هەر لەمیانی سەردانەكەیدا بۆ شاری سلێمانی، نیوەڕۆی ئەمڕۆ یەكشەمە2015/5/10 بەڕێز نێچیرڤان بارزانی سەرۆك وەزیرانی هەرێمی كوردستان و شاندێكی یاوەری سەردانی باڵەخانەی پارێزگای سلێمانی كرد و لەلایەن پارێزگار و جێگرەكەی و ستافی پارێزگاوە پێشوازی لێكرا.

لە دیدا بەڕیز سەرۆك وەزیرانی هەرێمی كوردستان پیرۆزبایی لە پارێزگار و جێگرەكەی و ستافی نوێی پارێزگای سلێمانی كرد بەبۆنەی دەست بەكاربوونیان و هیوای خواست كە وەك یەك ستاف و بە تیم كارەكانیان ئەنجام بدەن و هەرچی زۆرتر خزمەت بە خەڵكی شار و پاریزگای سلێمانی بكەن.

لە بەشێكی دیكەی كۆبوونەوەكەدا باس لە كێشە و گرفتەكانی سنووری پارێزگای سلێمانی كرا بە تایبەت لە ڕووی ئاو و كارەباوە و ئەنجامدانی پرۆژەی زیاتر بۆ خزمەتی زیاتری هاوڵاتیان.

دواتر لە لێدوانێكی ڕۆژنامەوانیدا بۆ دەزگاكانی ڕاگەیاندن، بەڕێز نێچیرڤان بارزانی باسی كۆبوونەوەی لەگەڵ ستافی پارێزگای سلێمانی كرد و گوتی: "لەگەڵ پارێزگار باسی کێشەکانی سلێمانیمان کرد و بەشێوەیەکی گشتی ئەو کێشانەی کە تا ئێستا ماونەتەوە و هەروەها باسی ئەو پرۆژانەمان کرد کە ئێستا پێویستیان بەوە هەیە پارەیان بۆ خەرج بکرێت و سلفەیان پێبدرێت. من و وەزیری دارایی پشتیوانی خۆمان بۆ پارێزگار دەربڕیوە لەبەرامبەر ئەوکارانەی کە تا ئێستا کردویەتی  و هەروەها دەستخۆشی لە پارێزگاری سلێمانی دەکەم کە لەوەتەی دەست بەکاربووە بە تیم لەگەڵ ستافەکەی کاردەکات و هیوادارم ئەو رۆحیەتی کارکردنە لەنێوانیاندا بمێنێ و هەموومان بتوانین بە تیم کاربکەین بۆئەوەی زیاتر خزمەتی ئەو وڵاتە بکەین".

لە چوارچێوەی سەردانەكەیدا بۆ شاری سلێمانی، ڕۆژی یەكشەممە 2015/5/10 بەڕیز نێچیرڤان بارزانی سەرۆك وەزیرانی هەرێمی كوردستان سەردانی سەرۆك جەلال تاڵەبانی كرد.

له‌ دیدارێكدا بەڕێز سەرۆك وەزیران وێڕای دەربڕینی سوپاسگوزاریی بۆ ئەو پێشوازییه‌ گه‌رمه‌ی سەرۆك مام جه‌لال، هەروەها خۆشحاڵیی خۆی بە دیداری به‌ڕێزیان پیشاندا به‌ تایبه‌تی كه‌ ته‌ندروستییان  زۆر باشتره‌ و رۆژ به‌رۆژ به‌ره‌وپێش ده‌چێت.

له‌ به‌شێكی دیكەی دیداره‌كه‌دا بەڕێز نێچیرڤان بارزانی له‌گه‌ڵ خستنه‌ڕووی یاده‌وه‌رییه‌كانی پێكه‌وه‌ كاركردنیان، هەروەها گرنگی رۆڵی سەرۆك مام جه‌لالی دووپاتكرده‌وه‌ له‌قۆناغه‌ جیاجیاكاندا كه‌ له‌ هه‌موو ئاسته‌كاندا بەڕێزیان جێ ده‌ستیان دیاره‌، له‌و باره‌یه‌شه‌وه‌ تێڕوانین و بۆچونه‌كانی  و مامه‌ڵه‌كردنی له‌ به‌رامبه‌ر پێشهات و ڕووداوه‌كان، به‌رز نرخاند.

