فەلاح مستەفا بەرپرسی پەیوەندیەكانی دەرەوەی حكومەت پێشوازی لە ئارجون كانت ماینالی، نوێنەری تایبەتی وەزیری دەرەوەی نیپاڵ بۆ خۆشگوزەرانی ئەو نیپاڵیانەی كە لە عێراق دەژین و تیرسا راج ئاریاڵ، جێگری باڵیۆزی نیپاڵ لە پاكستان كرد.

نوێنەری تایبەتی وەزیری دەرەوەی نیپاڵ سوپاسی حكومەتی هەرێمی كوردستانی كرد بۆ ئەو هاوكاری و یارمەتیانەی كە لەماوەی رابردوو پێشكەش بەو نیپاڵیانەی كردووە كە لە هەرێم دەژین و گووتی لە نزیكەوە چاوم بە هێزی كاری نیپالی كەوتووەو خۆشحاڵی خۆیان نیشانداوە بە كار كردن لە هەرێمی كوردستان. هەردوولا تیشكیان خستە سەر هێزی كاری نیپالی لە هەرێم و ئاستی ژیان و گوزەرانیان و چۆنیەتی هاوكاری و هەماهەنگی كردن لەگەڵ وەزارەتە پەیوەنددارەكان، هاوكات جەختیان لەسەر پەرەپێدانی پەیوەندیەكانی نێوان هەردوولاو بەردەوامبوونی سەردانەكان بۆ ئەم مەبەستە كردەوە.

هەر لە دیدارەكەدا باس لە بارودۆخی ئێستای هەرێمی كوردستان و عێراق لەڕووی ئاسایش و قەیرانی سیاسی و ئابووری كرا. شاندی ناوبراو بە ئەرێنی باسیان لە بارودۆخی جیاوازی هەرێم لەگەڵ بەشەكانی دیكەی عێراق و هەندێك لە ووڵاتانی ناوچەكە كرد.

لای خۆشیەوە فەلاح مستەفا پاڵپشتی فەرمانگەی پەیوەندیەكانی دەرەوەو حكومەتی هەرێم بۆ شاندی ناوبراو دوپات كردەوەو گووتی حكومەتی هەرێم لە هەوڵەكانی بەردەوامە بۆ گەشەپێدانی زیاتری هەرێم، هاوكات كاری جدی دەكا بۆ دەستبەركردنی ئاسایش و بارودۆخێكی سەقامگیر بۆ هەموو ئەوانەی كە لە هەرێم دەژین. ئەمەش وێڕای هەوڵە بەردەوامەكان بۆ پاراستن و دەستەبەركردنی مافی ئەو هاووڵاتیە بیانیانەی كە لێرە بۆ مەبەستی جیاجیا نیشتەجێ بوون.

لەپێناو ڕاوێژ و ئاڵوگۆڕكردنی بیروڕا و قسەكردن لەسەر گرتنەبەری هەڵوێستی پتەو و یەكڕیزیی نیشتمانی لەبەرانبەر هەڕەشەكاندا ئەمڕۆ دووشەممە 11ـی 8ـی 2014 لە سەلاحەدین بە سەرپەرشتیی بەڕێز مەسعود بارزانی سەركردە باڵاكانی پارتی دیموكراتی كوردستان و یەكێتیی نیشتیمانی كوردستان و بزووتنەوەی گۆڕان و یەكگرتووی ئیسلامیی كوردستان و كۆمەڵی ئیسلامیی كوردستان كۆبوونەوە.

لەم كۆبوونەوەیەدا ڕووداوەكانی ئەم دوایە و پەلاماری تیرۆریستان بۆ سەر خاك و خەڵكی كوردستان خرایە بەر باس و بە وردی بارودۆخی مەیدانیی هێزەكانی پێشمەرگە لە بەرەكانی ڕووبەڕووبوونەوە و كاردانەوە سیاسییەكانی هێرشی تیرۆریستان بۆ سەر كوردستان هەڵسەنگاندنی بۆ كرا و كۆبوونەوەكە جەختی لەسەر پێویستیی چارەسەركردنی هەموو جۆرە كەموكوڕییەك لە بەرەكانی جەنگ و هەروەها دیاریكردنی ڕێوشوێنی پێویست بۆ پاراستنی هەرچی زیاتری ئاساییشی هەرێمی كوردستان كردەوە.

