نوێنەری حكومەتی هەرێمی كوردستان لە كۆماری ئیسلامی ئێران رەتیدەكاتەوە ئەو وڵاتە هەوڵی دواخستنی هەڵبژاردنی پەرلەمانی كوردستان بدات و دەڵێت "ئەو لایەنانەی دەیانەوێت هەڵبژاردنی پەرلەمانی كوردستان دوابكەوێت بەناوی ئەملا و ئەولا سیناریۆ دروست دەكەن".
نازم دەبباغ، نوێنەری حكومەتی هەرێمی كوردستان لە كۆماری ئیسلامی ئێران بە وێستگە نیوزی راگەیاند "پێموایە ئەو لایەنانەی كە دەیانەوێت هەڵبژاردنی پەرلەمانی كوردستان لە كاتی خۆیدا دوابكەوێت هەندێك سیناریۆ دروست دەكەن بەناوی ئەملا و ئەولا، ئەگینا بڕیاری ئەنجامدانی هەڵبژاردنی پەرلەمانی كوردستان لەدەست لایەنە سیاسییەكانە".
سەبارەت بەوەی بۆچی هەندێك لایەن سیناریۆ بۆ دواخستنی هەڵبژاردن دروست بكەن، دەبباغ روونیكردەوە "پێموایە ئەو لایەنەی كە بیەوێت هەڵبژاردن دوابخات و لە ئەنجامی هەڵبژاردن بترسێت و لەكەمبوونی دەنگەكانی یان لەدروستبوونی كێشە، ئەوانە خۆیان بەشێكن لەوەی كە بیانەوێت هەڵبژاردن دوابخەن".
ناوبراو رەتیكردەوە كۆماری ئیسلامی ئێران دەستوەردان بۆ دواخستنی هەڵبژاردنی پەرلەمانی كوردستان بكات و وتی "ئێران لەگەڵ ئەوەدایە هەرچی زووە حكومەتی نوێی عیراق پێك بهێنرێت و هەڵبژاردنی پەرلەمانی كوردستان بكرێت".
بڕیارە رۆژی 30ی ئەیلول هەڵبژاردنی خولی پێنجەمی پەرلەمانی كوردستان ئەنجام بدرێت، هەفتەی رابردووش لایەنەكان ناوی كاندیدەكانیان پێشكەشی كۆمسیۆنی هەڵبژاردن كرد.