ڕۆژی پێنجشەممە 30ـی 7ـی 2015 بەڕێز مەسعود بارزانی سەرۆكی هەرێمی كوردستان پێشوازی لە دكتۆر ئەحمەد ئەمیری یاریدەدەری سكرتێری گشتیی ئەنجومەنی ئاسایشی نەتەوەیی ئێران و شاندێكی یاوەری كرد.
لە دیدارەكەدا باس لە مەترسی دەركەوتنی تیرۆریستانی داعش و هزری تەكفیری لەسەر ئاساییشی جیهان و ناوچەكە كرا و بیروڕا لەبارەی هەوڵی هاوبەشی هەموو لایەك و چۆنییەتیی ڕووبەڕووبوونەوەی مەترسییەكانی هزری توندڕۆیی و تیرۆر ئاڵوگۆڕ كرا. هەروەها دواپێشهاتە سیاسی و ئەمنیی لە ناوچەكەیش خرایە بەر باس و گفتوگۆ.
لە بەشێكی ئەم دیدارەدا یاریدەدەری سكرتێری گشتیی ئەنجوومەنی ئاساییشی نەتەوەیی ئێران ستاییشی ڕۆڵی هێزی پێشمەرگەی كرد لە تێكشكاندن و ڕاگرتنی پەلاماری تیرۆریستان كە دەستێكی باڵایان لە پاراستنی ئاساییشی ناوچەكە و وڵاتان لە هەڕەشەی تیرۆریستانی داعش هەبووە.
هەر لەم دیدارەدا شاندی میوان بیروڕای خۆیان لەبارەی ڕێككەوتنی ئەتۆمیی وڵاتەكەیان لەگەڵ ڕۆژئاوا و هەروەها پەرەسەندن و گۆڕانكارییە سیاسییەكانی ناوچەكە بۆ سەرۆك بارزانی خستەڕوو و جەختیشیان لەوە كردەوە كە ئاساییش و سەقامگیری و بەهێزیی هەرێمی كوردستان بۆ كۆماری ئیسلامیی ئێران جێگەی بایەخە.
زاگرێب چەندین رووداوی کەلتووری و سیاسی پەیوەست بە هەرێمی کوردستان بەخۆیەوە دەبینێت
هەفتەی رابردوو زاگرێبی پایتەختی کرۆواتیا، چەندین رووداوی کەلتووری پەیوەست بە هەرێمی کوردستان وچەندین کۆبوونەوی سیاسی لە نێوان حکومەتی هەرێمی کوردستان و بەرپرسانی باڵای ئەو وڵاتەی بەخۆیەوە بینی.
شاندێکی فەرمانگەی پەیوەندییەکانی دەرەوه‌ی حکومەتی هەرێمی کوردستان بەسەرۆکایەتی به‌ڕێز فەلاح مستەفا بەرپرسی فەرمانگەی پەیوەندییەکانی دەرەوە لە 49یەمین فێستیڤالی نێودەوڵەتی فۆلکلۆری بەشدارییان کرد کە لە نێوان رۆژانی 15 تا 19 ی تەمووز لە شاری زاگرێب بەرێوەچوو. لە پەراوێزی ئەو فێستڤاڵە هەروەها هەفتەی کەلتووری کوردستان-کرۆواتیا بەرێوەچوو.
رۆی یەکشەممە، 19 ی تەمووز، بەرێز فەلاح مستەفا بەشداری لە مەراسیمی کۆتایی فێستیڤاڵی نێوودەوڵەتی زاگرێب کرد کە تیایدا تیمی هونەری نیشتمانی کوردستان هەڵپەرکێی کوردییان نمایش کرد.
سەبارەت بە گرینگی هەفتەی کەلتووری کوردستان-کرۆواتیا، فەلاح مستەفا رایگەیاند، " ئەو رووداوە هەلێکی باشی بۆ بەشداربووان رەخساند بۆ ئەوەی کەلتووری راستەقینەو میراتی کەلتووری کوردستان بناسن، رووداوی لەو چەشنە زیاتر برەودەدات بە ئالوگۆڕی کەلتووری و پێشخستنی لێکتێگەیشتن لە نێوان هاوڵاتییانی کوردستان و کرۆواتیا."
رۆژی دواتر، فەلاح مستەفا بەشداری کرد لە سمینار و پێشانگایه‌ك ده‌رباره‌ی ئەنفال كه لە ئارشیڤی نیشتمانی کرۆواتی رێكخرابوو. فەلاح مستەفا ووتی، "هەموو شارستانیەتێک، هەموو کەلتوورێک، هەموو خەڵکانێک کاتی چارەنووسسازیان لە مێژووی خۆیاندا هەبووە، بۆ کوردی عێراق ئەو کاتە، ئەنفالە کە ئێمە رووبەرووی مردن بووین بەدەستی دوژمنێکی دڵڕەق لەناو وڵاتەکەی خۆماندا، بەلام ئێمە زیندوو ماین بۆ ئەوەی گەشە بکەین."
