ئەمڕۆ سێشەممە 9ـی6ـی2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە شاندێكی كەنیسەی ڕۆژهەڵاتی ئاشووری كرد.

لە دیدارێكدا شاندەكە سوپاس و پێزانینی كەنیسەی ڕۆژهەڵاتی ئاشووری لە جیهانی بە سەرۆك بارزانی ڕاگەیاند بۆ هەوڵەکانی هەرێمی كوردستان بۆ حەواندنەوەی ئەو ژمارە زۆرەی ئاوارە و پەنابەران، لە پێکهاتە ئایینی و نەتەوەییە جیاجیاکان و پێداویستییەکانی ژیانیان بۆ دەستەبەر کردوون، بەتایبەتییش ڕەخساندنی دەرفەت بۆ منداڵانی ئاوارە کە لە کوردستان درێژە بە خوێندن بدەن. هەروەها سوپاسی كرانەوە و دڵفراوانیی خەڵكی كوردستانیشی كرد و ئاماژەی بەوەدا كە جێگەی شانازییە كوردستان بووەتە پەناگەیەكی ئارام بۆ مەسیحییەكان و پەیڕەوانی ئایین و ئایینزاكانی دیكەی عێراق و ئەو پێکەوەژیانە ئارامەی نێوان پێکهاتە جیاجیاکانی کوردستانیان وەک نموونەیەکی گەش و مایەی شانازی لەقەڵەم دا. ئەندامانی شاندی سەرۆكی كەنیسەی ڕۆژهەڵاتی ئاشووری لە جیهان ئەوەیشیان دووپات كردەوە كە پێویستە وڵاتانی جیهان هاوكار و پاڵپشتیی هەرێمی كوردستان بن لە شەڕكردنی دژی تیرۆریستان و یارمەتیدانی ئاوارەكان و هیواشیان خواست ئەو ناوچانەی تائێستا لەژێر دەستی تیرۆریستاندا ماون ئازاد بکرێن و ئاوارەکان بگەڕێنەوە ماڵی خۆیان.

لەبەشێکی دیکەی دیدارەکەدا شاندی میوان ڕایانگەیاند کە لە مانگی ئەیلوولی ئەمساڵ لە هەولێر هەڵبژاردن بۆ جێگرەوەیەک بۆ قەداسەتی پاتریارك مار دنخای چوارەم سەرۆکی کۆچکردووی كەنیسەی ئاشووریی ڕۆژهەڵات، بەڕێوە دەچێت و کورسیی سەرۆکی كەنیسەی ئاشووریی ڕۆژهەڵات لە ئەمریکاوە دەگوازرێتەوە بۆ هەولێر و ئەوەشیان بە ڕووداوێکی گرینگ بۆ کوردستان و ئاشوورییەکانی جیهان لەقەڵەم دا.

لەبەرانبەردا سەرۆك بارزانی بەگەرمی بەخێرهاتنی شاندی میوانی كرد و وێڕای ئاماژەدان بە پەیوەندیی مێژوویی نێوان پێكهاتەكان كوردستان جەختی لەوە كردەوە كە كوردستان نیشتیمانی هەمووانە و پێویستە هەموو لایەك تێیدا بە ئازادی و سەربەرزی بژیین. سەرۆک بارزانی جەختیشی کردەوە کە تیرۆریستان دژی پێکهاتەیەک یان ئایینێکی دیاریکراو نین، بەڵکوو دژی هەموو مرۆڤایەتین و دژی ژیان و ئازادین، بۆیە دەستیان گەیشتبێتە هەر ناوچەیەک، شوێنە پیرۆزەکانی سەرجەم ئایینەکانیان تەقاندۆتەوە، هەر لە مەزارگەی پەیامبەران و مزگەوت تا دەگاتە کەنیسە و پەرستگای ئایینەکانی تر، بەڵام دڵنیاین تیرۆریستان هیچ داهاتوویەکیان نییە و هەموو ئەو شوێنانە ئازاد دەکرێن کە تا ئێستا لەژێر دەستیاندا ماون.

لە کۆتایی دیدارەکەدا شاندی میوان سوپاسی خۆیان بە سەرۆک بارزانی ڕاگەیاند بۆ ڕەخساندنی دەرفەتی ئەو دیدارە.