ڕونیشی كرده‌وه‌ كە هه‌میشه‌ هه‌ڵوێسته‌كانی سەرۆك مام جه‌لال له‌یاد و بیره‌وه‌ریاندا ده‌مێننه‌وه‌ و هه‌رگیز له‌ یاد ناچن كە له‌ هه‌موو بۆنه‌ و وێستگه‌یه‌كدا به‌ڕێزیان ئاماده‌ییان هه‌یه‌.

سەرۆك مام جه‌لالیش دڵخۆشی خۆی نیشاندا بۆ سه‌ردانه‌كه‌ی بەڕێز نێچیرڤان بارزانی سەرۆك وەزیرانی هەرێمی كوردستان و دوای دیدارەكەش سەرۆك مام جەلال به‌گه‌رمی به‌ڕێز سەرۆك وەزیرانی هەرێمی كوردستانی به‌ڕێخست.

دکتۆر "بەرھەم ساڵح" جێگری سکرتێری گشتیی یەکێتی نیشتمانی کوردستان لەگەڵ دکتۆر "عەلی لاریجانی" سەرۆکی پەڕڵەمان و دکتۆر "حوسێن ئەمیرعەبدوڵڵاھیان" جێگری وەزیری دەرەوەی ئێران کۆبۆەوە.

دکتۆر "بەرھەم ساڵح" جێگری سکرتێری گشتیی یەکێتی نیشتمانی کوردستان کە لە لایەن کۆماری ئیسلامی ئێرانەوە بانگھێشت کرابوو، بە سەردانێک گەیشتە تارانی پێتەختی ئێران و لە لایەن دکتۆر "عەلی لاریجانی" سەرۆکی پەڕڵەمانی ئێران و ھەروەھا دکتۆر "حوسێن ئەمیرعەبدوڵڵاھیان" جێگری وەزیری دەرەوەی کۆماری ئیسلامی ئێران لە کاروباری وڵاتانی عەڕەبی و ئەفریقا پێشوازیی لێکرا و لە کۆبوونەوەکاندا مەسەلەکانی عێراق و گۆڕانکارییەکانی ناوچەکە خرانە بەرباس و ئاخاوتنەوە.

لەم دیدارانەدا کە "نازم دەباغ" نوێنەری حکوومەتی ھەرێمی کوردستان لە تاران، "ئومێد کەریمیان" نوێنەری شاری مەریوان لە پەڕڵەمانی ئێران، دکتۆر "حوسێن شێخولئیسلام" راوێژکاری سەرۆکی پەڕڵەمانی ئێران لە کارووباری نێودەوڵەتی و چەندین کەسایەتیی دیکە تیایدا ئامادەبوون، باسی باروودۆخی عێراق و ناوچەکە کرا و ھەروەھا داھاتووی ناوچەکە دوای شەڕی داعیش و ئەو کێشە و گرفتانەی کە لە ڕۆژھەڵاتی ناوەڕاستدا ھاتوونەتە پێشێی.

ھەر وەکوو لە رابردوودا سەرکردە سیاسییەکانی کورد لە کاتیی پێویستدا و لەسەر بانگھێشت، سەردانی وڵاتانی ناوچەکە و جیھانیان کردووە، سەردانی سکرتێری گشتیی یەکێتی نیشتمانی کوردستان لەم قۆناغەی ئێستادا بۆ وڵاتی ئێران گرینگیی تایبەت بە خۆی ھەیە و شارەزایی لە بواریی لێکدانەوە و ھەڵسەنگاندن و بیرکردنەوە لە ئایندەی کێشەکانی ناوچەکە و بەتایبەتی لە عێراقدا کە داعیش روو لە لاوازییە و بەڵام لە ھەمان کاتیشدا لە رۆژھەڵاتی ناوەڕاست و ناوچەکەدا کێشەکان روو لە گەرمییە. ھەر بۆ دانووستان لە باروودۆخی ئێستاکە و بیرکردنەوە لە داھاتوو و راوێژکردن لەگەڵ کەسانیی وەکوو دکتۆر "بەرھەم ساڵح" رۆڵ و کاریگەریی خۆی دەبێت.

