ئەمڕۆ دووشەممە، 2015/4/27 کۆبوونەوەی ئاسایی هەردوو سەرۆکایەتیی پەرلەمانی کوردستان و حکوومەتی هەرێم بە ئامادەبوونی بەڕێزان د.یوسف محەمەد سادق سەرۆکی پەرلەمان و نێچیرڤان بارزانی سەرۆک وەزیرانی هەرێمی كوردستان سازکرا كە هەریەكە لە بەڕێزان جەعفەر ئیبراهیم ئێمنکی جێگری سەرۆکی پەرلەمان و قوباد تاڵەبانی جێگری سەرۆک وەزیران و فەخرەدین قادر سکرتێری پەرلەمان و مەولود باوەموراد وەزیری هەرێم بۆ کاروباری پەرلەمان ئامادەبوون.

لەسەرەتای دانیشتنەکەدا، بەڕێز د.یوسف محەمەد سادق سەرۆکی پەرلەمان، بەخێرهاتنی شاندی حکوومەتی هەرێمی کرد و هیوای خواست دانیشتنەکە هەنگاوێک بێت بە ئاراستەی ڕێکخستنەوەی پەیوەندییەکانی نێوان پەرلەمان و حکوومەتی هەرێمی کوردستان، بە تایبەتیش لەو پرسە گرنگانەی پەیوەندییان بەژیان و بژێوی هاوڵاتیانی هەرێمی کوردستانەوە هەیە."

 لە بەشێکی دیكەی وتەکانیدا سەرۆکی پەرلەمان باسی لە گرنگی هەماهەنگیی نێوان سەرۆکایەتیی حکوومەت و دەستەی سەرۆکایەتیی پەرلەمان کرد لە کاروباری پرۆژە یاسا و بڕیارەکاندا. هەردوولاش تەبا بوون لەسەر ئەوەی ئەم دانیشتنانە بەردەوامییان هەبێت.

دواتریش بەڕێز نێچیرڤان بارزانی سەرۆک وەزیرانی هەرێمی کوردستان، ئاماژەی بە پەیوەندیی نێوان وەزیرەکان و لیژنە تایبەتمەندەکانی پەرلەمانی کوردستان کرد و ئەو پەیوەندییانەی بە هەنگاوێکی درووست زانی بۆ کەمکردنەوەی ڕۆتین و بەدواداچوونی گرفتی هاوڵاتیان.

لە دوا تەوەری دانیشتنەکەشدا گفتوگۆ لەبارەی شەڕی دژی تیرۆریستان و سەرکەوتنەکانی هێزی پێشمەرگەی کوردستان لەبەرەکانی شەڕدا کرا و پێشمەرگە وەک سیمبولی ئازادیی و سەرفرازیی گەلی کورد ناسێنرا.

دوای كۆبوونەوەكەش، هەردوو بەڕێبەڕێزان د. یوسف محەمەد سەرۆكی پەرلەمان و نێچیرڤان بارزانی سەرۆك وەزیرانی هەرێم، لەبارەی ناوەرۆكی كۆبوونەوەكە لێدوانیان دایە دەزگاكانی ڕاگەیاندن.

بەڕێز نێچیرڤان بارزانی سەرۆك وەزیرانی هەرێمی كوردستان لە قسەكانیدا وێڕای سوپاسگوزاری بۆ پێشوازی گەرمی سەرۆكایەتی پەرلەمان لە شاندەكەیان، هەروەها گوتی : ئەمڕۆ ئێمە بۆ زیاتر تەفعیلكردنی چۆنیەتی پەیوەندی نێوان حكومەت و پەرلەمان،  كۆبووینەوە و ئەم كۆبوونەوەیەش لەچوارچێوەی زنجیرە كۆبوونەوەیەكە كە پێویستە بەشێوەیە كی دەوری بەردەوام بێت بۆ هەبوونی هەماهەنگی زیاتر لەبارەی چۆنیەتی كاركردن لەسەر ئەو یاسایانەی لەپەرلەمان باسیان لێوە دەكرێت، هەروەها بۆ چارەسەركردنی هەر ئەگەر و گرفتێك كەبێنە پێش. بەشێوەیەكی گشتی كۆبوونەوەی ئەمڕۆمان كۆبوونەوەیەكی باش بوو وهیوادارین بەردەوام بێت.

