به‌بۆنه‌ى ده‌ستنیشانكردنى وه‌ك باڵیۆزى نیازپاكیى نه‌ته‌وه یه‌كگرتووه‌كان، له نامه‌یه‌كدا بۆ خاتوو نادیا موراد، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان، وێڕاى ده‌ربڕینى خۆشحاڵى، پیرۆزبایى لێده‌كات و هیواى سه‌ركه‌وتنى بۆ ده‌خوازێت، هه‌روه‌ها پشتگیریى خۆى و حكوومه‌تى هه‌رێمى كوردستان بۆ ئه‌رك و كاره‌كانى ده‌رده‌بڕێت.
له نامه‌كه‌یدا به‌ڕێز سه‌رۆك وه‌زیران ده‌ستنیشانكردنى نادیا موراد به باڵیۆزى نیازپاكیى نه‌ته‌وه یه‌كگرتووه‌كان به نیشانه‌ى هاوسۆزى و پشتگیریى كۆمه‌ڵگه‌ى نێوده‌وڵه‌تى بۆ خوشك و برایانى ئێزدى له قه‌ڵه‌م ده‌دات كه له هه‌مان كاتدا مایه‌ى شانازیى ته‌واوى ئێزدییان و كوردستانه. هیواش ده‌خوازێت ئه‌م ئه‌ركه‌یان ببێته پشتگیرییه‌ك بۆ هه‌وڵه‌كانى حكوومه‌تى هه‌رێمى كوردستان و دۆستانى ئێزدییان بۆ ئه‌وه‌ى جینۆسایدى ئێزدییان و پێكهاته ئایینى و نه‌ته‌وه‌ییه‌كانى دیكه، له‌لایه‌ن كۆمه‌ڵگه‌ى نێوده‌وڵه‌تییه‌وه بناسرێت.
ئه‌مه‌ش ده‌قى نامه‌كه‌ى به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستانه بۆ خاتوو نادیا موراد:
خانما هێژا نادیا موراد،
سلاڤ و ڕێز ..
گه‌له‌ك خۆشحالم ب ده‌ستنیشانكرنا هه‌وه وه‌ك بالیۆزا نیازپاكیێ یا نه‌ته‌وه‌یێن یه‌كبوویى، ب ڤێ هه‌لكه‌فتنێڤه ژ دل پیرۆزباهیێ ل هه‌وه دكه‌م، هیڤیا سه‌ركه‌فتنێ بۆ ئه‌ركێ هه‌وه دخوازم، ئه‌ز و حكوومه‌تا هه‌رێما كوردستانێ ژى ب هه‌مى شێوه‌یه‌كى ئه‌م ئاماده‌نه هه‌مى پشتگیریا پێویست پێشكه‌شى هه‌وه و كار و ئه‌ركێن هه‌وه بكه‌ین.
ده‌ستنیشانكرنا هه‌وه وه‌ك بالیۆزا نیازپاكیێ یا نه‌ته‌وه‌یێن یه‌كبوویى نیشانا هه‌ڤسۆزى و پشته‌ڤانیا جڤاكا نێڤده‌وله‌تییه بۆ خوشك و برایێن مه یێن ئێزدى، هه‌روه‌سا جهێ شانازییا هه‌مى ئێزدییان و ته‌ڤایا كوردستانێیه. هیڤیدارم كو ئه‌ڤ ئه‌ركێ هه‌وه ببیته پشته‌ڤانییه‌كا دى بۆ هه‌ولێن حكوومه‌تا هه‌رێما كوردستانێ و دۆستێن ئێزدییان كو جینۆسایدا ل دژى خوشك و برایێن مه یێن ئێزدى و پێكهاتێن دى یێن ئۆلى و نه‌ته‌وه‌یى هاتیه كرن، ژ ئالیێ جڤاكا نێڤده‌وله‌تیڤه بێته ناسكرن.
جاره‌كا دى ژ دل پیرۆزباهیێ ل هه‌وه دكه‌م، هه‌مى پشتگیرى و پشته‌ڤانیا خوه بۆ هه‌وه و سه‌ركه‌فتنا ئه‌ركێ هه‌وه دوباره ده‌كه‌م.
سه‌ركه‌فتى بن.
نێچیرڤان بارزانى
سەرۆك وەزیرێن هەرێما كوردستانێ