دکتۆر "بەرھەم ساڵح" بە ھۆی کەمیی کات، تارانی پێتەختی ئێران بەجێھێشت و بە خێرایی گەڕایەوە بۆ ھەرێمی کوردستان و دیدارەکانی دیکەی بۆ ئەنجامنەدرا.

ئێوارەی ئەمڕۆ دووشەممە 2015/5/4 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێز خاتوو ڤێنسا پوسیچ جێگری سەرۆك وەزیران و وەزیری دەرەوەی كۆماری كرواتیا و شاندێكی یاوەری كرد.

لە دیدارێكدا خاتوو پوسیچ خۆشحاڵیی خۆی بە سەردانی هەرێمی كوردستان و لە نزیكەوە ئاگاداربوون لە ڕەوشی هەرێم دەربڕی و ئاماژەی بەوە كرد كە لە میانی سەردانەكەیدا سەردانی چەند دەزگایەك لە هەرێم دەكات، لەوانەش پەرلەمان و دەزگاكانی حكوومەت و كەمپی ئاوارەكان. هەروەها سوپاسی حكوومەت و خەڵكی كوردستانی كرد كە بە ئیمكانیاتێكی دیاریكراو توانیویانە باوەش بۆ ژمارەیەكی یەكجار زۆری ئاوارەی دەستی تیرۆر بكەنەوە و لە هەموو بوارەكاندا هاوكاری و خزمەتگوزاریی پێویستیان پێشكەش بكەن و هەروەك سوپاسی هێزەكانی پێشمەرگەی كوردستانیشی كرد كە بوێرانە ڕووبەڕووی تیرۆر بوونەتەوە و توانیویانە بە شێوەیەكی سەركەوتوو بەرگری لەو بنەما هاوبەشانە بكەن كە دونیای ئازاد باوەڕی پێیەتی.

لە بەشێكی دیكەی قسەكانیدا خاتوو پوسیچ ئاماژەی بەوە كرد كە كرواتیا بە پێی ئیمكانیاتی خۆی لە ڕابردوودا هاوكاریی هەرێمی كوردستانی كردووە و لە داهاتووشدا بە هەمان شێوە لەسەر هاوكارییەكانی بەردەوام دەبێت، بە تایبەتی لە ڕووی سەربازی و مرۆییەوە و هیوای خواست كە لە كاتێكی نزیكدا و لە بەرژوەندیی خەڵكی كوردستان و پێشمەگەدا كۆتایی بەو شەڕە بێت و هەرێمی كوردستان لە ڕووی پێشڤەچوونی ئابووری و سەقامگیری و دیموكراسی و ئاوەدانی و داومودەزگاییەوە، بەردەوامی بە كاروانەكەی بدات و ئەو جێگە و پێگە ئابووریەی كە پێشتر هەیبوو، زیاتر بەرزی بكاتەوە و بۆ ئەم مەبەستەش كرواتیا ئامادەیە هاوكاری پێشكەش بە هەرێمی كوردستان بكات و وەك كارئاسانیش بۆ ئەم بابەتە ئامادەن لە داهاتوودا كونسڵخانەی خۆیان لە هەولێر بكەنەوە بۆ ئەوەی لە هەموو بوارەكاندا زیاتر برەو بە پەیوەندییە دووقۆڵییەكان بدەن.