لە چواچیوەی سەردانەکەیدا، بەرێز فەلاح مستەفا هەروەها لەگەڵ بەرپرسە باڵاکانی ئەو وڵاتە لە نێوانیشیاندا سەرۆک کۆماری کرۆواتیا، خاتوو کۆلیندا گاربەر کیتراوۆڤیچ، کۆبووەوە.
لە کۆبوونەوەکەیدا لەگەڵ سەرۆکی کرۆواتیا، بەرێز فەلاح مستەفا پەیوەندییە دووقۆڵییەکانی نێوان هەرێمی کوردستان و کرۆواتیا هەروەها بارودۆخی ئێستای ناوچەکەیان لەگەڵ سەرۆکی کرۆواتیا تاوتوێ کرد.
هەردوولا باسیان لەو ئاستەنگە سەربازی و مرۆڤییە کرد کە رووبەرووی هەرێمی کوردستان بووەتەوەو جەختیان لە هاوکاری نێودەوڵەتی و ناوچەیی کرد بۆ لەناوبردنی تیرۆریزمی نێودەوڵەتی و گەڕاندنەوەی سەقامگیری بۆ رۆژهەڵاتی ناوەراست.
بەرێز فەلاح مستەفا سوپاسی بەشداری کرۆواتیای کرد لە هاوپەیمانی دژی رێكخراوی تێرۆریستی ده‌وڵه‌تی ئیسلامی، ناسراو به داعشداو رایگەیاند هێشتا هێزەکانی پێشمەرگە پێویستییان بە چەک و تەقەمەنی و راهێنانی سەربازی هەیە.
هه‌روه‌ها باسی لەو تەحەددایانە کرد کە رووبەرووی حکومەتی هەرێمی کوردستان هاتووە كه شوێنی نزیکەی یه‌ك ملیۆن وهه‌شت سه‌د هه‌زار پەنابەر و ئاوارەی کردووەتەوە وداوای یارمەتی زیاتری نێودەوڵەتیشی لەو بارەیەوە کرد.
له‌لای خۆیه‌وه، سەرۆکی کرۆواتیا رایگەیاند تێگەیشتنی تەواویان هەیە بۆ ئەو کێشانەی رووبەرووی هەرێمی کوردستان بوونەتەوەو پشتیوانی کرۆواتیای بۆ هەرێمی کوردستان لە شەڕ لە دژی تیرۆریستانی داعش دووپاتکردەوە.
بەرپرسى پەیوەندیەکانى دەرەوەی حکومەتی هەرێمی کوردستان هەروەها لەگەڵ هەر یەک لە دۆماگۆیى یوریچیج سەرۆکى دیوان و داریۆ میخلاین ڕاوێژکارى سەرۆک کۆمار بۆ کاروبارى سیاسەتى دەرەوە و ئەوروپا و یوسیپ بولیێڤیچ ڕاوێژکارى سەرۆک کۆماری کرۆواتیا بۆ کاروبارى بەرگرى و ئاسایشى نیشتیمانى کۆبووەوە.
دۆماگۆیى یوریچیج سەرۆکى دیوانی سەرۆکایەتی کرۆواتیا ستایشی رۆڵی پێشمەرگەی کرد لە رێگریکردن لە پێشرەوییەکانی داعش و هاوکارییە مرۆڤییەکانی حکومەتی هەرێمی کوردستانی بەرزنرخاند کە پێشکەش بە ئەو ژمارە زۆرە ئاوارە و پەنابەرە دەکرێت و رایگەیاند، " ئێمە وەک هاوبەشێک چاو لە هەرێمی کوردستان دەکەین و چاومان لە بەردەوامی هاوکارییەکانە لە هەموو روویەکەوە."
لەکۆبوونەی لەگەڵ فەلاح مستەفا، داریۆ میخلاین ڕاوێژکارى سەرۆک کۆماربۆ سیاسەتى دەرەوەی کرۆڤاتیا رایگەیاند، ئێمە پێزانینمان هەیە بۆ ڕۆڵى سەرۆک بارزانى لە سەرکردایەتیکردنی هەرێمی کوردستان لە شەڕ لە دژی تیرۆریستانی داعشدا. راشیگەیاند، " هەرێمی کوردستان بووەتە دوورگەیەکی سەقامگیر بۆ پێکەوەژیانی ئایینی و ئاشتیانەو پێشکەوتن."