لای خۆیەوە بەڕێز د.یوسف محەمەد سەرۆكی پەرلەمانی كوردستان لە لێدوانێكدا بۆ كەناڵەكانی ڕاگەیاندن ئاماژەی بە ناوەرۆكی كۆبوونەوەكە كرد كە بۆ گفتوگۆكردن لەبارەی پرۆژە یاساكان وهەماهەنگیی نێوان هەردوولا و بەردەوامی پەیوەندی نێوان هەردوو دەسەڵاتی جێبەجێكردن و یاسادانان بوو. ئەوەشی خستە ڕوو كە بڕیاردراوە ئەم كۆبوونەوە دەوریانە بەردەوام ئەنجام بدرێن

بەداخ و خەمێکی زۆرەوە هەواڵی کۆچی دوایی زانا و تێكۆشه‌ری گەورەی عێراقی ’’محمد بحر العلوم - مان پێگەیشت. خوالێخۆشبوو وێڕای پێگەی زانستییانەی وەک زانایەکی  گەورە، هاوکات تێكۆشه‌رێكی بەهەڵوێستیش بووە و هەمیشە لە بەرەی زوڵملێکراوان و لە دژی ستەمکاران  تێکۆشاوە. هەڵوێستی دۆستانەی ئەم زانا و تێکۆشەرە بەرامبەر بە گەلی کوردستان لە مێژووی سیاسیی هاوچەرخی عێراقدا، هەمیشە مایەی ڕێز و پێزانینی ئەم گەلە بووە و هەرگیز لەیادی ناکات.

لەدەستدانی ئەم زانا نیشتیمانپەروەرە، ئەگەر بۆ گەلی کوردستان لەدەستدانی دۆستێکی گەورە بێت، ئەوا بۆ سەرجەم عێراقییەکانیش خەسارەتێکی گەورەیە، بەتایبەت کە خوالێخۆشبوو جگە لە ڕۆڵی مێژووییانەی لە خەباتی گەلی عێراقدا دژ بە ڕژێمی دیکتاتۆری، هاوکات ڕۆڵێکی کاریگەریشی لە بنیادنانەوەی عێراقی نوێدا، هەبووە.

لێرەوە، بەناوی خۆم و حکوومەت و گەلی کوردستانەوە، لەگەڵ دەربڕینی هاوخەمیمان لە ڕێگەی بەڕێز د. ئیبراهیم بحر العلوم - ەوە بۆ خانەوادەی بەڕێزی خوالێخۆشبوو، پرسە و سەرەخۆشیمان ئاراستەی  مەرجەعە ئایینییە بەڕێزەکان و سەرجەم گەلانی عێراق دەکەین. ڕۆحی پاکی خوالێخۆشبوو بە بەهەشتی بەرین شاد بێ و  خوای گەورە ئارامی و سەبووری بە هەموو لایەک ببەخشێت.

نێچیرڤان بارزانی
سه‌رۆك وه‌زیرانی هه‌رێمی كوردستان
2015/4/8

ئەمڕۆ شەممە 2015/4/4 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێز كاردینال (فێرناندۆ فیلۆنی) نوێنەری پاپای ڤاتیكان كرد كە ماوەی چەند ڕۆژێكە بە سەردان لە هەرێمی كوردستانە.

لە دیدارێكدا نوێنەری پاپای ڤاتیكان سوپاس و پێزانینی خۆی بۆ حكوومەتی  هەرێمی كوردستان دەربڕی بۆ ئەو هەموو هاوكارییەی پێشكەشی ئەو ئاوارانەی كردووە كە لە ترسی تیرۆریستانی داعش ڕوویان لە هەرێمی كوردستان كردووە و ئاماژەی بەوە كرد كە ڕەوشی ئاوارەكان بە بەراورد لەگەڵ سەرەتای هاتنیان بۆ هەرێمی كورستان، زۆر باشتر بووە و هیوای خواست ڕەوشەكە بەرەو ئاساییبوونەوە بچێت و ئاوارەكان بگەڕێنەوە سەر جێگە و ڕێگەی خۆیان و بە تەبایی و برایەتی لەگەڵ هەموو پێكهاتەكان بەیەكەوە بژین. هەروەها سوپاسی خۆی و پاپای ڤاتیكانی پێشكەش بە سەرۆك وەزیرانی هەرێمی كوردستان كرد بۆ ئەو هەموو قوربانیدانەی كە پێشمەرگە لە شەڕی دژی تیرۆر داویانە و ئەو نەبەردیەی لەو شەڕە سەپاوەدا پیشانی دەدەن و بەبێ‌ جیاوازی بەرگری لە هەموو پێكهاتەكان دەكەن.

