سه‌رله‌به‌یانیى ئه‌مڕۆ یه‌كشه‌ممه 10ى ئازارى 2014، به ئاماده‌بوونی نێچیرڤان بارزانی سه‌رۆك وه‌زیرانى هه‌رێمی كوردستان، له هۆتێلی ڕۆتانا له هه‌ولێر گرێبه‌ستی به‌رهه‌مهێنانی هاوبه‌شى ده‌رمان له نێوان كۆمپانیای نیشتمانیی ئاوامیدیكا و كۆمپانیای سانۆفیی فه‌ڕه‌نسیدا ئیمزا كرا، كه سێه‌مین گه‌وره‌ترین كۆمپانیاى جیهان و گه‌وره‌ترین كۆمپانیاى دروستكردنى ده‌رمانه له ئه‌ورووپا.
له ڕێوڕه‌سمه‌كه‌دا كه ژماره‌یه‌ك له وه‌زیرانی حكوومه‌تی هه‌رێمی كوردستان و ژماره‌یه‌ك له نوێنه‌ر و كونسوڵی وڵاتانی بیانی له هه‌رێمی كوردستان و باڵیۆزی سوید له عیراق و ژماره‌یه‌ك له خاوه‌نكاران له بواری كه‌رتی ده‌رماندا ئاماده‌ی بوون، پرۆفیسۆر د. بارام خدر به‌ڕێوه‌به‌ری كۆمپانیای نیشتیمانیی ئاوامیدیكا بۆ ده‌رمان له وته‌یه‌كدا ئیمزاكردنی ئه‌م گرێبه‌سته‌ی به ڕووداوێكی زۆر گرنگ له قه‌ڵه‌م دا و دووپاتی كرده‌وه به‌م گرێبه‌سته كۆمپانیاكه‌یان ده‌توانێت به‌رهه‌مه گرنگه‌كانی سانۆفی له هه‌رێم و له عیراق به‌گشتی به‌رهه‌م بهێنێت.
هه‌روه‌ها كورته‌یه‌كی له‌باره‌ی كۆمپانیای ئاوامیدیكا و دامه‌زراندنی پێشكه‌ش كرد كه به پاڵپشتیی ڕاسته‌وخۆی نێچیرڤان بارزانی له‌پێناو به‌رهه‌مهێنانی ده‌رمان به كواڵیتیه‌كی به‌رز دامه‌زرا و له‌گه‌ڵ شاره‌زایانی ئه‌ورووپایی دیزاینی كۆمپانیاكه له 2005 ئاماده كرا و كارێكی زۆر جددی له‌سه‌ر كرا تا به شێوه‌یه‌كی فه‌رمی له لایه‌ن سه‌رۆك وه‌زیرانى هه‌رێمى كوردستانه‌وه كرایه‌وه، ئینجا ساڵی 2010 ده‌ست به به‌رهه‌مهێنان كرا و ساڵ به ساڵیش به‌رهه‌مهێنانه‌كه‌ى له زیادبووندایه .
هه‌ر له‌م ڕێوڕه‌سمه‌دا وه‌زیری ته‌ندروستیی حكوومه‌تى هه‌رێمى كوردستان ئاماژه‌ی به‌وه دا ئه‌م گرێبه‌سته سوودێكی زۆری بۆ هه‌رێمی كوردستان ده‌بێت و ڕوونى كرده‌وه كه كابینه‌ی حه‌وته‌می حكوومه‌تی هه‌رێمی كوردستان هه‌ر له سه‌ره‌تای ده‌ستبه‌كاربوونییه‌وه، گرنگی به بواری ته‌ندروستی داوه و كه‌رتی ده‌رمانیشی له‌و بواره‌دا له ڕیزبه‌ندی یه‌كه‌م داناوه. هه‌روه‌ها ڕایگه‌یاند له ماوه‌ی ده‌ستبه‌كاربوونیدا چه‌ندین نه‌خۆشخانه دروست كراون كه كۆی گشتییان 2700 ته‌ختی نه‌خۆش پێك ده‌هێنن و گوژمه‌ی زیاتر له 800 ملیۆن دۆلاری تێچووه.
