بارزانی لە کاتێکدا سوپاسی هەموو ئەو کەسانە دەکات کە لە هەڵمەتی هاوکاریکردنی رووبەڕووبوونەوەی ڤایرۆسی کۆرۆنا و خەڵکی هەژار و کەمدرامەت بەشدارن.

لەم چوارچێوەیەشدا سەرۆکی حکومەت بڕیاریدا مووچە و شایستە داراییەکانی خۆی بە هەڵمەتی رووبەڕووبوونەوەی ڤایرۆسی کۆرۆنا و هاوکاریکردنی هاووڵاتییانی کەمدەرامەت ببەخشێت.

https://www.kurdistan24.net/so/news/2a9bfe19-2144-44b7-a35a-65d52b15e6d6

ھەولێر، ھەرێمی كوردستان، عێراق (GOV.KRD) – مەسرور بارزانی سەرۆكی حكومەتی ھەرێمی كوردستان لە پەیامێكدا ھێرشی رۆژی چوارشەممە ١١ ئاداری ٢٠٢٠ بۆ سەر سەبازگەی تاجی لە عێراق شەرمەزار دەكات:

بە تووندی ئەو هێرشە شەرمەزار دەکەین کە دوێنی شەو کرایە سەر سەربازگەی (التاجی) عێراقی و بووە هۆی گیان لە دەستدان و برینداربوونی ژمارەیەک راهێنەر و راوێژکاری هێزی هاوپەیمانان.
پرسەو سەرەخۆشی لە کەسوکار و هاوکارەکانیان دەکەم و هیوای چاکبوونەوەی خێرا بۆ بریندارەکان دەخوازم.

لە کاتێکدا کە هێشتا هەڕەشەی تیرۆر لە عێراق و ناوچەکەدا بەردەوامە، ئەم جۆرە کردارانە زەمینە بۆ بەهێزبوونەوەی گرووپە تووندرۆکان دەرەخسێنن. لە ناو عێراق کێشە تەندروستی و ئابووری و ئەمنییەکان فشاری زۆری بۆ سەر هاوولاتیان دروست کردووە، بۆیە ئالۆزترکردنی دۆخەکە بە زیانی عێراق و سەرجەم گەلانی ناوچەکە دەکەوێتەوە.

خوازیارین بە هەماهەنگیی هەموو لایەنە نیشتمانی و دڵسۆزەکانی ناوچەکە و هاوپەیمانان، رێگە لە هەر هەوڵێکی تێکدەرانە بگیرێت و تواناکان بۆ سەقامگیری و ئاشتی و باشترکردنی گوزەرانی هاووڵاتیان تەرخان بکرێن.

مەسرور بارزانی
سەرۆکی حکومەتی هەرێمی کوردستان
٢٠٢٠/٣/١٢

https://gov.krd/government/the-prime-minister/activities/posts/2020/march/%D8%B1%D8%A7%DA%AF%DB%95%DB%8C%DB%95%D9%86%D8%AF%D8%B1%D8%A7%D9%88%DB%8E%DA%A9-%D9%84%DB%95-%D8%B3%DB%95%D8%B1%DB%86%DA%A9%DB%8C-%D8%AD%DA%A9%D9%88%D9%85%DB%95%D8%AA%DB%8C-%D9%87%DB%95%D8%B1%DB%8E%D9%85%DB%8C-%DA%A9%D9%88%D8%B1%D8%AF%D8%B3%D8%AA%D8%A7%D9%86%DB%95%D9%88%DB%95/

 • قوباد تاڵەبانی: چاكسازییە‌كانمان بە‌ردە‌وامی پێ دەدەین و داهاتمان فرە‌چە‌شن دەکەین

• جێگری سەرۆک وەزیران: جێبەجێکردنی یاسای چاكسازی كە‌ لە‌ پە‌رلە‌مانی كوردستان پە‌سە‌ند كراوە‌، یە‌كێ لە ‌پلانە‌كانمان لە‌ماوە‌ی داھاتوودا دەبێت.

هەولێر، هەرێمی کوردستان، عێراق (GOV.KRD) - رۆژی چوارشە‌ممە ١١ ئاداری ٢٠٢٠، قوباد تاڵە‌بانی جێگری سە‌رۆكی ئە‌نجومە‌نی وە‌زیران، سە‌رپە‌رشتیی كۆبوونە‌وە‌یەکی تایبەت بە جێبەجێکردنی چاکسازییەکانی حکومەت کرد. لە‌ كۆبوونە‌وە‌كە‌دا، ھە‌ڵسە‌نگاندێكی ورد بۆ رەوشەکە و دەرهاویشتەکانی بڵاوبوونە‌وە‌ی ‌ڤایرۆسی كۆرۆنا و چۆنییەتی جێبەجێ کردنی چاکسازییەکانی حکومەتی هەرێم لە سێکتەرە جیاجیاکاندا كرا.