یوسیپ بولیێڤیچ ڕاوێژکارى سەرۆک کۆمار بۆ کاروبارى بەرگرى و ئاسایشى نیشتیمانى جەختی کردەوە توندڕەوی ئایینی دیاردەیەکی نێودەوڵەتییە، لەبەر ئەوەش کۆمەڵگای نێودەوڵەتی بەرپرسیارییەتی هاوبەشی هەیە دژی گرووپە تیرۆریستییەکان شەڕ بکات. کرۆواتیا ئەندامێکی هاوپەیمانی دژی داعشە و پابەندە بە پشتگیریکردنی هەرێمی کوردستان لەو شەڕەدا."
جێگری سەرۆکی حکومەتی هەرێم ستایشی کارەکانی کونسوڵی پێشوی ئەمریکا دەکات و پێشوازی لە کونسوڵی نوێی ئەو وڵاتە لە هەرێم دەکات
لە دیدارێکدا، کە لە تەلاری ئەنجومەنی وەزیران بەڕێوەچوو، جۆزێف پینینگتۆن، کونسوڵی پێشووی ئەمریکا لە هەرێم، ماتیاس میتمەنی وەکو کونسوڵی نوێی وڵاتەکەی لە هەرێمی کوردستان بە بەڕێز قوباد تاڵەبانی جێگری سەرۆکی حکومەتی هەرێمی کوردستان ناساند.
لە دەستپێکی دیدارەکەدا کە ئەمڕۆ بەڕێوەچوو، جێگری سەرۆکی حکومەتی هەرێم سوپاس و پێزانینی خۆی وحکومەتی هەرێمی بە جۆزێف پینینگتۆن راگەیاند، کە لە ماوەی دوو ساڵی رابردوودا وەکو کونسوڵی ئەمریکا لە هەرێمی کوردستاندا کاری کردووە، وهیوای سەرکەوتنی لە ئەرکەکانی داهاتویدا بۆ خواست.
جۆزێف پینینگتۆن دووپاتی کردەوە کە ئەمریکا هاوپەیمانی ستراتیژیی هەرێمی کوردستانە و هیوای خواست کونسوڵی نوێی وڵاتەکەی لەسەر هەمان رێچکە کار بکات و برەو بە پەیوەندییەکان بدات لەسەر ئاستەکانی ئابووری و فەرهەنگی و سەرجەم بوارەکانی تر.
لە وتەیەکیشیدا بەڕێز قوباد تاڵەبانی رایگەیاند، جۆزیف پینینگتۆن لە کاتێکی گرنگدا لە هەرێمی کوردستاندا کاری کرد و توانی لە ماوەی دوو ساڵی کارکردنیدا شوێنی خۆی بکاتەوە بەوەی رۆڵی بەرچاوی هەبوو لە بەرەوپێشبردن و پتەوترکردنی پەیوەندییەکانی نێوان هەرێمی کوردستان و ئەمریکا.
لە بەشێکی تری قسەکانیدا بەڕێز جیگری سەرۆکی حکومەتی هەرێم وتی، ماتیاس میتمەن کەسێکی بە توانایە و پێشتر لە ئەنجومەنی ئاسایشی ئەمریکا کاری لەسەر دۆسێی عیراق کردووە، هەروەک کونسوڵی وڵاتەکەی بووە لە شاری بەسرا.
یەكێتیی ئەوروپا لە هاوكارییكردنی هەرێمی كوردستان بەردەوام دەبێت
ئێوارەی ئەمڕۆ دووشەممە 27/7/2015 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێزان كریستۆس ستایلیاندس كۆمیساری باڵای یەكێتیی ئەوروپا بۆ كاروباری مرۆیی و بەڕێوەبردنی قەیرانەكان و خاتوو جانا هایپەسكۆڤا باڵیۆزی یەكێتیی ئەوروپا لە عێراق و شاندێكی یاوەریان كرد.
لە دیدارێكدا شاندی میوان سوپاس و پێزانینی خۆیان پێشكەش بە خەڵك و حكوومەتی هەرێمی كوردستان كرد كە سەرەڕای ئەو بارە قورسە ئابوورییەی ڕووبەڕوویان بووەتەوە، باوەشیان بۆ ئەو ژمارە زۆرەی ئاوارە و پەنابەران كردووتەوە و بە باشترین شێوە خزمەتگوزاریی پێویستیان پێشكەش كردوون بۆیە وەك یەكێتیی ئەوروپا هاوكار و پشتیوانی هەرێمی كوردستانن و بەردەوامیش دەبن و هەوڵ دەدەن كۆمەڵگەی نێودەوڵەتی زیاتر هاوكاریی هەرێمی كوردستان بكات بۆئەوەی ئەو بارە قورسەی لەسەر شانییەتی، كەم بكرێتەوە.