لایەنە سیاسییەكانی بەشداربووی كۆبوونەوەكە پشتگیریی تەواوی خۆیان بۆ هێزەكانی پێشمەرگەی كوردستان دووپات كردەوە و سوپاسی خەڵكی كوردستان و لایەنە سیاسییەكان و ڕێكخراوەكانی كۆمەڵگەی مەدەنییان كرد لە خۆڕاگرییان و هەستكردنیان بە بەرپرسیارێتی بۆ پاڵپشتیكردنی پێشمەرگە و یارمەتیدانی ئاوارەكان و هەروەها سوپاسی پشتیوانی و بەدەنگەوەهاتنی كۆمەڵگەی نێودەوڵەتی و وڵاتانی دۆستی گەلی كوردستانیان كرد و داوایشیان لە كۆمەڵگەی نێودەوڵەتی كرد كە لە پاراستنی ئاوارەكان و حەواندنەوەیاندا یارمەتیی هەرێمی كوردستان بدەن هەتا ئەو كاتەی دەگەڕێنەوە سەر ماڵ و حاڵی خۆیان.

بەشداربووانی كۆبوونەوەی پێنج لایەنی سیاسی لەگەڵ سەرۆك بارزانی داوایان لە هەموو هێزە سیاسییەكان و خەڵكی كوردستان كرد كە لەم كاتە هەستیارەدا بە یەكهەڵوێستی یەكڕیزیی نیشتیمانی بپارێزن و جەختیشیان لەوە كردەوە كە هەموو هێزە بەشداربووانی بەرەكانی جەنگ پێویستە دوور بن لە نەفەسی حزبی و داوایشیان لە دەزگاكانی ڕاگەیاندنی كوردستان كرد كە بە چاوكراوەیی و هەستكردنی زیاتر بە بەرپرسیارێتی مامەڵە لەگەڵ ڕووداوەكان بكەن و ڕەچاوی بەرژەوەندی و ئاساییشی نەتەوەیی هەرێمی كوردستان بكەن.

پڕۆسەی سیاسیی عێراقیش تەوەرێكی ئەم كۆبوونەوە بوو و تێیدا بەشداربووانی كۆبوونەوەكە ئیدانەی هەموو جۆرە هەوڵێكیان لە بەغدا كرد كە بۆنی تێكدانی پڕەنسیپی تەوافوق و كۆدەتای سەربازی لێ بێت و پاڵپشتیی تەواوی خۆیشیان بۆ بەڕێز د. فواد مەعسووم سەرۆك كۆماری عێراق و پڕۆسەی دیموكراتی و دەستووریی عێراق ڕاگەیاند و هیواشیان خواست بەزووترین كات كۆتایی بە قەیرانی سیاسی بێت. سەبارەت بە پڕۆسەی پێكهێنانی حكوومەت كۆبوونەوەكە ڕایگەیاند كە ڕێز لە هەر بڕیارێك دەگرن كە لە لایەن هاوپەیمانێتیی نیشتیمانییەوە بگیرێتە بەر. 

لایەنە سیاسییەكانی بەشداربووی ئەم كۆبوونەوەیە بڕیاریاندا كە بۆ ڕووبەڕووبوونەوەی پێشهاتەكان و چارەكردنی گرفتەكان میكانیزمی گونجاو بگیرێتە بەر و ڕاگۆڕینەوە و كۆبوونەوەكانیشیان بەردەوام بێت.