لای خۆیەوە بەڕێز سەرۆك وەزیرانی هەرێمی كوردستان سوپاسی جێگری سەرۆك وەزیران و وەزیری دەرەوەی كرواتیای كرد بۆ ئەو سەردانە و وتە بەنرخەكانی لە بەرامبەر هەرێمدا و هەروەك سوپاسی كۆماری كرواتیای كرد بۆ ئەو هاوكارییانەی لە چوارچێوەی هێزە هاوپەیمانەكاندا لە ڕابردوو و داهاتوودا پێشكەش بە هەرێمی كوردستانی كردوون و دەیكات و هیوای خواست سەردانەكەیان سەركەوتوو بێت بە شێوەیەك بتوانن لەو ماوەیەی كە لە هەرێمی كوردستانن، لە نزیكەوە ئاگاداری بارودۆخی هەرێم و گرفتەكانی بن بە تایبەتی لە ڕووی مرۆیی و سەربازیەوە. ئاماژەی بەوەش كرد كە لە داهاتوودا حكوومەتی هەرێمی كوردستان ئامادەیە بۆ هەموو جۆرە هاوكاری و هەماهەنگییەك و پێشوازیش لە سەرمایەگوزاری و ئەزموونی سەركەوتووی كرواتیا لە بوارە جیاجیاكاندا دەكات و بۆ ئەو مەبەستەش حكوومەت ئامادەی هەر جۆرە هاوكاری و ئاسانكارییەكە.

گفتوگۆكردن لەسەر پەیوەندییەكانی نێوان هەولێر و بەغدا بە تایبەتی ڕێككەوتنی نێوان هەردوولا و ڕووبەڕووبوونەوەی تیرۆریستانی داعش و زیاتر تۆكمەكردنی ئەو ڕووبەڕووبوونەوەیە و كۆمەڵێك بابەتی دیكەی پەیوەندیدار بە ناوچەكەوە، بەشێكی دیكەی دیدارەكە بوون.

پێشنیوەڕۆی ئەمڕۆ 2015/5/4 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەڕێز فرانك بێیكەر باڵیۆزی بەریتانیا لە عێراق و شاندێكی یاوەری كرد.

لە دیدارێكدا باڵیۆزی بەریتانیا خۆشحاڵیی خۆی به‌ سەردانی هەرێمی كوردستان و دیداری لەگەڵ بەڕێز سەرۆك وەزیران دەربڕی و باسی لە پەیوەندییەكانی نێوان هەولێر و بەغدا و بەتایبەتی پرسى جێبەجێكردنی ڕێككەوتنی نێوان هەردوولا كرد. لە بەشێكی دیكەی قسەكانیدا ئاماژەی بە پرۆسەی سیاسیی عێراق بە شێوەیەكی گشتی و بەتایبەتی بارودۆخی ئەمنی و شەڕی دژی تیرۆریستانی داعشى كرد و دەسخۆشی و پشتگیریی بەردەوامی حكوومەتی وڵاتەكەی بۆ هێزی پێشمەرگە دەربڕی كە توانیویەتی ڕووبەرێكی فراوان لە دەستی تیرۆریستان ڕزگار بكات.

لای خۆیەوە بەڕێز سەرۆك وەزیرانی هەرێمی كوردستان سوپاسی سەردانی باڵیۆزی بەریتانیای كرد و خۆشحاڵیی خۆی بۆ بیروبۆچوون و پشتگیرییە بەردەوامەكانی بەریتانیا بۆ هەرێمی كوردستان و هێزی پێشمەرگە دەربڕی و هیوای خواست كۆمەڵگەی نێودەوڵەتی بەتایبەتی بەریتانیا وەك هێزێكی سەرەكیی وڵاتانی هاوپەیمان، لەسەر پشتگیری و هاوكاریكردنی هەرێمی كوردستان و هێزی پێشمەرگە و پرۆسەی سیاسی لە عێراق بەردەوام بن.

ئاڵوگۆڕكردنی بیروڕا ده‌رباره‌ى ڕووداوەكان و پێشهاتەكانی ئێستای عێراق و پرۆسەی سیاسی و ڕووبەڕووبوونەوەی تیرۆریستانی داعش و پرۆسەی ئازادكردنی مووسڵ، هەروەها گفتوگۆكردن لەسەر دوا سەردانی هەردوو بەڕێزان مەسعوود بارزانی سەرۆكی هەرێمی كوردستان و حەیدەر عەبادی سەرۆك وەزیرانی عێراق بۆ ویلایەتە یەكگرتووەكانی ئەمەریكا، بەشێكی دیكەی دیدارەكە بوون.