ڕێز و سوپاسی خۆشیان پێشكەش بە پێشمەرگەی كوردستان كرد كە توانیویانە بەر لە هەڕەشە و هێرشەكانی تیرۆرستانی داعش بگرن و هێرشەكانیان تێكبشكێنن و خەڵكی ناوچەكە بە هەموو پێكهاتە نەتەوەیی و ئایینییەكانەوە بپارێزن. هەروەك باسیان لە پێدوایستییەكان و هەوڵەكانی هەرێمی كوردستان لەگەڵ بەغدا بۆ بەدەستهێنانی هاوكاریی نێودەوڵەتی كرد و جەختیان لەوە كردەوە كە پێویستە كۆمەڵگەی نێودەوڵەتی بایەخێكی زیاتر بەو بابەتە بدات.
لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانەی شاندی یەكێتیی ئەوروپای كرد و داوای كرد لەو سەردانەیاندا ڕاستی بارودۆخی هەرێمی كوردستان بگەیەننە لایەنە پەیوەندیدارەكانی ئەوروپا و نێودەوڵەتی و لە پشتگیریی و هاوكارییكردنی خەڵك و حكوومەتی هەرێمی كوردستان بۆ بەهاناوەچوونی ئاوارە و پەنابەران بەردەوام بن جا چ ڕاستەوخۆ یان بە ڕێگەی ڕێكخراوەكانی نێودەوڵەتی و ناوخۆی هەرێمی كوردستانەوە بێت.
هەروەها سوپاسی ڕۆڵی بەڕێز باڵیۆزی یەكێتی ئەوروپای لە عێراق كرد كە بەردەوام سەردانی هەرێمی كوردستان دەكات و لە نزیكەوە چاودێری بارودۆخی هەرێم دەكات و ئەمەش بایەخدانی یەكێتی ئەوروپا بە هەرێمی كوردستان دەگەیەنێت و جێگەی خۆشحاڵییە.
تاوتوێكردنی بارودۆخی گشتی عێراق و ناوچەكە و ئەو كێشانەی ڕووبەڕووی ناوچەكە بوونەتەوە، تەوەرێكی دیكەی دیدارەكە بوو.
بەریتانیا پشتگیریی لە چارەسەركردنی كێشەكانی نێوان هەولێر و بەغدا دەكات
سەرلەبەیانیی ئەمڕۆ سێشەممە 28/7/2015 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێز فرانك بەیكەر باڵیۆزی بەریتانیا لە عێراق و شاندێكی یاوەری كرد.
لە دیدارێكدا بەڕێز بەیكەر خۆشحاڵیی خۆی بە سەردانی هەرێمی كوردستان دەربڕی و پەیوەندییە دووقۆڵییەكانی نێوان هەرێمی كوردستان و بەریتانیای لە هەموو بوارەكاندا دووپات كردەوە، بە تایبەتی لە بوارەكانی بازرگانی و ئابووریدا. هەروەها ئاماژەی بە ڕەوشی عێراق بە شێوەیەكی گشتی و بە تایبەتی شەڕی دژی تیرۆرستانی داعش لە دەڤەرە جیاجیاكان كرد و پشتگیری و هاوكاریی وڵاتەكەی بۆ هێزی پێشمەرگەی كوردستان لەو شەڕەدا پیشان دا و ڕۆڵی خەڵك و حكوومەتی هەرێمی كوردستانیشی لە ڕووبەڕووبوونەوەی تیرۆر و دوورخستنەوەی مەترسییەكانی لە ناوچەكە، بەرز نرخاند.
بەڕێزیان هەروەها باسی لە كێشەكانی نێوان هەرێمی كوردستان و حكوومەتی فیدراڵ و كێشەكانی ناوخۆی هەرێمی كوردستان بە تایبەتی یاسای سەرۆكایەتیی هەرێمی كوردستان كرد و جەختی لەوە كردەوە كە پێویستە ئەو كێشانە بە ڕێگەی دیالۆگ و لێكگەیشتن و سازان چارەسەر بكرێن و پشتگیری و هاوكاریی خۆیشی بۆ چارەسەركردنی كێشەكان دەربڕی.
