بە ئامادەبوونی بەڕێز مسعود بارزانی سەرۆكی هەرێمی كوردستان ، ئەمڕۆ لە سەر خاكی پیشانگای نێودەوڵەتی هەولێر پیشانگای ساڵانەی مەدا كرایەوە .
لە رێوڕەسمەكەدا كە ژمارەیەكی زۆری پەرلەمانتار و وزیرانی حكومەتی هەرێم و بەرپرسانی حكومەتی فیدراڵ و ژمارەیەك لە كونسوڵ و نوێنەرانی وڵاتانی بیانی لە هەولێر و ژمارەیەك لە رۆشنبیر و رۆژنامەنووسانی كورد و عەرەب ئامادەی بوون سەرۆكی هەرێمی كوردستان و میوانانی پیشانگا گەشتێكیان بە نێو بەشەكانیدا كرد.
پاشان سەرۆكی هەرێم وتەیەكی پێشكەشكرد تیایدا بەخێرهاتنی میوانانی فستیڤاڵی كرد و دووپاتیكردەوە مایەی شانازی هەرێمە كە هەموو ساڵێك پیشانگای كتیبَب لە هەولێر دەكرێتەوە و هەر ساڵێكیش پێشكەوتنی زیاتر و رێكخستنی بە خۆیەوە دەبینێت .
هەروەها دووپاتیكردەوە ئەمڕۆ كوردستان میوانداری كتێب و رۆشنبیری دەكات چونكە باوەڕی بەوە هەیە كە رۆشنبیری بنەمای ژیانێكی ئارامە و ئەو گەلەی خۆی بە رۆشنبیری پڕچەك دەكات دەتوانێت ئایندەی خۆی بونیاد بنێت و دەتوانێ سوود وەربگرێت و سوودیشی بۆ خەڵكی دیكەش هەبێت .
نیشانیشیدا پیشانگای كتێب زۆر بە رێكی دەستیپێكرد و ئەمڕۆش وا میوانداری نۆیەمین پیشانگای دەكەین لە هەولێر و ئەمەش بەڵگەیەكی گەورەیە بەوەی گەلی كوردستان خۆشەویستی بۆ كتێب و رۆشنبیری هەیە بۆ كتێب و رۆشنبیری و ئامادەبوونی ئەم خەڵكە لەو پیشانگایەش بەڵگەیەكی دیكەیە بۆ رێزگرتنی خەڵكی كوردستان بۆ رۆشنبیری و رۆشنبیران و بۆ قەڵەم .
هەروەها شانازی خۆیشی بەوە نیشاندا كە ئازادیە گشتی و تایبەتیەكان بۆ هەر تاكێك پارێزراوە بە بەڵگەی كردنەوەی ئەم پیشانگایەی كە هەموو خانەكانی بڵاوكردنەوە تیایدا كتێبەكانی خۆی نمایش دەكات بە بێ ئەوەی هیچ لایەن و كەسێك سانسۆر بخاتە سەریان .
دووپاتیشیكردەوە هەولێر هەمیشە كراوەیە و ئامادەیە بۆ پیشوازیكردن لە هەموو پیشانگایەكی لەمجۆرە .
پاشان نەوزاد هادی پارێزگاری هەولێر لە وتەیەكدا وێڕای بەخێرهێنانی میوانان خۆشحاڵی خۆی بەوە نیشاندا كە زیاتر لە 250 ناوەندی چاپ و بڵاوكردنەوە لە 12 وڵاتی عەرەبی و چەند وڵاتێكی ئەورووپایی و 5 خانە لە كوردستان و 20 لە عیراق ئەمڕۆ لەو پیشانگایەدا بە جیاواز لە ساڵانی دیكە بەشدارن ئەوەش نیشانەی خۆشەویستی خەڵكی هەرێمی كوردستان و هەولێرە بۆ كتێب و بۆ رۆشنبیری.
دوایین وتار لە لایەن مەحموود جبریل كەسایەتی ناوداری عەرەبی پێشكەشكرا كە تیایدا ستایشی پێشكەوتنی كوردستانی كرد و خۆشحاڵی خۆی بە پێشكەوتنی ئەم هەرێمە نیشاندا لەو كاتەی كە ناوچەكە لە بارێكی زۆر نائارامدایە .
پاشان چەندین پارچەی مۆزیكی كوردی و عەرەبی لەم رێوڕەسمەدا بەڕێوەچوون كە تیایدا یادی شاعیری گەورەی كورد شێركۆ بێكەش كرایەوە .