جێگری سە‌رۆكی ئە‌نجومە‌نی وە‌زیران، ئاماژە‌ی بە‌وە‌دا کە دەبێت‌؛ چاكسازییە‌كانمان بە‌ردە‌وامی پێ بدەین و داهاتمان فرە‌چە‌شن بکەین و یاسای چاكسازی كە‌ لە‌پە‌رلە‌مانی کوردستان پە‌سە‌ند كراوە‌، یە‌كێك بێت لە ئەولەویاتەکانمان کە لە‌ماوە‌یەکی نزیکدا بیخە‌ینە‌ بواری جێبە‌جێ كردنە‌وە‌."

لەکۆبوونەوەکەدا، بڕیاردرا وە‌فدێك سە‌ردانی بەغدا بكات بۆ ئەوەی پێکەوە هەماهەنگ بین بۆ ئەم رەوشە هەنووکەییە، ھە‌روە‌ھا وە‌زارە‌تی دارایی راسپێردرا بۆ ھە‌فتە‌ی ئایندە‌ راپۆرتێكی ورد ئامادە‌ بكە‌ن سەبارەت بە چۆنییەتی ئەنجامدانی قۆناغەکانی چاکسازیی.

لەبەشی دووەمی کۆبوونەوەکە، باس لەکەرتی کارەبا کرا و چۆنییەتی چاککردنی ئەو کەرتە لەرووی پێدانی کارەبا بەهاوڵاتییان و ئەنجامدانی چاکسازی لەو سێکتەرە. وەزیری کارەبا ڕاپۆرتێکی لەسەر بەرهەمهێنان و دابەشکردن و کۆکردنەوەی داهاتەکانی وەزارەتیان پێشکەش کرد، لەو رووەووە پێشنیار و بۆچوونەکان خرانە روو و بڕیار درا چی پێویستە ئەنجام بدرێت بۆ ئەوەی ئەو سێکتەرە باشتر رێکبخرێتەوە.

ھە‌روە‌ھا بڕیاردرا لە ماوەی دوو هەفتەدا وەزارەتی کارەبا راپۆرتێکی زانستی ئامادە بکات وپلانەکانیان بۆ چاکسازی وباشتر خزمەتکردنی هاوڵاتییان لە پێدانی کارەبا پێشکەش بکەن.

 https://gov.krd/government/deputy-prime-minister/activities/posts/2020/march/%D8%AC%DB%8E%DA%AF%D8%B1%DB%8C-%D8%B3%DB%95%D8%B1%DB%86%DA%A9-%D9%88%DB%95%D8%B2%DB%8C%D8%B1%D8%A7%D9%86-%D8%B3%DB%95%D8%B1%D9%BE%DB%95%D8%B1%D8%B4%D8%AA%DB%8C-%DA%A9%DB%86%D8%A8%D9%88%D9%88%D9%86%DB%95%D9%88%DB%95%DB%8C-%DA%86%D8%A7%DA%A9%D8%B3%D8%A7%D8%B2%DB%8C%DB%8C%DB%95%DA%A9%D8%A7%D9%86%DB%8C-%D8%AD%DA%A9%D9%88%D9%85%DB%95%D8%AA%DB%8C-%DA%A9%D8%B1%D8%AF/

نازم عومەر دەباغ
(مامۆستا نازم)

بەندە بە بڕیاری مەكتەبی سیاسی یەكێتی بۆ بەشداریی لە چالاكییەكانی دەرەوە، دژی بەكارهێنانی چەكی كیمیایی لە مانگی نیسانی 1990 بە شاندێك رەوانەی پاریس كرام، لەبەر هەندێك هۆكار بۆ ماوەی چەند مانگێك لە پاریس مامەوە.
بۆ مێژوو پێویستە بوترێت جەنابی رەوانشاد مام جەلال، ئەوكات لە دیدارەكانی دەرەوەی لە لەندەن و لە پاریسیش كە بەندە لەگەڵیدا بووم، باسی لەوە دەكرد كە سەدام پەلاماری كوێت دەدات و دەیگرێت و ئەوەی جێگای سەر سوڕمان بوو لای فەرەنسییەكان پێیان وابوو ئەوە خەونە، كە بەڕێز د.ئەحمەد بامەڕنی وەكو نوێنەری یەكێتی بەشدار بوو.