لە تەوەرێكی دیكەی دیدارەكەدا باسى دوا پێشهاتەكان بە تایبەتی قوناغی ئاساییبوونەوەی ڕەوشەكە و گەڕانەوەی ئاوارەكان بۆ سەر ماڵ و حاڵی خۆیان كرا و لەم میانەشدا داكۆكى لەسەر هاوكاریكردن و پاراستنیان كرایەوە بۆ ئەوەی بتوانن ژیانی ئاساییی خۆیان دەست پێبكەنەوە.

لای خۆیەوە بەڕێز سەرۆك وەزیرانی هەرێمی كوردستان سوپاسی سەردانی نوێنەری پاپای ڤاتیكانی بۆ هەرێمی كوردستان كرد و تیشكى خسته‌ سه‌ر دوا سەردانی خۆی بۆ ڤاتیكان و پێشوازى و دیدارى له‌گه‌ڵ قەداسەتی پاپا. ئاماژەی بەوەش كرد كە حكوومەت و خەڵكی هەرێمی كوردستان باوەڕیان بە برایەتی و پێكەوەژیان و یەكڕیزیی هەموو پێكهاتەكان هەیە و بەردەوام دەبن لە هاوكاریكردنی ئاوارەكان و هیوای خواست لە كاتێكی نزیكدا بارودۆخەكە ئاسایی ببێتەوە تا ئاوارەكان بگەڕێنەوە شوێنی خۆیان و ئامادەییی حكوومەتی هەرێمی دەربڕی كە لە شوێنەكانیان هاوكاری و پاراستن بۆ ئاوارە گەڕاوەكان دابین بكات.

ئەمڕۆ دووشەممە بەڕێز حەیدەر عەبادی سەرۆك وەزیرانی عێراق بە سەردانێك گەییشتە هەرێمی كوردستان لە فڕۆكەخانەی نێودەوڵەتیی هەولێر لە لایەن بەڕێز مەسعود بارزانی سەرۆكی هەرێمی كوردستان و نێچیرڤان بارزانی سەرۆكی حكوومەتی هەرێم و ژمارەیەك لە بەرپرسە سیاسی و ئەمنییە باڵاكانی هەرێم پێشوازی كرا.

دوای پشوودانێكی كورت لە فڕۆكەخانەی نێودەوڵەتیی هەولێر سەرۆك وەزیرانی عێراق و شاندە یاوەرەكەی كە پێكهاتبوون لە خالد ئەلعوبێدی وەزیری بەرگریی حكوومەتی عێراق و محەمەد سالم ئەلغەبان وەزیری ناوخۆی حكوومەتی عێراق و دكتۆر جاسم محەمەد وەزیری كۆچ و كۆچبەرانی عێراق و فەریقی یەكەم بابەكر زێباری سوپاسالاری عێراق و ژمارەیەك لە بەرپرسە سەربازی و ئەمنییەكانی حكوومەتی عێراق لە شاری هەولێر لەگەڵ سەرۆك بارزانی كۆبوونەوە.

لەم كۆبوونەوەیەدا كە كۆسرەت ڕەسووڵ عەلی جێگری سەرۆكی هەرێم و نێچیرڤان بارزانی سەرۆكی حكوومەت و مەسروور بارزانی ڕاوێژكاری ئەنجوومەنی ئاساییشی هەرێم و قوباد تاڵەبانی جێگری سەرۆكی حكوومەت و مستەفا سەید قادر وەزیری پێشمەرگە و كەریم شنگالی وەزیری ناوخۆی حكوومەتی هەرێم و فواد حوسێن سەرۆكی دیوانی سەرۆكایەتیی هەرێم و ژمارەیەك لە بەرپرسە سیاسی و ئەمنی و سەربازییەكانی هەرێم ئامادەی بوون، سەرۆك وەزیرانی عێراق لە گوتەیەكدا ئاماژەی بەو بەرژەوەندی و خاڵە هاوبەشانە كرد كە زیاترن لە خاڵی ناكۆكیی نێوان هەولێر بەغدا و بە پێویستی زانی كە كار لەسەر بەرژەوەندی و خاڵە هابەشەكانی هەردوولا بكرێت و پەرەی پێ بدرێت.

