نێچيرڤان بارزانى: د. نەجمەدین كەریم عاشقی كەركووك بوو

 ئێواره‌ى ئه‌مڕۆ هه‌ينى 6/11/2020 به‌ به‌شداريى به‌ڕێز نێچيرڤان بارزانى، سه‌رۆكى هه‌رێمى كوردستان، ڕێوڕه‌سمى پێشوازى له‌ ته‌رمى خوالێخۆشبوو د. نه‌جمه‌دين كه‌ريم، كه‌سايه‌تى و سياسه‌تمه‌دارى كوردستان و پارێزگارى پێشووى كه‌ركووك له‌لايه‌ن سه‌رۆكايه‌تيى هه‌رێمى كوردستانه‌وه‌ له‌ فڕۆكه‌خانه‌ى نێوده‌وڵه‌تيى هه‌ولێر به‌ڕێوه‌ چوو.

له‌ ڕێوڕه‌سمه‌كه‌دا وێڕاى خێزان و كه‌سوكار و دۆستانى خوالێخۆشبوو، به‌ڕێزان جێگرى سه‌رۆك وه‌زيرانى هه‌رێمى كوردستان، نوێنه‌رى سه‌رۆك بارزانى، وه‌زيرى ده‌ره‌وه‌ى عێراق و ژماره‌يه‌كى به‌رچاوى وه‌زيران و نوێنه‌رانى هێز و لايه‌نه‌ سياسييه‌كان و به‌رپرسانى حكوومى و حيزبى ئاماده‌ بوون. دواى دانانى تاچه‌گوڵينه‌ له‌سه‌ر ته‌رمى خوالێخشبوو، سه‌رۆك نێچيرڤان بارزانى، وته‌يه‌كى له‌باره‌ى ژيان و خه‌بات و ڕۆڵ و پێگه‌ى د. نه‌جمه‌دين كه‌ريمه‌وه‌ پێشكه‌ش كرد، ئه‌مه‌ ده‌قه‌كه‌يه‌تى:

كەسوكار و بنەماڵەی بەڕێزی خوالێخۆشبوو د. نەجمەدین كەریم،

ئامادەبووانی بەڕێز،

كوردستانیانی خۆشەویست،

ئەمڕۆ هەموومان لێرە بە خەمباری، بەڵام بە سەربەرزی پێشوازی لە تەرمی كەسایەتيی لێهاتوو و تێكۆشەری كوردستان د. نەجمەدین كەریم دەكەین. د. نەجمەدین كەریم بە سەربەرزی ژیا، هه‌ر يه‌كێك لە ئێمەش دەتوانێت زۆر بە سەربەرزی یادی بكاتەوە، ئەمڕۆش ئێمه‌ هه‌موومان پێكه‌وه‌ بە سەربەرزی پێشوازی له‌ ته‌رمى پيرۆزى ده‌كه‌ين.

د. نەجمەدین كەریم كەسێكی ئازا و بوێر بوو. ئازایەتییەكی كەركووكیانە و گەرمیانیانە لە خوێنیدا هەبوو، هەر ئەو بوێرییەش وایكرد چەندين هەڵوێست بخاتە مێژووی خەبات و كار و ژیانی خۆیەوە. د. نەجمەدین كەریم بەر لە تەواوكردنی خوێندنی پزیشكی لە عێراق، ببووە ئەندامی یەكێتيی قوتابیانی كوردستان، دوای تەواوكردنی خوێندنیش بەبێ دوودڵی وەك پزیشكێك پەیوەندی بە شۆڕشی ئەیلوولەوە كرد و بووە پێشمەرگە. لە ماوەیەكی كورتیشدا توانی ببێتە جێگەی متمانەی مەلا مستەفاى بارزانيی ڕابەری شۆڕش. دوای نسكۆی شۆڕشی ئەیلوول، ئاگادار و بەشدار بوو له‌ هەندێك لە ئامادەكارییەكان بۆ درێژەپێدان بە شۆڕش و هەڵگیرساندنه‌وه‌ی شۆڕشی گوڵان. دوای نەخۆشكەوتنه‌وه‌ی بارزانيی نەمر، د. نەجمەدین كەریم وه‌ك پزیشكێك لەگەڵى چوو بۆ ئەمه‌ریكا.

د. نەجمەدین كەریم، لە كاتی مانەوەی لە ئەمه‌ریكا خوێندنی باڵای لە بوارەكەیدا تەواو كرد و بووە یەكێك لە پزیشكە متمانەپێكراوەكان لە سەرتاسه‌رى ئەمه‌ریكا، لە بواری ئەكادیمیشدا پێگەیەكی بەرزی هەبوو. دكتۆر پێشكەوتنی خۆی لە بواری پزیشكیدا بۆ پەیداكردنی دۆست بۆ چارەسەری كێشەی كورد بەكارهێنا، هەوڵی دەدا زۆرترین پشتیوانی بۆ مافە ڕەواكانی خەڵكی كوردستان بەدەست بهێنێت. بە ڕاستی كاتی مانەوەى لە ئەمه‌ریكا، زۆر دۆستی بۆ كورد پەیدا كرد و بەردەوام كارئاسانی دەكرد بۆ شاندی پارتەكانی كوردستان بۆ ئەوەی بتوانن بەرپرسانی ئەمه‌ریكا ببینن و قسه‌يان له‌گه‌ڵ بكه‌ن. بەو شێوەیە بە درێژایيی ژیانی لە ئەمه‌ریكا، لە خەباتكردن بۆ كوردستان دانەبڕا و بەهۆی كاركردنييه‌وه‌ بۆ كوردستان، دۆستایەتی لەگەڵ حزب و لايه‌نه‌كانى هەموو پارچەكانی ترى كوردستان دروست كردبوو.