ئێوارەی ئەمڕۆ دووشەممە11ـی 8ـی 2014 لەڕێی تەلەفۆنەوە فرانك واڵتێر شتانمایێر وەزیری دەرەوەی ئەڵمانیا پەیوەندی بە بەڕێز مەسعود بارزانی سەرۆكی هەرێمی كوردستان كرد.

لەم پەیوەندییە تەلەفۆنییەدا وەزیری دەرەوەی ئەڵمانیا سوپاسی سەرۆك بارزانیی و هێزی پێشمەرگە و سەركردایەتیی سیاسیی كوردستانی كرد بۆ ڕووبەڕووبوونەوەیان لەدژی تیرۆریستان و یارمەتیدانی ئاوارەكان و پاراستنی خەڵكی سڤیل و پێكهاتە ئایینی و نەتەوەییەكانی عێراق و كوردستان.
هەر لەم پەیوەندییە تەلەفۆنییەدا وەزیری دەرەوەی ئەڵمانیا پاڵپشتیی وڵاتەكەی بۆ گەلی كوردستان دووپات كردەوە و ڕایگەیاند كە وڵاتەكەی ئامادەیە لە شەڕی دژی تیرۆردا لەتەك گەلی كوردستان بوەستێت و ئەوەیشی بە سەرۆك بارزانی ڕاگەیاند كە حكوومەتی ئەڵمانیا دیراسەی چۆنییەتی هاوكاریكردنی حكوومەت و خەڵكی كوردستان دەكات.

لەبەرانبەردا سەرۆك بارزانی سوپاسی وەزیری دەرەوەی ئەڵمانیا كرد و ڕایگەیاند كە خۆشحاڵین بەوەی لە كاتی تەنگانەدا دۆستەكانمان پشتیوانی و هاوكاریی خۆیان بۆ گەلی كوردستان دووپات دەكەنەوە. هەروەها سەرۆك بارزانی سوپاسی هەموو ئەو لایەن و وڵاتانەی كرد كە بۆ ڕووبەڕووبوونەوەی تیرۆر یارمەتیی كوردستان دەدەن. سەرۆك بارزانی ئەوەیشی خستەڕوو كە كوردستان تەنیا شەڕی ڕێكخراوێكی تیرۆریستی ناكات بەڵكو شەڕی دەوڵەتێكی تیرۆریستی دەكات. سەرۆك بارزانی ئەوەیشی بە وەزیری دەرەوەی ئەڵمانیا گوت كە گەلی كوردستان سەربەرزانە بەرگری لەخۆی و ئاییندەی خۆی دەكات و لە سەركەوتنی خۆمان دڵنیاین و لەشەڕی تیرۆر و بەرگریكردن لە خۆی بەردەوام دەبێت. هەر لەم پەیوەندییە تەلەفۆنییەدا وەزیری دەرەوەی ئەڵمانیا ڕایگەیاند كە بۆ یارمەتیدانی هەرێمی كوردستان لەگەڵ وڵاتانی ئەوڕووپایی و هەرێمی كوردستان لە پەیوەندیی بەردەوامدا دەبن.

ئێوارەی ئەمڕۆ سێشەممە ١٢ـی ٨ـی ٢٠١٤، بەڕێز جۆ بایدن جێگری سەرۆكی ویلایەتە یەكگرتووەكانی ئەمەریكا لەڕێی تەلەفۆنەوە پەیوەندی بە بەڕێز مەسعود بارزانی سەرۆكی هەرێمی كوردستان كرد.

لە پەیوەندییە تەلەفۆنییەکەدا جێگری سەرۆكی ویلایەتە یەكگرتووەكانی ئەمەریكا جارێکی تر پشتگیریی حکوومەتی ئەمەریکای بۆ هەرێمی کوردستان دووپات کردەوە لە بەرەنگاربوونەوەی تیرۆریستان، هەتا ئەوکاتەی بەهاوکاریی هەموولایەک هێزی تیرۆریستان تێک دەشکێندرێن. هەروەها دەستخۆشی لە هێزەکانی پێشمەرگەی کوردستان کرد کە توانیویانە سەرکەوتنی بەرچاو بەدەست بهێنن.