بەگوێرەی زانیارییەکانی دەستەی گشتی گەشتوگوزار لە هەرێمی كوردستان، سەرەڕای ئەو بارودۆخە ناهەموارەی عیراق وهەرێمی كوردستان وناوچەكە بەگشتی پێیدا تێپەڕی، ڕێڕەوی گەشتوگوزار لەهەرێمی كوردستان نەوەستاوە.

لەدیمانەیەكی تایبەت بە ماڵپەڕی حكومەتی هەرێمی كوردستان،مەولەوی جەبار، سەرۆكی دەستەی گشتی گەشتوگوزاری هەرێم ئاماژەی بەوەدا ئەم بارودۆخە بووە هۆكارێك بۆ كەمبوونەوەی ژمارەی ئەو گەشتیارانەی لەناوەڕاست وباشووری عیراقەوە دەهاتن بەپێچەوانەی گەشتیارانی دەرەوەی سنووری عیراق كە كەمبوونەكە بەو ڕێژەیە نەبوو.

ئەوەشی خستەڕوو كە ئەو بارودۆخەی ساڵی پار هەرێمی كوردستان پێیدا تێپەڕی وایكرد ئەو پلانەی داندرابوو بۆ گەشەپێدانی گەشتوگوزاری لە هەرێم دوا بخرێت وگۆڕانكاری زۆریشی تیادا بكرێت.

مەولەوی جەبار رایگەیاند، دەستەی گەشتوگوزاری هەرێم دەستپێشخەریکرد بۆ كۆكردنەوەی كۆمپانیا گەشتیارییەكانی توركیا و ئێران وكۆمپانیا نێوخۆییەكان وباشوور وناوەڕاستی عیراق بۆ باسكردنی واقیعی ئەم کەرتە لەهەرێم وچۆنیەتی هێنانی گەشتیار، بەسوود وەرگرتن لە بارودۆخی ئارام وسەقامگیری ئاسایش لە شارەكانی هەرێمی كوردستان.

"ئەمەش جگە لەبەشداربوونمان لە چەندین پیشانگای جیهانی لەبەرلین وئیستەنبۆڵ وئامەد وتاران كە بووە هۆی پەیوەندیكردنمان بە ژمارەیەکی زۆر لە كۆمپانیای تایبەتەمەند."

سەرۆكی دەستە ئەوەشی خستەڕوو كە لەمیانەی ئەو دیدارانەدا رێككەوتن لەگەڵ كۆمپانیا گەشتیاریەكان كراوە "نرخی كێبڕكێكاری وهەرزان پێشكەشی گەشتیاران بكرێت لەڕووی كرێی رێگا وئوتێل وتەنانەت هەبوونی داشكان لەكڕینی كەلوپەلی جیاجیا لەمۆلەكانیش بۆهاندانی هێنانی زیاترین ژمارەی گەشتیار".

هەروەها ئاشكرایكرد، دەستەی گەشتوگوزاری هەرێمی كوردستان، شوێنێكی تایبەتی لە پیشانگای دوبەی گەشتیاری وەرگرتووە كە بڕیار وایە لە مانگی داهاتوودا ئەنجامبدرێت وتیایدا هەرچی پەیوەندی بەگەشتوگوزاری كوردستانەوە هەیە لەوێ نمایش دەكرێت بەشێوەیەك كە بتواندرێت سەرنجی كۆمپانیاكانی جیهان رابكێشرێت بۆ هێنانی گەشتیار یانیش وەبەرهێنان لەم بوارەدا.

ئاشكراشیكرد، لەمانگی یۆنیۆ/حوزەیرانی داهاتوودا لەبۆدابێست دیدارێك لەنێوان كۆمپانیا گەشتیاریەكانی هەرێم وچەندین كۆمپانیای ئەورووپا بەڕێوەدەچێت وتیایدا باسی بارودۆخی كوردستان دەكرێت وهەموو پاكێجە گەشتیاریەكان نمایش دەكرێت وپێشكەشی ئەو كۆمپانیایانە دەكرێت.