بەڕێزان..

د. نەجمەدین كەریم ساڵی 2009 گەڕایەوە كوردستان و بووە ئەندامی مەكتەبی سیاسيی یەكێتيی نیشتمانیی كوردستان، بە ڕاستیش یەكێك بوو لەوانەی جێگەی متمانەی خوالێخۆشبوو مام جەلال بوو، د. نەجمەدین كەریمیش بۆ خوالێخۆشبوو سەرۆك مام جەلال، ئه‌وه‌ى پێى كرا بە دڵسۆزی جێبه‌جێى ده‌كرد.

د. نەجمەدین عاشقی كەركووك بوو، وەك خۆی دەیگوت كەركووك بۆ ئەو وه‌كوو دڵ وايە، لەبەر ئەوەش كه‌ نیسانی 2011 بووە پارێزگاری كەركووك، بە عەشقەوە و به‌وپه‌ڕى دڵسۆزييه‌وه‌ كاری بۆ كەركووك دەكرد و بە هیچ شێوەیەكيش لە كاركردن بۆ كەركووك و كەركووكییەكان ماندوو نەدەبوو. ئەگەر تەماشای ئەو ماوەیە بكەین كە د. نەجمەدین كەریم پارێزگار بوو، دەبینین گەورەترین بووژانەوەی كەركووك لە سەردەمی ئەودا بووە. نزیكەی (600) قوتابخانە دروست كران، سێدەوامی لە قوتابخانەكانی كەركووك نەما، زیاتر لە (30) بنكەی تەندروستی دروست كران، 70%ی جاده‌ى ناو گەڕەكەكانی كەركووك قیڕتاو كران، نەخۆشخانەی ئازادی بە شێوەیەكی زۆر باش نۆژەن كرایەوە، نەخۆشخانەیەكی گەورەی هاوچەرخ بۆ حەویجە دروست كرا، ڕێگەی سلێمانی ـ كەركووك ـ بەغدا، هەروەها ڕێگەی كەركووك ـ هەولێر كرایە جووتسایدى، بەنداوی خاسەجای دروست كرد، ساڵانە نزیكەی (400) پڕۆژەى لە كەركووك جێبەجێ ده‌كرد.

د. نەجمەدین كەریم هەوڵی دەدا خزمەتی هەموو كەركووكییەكان بكات بە هەموو نەتەوە و پێكهاتەكانەوە، بەڵام لە هەمان كاتدا ئەوەشی دەزانی كە كەركووك كێشەی ناوەندیی كوردستانە لە عێراق، لەبەر ئەوەش لەگەڵ سەرۆك مەسعوود بارزانی و سەرۆك مام جەلال به‌وپه‌ڕى دڵسۆزييه‌وه‌ هه‌وڵى ده‌دا كه‌ ئه‌و كێشانه‌ چاره‌سه‌ر بكرێت.

زۆرێك له‌و پرۆژانه‌ كه‌ به‌ هاوكاريى ئێمه‌ له‌ حكوومه‌تى هه‌رێمى كوردستان بۆ كه‌ركووك جێبه‌جێ ده‌كران، جه‌نابيان به‌وپه‌ڕى دڵسۆزييه‌وه‌ كه‌ ده‌هات و قسه‌ى له‌گه‌ڵ ئێمه‌ ده‌كرد، هه‌ميشه‌ پێداگرى له‌وه‌ ده‌كرد كه‌ ده‌بێت هاوكارى بكرێت بۆ ئه‌وه‌ى پڕۆژه‌كان له‌ كه‌ركووك به‌ شێوه‌يه‌كى باش جێبه‌جێ بكرێت. ئه‌و به‌وپه‌ڕى دڵسۆزييه‌وه‌ هه‌وڵى ده‌دا كه‌ كێشه‌كانى كه‌ركووك چاره‌سه‌ر بكات، ده‌يزانى گرفتى بنه‌ڕه‌تيى نێوان حكوومه‌تى عێراق و حكوومه‌تى هه‌رێمى كوردستان مه‌سه‌له‌ى كه‌ركووكه‌ كه‌ جه‌وهه‌رى بنه‌ڕه‌تيى كێشه‌كانه‌، به‌ڵام به‌داخه‌وه‌ له‌به‌ر پابه‌ندنه‌بوونى لايه‌نه‌ عێراقييه‌كان به‌ مادده‌ى 140ى ده‌ستوورى عێراق، تا ئێستاش ئه‌و كێشه‌يه‌ به‌ هه‌ڵواسراوى ماوه‌ته‌وه‌، ئه‌وه‌ش زيانێكى زۆرى هه‌بووه‌ و هه‌يه‌ بۆ هه‌موو عێراق.