لە بەرانبەردا سەرۆک بارزانی سوپاسی خۆی بۆ سەرۆک ئۆباما و بەڕێز بایدن و گەلی ئەمەریکا دەربڕی بۆ ئەو پشتگیرییەی کە پێشکەشی گەلی کوردستانیان کردووە و بەڵێنی دا هەرێمی کوردستان لەم شەڕەی کە تووشی بووە بەرگریی لە خاک و خەڵک و هەموو بەهاکانی لێبوردەیی و پێکەوەژیان و ئازادی دەکات.

سەرۆک بارزانی ئەوەشی بۆ جێگری سەرۆكی ویلایەتە یەكگرتووەكانی ئەمەریكا خستەڕوو کە پشتگیری و هاوکاریی ویلایەتە یەكگرتووەكانی ئەمەریكا هیممەت و هێزی زیاتری دایە گەلی کوردستان.

هەر لە پەیوەندییە تەلەفۆنییەکەدا بارودۆخی سیاسیی عێراق و ڕەوشی ئەمنی و سەربازیی بەغدا خرایە بەرباس و هەردوولا پشتگیریی خۆیان بۆ ئەو پرۆسە دەستوورییە دووپات کردەوە کە لەلایەن سەرۆک کۆماری عێراقەوە بۆ ڕاسپاردنی کاندیدی سەرۆک وەزیرانی عێراق دەست پێکراوە.

جێگری سەرۆكی ویلایەتە یەكگرتووەكانی ئەمەریكا هیوای خواست هاوپەیمانیی کوردستان لەگەڵ هێزە سیاسییەکانی تری عێراق دەست بکەن بە گفتوگۆ بۆ دامەزراندنی حکوومەتێکی گشتگیر و هاوبەشیی ڕاستەقینە کە هەموو لایەنەکان تیایدا بەشدار بن و عێراق لەم قەیرانەی ئێستا دەرباز بکرێت.

لە بەرانبەردا سەرۆک بارزانی جەختی لەوە کردەوە کە هەرێمی کوردستان یارمەتی پرۆسەی سیاسیی عێراق دەدات بۆ ئەوەی حکوومەتێکی شەراکەتی نیشتیمانی پێک بهێندرێت کە دوور بێت لە ئەزموونە شکستخواردووەکەی پێشوو.

ئێوارەی ئەمڕۆ سێشەممە 12ـی 8ـی 2014 بەڕێز مەسعود بارزانی سەرۆكی هەرێمی كوردستان لەڕێی تەلۆفۆنەوە پەیوەندی بە بەڕێز د. فواد مەعسووم سەرۆك كۆماری عێراق كرد.

لەم پەیوەندییەدا گفتوگۆ لەبارەی دوایین پێشهات و هەنگاوەكانی نێو پڕۆسەی سیاسیی و دەستووریی عێراق كرا و سەرۆك بارزانی دەستخۆشی لە سەرۆك كۆماری عێراق كرد بە بۆنەی هەنگاوە دەستوورییەكانی و هەروەها و ڕاسپاردنی كاندیدی هاوپەیمانێتیی نیشتیمانی بۆ پێكهێنانی حكوومەتی ئاییندەی عێراقی.

سەرۆك بارزانی لەم پەیوەندییەدا پاڵپشتیی تەواوی خۆی بۆ سەرۆك كۆماری عێراق ڕاگەیاند و هیوای سەركەوتنی بۆ خواست.