ئاماژه‌ی به‌وه‌ش كرد كه ئێستا له هه‌رێمی كوردستان 75 نه‌خۆشخانه و 993 بنكه‌ی ته‌ندروستی هه‌ن و له ماوه‌ی دوو ساڵی ڕابردوودا 2700 پزیشك دامه‌زراون. هه‌روه‌ها ئاماژه‌ی به‌وه‌ش كرد كه ته‌نیا له ساڵی 2013دا وه‌زاره‌تی ته‌ندروستی ده‌ستى به‌سه‌ر 900 ته‌ن ده‌رمانی ماوه‌به‌سه‌رچوودا گرتووه، كه به گوته‌ی وه‌زیر زیاتر له 80%یان پێش ئه‌وه‌ی بێنه ناو هه‌رێمی كوردستانه‌وه، له بازگه‌كان گیراون.
لاى خۆیه‌وه نێچیرڤان بارزانى له په‌یڤه‌كێدا وێڕای پیرۆزبایی به بۆنه‌ی ئیمزاكردنی ئه‌م گرێبه‌سته‌وه، ئاماژه‌ی به‌وه دا كه خاوه‌نی كۆمپانیای ئاوامیدیكا د. به‌هرام یه‌كێك بووه له‌و كه‌سانه‌ی ده‌رمانی چاره‌سه‌ركردنی ئاوی ڕه‌شی له‌سه‌ر ئاستی جیهاندا دۆزیوه‌ته‌وه، له‌به‌ر ئه‌وه ئه‌و ناوێكی دیاره نه‌‌ك ته‌نها له كوردستان و له عیراق، به‌ڵكوو له هه‌موو جیهان ناوێكه و بۆ كورد جێی شانازییه خه‌ڵكی واى هه‌بێت.
سه‌رۆك وه‌زیران ڕوونى كرده‌وه كه مه‌به‌ستی سه‌ره‌كیی حكوومه‌ت له پاڵپشتیكردنی ئه‌م جۆره پڕۆژانه، هێنانه‌دی ویستی گه‌لی كوردستانه به‌وه‌ی كه‌سانی هه‌ژار و ده‌وڵه‌مه‌ند وه‌كوو یه‌ك ده‌رمانیان ده‌ستبكه‌وێت و نیگه‌رانیی خۆیشی له‌وه نیشان دا كه تا ئێستا گرفتی كواڵیتیی ده‌رمان له هه‌رێمی كوردستان گرفتێكی دیاره و نه‌یشارده‌وه سیسته‌می ته‌ندروستی له هه‌رێمی كوردستان و هه‌موو عیراقیش سیسته‌مێكی شكستخواردووه .
نێچیرڤان بارزانی ئاماژه‌ی به‌وه دا شكستی ئه‌و سیسته‌مه له وه‌دا ده‌ست پێده‌كات كه حكوومه‌ت خۆی له دابینكردنی هه‌موو پێداویستییه‌ك به‌رپرسیار كردووه و ناتوانێت وه‌ك پێویست به ستانداردێكی نێوده‌وڵه‌تی ئه‌و خزمه‌تگوزاریبه پێشكه‌شی هاووڵاتیانی عیراق بكات به شێوه‌یه‌كی گشتی.
دووپاتیشی كرده‌وه به نه‌بوونی سیسته‌مێكی سه‌ركه‌وتووی ته‌ندروستی، دروستكردنی بینا و نه‌خۆشخانه‌ی به‌رز و باش هیچ سوودێكی نابێت. هاوكات زۆر سوپاسی وه‌زیری ته‌ندروستی و وه‌زیری پلاندانانی حكومه‌تی هه‌رێمی كوردستانى كرد بۆ ئه‌و ئه‌رك و ماندووبوونه‌ی ئه‌نجامیان دا بۆ سه‌رخستنی ئه‌م پڕۆژه‌یه و هیوای خواست وه‌زاره‌تی ناوخۆ و ئاسایش كه درێغیان له ئه‌ركی خۆیاندا نه‌كردووه، زیاتر كار بۆ ڕێگه‌گرتن له هێنانی ده‌رمانی ماوه به‌سه‌رچوو بۆ هه‌رێمی كوردستان بكه‌ن و گوتى گه‌لی كوردستان شایسته‌ی باشترین خزمه‌تگوزارین له‌م بواره‌دا.
هه‌ر له‌م ڕێوڕه‌سمه‌دا باڵیۆزی سوید له عیراق و نوێنه‌ری كۆمپانیای سانۆفیی فه‌ڕه‌نسی و نوێنه‌رى وه‌زیرى ته‌ندروستیى عیراق وتاری خۆیان پێشكه‌ش كرد. له كۆتاییشدا ڕێككه‌وتنه‌كه له نێوان هه‌ردوو كۆمپانیاى سانۆفى و ئاوامیدیكادا ئیمزا كرا.
سێ شەممە, 11 ئازار 2014