لێرەشه‌وه‌ لەبەردەم تەرمی د. نەجمەدین كەریمدا، جارێكی دیكە دووپاتى ده‌كه‌ينه‌وه‌ كه‌ ده‌بێت كێشه‌ى كه‌ركووك و ناوچه‌ كێشه‌له‌سه‌ره‌كان بە شێوه‌يه‌كى ئاشتیانە و بە دیالۆگ، لەسه‌ر بنه‌ماى ده‌ستوورى عێراق چاره‌سه‌ر بكرێت. هەرچەند ئه‌و كێشه‌يه‌ دوا بخرێت، ئاڵۆزتر دەبێت، بۆیەش ئێمە جارێكی تر داوا دەكەین، پێكەوە دابنیشین و ئەو كێشانه‌ لە چوارچێوەی دەستووری عێراقدا چارەسەر بكەین.

بەڕێزان ..

د. نەجمەدین كەریم، دوای ژیانێكی پڕ لە كار و تێكۆشان، بەجێی هێشتین. ئەمڕۆ جارێكی دیكە هاوخەميی خۆم و سەرۆكایەتيی هەرێمی كوردستان لەگەڵ كەسوكار و خزمانی، له‌گه‌ڵ خه‌ڵكى خۆشه‌ويستى شارى كەركووك و هەموو گەلی كوردستان، دووپات دەكەمەوە. لەسەر وەسیەتی خۆی، ئەمڕۆ بە شێوەیەكی كاتی لە هەولێر دەنێژرێت. هیوادارین زوو ئەو هیوایەی د. نەجمەدین بێته‌ دى كە داواى كردبوو ته‌رمه‌كى بۆ هه‌ميشه‌ بگه‌ڕێته‌وه‌ بۆ شارى كه‌ركووك. هيوادارين دۆخێكى وا به‌ زوويى بێته‌ كايه‌وه‌ و ئێمه‌ بتوانين ته‌رمى د. نه‌جمه‌دين بگه‌ڕێنينه‌وه‌ بۆ كه‌ركووك.

ديسانه‌وه‌ سه‌ره‌خۆشى له‌ كه‌سوكارى د. نه‌جمه‌دين ده‌كه‌م، سه‌ره‌خۆشى له‌ سۆزان خان و منداڵه‌كانى ده‌كه‌م، هاوبه‌شى خه‌ميانين و هيوادارم دوا خه‌ميان بێت.

هه‌موو لايه‌كيتان به‌خێر بێن، زۆر سوپاس.

 

پرسەنامەی سەرۆک مەسعود بارزانی بۆ کۆچی دوایی شاعیر ناوداریی کورد جەلال مەلەکشا

"مەسعود بارزانی" له په‌یامێکی پرسەنامەییدا به بۆنه‌ی کۆچی دوایی شاعیری ناوداریی کورد "جەلال مەلەکشا" سەرەخۆشی لە خانەوادەی خوالێخۆشبوو و ڕۆشنبیر و ئەدەبدۆست و نووسەرانی هەموو کوردستان کرد.

 

ده‌قی په‌یامه‌که‌ی سەرۆک "مەسعود بارزانی" له خواره‌وه‌دا هاتووه:

 

بەناوی خودای بەخشندە و میهرەبان

بە داخێکی زۆرەوە هەواڵی کۆچی دوایی شاعیری ناوداری گەلی کورد "جەلال مەلەکشا"م پێی گەییشت.

"جەلال مەلەکشا" نووسەر و شاعیرێکی نیشتیمانپەروەر بوو کە جێی دەستی لە بەرەوپێشبردنی فەرهەنگ و ئەدەبی کوردستان دیارە.

سەرەخۆشی لە خانەوادە و کەسوکاری خوالێخۆشبوو جەلالی مەلەکشا و ڕۆشنبیر و ئەدەبدۆست و نووسەرانی شاری سنە و هەموو کوردستان دەکەم و خۆم بە هاوبەشی خەمیان دەزانم.

لە خودای گەورە داواکارم خوالێخۆشبوو بە بەهەشتی بەرین شاد بکات و سەبر و ئارامیش بە هەموو لایەک ببەخشێت.

انا لله و انا الیە راجعون

مەسعود بارزانی

قوباد تاڵەبانی پێشوازیی لە گەورە ئابووریناسی جیهانی تۆماش سێدلاچێک کرد

قوباد تاڵەبانی لەگەڵ دکتۆر تۆماش سێدلاچێک گەورە ئابووریناسی جیهانی و کۆماری چیک کۆبووەوە و تاوتوێی چۆنییەتی بووژانەوەی ئابووری هەرێمی کوردستانیان کرد.

 

قوباد تاڵەبانی پێشوازیی لە گەورە ئابووریناسی جیهانی و كۆماری چیك تۆماش سێدلاچێک کرد كە لەسەر بانگهێشتی جێگری سەرۆك وەزیران بۆ راوێژی ئابووری و ئەنجامدانی زنجیرەیەك دیدار و چالاكی هاتووەتە هەرێمی كوردستان.