دوای ڕاگەیاندنی ئەنجامە بەراییە‌كانی هەڵبژاردنی سەرۆكایەتیی كۆماری توركیا و هەڵبژێردرانی بەڕێز ڕەجەب تەییب ئەردۆغان وەك سەرۆك كۆماری تازەی توركیا، شەوی ڕابردوو 10ی ئابی 2014، بەڕێز نێچیرڤان بارزانی سەرۆك وەزیرانی هەرێمی كوردستان لە پەیوەندییەكی تەلەفۆنیدا پیرۆزبایی لە بەڕێز ئەردۆغان كرد و هیوای سەركەوتنی بۆ خۆی و گەل و كۆماری توركیا خواست.

بەڕێز سەرۆك وەزیرانی هەرێمی كوردستان هەروەها هیوای خواست كە هەڵبژاردنی ڕاستەوخۆی سەرۆك كۆمار لە لایەن گەلەوە ببێتە هۆی هەڵنانی هەنگاوی خێراتر لە لایەن توركیاوە بەرەو پێشكەوتنی زیاتر و كرانەوە و گۆڕانكاریی باشتر لە هەموو بوارەكاندا و پەیوەندییەكانی هەولێر و ئەنقەرەش لە قۆناغی تازەی توركیادا، لە هەموو ڕوویه‌كه‌وه‌ بەرەوپێشچوونی زیاتر بە خۆیانەوە ببینن، پرۆسەی ئاشتی و چارەسەركردنی پرسی كوردیش لە توركیا لە ژێر سەرۆكایەتیی بەڕێز ئەردۆغاندا بگاتە سەركەوتن.

هەر لەو پەیوەندییە تەلەفۆنییەدا بەڕێز سەرۆك كۆماری توركیاش سوپاسی بەڕێز نێچیرڤان بارزانی سەرۆك وەزیرانی هەرێمی كورستانی كرد و دووپاتی كردەوە كە ئەوان خوازیاری برەدوان و بەرەوپێشبردنی زیاترى پەیوەندییەكانی توركیان لەگەڵ هەرێمی كوردستاندا.

لە هەولێری پایتەخت بەڕێز مسعود بارزانی سەرۆكی هەرێمی كوردستان پێشوازی لە لۆران فابیۆس وەزیری دەرەوەی فەڕەنسا و شاندێكی یاوەری كرد.

لە كۆبوونەوەیەكدا كە نێچیرڤان بارزانی سەرۆكی حكوومەتی هەرێمی كوردستان و قوباد تاڵەبانی جێگری سەرۆكی حكوومەت و مەسروور بارزانی ڕاوێژكاری ئەنجوومەنی ئاساییشی هەرێمی كوردستان و مستەفا سەید قادر وەزیری پێشمەرگە و فەلاح مستەفا بەرپرسی فەرمانگەی پەیوەندییەكانی حكوومەتی هەرێم و فواد حوسێن سەرۆكی دیوانی سەرۆكایەتی هەرێمی كوردستان ئامادەی بوون سوپاسی پاڵپشتیی فەڕەنسای كرد بۆ گەلی كوردستان بەتایبەتی خودی وەزیر كە هەڵگری پەیامی پشتیوانی سەرۆك و گەلی فەڕەنسا بوو بۆ هەرێمی كوردستان و ڕایگەیاند كە بە پشتبەستن بە خۆمان و هاوكاریی دۆستانمان لەوە دڵنیاین كە تیرۆریستان تێكدەشكێنین. سەرۆك بارزانی ئەوەیشی خستەڕوو كە گەلی كوردستان لەپێناو چەسپاندنی پێكەوەژیان و لێبووردەیی و ئازادییدا ئامادەیە قوربانی بدات.

