شارپرێس:
نازم دەباغ نوێنەری‌ حكومەتی‌ هەرێم لەتاران رایگەیاند، قاسمی‌ سلێمانی فەرماندەی سوپای قودسی ئێرانی‌ كۆبوونەوەی‌ دووقۆڵی‌‌و زۆر تایبەتی‌ لەگەڵ‌ مەسعود بارزانی‌ كردووە پێش ئەنجامدانی‌ ریفراندۆم.

نازم دەباغ لەچاوپێكەوتنێكی‌ لەگەڵ ژمارەی ئەمڕۆ سێ‌ شەممەی هەفتەنامەی ئاوێنە راشیگەیاندووە "لەكاتی‌ دیاریكردنی‌ وادەی‌ ریفراندۆمەوە تا ئەو كاتەی‌ ریفراندۆمەكە ئەنجامدرا، شاندی‌ ئێران 70 تا 80 كۆبوونەوەیان لەگەڵ‌ سەركردەی‌ لایەنە سیاسییەكانی‌ كوردستان ئەنجامدا".

نوێنەرەكەی حكومەتی هەرێم لەتاران ئاشكراشیكردووە، كە خۆی پەیامێكی‌ تایبەتی‌ قاسمی‌ سلێمانی بەنامەی فەرمی‌ ناردووە بۆ مەكتەبی‌ سیاسی‌ یەكێتی‌ نیشتمانی‌ كوردستان‌و بەتەلەفون‌و زارەكیش ناردوویەتی بۆ حكومەتی‌ هەرێمی‌ كوردستان".

هەروەها رایگەیاندووە "قاسمی‌ سلێمانی‌ لەو پەیامەیدا پێیوتم بەسەركردایەتی‌ سیاسی‌ كوردستان بڵێت، كە ئامادەیی‌ ئەوەین لەچوارچێوەی‌ دەستوور‌و یەكپارچەیی‌ عێراقدا بەرگری‌ لەمافەكانی‌ ئێوە بكەین‌و مادەی‌ 140یش جێبەجێ‌بكەین".

قسەكانی دەباغ لەكاتێكدایە، كە مانگی رابردوو پرۆسەی ریفراندۆمی سەربەخۆیی بەرێوەچوو، كە ئەوە كاردانەوەی زۆری بەدواوە هات‌و بەو هۆیەشەوە پەیوەندییەكانی نێوان هەرێم‌و ئێران تێكچوو.

دەباغ لەبارەی باشبوونەوەی پەیوەندییەكانی ئێران‌و هەرێمی كوردستان رایگەیاند "دڵنیام لەقۆناغی‌ ئایندەدا ئێران هەوڵدەدات هاوپەیمانی‌ كوردو شیعە بپارێزێت، كە ئێران دژی‌ كورد نییە، بەڵكو دژی‌ ئەو سیاسەتەیە پەیڕەو كرا".