 

سەردانی ئەم ئابووریناسە كە خاوەنی چەند خەڵاتی نێودەوڵەتییە بە هەماهەنگی لەگەڵ وەزارەتی دەرەوەی کۆماری چیک بووە و ئامانجی سەردانەکەشی پێشكەشكردنی ڕاوێژە بە هەرێمی کوردستان لەبارەی چۆنییەتی فرەجۆركردنی سەرچاوەكانی داهات و پەرەپێدانی ئابووری و دووركەوتنەوەیە لە پشتبەستن بە نەوت وەك تاکە سەرچاوەی بودجە.

 

لە کۆبوونەوکەدا، جێگری سەرۆک وەزیران دۆخی ئابووری هەرێم و پلان و ئامانجەکانی حکومەتی هەرێمی بۆ پێشخستنی ئابوری و فرەجۆرکردنی سەرچاوەکانی داهاتی بۆ تۆماش سێدلاچێک روونکردەوە و بە گرنگییەوە باسی سوودوەرگرتن لە ئەزمونی کۆماری چیکی کرد کە لەڕووی بووژانەوە و پەرەپێدانی ئابوورییەوە نموونەیەکی سەرکەوتووی پێشکەش کردووە.

 

لەلای خۆشیەوە تۆماش سێدلاچێک ئامادەیی خۆی نیشاندا بۆ بەخشینی بەرچاوڕوونی بە حکومەتی هەرێم بۆ چۆنییەتی گواستنەوەی ئەزموونی کۆماری چیک و وڵاتانی هاوشێوە بۆ ئەوەی هەرێمی کوردستان لە پشتبەستن بە تاکە سەرچاوە رزگاری بێت.

 

ئەم سەردانە لە چوارچێوەی هەوڵەکانی جێگری سەرۆکی حکومەت دایە بۆ چۆنییەتی گواستنەوەی ئەزمونی وڵاتانی سەرکەوتوو کە هەر لەم چوارچێوەیەشدا لەگەڵ چەندین وڵات لە هەوڵدایە بۆ گواستنەوەی ئەزموونی ئەم وڵاتانە لەڕووی کشتوکاڵ و حکومەتی ئەلکترۆنی و چەندین بواری دیکەی حکومڕانییەوە.

سه‌رۆكى هه‌رێمى كوردستان پێشوازى له‌ كونسولى ئه‌رمه‌نستان كرد

سه‌رله‌به‌يانيى ئه‌مڕۆ سێشه‌ممه‌ 3/11/2020 به‌ڕێز نێچيرڤان بارزانى، سه‌رۆكى هه‌رێمى كوردستان، پێشوازى له‌ به‌ڕێز ئارشاك مانۆكيان كونسولى گشتيى ئه‌رمه‌نستان له‌ هه‌رێمى كوردستان كرد.

 

له‌ ديدارێكدا به‌ڕێز مانۆكيان خۆشحاڵيى خۆى به‌ يه‌كه‌م ديدارى خۆناساندن له‌گه‌ڵ سه‌رۆكى هه‌رێمى كوردستان ده‌ربڕى و خواستى وڵاته‌كه‌ى بۆ په‌ره‌پێدانى په‌يوه‌نديى هه‌مه‌لايه‌نه‌ به‌تايبه‌تى له‌ بوارى ئابووريدا له‌گه‌ڵ عێراق و هه‌رێمى كوردستان دووپات كرده‌وه‌.

 

لاى خۆيه‌وه‌ سه‌رۆك نێچيرڤان بارزانى، وێڕاى به‌خێرهێنان، هيواى سه‌ركه‌وتنى له‌ ئه‌ركه‌كه‌يدا بۆ خواست و دووپاتى كرده‌وه‌ كه‌ هه‌رێمى كوردستان خوازيارى په‌ره‌پێدانى په‌يوه‌ندييه‌كانيه‌تى له‌گه‌ڵ ئه‌رمه‌نستان و ده‌رفه‌ت و بوارى وه‌به‌رهێنان و سه‌رمايه‌گوزاريش بۆ كه‌رتى تايبه‌ت و كۆمپانيا ئه‌رمه‌نييه‌كان له‌ عێراق و هه‌رێمى كوردستان ڕه‌خساوه‌.

 

په‌يوه‌ندييه‌كانى هه‌ولێر ـ به‌غدا، مه‌ترسييه‌كانى تيرۆر، دوايين پێشهاته‌كانى دۆخى ناوچه‌كه‌ به‌گشتى و چه‌ند پرسێكى جێى بايه‌خى هه‌ردوولا، ته‌وه‌رێكى ديكه‌ى ديداره‌كه‌ بوون كه‌ تيايدا سه‌رۆك نێچيرڤان بارزانى هيواى خواست كێشه‌ و گرفته‌كان به‌ شێوه‌يه‌كى ئاشتيانه‌ چاره‌سه‌ر بكرێن و ئارامى و سه‌قامگيرى بگه‌ڕێته‌وه‌ ناوچه‌كه‌.