سەبارەت بە كاریگەریی ڕووداوەكانی ئەم دواییە لەسەر پەیوەندی نێوان كورد و عەرەب سەرۆك بارزانی جەختی لەوە كردەوە كە ڕێگە نادەین تیرۆر پەیوەندیی نێوان كورد و عەرەب تێك بدات. لەبارەی شەڕی تیرۆریشدا سەرۆك بارزانی ئەوەی ڕوونكردەوە كە كوردستان لەشەڕدایە لەگەڵ دەوڵەتێكی تیرۆریستیی پڕچەك و داوای لە وڵاتانی ئازاد كرد كە بۆ تێكشكاندنی تیرۆریستان پشتیوانی كوردستان بن. سەرۆك بارزانی سوپاسی سەرۆكی فەڕەنسا و ئەمەریكا و هەموو ئەو وڵاتانەی كرد كە یارمەتیی كوردستان دەدەن و هێمای بەوەدا كە كوردستان سەركەوتوو دەبێت چونكە پێشمەرگەی قارەمانی هەیە و دۆستی بە وەفا و مەزنیشی هەیە.

لەبەرامبەردا وەزیری دەرەوەی فەڕەنسا سوپاسی سەرۆك بارزانیی كرد بۆ ئەو پێشوازییە گەرمەی لێی كراوە و ڕایگەیاند كە هەڵگری پەیامی پشتیوانیی حكوومەت و گەلی فەڕەنسایە بۆ هەرێمی كوردستان. وەزیری دەرەوەی فەڕەنسا ئاماژەی بەوەدا كە شەڕی كوردستان لەگەڵ تیرۆریستاندا شەڕی فەڕەنسایشە چونكە فەڕەنسا وڵاتی ئازادییەكانە و شەڕی دژی تیرۆر شەڕی پاراستنی ئازادییە. وەزیری دەرەوەی فەرەنسا دووپاتی كردەوە كە فەڕەنسا لەتەك هەرێمی كوردستان دەوەستێت و هاوكارییەكانی بەردەوام دەبێت و ئەوەیشی خستەڕوو كە هانی وڵاتانی ئەوڕووپایی دەدات بۆ ئەوەی پردێكی ئاسمانی لەنێوان ئەوڕووپا و كوردستان دروست بكرێت بە مەبەستی گەیاندنی هاوكاری بۆ ئاوارەكان و حكوومەتی هەرێمی كوردستان.
قسەكردن لەسەر دوا پێشهاتە سیاسی و ئەمنییەكانی هەرێم و پەلاماری تیرۆریستان بۆ كوردستان و بارودۆخی ئاوارەكانی پارێزگای موسڵ و دەڤەری زوممار و شەنگال و چۆنییەتی یارمەتیدانیان تەوەرێكی دیكەی ئەم كۆبوونەوەیە بوو. پاش تەواوبوونی كۆبوونەوەكە سەرۆك بارزانی و وەزیری دەرەوەی فەڕەنسا ناوەڕۆكی كۆبوونەوەكەیان لە پڕێسكۆنفڕانسێكدا بۆ دەزگاكانی ڕاگەیاندن شی كردەوە.
لەکۆنگرە رۆژنامەوانیەکەدا هەردوولا پەیمانی دۆستایەتی نێوانیان دووپاتکردەوە بەوەی کە وەزیری دەرەوەی فەڕەنسا دووپاتیکردەوە ئەو شەڕەی هەرێمی کوردستان لەدژی تیرۆر دەیکات شەڕی فەڕەنساشە وئەم وڵاتەش لەپاڵپشتی خۆی بۆ هەرێمی کوردستان بەردەوام دەبێت وبەشێوەیەکی فەرمیش پەیامی سەرۆکی فەڕەنسای بە هەرێمی کوردستان گەیاند، هاوکات وەزیری دەرەوەی فەڕەنساش رایگەیاند کە 118 تۆن یارمەتی مرۆیی بۆ ئاوارە مەسیحی وئێزدیەکان هێناوە کە لەترسی تیرۆر پەنایان بۆ هەرێمی کوردستان بردووە.
نیشانیشیدا هاتنی ئەو پەیامێکی بەهێزە بەوەی کە فەڕەنسا وەکو دەوڵەتێکی گەورە وگرنگ پشتیوانی گەلی کوردستانە وپشتیوانی هەموو گەلی عیراقە. ئێمە بەپشت بەستن بەخۆمان وبەهاوکاری وپشتیوانی دۆستانمان دڵنیاین کە هەموو تیرۆریست ودوژمنان تێکدەشکێن وسەرکەوتن هەر بۆ ئێمە دەبێت. ئێمە لەسەر رێبازی خۆمان بەردەوام دەبین کە ڕێبازی لێبوردەیی وپێکەوەژیان وئازادی ئایینی ومەزهەبیە وهەرچی قوربانیەک پێویست بێت بۆ زیاتر چەسپاندنی ئەو سەوابینە ئێمە ئامادەین بیبەخشین.
لەلای خۆشیەوە لۆران فابیۆس وەزیری دەرەوەی فەڕەنسا لەوتەیەکدا وێڕای سوپاسگوزاری بۆ سەرۆک بارزانی، دووپاتیکردەوە ئەو پەیامی دۆستایەتی بۆ گەلی کوردستان بەناوی سەرۆک وگەل وحکومەتی فەڕەنسا هێناوە ونیشانیشیدا لەکاتی گەڕانەوەی هانی ئەوروپاییەکانیش دەدا لەسەر هەمان ڕێچکە بڕۆن.