مەولەوی جەبار تیشكی خستە سەر پرۆژەیەك كە دەستەی گشتی گەشتوگوزاری هەرێم بەنیازە لەگەڵ چەندین كۆمپانیای دیار وبەرچاو جێبەجێی بكات. وتی ئەم پرۆژەیە کە بە "كوردستان هۆڵیدەی" دەناسرێت ولەسەر ئاستی باكوور وباشوور ورۆژهەڵاتی کوردستان جێبەجێ دەكرێت.

وردەكاری ئەو پرۆژەیەش لەوەدایە، كە گەشتیار لەیەك كاتدا چەندین شار وشوێنی گەشتیاری هەرێمی كوردستان وشارەكانی دیكەی باكوور ورۆژهەڵاتی كوردستان بەسەر بكاتەوە وهەموو ئەو گەشتانەش لەیەك پاكێجدا بن وئاماژەی بەوەشدا ئەم پرۆژەیە كاری زۆری لەسەر كراوە وكۆمپانیاكان دیراسەیان كردووە وهیوای خواست لەنزیكترین كاتدا ببێتە واقیع وجێبەجێ بكرێت.

هەروەها گوتی، لەمانگی یۆلیۆ/تەمموزی داهاتوودا "گەشتێكمان بۆ شاری وان دەبێت ولەوێ هەموو ئەو پاكێجانەی باسمان كردوون ولەسەری رێككەوتووین رێكیان دەخەینەوە ولە 27ی سەپتەمبەر/ئەیلولی داهاتووش، كە رۆژی جیهانی گەشتوگوزارە، هەموو ئەو كۆمپانیایانەی لەگەڵیان دانیشتووین داوەتی هەولێریان دەكەین ولەكۆنفڕانسێكی گەورەدا هەڵسەنگاندنی ئەو بەرنامانە دەكەین كە جێبەجێمان."

ئەوەشی خستەڕوو كە لەمانگی نۆڤەمبەر / تشرینی دووەمی داهاتوودا هەرێمی كوردستان بەشداری پیشانگای لەندەن دەكات، كە یەكێكە لەپیشانگا هەرە گرنگەكانی بواری گەشتیاری لەجیهاندا.

لەسەر ئاستی ناوخۆدا، وەك سەرۆكی دەستە نیشانیدا، كاری زۆر وپرۆژەی زۆر لەئارادایە لەبارەی بەرزكردنەوەی كواڵیتی. بۆ ئەم مەبەستەش دانیشتن وكۆبوونەوە لەگەڵ هوتێل وكۆمپانیا گەشتیاریەكان کراون.

هەروەها ئاشکرای کرد کە ناوەندێكی گەورەی راهێنانی گەشتیاری لەهەرێمی كوردستان ئەم ساڵ دەكرێتەوە وتیایدا هەوڵدەدرێت چەند پسپۆڕ ومامۆستای بیانی بێن ومەشق بە كارمەند وپسپۆڕانی ئەم بوارە بكات. بۆ ساڵی داهاتووش، راهێنان لەم ناوەندە دەبێتە مەرجێك بۆ كاركردن لەبواری گەشتیاری لەسەر ئاستی ناوخۆدا.

پێشنیوەڕۆی ئەمڕۆ 2015/4/30 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێزان پڕۆفیسۆر پاوڵ بۆیل سەرۆكی زانكۆی لیستەری بەریتانی و د. موسڵح مستەفا سەرۆكی زانكۆی سۆران و شاندێكی یاوەریان كرد.

لە دیدارێكدا باس لەو نەخشەڕێگایە كرا كە لە نێوان هەردوو زانكۆی لیستەر و سۆراندا واژۆ كراوە و لەم نێوەندەشدا به‌ڕێز سەرۆكی زانكۆی لیستەر باسی لە گرنگیی پەیوەندی و مێژووی ئەو پەیوەندییە لە نێوان هەردوو زانكۆی لیستەر و سۆراندا کرد و پڕۆژە هاوبەشەكانی نێوان هەردوو زانكۆی بە گرنگ و بەرهەمدار لە قەڵەم دا، ئاماژەی بەوەش كرد كە هەردوو زانكۆ لە تێڕوانین و بیرۆکە و فەلسەفەی پێشکەوتنی ئەکادیمی و زانستی لە یەكەوە نزیکن، ئەمەش هۆکارێکی گرنگە بۆ کارکردن و دۆزینەوەی پڕۆژەی هاوبەش.