سەرۆکى هەرێمى کوردستان پێشوازى لە کونسولى گشتیى هۆڵەندا کرد

بەڕێز نێچیرڤان بارزانى، سەرۆکى هەرێمى کوردستان، پێشوازى لە بەڕێز هانس ئاکەربووم، کونسولى گشتیى هۆڵەندا لە هەرێمى کوردستان کرد.

 

لە کۆبوونەوەیەکدا پەیوەندییەکانى هەرێمى کوردستان و هۆڵەندا و برەودان بە بوارەکانى هاریکاریى نێوان هەردوولا، هاریکاریى کەرتى تایبەتى هۆڵەندى و هەرێمى کوردستان بەتایبەتى لە بوارى کشتوکاڵیدا، ئامادەیى و چالاکیى ڕەوەندى کوردستان لە هۆڵەندا، دۆخى هەرێمى کوردستان و عێراق، مەترسییەکانى تیرۆر، پەتاى کۆڤید_١٩ و دۆخى ناوچەکە بەگشتى، تاوتوێ کرا.

 

سەرۆک نێچیرڤان بارزانى خواستى هەرێمى کوردستانى بۆ برەودان بە پەیوەندییەکانى لەگەڵ هۆڵەندا دووپات کردەوە و ئاماژەى بەوە دا کە هەرێمى کوردستان بەتایبەتى لە بوارى کشتوکاڵى و خوێندنى زانکۆییى ئەو بوارەدا، دەتوانێت سوود لە ئەزموونى سەرکەوتووى هۆڵەندا بۆ بەرەوپێشبردنى کەرتى کشتوکاڵ ببینێت و دەرفەت و زەمینەیەکى باشى پێشخستنى کشتوکاڵ لە هەرێمى کوردستان هەیە کە دەکرێت کەرتى تایبەتى هۆڵەندى سەرمایەگوزارى تێدا بکات.

 

لاى خۆیەوە بەڕێز کونسولى گشتیى هۆڵەندا لە هەرێمى کوردستان وێڕاى ده‌ربڕینی خۆشحاڵى بە کارى هاوبەش و هاریکاریى لەگەڵ هەرێمى کوردستان لە بوارە جیاکاندا، باسى لە هاریکاریى کەرتى گشتى و تایبەتى هۆڵەندى لەگەڵ هەرێمى کوردستان بەتایبەتى لە بوارى کشتوکاڵیدا کرد و هەموو پشتگیرییەکى وڵاتەکەى بۆ برەودان بە پەیوەندییەکانى لەگەڵ هەرێمى کوردستان دووپات کردەوە.

 

هاوکارى و هەماهەنگیى هۆڵەندا لەگەڵ هەرێمى کوردستان لە بوارەکانى جێبەجێکردنى چاکسازى و مەشق و ڕاهێنانى پێشمەرگەدا، پەیوەندییەکانى هەولێر ـ بەغدا، پێشهاتەکانى شەڕى تیرۆر و بەرەنگاربوونەوەى داعش، چەند تەوەرێکى دیکەى کۆبوونەوەکە بوون.

به‌رپرسی په‌یوه‌ندییه‌كانی ده‌ره‌وه‌‌ پێشوازی له‌ كونسوڵی گشتیی ئه‌مەریكا ده‌كات

سه‌فین دزه‌یی به‌رپرسی په‌یوه‌ندییه‌كانی ده‌ره‌وه‌ پێشوازی له‌ ڕۆب واڵەر كونسوڵی گشتیی ئه‌مەریكا له‌هه‌رێمی كوردستان كرد.

له‌ كۆبوونه‌وه‌كه‌‌دا تاوتوێی پرسه‌كانی‌ سیاسی، ئابووری، ئاسایش وته‌ندروستی له‌ هه‌رێمی كوردستان وعێراق كران، وتیشك خرایه‌سه‌ر دوایین ڕووداوه‌كانی عێراق وپه‌یوه‌ندییه‌كانی نێوان هەولێرو بەغدا.

سه‌فین دزه‌یی باسی له‌ هه‌وڵی جددی و پلانه‌كانی حكومه‌ت كرد بۆ كۆنترۆڵكردنی په‌تای كۆڕۆنا و غڕێگریكردن له‌ ته‌شه‌نه‌كردنی، ‌ بۆ ئه‌م مه‌به‌سته‌ش چه‌ندین ڕێكاری خۆپارێزی پێویست و گرینگی گرتۆته ‌به‌ر وله‌ پێشه‌نگی كاره‌كانیدایه‌ ولەسه‌رجه‌م دام وده‌زگاكان وشوێنه‌ گشتییه‌كان و سێكته‌ره‌ جیاوازه‌كان به‌گشتیی جێبه‌جێ ده‌كرێت هاوكات سوپاسی پشتیوانی و هاوكاری به‌رده‌وامی ئه‌مەریكای كرد بۆ هه‌رێمی كوردستان وعێراق به‌تایبه‌تیش له‌ ماوه‌ی سه‌رهه‌ڵدانی په‌تای كۆڕۆنادا.