نامەکەی مام جەلال بۆ سەرکردایەتی چی تێدابوو؟
ئەوەبوو لە 2/8/1990 سەدام پەلاماری كوێتی-دا و كوێتی داگیركرد. بەندە كارەكانم تەواو بوو، بڕیارمدا بگەڕێمەوە بۆ كوردستان، جەنابی مام جەلال پێی باش بوو لە سوریا سەردانێكی بەڕێزیان بكەم و لەوێوە بگەڕێمەوە بۆ كوردستان.
لە رۆژی 5/8/1990 لەرێگای فڕۆكەوە لە پاریس گەڕامەوە و چووم بۆ دیمەشق، نزیكەی هەفتەیەك مامەوە، لەو ماوەیەدا چەند جارێك بە خزمەت مام جەلال گەیشتم و بەڵێنی دا كە نامەیەك بۆ مەكتەبی سیاسی و بەڕێز رەوانشاد كاك نەوشیروان بنووسێت. نامەكە دوو خاڵی گرنگی تێدا بوو: یەكەمیان سەرنجی بوو لەسەر هەندێك بابەت و قسە و قسەڵۆك لەناو سەركردایەتی و مەكتەبی سیاسی، دووەم لەسەر دەربڕینی خۆشحاڵی خۆی بۆ ئایندە دوای گرتنی كوێت، كە بۆچوونەكانی وابوو لە سەدام ناگەڕێن لە كوێت بمێنێتەوە و بە دڵنیاییەوە پەلاماری دەدەن و دەری دەكەن، بۆیە پێویستە یەكێتی خۆی ئامادە بكات لەكاتی دەركردنی عیراق لە كوێت و شكاندنی هێزەكانی، جەماوەر و هێزی پێشمەرگە سازو ئامادە بكرێت بۆ سەركردایەتیكردنی راپەڕین و هاوكارییەكی تەواو لەگەڵ ئەندامانی بەرەی كوردستانی. هەروەها نووسیبووی كە ئەویش لە دەرەوە كار لەسەر ئەوە دەكات و لەبەرەی كوردستانی رێككەون لەسەر شێوازی سەركردایەتی كە جەنابی مام جەلال لە دەرەوە سەركردایەتیی بەرەی كوردستانی بكات و ئەگەر راپەڕینیش كرا، ئەوا جەنابی كاك مەسعود لە ناوەوە سەركردایەتیی پێشمەرگە بكات.
دیارە لە 12/8/1990 گەڕامەوە لە رێگای دیمەشق – تاران و لە تاران چاوم بە بەڕێز كاك قادری حاجی عەلی كەوت و دواتر پێكەوە گەڕاینەوە سەركردایەتی یەكێتی لە قاسمەڕەش.

کۆبوونەوەی سەرکردایەتی بڕیاریدا
كۆبوونەوەیەكی مەكتەبی سیاسی و سەركردایەتی كراو خاڵەكانی نامەكەی مام جەلال گفتوگۆی لەسەر كرا، هەندێك راو بۆچوون هەبوو كە جیاوازیی تێدابوو، بەتایبەتی لەسەر شێوازی گفتوگۆ لەگەڵ سەدام حسێن كە هەموویان جگە لە بەندە و مامۆستا چەتۆ پێچەوانەی ئەو بۆچوونانە بووین.
لە بابەتی راپەڕین و خۆسازدان، هەمووان یەك رابووین و بڕیاردرا كاك نەوشیروان سەرپەرشتیی بەرنامەی داڕشتنی راپەڕین بكات لەگەڵ رێكخستنەكانی فەرماندەیی گشتیی هێزی پێشمەرگە كە ئەوكات بە بەرپرسیارێتی بەڕێز كاك ملازم عومەر و ئەندامێتی هەڤاڵان كاك شێردڵ حەوێزی، نەقیب خەلیل، كاك شێخ جەعفەر، مام رۆستەم، كاك حامیدی حاجی خالید و چەند كادر و فەرماندەی بەتواناش لە هێزی پێشمەرگە و مەڵبەندەكان هاوكار بوون، هەروەها رێكخستنەكانی ناو شاریش بۆ دروستكردنی شانە چەكدارەكان.
یەكێتیی نیشتمانیی كوردستان كەوتە پەیوەندیی و ئەنجامدانی چەندین كۆبوونەوە لەگەڵ قەوارە سیاسییەكانی كوردستان بەتایبەت پارتی دیموكراتی كوردستان.
لە مانگی 9/1990 دا، سەردانێكی پاریسم كرد، لەو كاتەدا جەنابی كاك مەسعود بە یاوەریی شاندێكی بەرز هاتبوونە قاسمەڕەش و میوانی مەكتەبی سیاسیی یەكێتی بوون و لەوێ بەرنامەی تەواوی شێوازی دابەشكردنی میحوەرەكان دەستنیشان كرا.