ئەوەیشی ڕاگەیاند كە حەز بە پێشكەوتن و بووژانەوەی هەرێم دەكات و بۆ ڕووبەڕووبوونەوەی داعشیش پێویستیمان بە كاری هاوبەش و هەماهەنگیی زیاتر نێوان هەردوولا هەیە. سەرۆك وەزیرانی عێراقی ئەوەیشی باس كرد كە لە شەی دژی داعشدا هیچ سنوورێك نییە بۆ بەرزكردنەوەی هەماهەنگیی نێوان هەرێمی كوردستان و عێراق.

لەبەرانبەردا سەرۆك بارزانی بەخێرهاتنی سەرۆك وەزیرانی عێراق و شاندی یاوەری كرد و هیوای خواست ئەم سەردانە سەركەوتوو بێت و دەرگە بۆ هاوكاری و لێكتێگەییشتن و هەماهەنگیی زیاتری نێوان هەرێم و بەغدا بكاتەوە. سەرۆك بارزانی باسی لە قارەمانێتیی پێشمەرگە لەدژی تیرۆریستان كرد و ئاماژەی بەوەدا كە كوردستان بەڕووی پەڵامارێكی دڕندانەی دوژمنێكی پڕچەك و بەدڕەوشت هاتەوە و توانی تێكیبشكێنێت. سەرۆك بارزانی ئامادەیی هەرێمی كوردستانیشی نیشاندا بۆ ئەوەی هەماهەنگی و هاوكاریی هێزەكانی عێراق بكات لە دەركردن و لەناوبردنی تیرۆریستانی داعش.

هەر لەم دانیشتنەدا سەركەوتنەكانی هێزی پێشمەرگە و هەروەها پڕۆسەی ئازادكردنی تكریت لە لایەن هێزەكانی عێراق و پلانی ئازادكردنی شاری موسڵ خرایە بەر باس و گفتوگۆ و بڕیاریش لەبارەی پێكهێنانی لیژنەی هاوبەشی سەربازی بۆ دیراسەكردنی پلانی ئازادكردنی موسڵ و لیژنەیەكی هاوبەشی تایبەتیش درا بۆ چۆنییەتی مامەڵەكردن لەگەڵ قۆناغی دوای ئازادكردنی موسڵ.

هەر لەم كۆبوونەوەیەدا جەخت لەوە كرایەوە كە بوونی هەڕەشە بۆ سەر كوردستان و عێراق هەڕەشەیەكی هاوبەشە و پێویستیشە تەواوی عێراق لە چنگی تیرۆریستان ڕزگار بكرێت. پەیوەندییەكانی نێوان هەرێم و بەغدا و ڕێگاكانی چارەسەركردنی كێشە و ناكۆكییەكان تەوەرێكی دیكەی ئەم كۆبوونەوەیە بوون و هەردوولا لەسەر ئەوە هاوڕابوون كە پێویستە پەیوەندییەكانی نێوان هەولێر و بەغدا ئاراستەیەكی ئیجابی وەربگرێت.

لەدوای تەواوبوونی كۆبوونەوەكە سەرۆك بارزانی و سەرۆك وەزیرانی عێراق لە پڕێسكۆنفڕانسێكدا ناوەڕۆكی كۆبوونەوەكەیان بۆ ڕاگەیاندنەكان خستەڕوو و وەڵامی پرسیاری ڕۆژنامەنووس و میدیاكارانیان دایەوە.

پاش پڕێسكۆنفڕانسەكە سەرۆك بارزانی و ژمارەیەك لە بەرپرسە ئیداری و سیاسییەكانی هەرێم لەگەڵ سەرۆك وەزیرانی عێراق و شاندی حكوومەتی عێراق بە مەبەستی لەنزیكەوە ئاگاداربوون لە بار و گوزەرانی ژیانی ئاوارە و پەنابەران سەردانی كەمپی ئاوارەكانیان لە بەحركە كرد لە نزیك شاری هەولێر.

شایانی گوتنە هەر ئێوارەی ئەمڕۆ حەیدەر عەبادی كۆتایی بە سەردانەكەی بۆ هەرێمی كوردستان هێنا و لە فڕۆكەخانەی نێودەوڵەتیی هەولێر لە لایەن سەرۆك بارزانی بەڕێ كرا.