دواتر ناوەڕۆكی نەخشەڕێگای واژۆكراوی نێوان هەردوو زانكۆی لیستەر و سۆران بۆ بەڕێز سەرۆك وەزیران خرایە ڕوو كە لە كردنەوەی سەنتەرێكی زمان و سەنتەری توێژینەوەی سامانە سروشتییەكان و كردنەوەی كەمپی زانكۆی لیستەر لە شاری سۆران پێك دێت.

لە دیدارەكەدا سەرۆكی زانكۆی لیستەر ئاماژەی بەوە كرد كە لەگەڵ هەریەك لە وەزارەتەكانی كشتوكاڵ و شارەوانی و گەشتوگوزار كۆبوونەتەوە و تیایاندا باسیان لە پرۆژەی هاوبەش كردووە وەك دروستكردنی نەخشەی كشتوكاڵی و گەشتوگوزار و پاراستنی كەرستەی مێژوویی و كلتووری لە هەرێمی كوردستان.

لای خۆیەوە بەڕێز سەرۆك وەزیرانی هەرێمی كوردستان سوپاسی سەردانی شاندی میوانی كرد و باسی لە گرنگیی پەیوەندیی نێوان هەردوو زانكۆی لیستەر و سۆران كرد و پشتگیریی خۆی بۆ ئەو نەخشەڕێگایە دەربڕی كە لە نێوان هەردوو زانكۆدا واژۆ كراوە، ئاماژەی بەوەش كرد كە ئەم جۆرە نەخشەڕێگایانە هاندەری باش و ئەرێنی دەبن بۆ زیاتر بەرزكردنەوەی ئاستی زانستی لە زانكۆكانی هەرێمی كوردستان.

لە بەشێكی دیكەی قسەكانیدا بەڕێز نێچیرڤان بارزانی پشتگیریی حكوومەتی هەرێمی كوردستانی بۆ ئەو پڕۆژە هاوبەشانە دەربڕی كە لە نێوان هەردوو زانكۆی سۆران و لیستەردا ئەنجام دەدرێن و بە پرۆژەی گرنگ و بەرهەمداری لە قەڵەم دان، هیواشی خواست كە ئەم پڕۆژە هاوبەشانە هەموو بوارەكانی دیكە بگرێتەوە بەتایبەتی بوارەكانی كشتوكاڵ و گەشتوگوزار، بۆ ئەم مەبەستەش كارئاسانی و پشتگیریی حكوومەتی هەرێمی بۆ شاندی میوان دەربڕی.

ئەمڕۆ پێنجشەممە ٢٣/٤/٢٠١٥ بەڕێز (مەسعود بارزانی) سەرۆکی هەرێمی کوردستان بە مەبەستی ئاگاداربوون لە ڕەوشی کوردانی ئێزدی و ئاوارەكان و ئاڵوگۆڕكردنی بیروڕا دەربارەی دواڕۆژی ناوچەكەیان و شەڕی داعش، لەگەڵ ژمارەیەک لە كەسایەتی و پیاوماقووڵانی کوردی ئێزدیی دەڤەری شنگال و شێخان و باشیک کۆبوویەوە.