دوای سەردانە سەركەوتووەكەی بۆ هەرێمی كوردستان و كۆبوونەوەی لەگەڵ بەڕێزان سەرۆكی هەرێمی كوردستان و سەرۆكی حكومەت و گەورە بەرپرسانی هەرێمی كوردستان، بەڕێز لۆران فابیۆس وەزیری دەرەوەی فەڕەنسا بە یاوەری فەلاح مستەفا بەرپرسی پەیوەندیەكانی دەرەوەی حكومەت و ئالان گێبخات كونسوڵی گشتی فەڕەنسا لە هەرێم، سەردانی كونسوڵگەری گشتی فەڕەنسا و سەنتەری رۆشنبیری فەڕەنسی كردو لەگەڵ ستافی كونسوڵگەری و رەوەندی فەرەنسی لە هەرێمی كوردستان كۆبووەوەو ئامانجی سەردانەكەی بۆ ئامادەبووان خستەڕوو.

دواتر بەڕێزیان یاوەری فەلاح مستەفا بەرپرسی پەیوەندیەكانی دەرەوەی حكومەت و ئالان گێبخات كونسوڵی گشتی فەڕەنسا لە هەرێم سەردانی شارۆچكەی عەنكاوەی كردو لەگەڵ مەتران بەشار مەتی وەردە سەرۆكی ئەساقیفەی ئەبرەشییەی هەولێرو نوێنەرانی ئاوارە مەسیحیەكان كۆبووەوەو گوێی لە پێداویستی و خواست و خەم و ئازارەكانیان گرت كە چۆن بەدەستی تیرۆرستانی داعش تووشی ئاوارەو كۆمەڵكوژی بوونەتەوە.

پاشان بەڕێز لۆران فابیۆس وەزیری دەرەوەی فەڕەنسا لەگەڵ بەڕێزان حازم میر تەحسین بەگ وەكیلی میری ئێزیدیان و بابەشێخ مەرجەعی ئایینی ئێزیدیان و شاندێكی باڵا كۆبووەوە. بەڕێزیان نیگەرانی حكومەتی فەڕەنسای خستەڕوو سەبارەت بەو تاوانانەی دەرهەق بە ئێزیدیان لە ناوچەی شنگال ئەنجامدرا. شاندی باڵای ئێزیدیان باسیان لە هەموو ئەو كارەسات و مەرگەساتانە كرد كە گروپی تیرۆرستی داعش بەرامبەر ئەوان ئەنجامی داوە.

ئێوارەی هەمان رۆژ بەڕێز وەزیری دەرەوەی فەڕەنسا لەلایەن فەلاح مستەفا بەرپرسی پەیوەندیەكانی دەرەوەی حكومەت لە فڕۆكەخانەی نێودەوڵەتی هەولێر بەڕێخران.