له‌ به‌شێكی دیكەدا هه‌ردوولا باسیان له‌ گرنگی ڕێككه‌وتنامه‌ی ئاساییكردنه‌وه‌ی دۆخی شه‌نگال كرد وبه‌پڕۆژه‌یه‌كی زۆر گرنگیان وه‌سفكرد كه‌ به‌هۆیه‌وه‌ ده‌یان هه‌زار خوشك و برای ئێزیدی ده‌توانن بگه‌ڕێنه‌وه‌ زێدی خۆیان و دووباره‌ ده‌ست به‌ ژیان بكه‌نه‌وه‌ و داهاتوویه‌كی سه‌قامگیر و دوور له‌ شه‌ڕ و ناخۆشیی بونیات بنێنه‌وه‌.

به‌رپرسی په‌یوه‌ندییه‌كانی ده‌ره‌وه‌ وكونسوڵی گشتیی ئه‌مەریكا جه‌ختیان له‌سەر په‌ره‌پێدانی په‌یوه‌ندی دووقۆڵی وفراوانتركردنی ئاستی هه‌ماهه‌نگییه‌كان له‌نێوان هه‌رێمی كوردستان وئه‌مەریكادا كرده‌وه‌.

كونسوڵی گشتیی ئەمەریکا سوپاسی حكومه‌تی هه‌رێم وفە‌رمانگه‌ی په‌یوه‌ندییه‌كانی دەرەوەی كرد بۆ هاوكاریكردنیان وپێشكه‌شكردنی كارئاسانی ته‌واو له‌ پێناو سه‌رخستنی كار وچالاكییه‌كانیان.

پرسەنامەی سەرۆکی حکومەتی هەرێمی کوردستان بەبۆنەی کۆچی دوایی مامۆستا جەلال مەلەکشا

"مەسرور بارزانى" سەرۆکی حکومەتی هەرێمی کوردستان، پرسەنامەیەکی بە بۆنەی کۆچی دوایی شاعیر و نووسەری ناسراوی کوردستان، مامۆستا "جەلال مەلەکشا" بڵاوکردەوە.

 

دەقی پرسەنامەکە:

 

بە داخەوە هەواڵی کۆچی دوایی شاعیر و نووسەری ناسراوی کوردستان "جەلال مەلەکشا"م بیست، کە ڕۆشنبیرێکی نیشتمانپەروەر بوو. پرسە و سەرەخۆشی لە بنەماڵەکەی دەکەم و هاوبەشی خەمیانم. خوای گەورە گیانی بە بەهەشت شاد بکات و ئارامییش بە کەسوکاری ببەخشێت.

مەسرور بارزانى

سەرۆکی حکومەتی هەرێمی کوردستان

په‌یامی هاوخه‌میى سه‌رۆکی هه‌رێمی کوردستان بۆ كۆچی دوایی جه‌لال مه‌له‌کشا

بۆ كۆچی دوایى شاعیری ناوداری کورد "جه‌لال مه‌له‌کشا"، "نێچیرڤان بارزانی" سه‌رۆکی هه‌رێمی کوردستان، پرسه‌نامه‌یه‌كی ئاڕاستەی بنەماڵە و دۆست و خۆشەویستان و شەیدایانی شیعرە بەرزەکانی کرد، كه‌ ئه‌مه‌ى خواره‌وه‌ ده‌قه‌كه‌یه‌تی:

 

پرسه‌نامه‌ی سه‌رۆکی هه‌رێمی کوردستان بۆ کۆچی شاعیر جه‌لالی مه‌له‌کشا

 

بە داخەوە هەواڵی کۆچی دواییی شاعیری ناوداری کورد جەلالی مەلەکشام بیست.

پرسە و سەرەخۆشی لە بنەماڵە و دۆست و خۆشەویستان و شەیدایانی شیعرە بەرزەکانی دەکەم، هاوخەمی کۆڕی شاعیران و ئەدەبدۆستانم بۆ لەدەستدانی شاعیری ئاویەر.

له‌ خوای مه‌زن داواکارم گیانی بخاته‌ به‌ر به‌زه‌یی و میهره‌بانیی خۆی و ئارامی و دڵنه‌وایی به‌ هه‌موو لایه‌ک ببه‌خشێت.

 

نێچیرڤان بارزانی

سه‌رۆکی هه‌رێمی کوردستان

 ٢٠٢٠/١٠/٣١

پۆستەری فیلمی "ژیان لەسەر شەقام" لە دەرهێنانی منداڵانی کۆبانێ و شنگاڵ بڵاوکرایەوە

مەنسوور جیهانی ـ پۆستەری فیلمی چوار ئێپیزۆدی "ژیان لەسەر شەقام" لە بەرهەمهێنانی "بەهمەن قوبادی" و لە دەرهێنانی منداڵانی کۆبانێ و شنگاڵ بۆ بەشداریی لە ڕووداوە سینەماییەکان بڵاوکرایەوە.