لای خۆیەوە بەڕێز سەرۆك وەزیرانی هەرێمی كوردستان سوپاسی سەردانی بەڕێز باڵیۆزی بەریتانیای لە عێراق و شاندی یاوەری كرد و هیوای خواست پەیوەندییە دووقۆڵییەكانی لەگەڵ هەرێمی كوردستان لە هەموو بوارەكاندا زیاتر گەشەی پێ بدرێت. هەروەها باسی لە سەركەوتنە بەردەوامەكانی هێزی پێشمەرگەی كوردستان لە شەڕی دژی تیرۆرستانی داعش كرد و هیوای بەردەوامیی هاوكاریی سەربازی لەلایەن وڵاتانی ئەورووپا بە تایبەتی بەریتانیاوە بۆ هێزی پێشمەرگە خواست.
لەبارەی كێشەكانی نێوان هەولێر و بەغداشەوە بەڕێز نێچیرڤان بارزانی جەختی لەوە كردەوە كە حكووومەتی هەرێمی كوردستان دەخوازێت كێشەكان بە ڕێگەی گفتوگۆ و دیالۆگ چارەسەر بكرێن. هەروەها ئەوەشی دووپات كردەوە كە پێویستە پرسی یاسای سەرۆكایەتیی هەرێمی كوردستان بە ڕێگەی سازان و لێكگەیشتن چارەسەر بكرێت و هەموو لایەنەكان لەسەر ئەم پرسە بگەنە ئەنجامێك كە لە بەرژوەندیی گشتیی هەرێمی كوردستاندا بێت.
لە دیدارێکدا لەگەڵ ئەکهارد برۆزە باڵیۆزی ئەڵمانیا لە عیراق، قوباد تاڵەبانی جێگری سەرۆکی حکومەتی هەرێمی کوردستان پرسی سیاسی عیراق و هەرێمی کوردستانی تاووتوێ کرد.
بەڕێز قوباد تاڵەبانی رایگەیاند، "هەرچەندە وەکو کورد بەشدارییەکی کارامان لە بونیادنانەوەی حکومەتی عیراقدا کردوە و تاوەکو ئێستاش هەموو هەوڵێکمان بۆ مانەوەی عیراقی دیموکراتی و فیدراڵ خستوەتەگەڕ، بەڵام روونە بۆ هەموو لایەک کە پرسی سەربەخۆیی کوردستان مافێکی رەوای گەلی کوردستانە."
لە گفتوگۆکەدا جێگری سەرۆکی حکوومەت هەوڵە بەردەوامەکانی حکوومەتی هەرێمی کوردستانی بۆ چارەسەرکردنی کێشە سیاسی و ئابووری و ئەمنیەکان عیراقی خستەڕوو و رایگەیاند: راستییەک هەیە کە ئێستا عیراق خۆی یەکگرتوو نیە و ئینتیما بۆ دەوڵەتێک بە ناوی عیراق نەماوە، هێندەی ئینتیما بۆ شیعە و سوونە و بۆ کورد هەیە..
هەروەها قوباد تاڵەبانی سوپاسی حکومەت و گەلی ئەڵمانیای کرد بۆ هاوکارییە سەربازیی و مرۆییەکانیان بۆ هەرێمی کوردستان و داوای کرد کە بەردوەام بن.
ئیمارات لە هاوكارییكردنی هەرێمی كوردستان بەردەوام دەبێت
پێشنیوەڕۆی ئەمڕۆ پێنجشەممە 30/7/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەڕێز حەسەن ئەحمەد ئەلشحی باڵیۆزی نوێی ئیمارات لە عێراق و شاندێكی یاوەری كرد.
لە دیدارێكدا بەڕێز باڵیۆزی نوێی ئیمارات لە عێراق خۆشحاڵیی خۆی بە سەردانی هەرێمی كوردستان و سەرسامیی خۆیشی بەرامبەر پێشكەوتنەكانی هەرێمی كوردستان لەی هەموو بوارەكاندا و بە تایبەتی لە بواری ئابووریدا دەربڕی و ئاماژەی بەوە دا سەربارەی ئەو گرفتانەی دروست بوون، بەڵام هەرێمی كوردستان بە سیاسەت و سەركردایەتیی حەكیمانەی خۆی توانیویەتی سەركەوتنی باش لە هەموو بوارەكاندا بەدەست بهێنێت. باسی لەوەش كرد كە ئیمارات بایەخێكی زۆر بە پەیوەندییەكانی لەگەڵ هەرێمی كوردستان و زیاتر بەهێزكردنیان دەدات و سەرمایەدارانی ئیماراتی هان دەدەن بۆئەوەی وەبەرهێنان لە هەرێمی كوردستان بكەن.
