ئێواره‌ى ئه‌مڕۆ یه‌كشه‌ممه 6ى ته‌ممووزى 2014، ئه‌نجومه‌نى وه‌زیرانى هه‌رێمى كوردستان به سه‌رۆكایه‌تیى به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان دووه‌مین كۆبوونه‌وه‌ى خۆى ساز دا.
له سه‌ره‌تاى كۆبوونه‌وه‌كه‌دا پوخته‌ى ڕاپۆرتێكى فراوانى به‌شى زانیارى و لێكۆڵینه‌وه‌ى گۆڤارى ناودارى ئیكۆنۆمیست كه پێگه‌یه‌كى دیارى باوه‌ڕپێكراو و كاریگه‌رى له جیهاندا هه‌یه، به ناوى "دیاریكردن و هه‌ڵسه‌نگاندنى پێگه‌ى هه‌رێمى كوردستان"، خرایه ڕوو، كه تیایدا تیشك خراوه‌ته سه‌ر پێشكه‌وتنه‌كانى هه‌رێمى كوردستان له ڕووى ژینگه‌ى سیاسى، سه‌قامگیریى سیاسى و ئاسایش، به‌رزیى ئاستى ژیان، په‌ره‌پێدانى مرۆیى، ئابوورى، بازرگانى، وه‌به‌رهێنان و چه‌ندین بوارى دیكه‌ى ژیانه‌وه.
به پێى پێوه‌ره‌كانى ئه‌و ڕاپۆرته له زۆربه‌ى بواره‌كاندا هه‌رێمى كوردستان له پێشه‌وه‌ى زۆرێك له وڵاتانى ناوچه‌كه‌دایه و له هه‌ندێ بوارى دیكه‌شدا له ئاستى وڵاته پێشكه‌وتووه‌كاندایه. ڕاپۆرته‌كه ڕوونى كردووه‌ته‌وه كه سیاسه‌تى حكوومه‌تى هه‌رێمى كوردستان بۆته هۆى ڕاكێشانى سه‌رمایه و كۆمپانیا بیانییه‌كان بۆ هه‌رێمى كوردستان و هانى داون بۆ ئه‌وه‌ى ڕوو بكه‌نه هه‌رێم و به‌شدارى له پرۆسه‌ى وه‌به‌رهێنان و په‌ره‌پێدانى هه‌رێمى كوردستان له بواره جیاكاندا بكه‌ن.
ئینجا به پێى به‌رنامه‌ى كۆبوونه‌وه‌كه، به‌ڕێز وه‌زیرى دارایى و ئابوورى ڕاپۆرتێكى ده‌رباره‌ى بودجه‌ى هه‌رێمى كوردستان و كێشه‌ى دارایى و هۆكاره‌كانى سه‌رهه‌ڵدانى و پلان و سیاسه‌تى حكوومه‌تى هه‌رێمى كوردستان بۆ ڕووبه‌ڕووبوونه‌وه‌ى ئه‌م بارودۆخه پێشكه‌ش كرد، كه خۆى له كۆمه‌ڵێك ڕیكارى جیا و ڕێكخستنه‌وه و كه‌مكردنه‌وه‌ى خه‌رجییه‌كان و زیادكردنى داهاته‌كان به هه‌موو جۆره‌كانییه‌وه ده‌دۆزێته‌وه. لاى خۆیه‌وه سه‌رۆك وه‌زیران دووپاتى كرده‌وه كه وێڕاى هه‌موو ڕێكاره‌كان، له پله‌ى یه‌كه‌مدا وه‌زاره‌تى دارایى پێویستى به چاكسازى و ڕێكخستنه‌وه‌یه‌كى ته‌واو هه‌یه بۆ ئه‌وه‌ى بتوانێت به باشترین شێوه كاره‌كانى به‌ڕێوه ببات.