بەرنامەی راپەڕین بەمجۆرە داڕێژرابوو
بە پێی ئەو بەرنامەیە كە خوالێخۆشبوو كاك نەوشیروان دایڕشتبوو، بڕیاری لێ دەدرێت و هەموو میحوەرەكان بەرپرسیان بۆ دیاری دەكرێت لەسەر بنەمای كێ زۆرترین هێزی هەیە، بەرپرسی یەكەم بۆ ئەوان دەبێت و لایەنەكەی دیكە دەبێتە جێگر و هەروەها حساب بۆ لایەنەكانی تریش بكرێت.
ئەوەی لێرەوە گرنگە لە كۆبوونەوەكانی بەرەی كوردستانی لەسەر پێشنیازی مام جەلال و یەكێتی، بڕیاردرا لە جیاتی دەركردنی بەیاننامەی لێبووردنی گشتی، بانگەوازی ئاشتبوونەوەی گشتی رابگەیەندریت، بۆیە لە سەرەتاوە چەكدارەكانی پاڵ حكومەتی بەعس، زووتر هەستیان بەو دڵنیاییە كرد و لەگەڵ ئەوەشدا زۆرترین زەرەرمەند لە دەستی ئەو چەكدارانەی سەربە حكومەتی عیراق یەكێتیی نیشتمانیی كوردستان بوو كە سەدان شەهیدی پیشمەرگە و فەرماندە و رێكخستنی بەدەست ئەوان لەدەستدابوو.
كاتێك لە مانگی 10/1990 گەڕامەوە بۆ سەركردایەتی، باس لەوە كرا كە هەموو میحوەرەكان بەرپرسی بۆ دانراوە و هەر ئەندامێكی مەكتەبی سیاسی كراوە بە بەرپرسی پارێزگایەك جگە لە دهۆك كە كەسی بۆ دانەنرابوو.
دیارە ئەوكات جەنابی كاك كۆسرەت ئەندامی مەكتەبی سیاسی نەبوو، بەڵام وەكو ئەندامی سەركردایەتی بە شایستەیی و ئازایی و بەتوانایی لە سەركردایەتی كردنی شاری هەولێر، ئەو بەرپرسیارێتییەی پێدرا.
كاك ملازم عومەر بۆ پارێزگای سلێمانی و كاك فەرەیدون عبدالقادر بۆ كەركوك و وەكو باسمان كرد كاك كۆسرەت بۆ هەولێر و جەنابی كاك نەوشیروانیش وەكو فەرماندەی گشتیی هێزی پێشمەرگەی كوردستان لەگەڵ جەنابی كاك مەسعود.
منیش بەلامەوە سەیر بوو كە شوێن بۆ بەندە دیاری نەكرابوو، چوومە لای كاك نەوشیروان چاوەرێی كۆبوونەوەم دەكرد، پرسیارم كرد ئەرێ بۆچی هیچ شوێنێك و كارێك لە بەرنامەی راپەڕین بۆ بەندە دیاری نەكراوە؟
لەوەڵامدا وتی: نەمانزانی وازوو دێیتەوە، لەگەڵ ئەوەی وتم كاك نەوشیروان خۆت دەتزانی مۆڵەتی من یەك مانگ بوو وا هاتمەوە، (دیارە ئەو وای دانابوو كە منیش وەكو ئەو برادەرانەی دەچوونە دەرەوە، درەنگ دەگەڕانەوە وا دەكەم).