هەروەها دەستخۆشی لە خەڵك و حكوومەتی هەرێمی كوردستان كرد كە سەرباری ئەو بارە قورسە داراییەی لەسەر شانیەتی، توانیویانە باوەش بۆ ژمارەیەكی یەكجار زۆری ئاوارە و پەنابەران لە هەموو پێكهاتەكان بكەن و شوێنی حەوانەوە و خزمەتگوزاریی پێویستیان بۆ دابین بكەن و ئامادەییی وڵاتەكەشی بۆ كەمكردنەوەی ئەو بارە قورسەی سەر شانی حكوومەتی هەرێم بە ناردنی بەردەوامی هاوكاری، پیشان دا.
لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانەی و هەڵوێستی بەڕێز باڵیۆز و حكوومەت و خەڵكی ئیماراتی كرد كە توانیویانە پەیوەندییەكی باش لەگەڵ هەرێمی كوردستان دروست بكەن و هاوكاریی حكوومەتی هەرێمی كوردستان بكەن بۆ بەهاناوەچوونی ئەو ئاوارە و پەنابەرانەی لە ترسی تیرۆر ڕوویان لە هەرێمی كوردستان كردووە. جەختی لەوەش كردەوە حكوومەتی هەرێمی كوردستان بە بایەخەوە سەیری پەیوەندییەكانی لەگەڵ حكوومەتی ئیمارات دەكات و ئامادەییی حكوومەتی هەرێمیشی بۆ پێشوازیكردن لە سەرمایەدارانی ئیمارات و پێشكەشكردنی كارئاسانی، دەربڕی.
بەڕێز نێچیرڤان بارزانی هیوای سەركەوتنی بۆ بەڕێز باڵیۆزی نوێی ئیمارات لە عێراق لە كارەكانی خواست و خوازیاری ئەوەش بوو كە پەیوەندییەكانی نێوان حكوومەتی هەرێمی كوردستان و ئیمارات لە هەموو بوارەكاندا زیاتر تۆكمە و بەهێز بكرێن. هەروەك سوپاسی بەڕێز كونسڵی ئیماراتی لە هەرێمی كوردستان كرد كە لە ماوەی دەسبەكاربوونی توانیویەتی پەیوەندییەكی باش و تۆكمە لەگەڵ دەامودەزگا حكوومییەكان و كۆمەڵگەی كوردستان بە شێوەیەكی گشتی دروست بكات و پردێكی بەهێزی نێوان هەرێمی كوردستان و دەوڵەتی ئیمارات بێت.
باسكردنی بارودۆخی سیاسیی عێراق و پەیوەندییەكانی نێوان هەوڵێر و بەغدا لایەنێكی دیكەی دیدارەكە بوو و لەمبارەیەشەوە بەڕێز باڵیۆزی ئیمارات لە عێراق هیوای خواست كێشەكان بە ڕێگەی گفتوگۆ و دیالۆگ چارەسەر بكرێن.
سەرۆکی هەرێمی کوردستان پێشوازی لە باڵیۆزی نوێی ئیمارات لە عێراق کرد
ئەمڕۆ چوارشەممە ٢٩ـی٧ـی٢٠١٥، بەڕێز مەسعود بارزانی سەرۆکی هەرێمی کوردستان لە سەلاحەدین پێشوازیی لە بەڕیز حسن احمد الشحی باڵیۆزی نوێی ئیماراتی یەکگرتووی عەرەبی لە عێراق و راشد محه‌مه‌د مه‌نسوری کونسوڵی گشتیی وڵاتی ئیمارات له‌هه‌رێمی کوردستان کرد.
لە دیدارێكدا سەرەتا باڵیۆزی نوێی ئیمارات سڵاو و ڕێزی شێخ موحەمەد بن زاید جێنشینی ئیماراتی یەكگرتووی عەرەبی بە سەرۆک بارزانی ڕاگەیاند و خۆشحاڵیی خۆی نیشان دا کە بۆ یەکەمجارە سەردانی هەرێمی کوردستان دەکات و سەرسامیی خۆی بە پێشکەوتنەکانی هەرێمی کوردستان خستەڕوو، هەروەها سوپاس و پێزانینی وڵاتەکەی بۆ سەرۆک بارزانی و حکوومەتی هەرێمی کوردستان ڕاگەیاند بۆ هاوکاریی و هەماهەنگییان لەگەڵ رێکخراوە مرۆییەکانی ئیماراتی عەرەبی و ئامادەیی وڵاتەکەشی بۆ پەرەپێدانی زیاتری پەیوەندییەکانی لەگەڵ هەرێمی کوردستان دەربڕی.