 

پۆستەری فیلمی چوار ئێپیزۆدی "ژیان لەسەر شەقام" Life on the Road لە بەرهەمهێنانی سینەماکاری بەزموونی کورد "بەهمەن قوبادی" و لە دەرهێنانی منداڵانی کۆبانێ و شنگاڵ، لەوانە: ئێپیزۆدی "ئێستا بۆ کوێی دەچێن؟"  Where do we go now? لە دەرهێنانی "ئیخلاس حەیدەر سامۆبۆد"، ئێپیزۆدی "ئێمە دیسانەوە سازیی دەکەینەوە" We'll make it again لە دەرهێنانی "سیدرا رێزوان"، ئێپیزۆدی "گەڕانەوە" The Return لە دەرهێنانی "سالوا سلێمان سیدۆ" و هەروەها ئێپیزۆدی "ژیان درێژەی هەیە" Life Goes On لە دەرهێنانی "عەدنان فارووق"، کە لە یەکەمین بەشداریی نێودەوڵەتی خۆیدا لە بەشی پێشبڕکێی "دەرهێنەرە نوێیەکان" لە چل و چوارەمین خولی فیستیڤاڵی نێودەوڵەتی فیلمی "سائۆ پائۆلۆ" São Paulo لە وڵاتی بڕازیل نمایش دەکرێت، لە لایەن هونەرمەندی ئێرانی "بێهزاد خۆرشیدی" دیزاینی بۆ کراوە و بۆ بەشداریی لە فیستیڤاڵە جیهانییەکانی فیلم و نمایش لە وڵاتانی جۆراوجۆری جیهان بڵاوکرایەوە.

 

ستافی ئامادەکردنی فیلمی چوار ئێپیزۆدی "ژیان لەسەر شەقام" بریتین لە: 

بەرهەمهێنان و ئامادەکردن: گوڵڕیز ئیحتیاتی، مونتاژ: ئیحسان واسقی، دەنگدانەر: حوسێن قوورچیان، گرووپی بەرهەم: میلاد فەیزوڵڵا بەیگی و عاتیفە ئەسڵانی، ستافی ئێپیزۆدی "ئێستا بۆ کوێی دەچێن؟"؛ دەرهێنەر: ئیخلاس حەیدەر سامۆبۆد، ڕاوێژکار: میلاد فەیزوڵڵا بەیگی، ستافی ئێپیزۆدی "ئێمە دیسانەوە سازیی دەکەینەوە"؛ ڕاوێژکار سۆران ئیبراهیم، وێنەگر: سۆران ئیبراهیم، دەنگهەڵگر: ڕێکەوت خالید، ئەکتەرەکان: سیدرا رێزوان و چیا ئەحمەدی، ستافی ئێپیزۆدی "گەڕانەوە"؛ ڕاوێژکار و وێنەگر: محەمەد تۆریوەریان و سالوا ئلێمان سیدۆ، یاردەدەری وێنەگر: نیما محەمەدپوور، ئەکتەرەکان: هازم خوداداد، نەزیر خوداداد، سۆنیا سلێمان سیدۆ، یاس خالید، خوداداد ئەسغەر، ستافی ئێپیزۆدی "ژیان درێژەی هەیە"؛ ڕاوێژکار و وێنەگر: سۆران ئیبراهیم و عەدنان فارووق، مۆنتاژ: سۆران ئیبراهیم، ئەکتەرەکان: روناک مستەفا، عومەر ساڵح، حەموودە محەمەد، سیلوا شێخۆ، دڵوا شێخ، شیرین شێخۆ قادر و مدلین شێخۆ، بەڕێوەبەریی ڕاگەیاندنی گشتیی: مەنسوور جیهانی، بەرهەمی: ڕۆژئاوا و هەرێمی کوردستان.

 

چل و چوارەمین خولی فیستیڤاڵی نێودەوڵەتی فیلمی "سائۆ پائۆلۆ" بە نمایش 198 فیلم لە دەرهێنەرانی 71 وڵاتی جیهان، لە بەشە جۆراوجۆرەکانی پێشبڕکێی و دەرەوەی پێشبڕکێی لەوانە: بەشی "ئاسۆی نێودەوڵەتی"، بەشی پێشبڕکێی "دەرهێنەرە نوێیەکان"، بەشی "بڕازیل"، بەشی "خەڵاتەکان"، بەشی "مافی مرۆڤ" و بەشی "کەمپەینەکان" لە ڕۆژانی 22ی ئۆکتۆبەر تا 4ی نۆڤەمبەری 2020 بە هۆی بڵاوبوونەوەی پەتای ڤایرۆسی کوشەندەی کۆڕۆنا بۆ یەکەمین جار، بە شێوەی ئۆنلاین لە شاری سائۆ پائۆلۆ لە وڵاتی بڕازیل بەڕێوەدەچێت.

 

بۆ زانیاریی زیاتر: 

https://44.mostra.org/jornal-da-mostra/veja-a-selecao-de-filmes-da-44-mostra  

پۆستەری فیلمی سینەمایی "کۆچەری بچکۆل" لە دەرهێنانی "بەتین قوبادی" بڵاوکرایەوە

مەنسوور جیهانی ـ پۆستەری فیلمی سینەمایی "کۆچەری بچکۆل" لە دەرهێنانی سینەماکاری کورد "بەتین قوبادی" بۆ بەشداریی لە ڕووداوە سینەماییەکان و نمایش لە وڵاتانی جۆراوجۆری جیهان بڵاوکرایەوە.