نەمویست لەو سەروەرییە بێبەش بم
وتی: باشە تەنها دهۆك ماوە، ئەگەر دەچیت، منیش بەشانازییەوە وتم من پێشمەرگەم، هەر شوێنێك بێت دەچم و نامەوێت لەم سەروەرییە بێبەش بم. وتی: باشە.
ئەوكات جەنابی كاك ملازم عومەر و عەقید دارا تۆفیق، لە ماڵەكەی بوون. وتم: باشە چی بكەم بۆ دهۆك، خۆ من نەكەس دەناسم و نە هێزێكی ئەتۆی پێشمەرگە هەیە لەگەڵ خۆمدا بیبەم، پێویستم بە هاوكاریی جەنابت و مەكتەبی عەسكەرییە.
دیارە كاك نەوشیروان وەڵامێكی دامەوە كە دڵخۆشكەر نەبوو، بەڵام جەنابی كاك ملازم عومەر وتی: نازم خەمت نەبێت، ئەگەر بچیت من هاوكاریت دەكەم، لێرەوە جارێكی تر سوپاسی كاك ملازم عومەر دەكەم.
هەر لەوێ بڕیاریدا لەگەڵ خوالێخۆشبوو نەقیب خلیل، هەموو ئەو پێشمەرگانەی بادینان كۆبكەینەوە، كاك نەقیب خلیل وەكو فەرماندەی گشتیی هێزی بادینان و بەندەش وەكو بەرپرس و سەرپەرشتیار دەستبەكار بووین.
داوای هێزێكی تایبەتم كرد كە لەگەڵماندا بێت، ئەوە بوو بە بڕیاری كاك ملازم عومەر و بە ئامادەیی كاك عوسمان شارستێنی بە هێزێكی خۆیەوە كە لەگەڵیدا بوون ‌و نزیكەی 50 پێشمەرگە دەبوون، لەگەڵماندا بن. كەوتینە پەیوەندیی و خۆسازدان، بەگشتی توانرا هێزێكی 180 كەسی ئامادە بكەین لە پێشمەرگە قارەمانەكانی ناوچەی بادینان كە لای خۆمان لە ئۆردوگای زێوە و ئێران بوون.

تەنها برادەرانی کۆمەڵە لەبادینان هەبوون
ئەو چەند مانگە لە سەرەوە خەریكی پلان و بەرنامە بووین، هەروەها سەرقاڵی ئاگاداركردنی رێكخستنەكانی یەكێتیی نیشتمانیی كوردستان و مەفرەزە پارتیزانەكانی یەكێتی بووین لە ناوچەی بادینان كە بەسەرپەرشتی شەهید حەسەن سەلیم و كۆمەڵێك لە هەڤاڵانی لەوێ بوون.
بێگومان دەبێت ئەوەش بڵێن كە ئەو سەردەمە تەنها وەكو رێكخستنی برادەرانی كۆمەڵە لەوێ بوون و باڵادەست بوون.
لەپەیوەندیدا لەگەڵ برادەرانی پارتی
رۆژێك لە كۆتایی مانگی شوباتی 1991دا جەنابی كاك كۆسرەت كە ماڵەكەی لە مەهاباد بوو و لەباڵاخانەیەكدا پێكەوە لەگەڵ ئێمە دەژیان و تەنها دیوارمان هاوبەش بوو، وتی: با بچینەوە مەهاباد، لەویشەوە سەردانێكی راژان و جەنابی كاك مەسعود بارزانی بكەین، بۆ چەند رۆژێك پێكەوە چووینە مەهاباد، پێموایە كۆتایی مانگی شوبات بوو، شەو درەنگانێك كاك كۆسرەت لە دەرگای نێوان ماڵی خۆی و ئێمەدا وتی: ئەگەر مزگێنییەكی خۆشت پێ بڵێم چیم بۆ دەكەی ؟ وتم: دڵنیابە بەپێی شایستە و دڵخوازی خۆت.
وتی: وا هاوپەیمانی لە كوێتی دا، هەر دەبێ بەیانی سەردانی كاك مەسعود بكەین و بگەڕێینەوە بۆ قاسمەڕەش و خۆمان ئامادە بكەین.
پێكەوە بەیانییەكەی چوینە راژان و لەوێ چاومان بە كاك مەسعود و بەشێك لە ئەندامانی مەكتەبی سیاسی پارتی كەوت. باس لە بارودۆخ كراو كاك كۆسرەت داوای لە جەنابی كاك مەسعود كرد و وتی: بەپێی رێكەوتن، پێویستە جەنابت بێیتە قاسمەڕەش و سەركردایەتیمان بكەیت، هەر وەكو مام جەلال-یش لە دەرەوە سەركردایەتیی بەرەی كوردستانی دەكات.
هەر لەوێوە لە رێگای پیـرانشار (خانە) گەڕاینەوە بۆ قاسمەڕەش و كەوتینە خۆسازدان و كۆبوونەوە و پەیوەندیكردن بە پارتیزانەكانەوە كە لە خوارەوە بوون، لە هەموویان نزیكتـر لە سەركردایەتی كە وەكو دەروازەی پەیوەندیی و راپەڕینیش بوو، مەفرەزەی پارتیزان كاك عەزیز بەگ و كوردەی كوڕی بوو.
لەبەرنامەی پارتیزانەكاندا بەڕێز كاك نەوشیروان داوایكرد كاك عەزیز بەگ بۆ ناوچەی رانیە كە پیاوێكی شارەزاو دڵسۆز بوو ناویشی نا بە هەڵۆی پیـر كە لە رێگای دەزگای بێسیمەوە كە لەلایان بوو پەیوەندی كراو وتیان ئامادەین و لە پەیوەندیداین لەگەڵ شانە چەكدارەكان و سەركردایەتی.
بەرەبەیانی رۆژی 5/3/1991 هەواڵ هات كە لە رانیە راپەڕین بووە و شاری رانیە پاككراوەتەوە، بەڵام بەداخەوە كاك عەلی نەبی كۆمەڵێك كەسی تر شەهیدبوون.
لە مەكتەبی سیاسی كۆبوونەوە كراو بڕیاردرا هێزەكانی قاسمەڕەش بە زوویی بكەونەڕێ‌ و ئاگاداری كاك مەسعودیش كرا كە راپەڕین دەستی پێكرد و چاوەڕێی ئێوە دەكەین.
رۆژی 6/3/1991 بڕیاڕ درا هێزەكەی بەندە لەگەڵ ئەوانەی دیكەدا كە دەیانەوێت بچینە خوارەوە لە ناویاندا خۆشكی بەڕێز هێرۆخان ئەوكات لە قاسمەڕەش بوو لەگەڵ هێزەكەی سكرتارییەت ئامادەبوون و هەموو پێكەوە بەڕێكەوتین بۆ رانیە، لەلایەن كاك عەزیز بەگەوە پێشوازیمان لێكرا.