لە بەرانبەردا سەرۆک بارزانی وێڕای بەخێرهێنانیان، هیوای سەرکەوتنی بۆ باڵیۆزی نوێ خواست و خۆشحاڵی خۆی بۆ بەرەوپێشچوونی ئاستی پەیوەندییەكانی نێوان هەردوولا پێشان دا و سوپاسی ئیماراتی عەرەبی کرد بۆ ئەو هاوکارییانەی لەبواری مرۆییدا پێشکەشی ئاوارە و لێقەوماوانی کردووە.
هەر لەم دیدارەدا لەبارەی بارودۆخی سیاسی و ئەمنیی عێراق و ناوچەكە و هەڕەشەی تیرۆریستان بۆ سەر ئاساییشی ناوچەكە و جیهان و دوایین پەرەسەندنە سیاسییەكان بیروڕا ئاڵوگۆڕ كرا.
سەرۆكی هەرێمی كوردستان پێشوازی لە باڵیۆزی ئوستراڵیا لە عێراق دەكات
ئەمڕۆ چوارشەممە ٢٩ـی٧ـی٢٠٥، بەڕێز مەسعود بارزانی سەرۆکی هەرێمی کوردستان لە سەلاحەدین پێشوازیی لە خاتوو لینداڵ ساچس باڵیۆزی ئوسترڵیا لە عێراق کرد.
لە دیدارەكەدا باڵیۆزی ئوستراڵیا لە عێراق سوپاسی سەرۆک بارزانی کرد بۆ دیدارەکە و ڕایگەیاند کە من ئەرکەکەم لە عێراق کۆتایی دێت و بۆ ئەوە هاتووم ماڵئاواییتان لێ بکەم، من چوار ساڵە لە عێراقم و لەم چوار ساڵەدا ڕەوشی زۆر خراپم بینیوە، بەڵا دەرفەتی ئەوەشم هەبوو کە کوردستانی جوان ببینم. باڵیۆزی ئوستراڵیا سوپاسگوزاریی خۆی و وڵاتەکەشی پێشکەشی سەرۆک بارزانی و گەل و حکوومەتی هەرێمی کوردستان کرد بۆ هاوکارییان لەگەڵ نوێنەرایەتی و ئەو هاووڵاتییانەی ئوستراڵیا کە لە هەرێمی کوردستان دەژین.
باڵیۆزی ئوستراڵیا جەختیشی کردەوە کە وڵاتەکەی وەک بەشێک لە هاوپەیمانێتیی نێودەوڵەتیی دژی داعش، هەست بە مەترسییەکانی تیرۆر دەکات و لە هاوکارییەکانی بۆ هەرێمی کوردستان بەردەوام دەبێت و هەماهەنگی و پاڵپشتیی لەگەڵ دۆستەکانی و بەتایبەت هەریمی کوردستان پەرە پێ دەدات. سوپاسی هەرێمی کوردستانیشی کرد کە ئەو ژمارە زۆرەی ئاوارە و لێقەوماوانیان حەواندۆتەوە و ڕایگەیاند کە وڵاتەکەی ڕێز و پێزانینی زۆری بۆ ئەو ڕۆڵە مرۆییەی کوردستان هەیە و لەچوارچێوەی کارەکانی ڕێکخراوی نەتەوە یەکگرتووەکانیشدا هەوڵ دەدات هاوکاریی زیاتر بۆ بەهاناوەچوونی ئاوارەکان تەرخان بکات.
هەر لە دیدارەکەدا باڵیۆزی ئوستراڵیا ڕایگەیاند: ساڵێک بەر لە ئێستا ڕەوشێکی زۆر خراپ هەبوو، خۆشحاڵم کە پێشمەرگە توانی ئازایانە بەرگریی بکات و هەڕەشەی تیرۆریستان لەسەر هەرێم نەهێڵێت.
باڵیۆزی ئوستراڵیا نیگەرانیی خۆیشی لە ڕەوشی خراپی ناوخۆی عێراق و پەرەسەندنی ناکۆکییەکان دەربڕی و هیوای خواست ئەو هەوڵانەی بۆ ئاشتەوایی هەیە سەربگرێت.
بەرانبەردا سەرۆك بارزانی وێڕای بەخێرهێنان، هیوای سەرکەوتنیشی لە کاری نوێیدا بۆ باڵیۆزی ئوستراڵیا لە عێراق خواست، سوپاسی وڵاتەکەشی کرد بۆ بەشدارییان لە شەڕ دژی تیرۆریستانی داعش.
سەرۆک بارزانی ڕایگەیاند: ڕاستە ساڵێکی سەختمان بەڕێ کرد، ئەو شەڕە بەسەر ئێمەدا سەپێندرا و بەدرێژایی مێژوو گەلی ئێمە دەستپێشخەری شەڕ نەبووە و هەمووجارێ بەسەریدا سەپێندراوە، بەڵام جێی شانازییمانە کە پێشمەرگەی کوردستان توانییان ئەفسانەی داعش تێکبشکێنن.