لە دیدارەکەدا (سەرۆک بارزانی) وتەیەکی پێشکەش کرد و تێیدا باسی ئەو کارەساتەی کرد کە بەسەر خوشك و برایانی ئێزدیدا هات كە درێژەپێدەری ئەو كارەساتانەیە كە بەسەر گەلی كوردستاندا هاتووە و ئەوەیشی باس كرد كە ئێزیدییەكان لەبەر كوردبوون و ئێزیدیبوونیان بوونە ئامانجی تیرۆریستان بەڵام دوژمنان لەو پیلانەی کە دایان‌نابوو بۆ لەناوبردنی ئێزدییەکان، شکستیان هێنا و، پیلانەکەیان سەری نەگرت. سەرۆك بارزانی ڕایگەیاند ئێستا بارودۆخەکە زۆر باشترە لە ساڵی پار و ڕێگاكان بۆ دەڤەری شنگال کراوەیە و، تێكڕای گەلی كوردستان و، هەموو دنیایش پاڵپشتی ئێزدییەکانە و پێشمەرگە و ڕۆڵەكانی گەلی كورد بە خوێنی خۆیان دەڤەرەكەیان ڕزگار كرد.

(سەرۆک بارزانی) لە بەشێکی دیکەی وتەکانیدا داوای لە کوردانی ئێزدی کرد کە هەست نەکەن کە کەرامەت و شەره‌فیان شکاوە، چونکە کەرامەت و شەرەفی ئیزدییەکان کەرامەت و شەرەفی میللەتی کوردە، داوایشی لێ کردن کە ئومێدیان هەبێت و باوەڕیان بە خۆیان هەبێت و داهاتوو هی ئێزیدییەكانە و بەڵێنیشی پێ دان کە لە چوارچێوەی بەرنامەیەکی سەربازیی گشتگیر و سەرتانسەریدا، گشت ناوچەکانیان ئازاد دەکرێتەوە و، ئاماژەیشی بەوەدا كە لەڕووی ئابووری و ئاوەدانكردنەوە بایەخێكی تایبەت بە ناوچەی ئێزیدییەكان دەدرێت بۆ ئەوەی بتوانن پشت بە خۆیان ببەستن.

هەر لەم كۆبوونەوەیەدا سەرۆک بارزانی بە ئیزدییەکانی ڕاگەیاند: "دەبێ داهاتووتان زامن بێ و، نابێ ڕێگە بدرێت جارێکی دی کارەساتی لەو شێوەیە دووبارە ببێتەوە، دەبێ ئێزدییەکان گشت ئیمکانیاتێکیان بۆ دابین بکرێ هەتا ناوچەکەی خۆیان بپارێزن و بەرگریی لێ بکەن؛ ئەو بابەتەیش تاوتوێ دەکرێت کە دەڤەری شنگال بکرێتە پارێزگا."

سەبارەت بە داهاتووی ناوچەکان و چارەنووسی کوردانی ئێزدی بەڕێز سەرۆکی هەرێمی کوردستان جەختی کردەوە کە: "هیچ کەس بۆی نییە کە داهاتووی کوردانی ئیزدی و چارەنووسیان دیاری بکات، کوردانی ئێزدی خۆیان خاوەن بڕیاری دیاریکردنی چارەنووسی ناوچەکانیانن و، بڕیار لە دیاریکردنی ناسنامەی نەتەوەیی خۆیان دەدەن و، چ بڕیارێکیشیان دا، دەبێ ئەو بڕیارە جێبەجێ بكرێت.

لە بەرانبەردا کەسایەتی و پیاوماقووڵانی کوردانی ئێزدی سوپاسی سەرۆک (بارزانی)ـیان کرد بۆ خەمخۆری و پەرۆشیی بۆ کوردانی ئێزدی و هاتنی سەرۆكیان بۆ چیای شنگال بە ڕووداوێكی مێژوویی وەسف كرد. هەروەها سوپاسی هیزەکانی پێشمەرگەیان کرد كە بۆ بەرگری لە کوردانی ئێزدی و ئازادكردنی دەڤەرەكەیان خۆێنی خۆیان بەخشیوە، هەروەها ئامادەبووان جەختیان لە كوردبوون و ناسنامەی نەتەوەیی خۆیان کردەوە. لەم دانیشتنەدا كەسایەتییە ئێزیدیەكان كۆمەڵێك داواكارییان خستەڕوو و سەرۆك بارزانیان لە كێشە و گرفتەكانیان ئاگادار كردەوە.

بۆ بینینی وتارەكەی سەرۆك بارزانی ئێرە كلیك بكە