بڕیاری ئازادکردنی ناوچەکان درا
سەرلەبەیانییەكەشی جەنابی كاك نەوشیـروان گەیشتە رانیە كە بەڕێزیان كاك كۆسرەت و شەهید حەسەن كوێستانی و كاك شێردڵ حەوێزی ‌و كۆمەڵێك كادر و فەرماندەی هێزی پێشمەرگەشی لەگەڵدا بوو.
لە رۆژانی 7 و 8 و9 و10ی 3/1991، هەموو ناوچەی چوارقوڕنە، سەروچاوە و تا دەگاتە كۆیە و سلێمانی ئازاد كران.
دوای هاتنە خوارەوەی جەنابی كاك مەسعود و ئازادكردنی بێتواتە، كاك نەوشیـروان و كاك مەسعود بارەگایان بردە بێتواتە و رۆژی 10/3 بەندە چووم سەردانی كۆیە بكەم، لەوكاتەدا بروسكەیەكمان لە جەنابی كاك مەسعودەوە بۆ هات كە ئامادەیین و بڕۆین بەرەو بادینان، چونكە بڕیارە 11/3 شاری هەولێر رزگار بكرێت و لەوێشەوە بچین بۆ دهۆك.
دەستبەجێ گەڕامەوە رانیە و بێتواتە و چووین بۆ لای كاك مەسعود، كاك نەوشیـروان ئاگاداری كردین كە ناوچەی حەریر و باتاس و رواندزیش ئازادكراون، بۆیە دەكرێت بچینە حەریر و لەوێوە خۆمان ئامادە بكەین بۆ بادینان و دهۆك لەگەڵ شەهید حەسەن كوێستانی و شەهید دڵشاد حەسەن و شەهید تەحسین كاوانی كە هەرسێكیان گیانی پاكیان بە كورد و یەكێتی و پێشمەرگە سپارد و شەهید بوون.
رۆژی 11/3 لە حەریر پەیوەندیم پێوەكردن و شەوی 11 لەسەر 12ی 3، بەدوای كاك عەبدولـموهەیمەندا دەگەڕام، چونكە سەركردایەتیی هێزەكەی پارتی بوو بۆ بادینان، تا بزانم بەرنامەمان چۆن دەبێت بۆ رۆیشتن. شەو لە ماڵی حسێن ئاغای سەرچیا چاوم بە بەرپرسێكی ئێرانی كەوت كە لەگەڵیدا بوو، دەمناسی. ویستم بە ناوی خۆی سڵاوی لێ بكەم، دەمم نەكردەوە وتی: (حاجی عەلی!) بە زەردەخەنەوە ئەحواڵیم پرسی و بەخێرهاتنی حاجی عەلیم كرد.
دیاربوو باس لە بارودۆخی بێخمە كرا و منیش وتم: «من خۆمی پێوە مەشغوڵ ناكەم، نامەیەكم دا بە كاك عومەر ئاغای سورچی وەكو نوێنەری یەكێتی، دیارە مەبەستم هەبوو، بروسكەشم بۆ شەهید حەسەن و شەهید دڵشاد كرد كە بەپەلە نوێنەریان بنێرن بۆ دەستبەسەر داگرتنی كەلو پەلی بێخمە.
وا باسكرا كە دەبێت چاوەڕێ بكەین تا هەولێرو رێگای فائیدە كۆنتـرۆڵ دەكرێت، ئەوكات لەگەڵ هێزەكەی برادەرانی پارتی بەڕێبكەوین بۆ دهۆك.
كەوتمە بیر كردنەوە لەوەی ئەگەر وا بڕوات، دەبێت هێزەكەی یەكێتی وەكو پاشكۆ لەگەڵ هێزەكەی پارتیدا بچینە دهۆك، هێزەكەی ئەوان نزیكەی 1500 تا 1600پێشمەرگە بوو.