سەرۆک بارزانی جەختی کردەوە کە داعش هەڕەشەیە لەسەر هەموو مرۆڤایەتی و لەناوبردنیشی ئەرکی هاوبەشی هەمووانە و پێویستە نەک هەر لە ڕووی سەربازی بەڵکوو لە ڕووی سیاسی و فیکری و ئابوورییشەوە شەڕی ئەو تیرۆریستانە بکرێت.
سەرۆک بارزانی هیوای خواست کێشە ناوخۆییەکانی عێراقیش بە نیازپاکی چارەسەر بکرێن.
سەبارەت بە بەشدارییکردنی تورکیا لەشەڕی دژی داعش و گرژییەکانی ئێستای نێوان تورکیا و PKK سەرۆک بارزانی ڕایگەیاند کە بێ گومان هاتنی تورکیا بۆ ناو هاوپەیمانیی دژی داعش کاریگەریی ئیجابی دەبێت. سەرۆک بارزانی نیگەرانیی خۆی لە پەرەسەندنی گرژییەكان نیشان دا و تەئکیدی کردەوە کە پێویستە هەموو لایەک بگەڕێنەوە بۆ پرۆسەی ئاشتی و بە پێویستیشی زانی تەركیزی گشت لایەك لەسەر ڕووبەڕووبوونەوە و لەناوبردنی تیرۆریستانی داعش بێت کە دوژمنی هاوبەشی هەمووانە.
باسکردنی بارودۆخی مەیدانیی بەرەكانی ڕووبەڕووبوونەوەی تیرۆریستان و ڕەوشی سیاسی و ئەمنیی عێراق و ناوچەکە تەوەرەێکی تری دیدارەکە بوو.
وەزیری دەرەوەی ئەڵمانیا لەڕێی تەلەفۆنەوە پەیوەندی بە سەرۆكی هەرێمی كوردستان دەكات
ئێوارەی ڕۆژی سێشەممە 28ـی 7ـی 2015 فرانك ڤالتر شتاینمایێر وەزیری دەرەوەی ئەڵمانیا لەڕێی تەلەفۆنەوە پەیوەندی بە بەڕێز مەسعود بارزانی سەرۆكی هەرێمی كوردستان كرد.
لەم پەیوەندییە تەلەفۆنییەدا بیروڕا لەبارەی دوا پێشهاتە سیاسی و ئەمنییەكانی ناوچەكە ئاڵوگۆڕ كرا و تیشك خرایە سەر هاوكارییە مرۆیی و سەربازییەكانی وڵاتی ئەڵمانیا بۆ هەرێمی كوردستان و هێزی پێشمەرگە.
هەر لەم پەیوەندییەدا پەیوەندییەكانی نێوان هەرێمی كوردستان و وڵاتی ئەڵمانیا تاوتوێ كرا.
More...
سەرۆكی هەرێمی كوردستان پێشوازی لە جێگری وەزیری دەرەوەی توركیا كرد
پەیامی نێچیرڤان بارزانی ده‌رباره‌ى بۆمبابارانكردنی بنكەكانی پارتی كرێكارانی كوردستان
دوایین هەواڵەکان
- نوێنەری حکومەتی هەرێم لە ئێران: سەردانەکەی پزیشکیان ئاماژەیە بۆ گرنگیدانی ئێران بە هەرێمی کوردستان
- ههرێمى كوردستان و ئێران جهخت له برهودان به پهيوهندييهكانيان دهكهنهوه
- سهرۆک نێچیرڤان بارزانی: سەردانی سەرۆک کۆماری ئێران مێژوویی بوو
- نازم دەباغ له وتووێژ لهگهڵ ئاژانسی ئیرنا: مەسعوود پزشکیان سەردانی هەولێر دەکات
- نازم دەباغ: کاتی سەردانی پزیشکیان بۆ عێراق دیار نییە
- «سەلام رشدی» لهگهڵ شاندی یهکێتی هاورده و ناردنکارانی لقی ههولێر کۆبۆوه
- سهرۆك نێچيرڤان بارزانى: ههميشه پشتيوانى و بهرگرى له مافهكانى ئێزدييان دهكهين
- سهرۆک نێچیرڤان بارزانی لهگهڵ باڵیۆزی یهکێتیی ئهورووپا کۆبووهوه
- سهرۆك نێچيرڤان بارزانى لهگهڵ باڵيۆزى نهمسا كۆبووهوه
- سهرۆك نێچيرڤان بارزانى سوپاسى جهنهرال ڤاول دهكات