 

پۆستەری ئینگلیزی فیلمی سینەمایی کوردیی "کۆچەری بچکۆل" The Little Refugee لە دەرهێنانی سینەماکاری کورد "بەتین قوبادی"، لە بەرهەمهێنانی "محەمەد ئەحمەدی" و بەرهەمی هاوبەشی وڵاتانی ئێران و تورکیا لە ساڵی 2019؛ کە لە یەکەمین بەشداریی نێودەوڵەتی خۆیدا لە بەشی پێشبڕکێی "دەرهێنەرە نوێیەکان" لە چل و چوارەمین خولی فیستیڤاڵی نێودەوڵەتی فیلمی "سائۆ پائۆلۆ" São Paulo لە وڵاتی بڕازیل نمایش دەکرێت، لە لایەن هونەرمەندی ئێرانی "بێهزاد خۆرشیدی" دیزاینی بۆ کراوە و بۆ بەشداریی لە فیستیڤاڵە جیهانییەکانی فیلم و نمایشە بیانییەکان بڵاوکرایەوە.

 

لە فیلمی سینەمایی "کۆچەری بچکۆل"دا کۆمەڵێک ئەکتەری کورد و ئێرانی و تورکیا لەوانە: "فەڕشید گەوێڵی"، "نادر فەلاح"، "پەریا وەزیری"، "عەزیز چابکورت"، "سوات ئوستا" و "محەمەد رەزا عەقدایی" لە تەنیشت دوو ئەکتەریی منداڵ "یۆسف مەحموود عەبدوالقادر" و "محەمەد مەحموود عەبدوالقادر" ڕۆڵیان بینیوە.

 

چل و چوارەمین خولی فیستیڤاڵی نێودەوڵەتی فیلمی "سائۆ پائۆلۆ" بە نمایش 198 فیلم لە دەرهێنەرانی 71 وڵاتی جیهان، لە بەشە جۆراوجۆرەکانی پێشبڕکێی و دەرەوەی پێشبڕکێی لەوانە: بەشی "ئاسۆی نێودەوڵەتی"، بەشی پێشبڕکێی "دەرهێنەرە نوێیەکان"، بەشی "بڕازیل"، بەشی "خەڵاتەکان"، بەشی "مافی مرۆڤ" و بەشی "کەمپەینەکان" لە ڕۆژانی 22ی ئۆکتۆبەر تا 4ی نۆڤەمبەری 2020 بە هۆی بڵاوبوونەوەی پەتای ڤایرۆسی کۆڕۆنا بۆ یەکەمین جار، بە شێوەی ئۆنلاین لە شاری سائۆ پائۆلۆ لە وڵاتی بڕازیل بەڕێوەدەچێت. 

 

هەندێک لە ئامادەکردنی ستافی فیلمی سینەمایی "کۆچەری بچکۆل" بریتین لە: 

نووسەری سیناریۆ و دەرهێنەر: بەتین قوبادی، راوێژکاری سیناریۆ: مەرزیە خوش تەراش، بەڕێوەبەریی وێنەگرتن: موڕتەزا نەجەفی، وێنەگری بەشی تورکیا: جەعفەر ئەسڵانی، مۆنتاژ: هایدە سەفی یاری، دەنگهەڵگر: محەمەد موختاری، دیزاینی سەحنە: موڕتەزا فەربود، دیزاینی جلووبەرگ: ئیلهام موعین، دەنگدانەر: بەهمەن ئەردەڵان، میکیاج: مەحموود دێهقان، بەرپرسی پلان: گوڵڕیز ئیحتیاتی، موزیک: بابەک میرزاخانی، بەرپرسی تەدارەکات: ئیسماعیل میرزایی، چاککردنی ڕەنگ: سامان مەجدوەفایی، یاریدەدەری دەرهێنەر: محەمەد کاشی، مستەفا هادی، مونشی سەحنە: مونا پیرایش، رووناکی: عەلیڕەزا ئەفشاری، فۆتۆگرافەر: سومەیە جەعفەری، دیمەنە تایبەتەکان: عەلی تەسدیقی، بەرپرسانی بەرهەم: میلاد خوسرەوی، بەهرام سەربازی، بەرهەمهێنەر: محەمەد ئەحمەدی، بەڕێوەبەریی ڕاگەیاندنی گشتیی: مەنسوور جیهانی و مەنووچێهر جیهانی، بەرهەمی هاوبەشی وڵاتانی ئێران و تورکیا، ساڵی بەرهەمهێنان: 2019.

 

بۆ زانیاریی زیاتر: 

https://44.mostra.org/jornal-da-mostra/veja-a-selecao-de-filmes-da-44-mostra  

 

پەڕەى 10 لەکۆى 158 پەڕەدا

هەواڵی زیاتر لە تویتەر

راپۆرتە پڕ بینەرەکان

حالت های رنگی