بەمجۆرە لە پردی قەندیل پەڕینەوە
دوعا خوازیم كرد و چوومە حەریر بۆلای شەهید تەحسین كاوانی و پێم وت: كاك تحسین كارێكمان پێ ناكرێت تا ئێمە زووتر بڕۆین لە رێگای ئاكرێ؟، وتی: با، بەڵام تۆ ئامادەی بچیت؟ وتم بەدڵنیاییەوە دەچم. وتی: ئەمشەو پەیوەندیی دەكەم و بەیانی ئاگادارتان دەكەمەوە.
ئەوە بوو پەیوەندیی بە رێكخستنەكانی ئاكرێ-وە كرد كە كەسێك ئەوكات بەناوی نەقیب فەیسەڵ كە ئەفسەری پۆلیس بوو، سەرپەرشتی شانە چەكدارەكان و رێكخستن بوو، وتی: وادەكەین 13/3 سەرلەبەیانیەكەی دەست پێ بكەین و دڵنیای دا كە سەركەوتوو دەبین.
بۆ نیوەڕۆكەی ئۆتۆمبێل دەهێنینە سەر رێگا لە ناوچەی پردی قەندیل و دەیان پەڕێنینەوە. لەڕاستیدا زۆر راستگۆیانە ئەو كارەیان كردو یەكەم نەقیب خەلیل پەڕییەوە و دوا بەدوای یەك هەموومان. بۆ ئێوارەكەی ئێمە لە ئاكرێ نانمان خوارد و حەواینەوە.
لێرەدا پێویستە باسی شانە چەكدارەكانی هێزەكەی كاك سوارەی عەباس ئاغا بكەین كە ئەوكات لەلایەن حكومەتی عیراقەوە پاراستنی ناوچەی شێخانیان پێ سپێردرا بوو. دەستبەجێ كە زانییان ناوچەكەیان چۆڵكرد و كارئاسانیان بۆ كردین و هاوكارییان كردین.
بۆ رۆژی دواتر لەرێگای شێخانەوە بە ئۆتۆمبیل بەرەو دهۆك بەڕێكەوتین. دیارە شەوەكەی لە رێگای بێسیمەوە ئاگاداریان كردینەوە كە دهۆكیش ئامادەیە و بەیانی 14/3/1991 كاتێك لەگەڵ هێزەكەدا گەیشتینە دهۆك، شاری دهۆك بە تەواوی ئازادكرابوو، برادەرانی ریكخستنی شار و پارتیزانەكان دەستیان بەسەر دهۆكدا گرتبوو. ئەوانەی كە لەبیرمە وەكو بەرپرسی رێكخستنەكانی یەكێتی، كاك عارف روشدی و كاك حسێن برای شەهید نەقیب خلیل، هەڤاڵ سدیق ئامێدی، سادق عومەر سندی، عەلی شەعبان و چەند كادرێكی تر.

بروسکەی کۆتایی نێردرا  بۆ کاک نەوشیروان
لە فەرمانگەی ئاگركوژێنەوەی دهۆك كە وەكو بارەگا دیاری كرابوو، هەر لەوێ كاك سەركەوت كە كادرێكی خوێندەوار بوو، بەرپرسیاری دەزگای بێسیمەكەمان بوو، زوو بێسیمەكەی دامەزراند و پەیامێكی بۆ كاك نەوشیروان نارد كە ئەوكات كاك نەوشیروان بەناوی مەولود و بەندە بەناوی سەهەند بوو. لە سەهەند-ەوە بۆ مەولود، ئاگاداری كردەوە كەوا سەعات 2:35 لە دوای نیوەڕۆی ئەمڕۆ 14/3 ئێمە گەیشتووینەتە دهۆك و شارەكە بەتەواوەتی ئازاد كراوە.
جگە لە هێزەكانی یەكێتی بە لێپرسراوێتی حەسەن سەلیم كە بەرپرسی هێزی پارتیزانەكانی ئەوێ بوو، هێزەكانی برادەرانی پارتیش ئەوكات بە سەرپەرشتیی بەڕێز كاك دكتۆر كەمال كەركوكی و لەگەڵ پارتی گەل بەشداربوون لە ئازادكردنی دهۆكدا.
كاتێك بروسكەكە دەگاتە دەست كاك نەوشیروان لەگەڵ كاك مەسعود هەریەك لە ژوورێك دەبن و نزیك بەیەك (ئەوە قسەی كاك حسێن سنجاری- یە كە ئەوكات لەگەڵ كاك نەوشیروان بوو.
هەڵدەستێت و دەچێتە لای كاك مەسعود، وەكو مژدانەیەك دەڵێت كاك مەسعود ئەوە ناشارەزاكەی ئێمەیە بەتەنها وەكو یەكێتی گەیشتۆتە دهۆك، دیارە وەكو خۆی لەبری تەقدیر كاك مەسعود دەڵێت: خۆ بڕیاربوو هەموو پێكەوە بچین بۆ دهۆك، دیارە فێڵی لە برادەرانمان كردووە، نەدەبوایە بێ ئەوان بچن.
بۆ بەیانییەكەی هێزەكەی برادەرانی پارتی هەر هەمووی گەیشتن و لە دهۆك چاومان بەیەكتری كەوت كە بریتی بوون لە كاك عەبدولموهەیمەن و زەعیم عەلی و كاك بابەكر زێباری و كۆمەڵیك لە فەرماندە و كادری دیكە كە ناوی هەموویانم لەبیر نەماوە و رێككەوتین كە لەمەودوا لەگەڵ یەكتریدا هاوكاربین.

گەڕانەوەی مام جەلال و هێرشەکانی دوژمن
لە رۆژی 16/3 حكومەتی عیراق لە ناوچەی فاییدەوە دەستی كرد بە هێرش و پەلاماردان بۆسەر هێزەكانی پێشمەرگە، هەروەها لەگەلی دهۆك، شەهید حەسەن سەلیم لە شەڕەكاندا لەگەڵ چەند پێشمەرگەیەكدا شەهید ببوون، پەیامیش هات كە جەنابی مام جەلال لە سوریاوە لەگەڵ كۆمەڵێك كادرو فەرماندەدا لەرێگەی فیشخاپوورەوە دەگەڕێنەوە كوردستان، لەوانە خوالیخۆشبوو جەبار فەرمان و كاك ئەحمەد بامەڕنی و لەسكرتاریەتیشەوە هێزێكی سكرتارییەت بە سەرپەرشتیی دكتۆر كەریم هاتن بۆ زاخۆ، هەموو چووین بۆ زاخۆ بۆ پێشوازیی لە جەنابی مام جەلال.
بەڕێز مام جەلال لەرێگەی فیشخاپوور لە 25/3 گەڕایەوە.
كە گەیشتن سەرەتا چوونە زاخۆ بوو بۆ بەردەم قایمقامییەتی زاخۆ، لەوێ بەئامادەبوونی جەماوەرێكی زۆر وتارێكی گرنگ ‌و بەنرخی خوێندەوە، دواتر چاوی بە كۆمەڵێك كەسایەتیی و لایەنە سیاسییەكان كەوت.
بۆ بەیانییەكەی بەرەو دهۆك بەڕێكەوتن و هەر ئەوكات كاك جەبار فەرمانی نارد بۆ بەرەی شەڕەكانی فاییدە كە بارودۆخەكە خراپ بوو، بەندە و هێزەكەش بۆ هەندێك كار لە زاخۆ ماینەوە و بەرنامەی چاوپێكەوتنم هەبوو لەگەڵ كوردەكانی سلۆپی، و بەیانییەكەی دوای پاشەكشەی پێشمەرگە لە فاییدە، بارودۆخ زۆر خراپ بوو. خەڵك دەستیكرد بەكۆچ و شڵەژانێكی ناخۆش روویدا و ناچار جەنابی مام جەلال دوای چەند كۆبوونەوەیەك لە دهۆك، دوای زۆر لێكردنی زۆربەی كەسایەتییەكان، دهۆكی بەجێهێشت بەرەو سلێمانی و بەندەش لەڕێگەی باتوفەو ئامێدییەوە (كە پێشتر شارەزاییم هەبوو) بەرەو بارزان و دواتریش بەرەو رواندز بەڕێكەوتم.

https://knwe.org/?p=64278