ئێوارەی ئەمڕۆ یەكشەممە 2015/9/23 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێز ژان ئاسڵ بۆرن وەزیری دەرەوەی لۆكسەمبۆرگ و شاندێكی یاوەری كرد.

لە دیدارێكدا باس لە  ڕەوشی ئەو ئاوارانە كرا كە ڕوویان لە هەرێمی كوردستان كردووە و بارگرانییەكی زۆریان بۆ حكوومەتی هەرێمی كوردستان دروست كردووە، لە كاتێكدا هەرێم خۆی دووچاری قەیرانی دارایی و نەبوونی بودجە و شەڕێكی نەگریس بووەتەوە، وێڕای ئەمەش توانیویەتی پێشوازی لەو ئاوارانە بكات و لە هەموو بوارەكاندا هاوكاری و خزمەتگوزارییان پێشكەش  بكات، بۆ ئەمەش شاندی میوان سوپاسی حكوومەتی هەرێمی كرد.

شاندی میوان هەروەها باسیان لەوە كرد كە هەموو هەوڵەكانیان دەخەنە گەڕ بۆ ئەوەی كۆمەڵگای نێودەوڵەتی و بە تایبەتی وڵاتانی ئەورووپا لە بارەی پێشكەشكردنی خزمەتگوزاری بە ئاوارەكان، یارمەتیی حكوومەتی هەرێمی كوردستان بدات و بۆ ئەم مەبەستەش هەفتەی داهاتوو لە میانی بەشداریكردنیان لە كۆنفرانسی وڵاتە كۆمەكبەخشەكان كە لە كوێت دەبەسترێت، باس لەوە دەكەن حكوومەتی هەرێمی كوردستان له‌ ڕووی هاوكاریكردنی ئاوارەكانه‌وه‌، ئەركی سەرشانی خۆی جێبەجێ كردووە و پێویستە كۆمەڵگای نێودەوڵەتیش ئەركەكانی بەرامبەر هەرێمی كوردستان جێبەجێ بكات.

لە تەوەرێكی دیكەی دیدارەكەدا باس لە بارودۆخی  ئێستای عیراق و بەرەكانی شەڕی دژی تیرۆریستان و ڕەوشی سیاسیی وڵات كرا و شاندی لۆكسەمبۆرگ سوپاس و پێزانینی خۆیان بۆ ئەو نەبەردییەی هێزی پێشمەرگە دەربڕی كە توانیویەتی بوێرانە ڕووبەڕووی ئەو گرووپە تیرۆیستییە ببنەوە و ئامادەییی خۆیان دەربڕی كه‌ بۆ چارەسەركردنی بریندارانی پێشمەرگە، هاوكاریی پێویست پێشكەش بكەن.

لای خۆیەوە بەڕێز نێچیرڤان بارزانی سوپاسی شاندی میوانی كرد بۆ سەردانەكەیان و هەڵوێستەكەیانی بەرز نرخاند و دڵنیای كردنەوە كە هەرێمی كوردستان بەبێ جیاوازیی ئایین و مەزهەب و نەتەوە، باوەشی بۆ هەموو ئاوارەكان كردووەتەوە و ئاماژەی بەوەش كرد ئەو شەڕەی پێشمەرگە لە دژی تیرۆیستان دەیكات، بۆ پاراستنی بنەماكانی مافی مرۆڤە كە خەڵكی كوردستان لەگەڵ خەڵكی ئازادیخواز و مرۆڤدۆستی جیهان، هاوبەشی ئەو بنەمایانەن و بەردەوام لەبەرچاوی گرتوون.

لە تەوەرێكی دیكەی قسەكانیدا بەڕێز سەرۆك وەزیران بارودۆخی سیاسیی عێراق و بەرەكانی شەڕ و بە تایبەت ڕەوشی شاری مووسڵی بۆ شاندی میوان خستە ڕوو و جەختی لەوە كردەوە كە هەرێمی كوردستان بەردەوام دەبێت لەسەر پاراستنی ئەو ناوچانەی كە ئازادی كردوون و هه‌موو هاوكارییەكیش بۆ نەهێشتنی مەترسیی تیرۆر پێشكەش دەكات.

لە كۆتایی دیدارەكەدا بەڕێز نێچیرڤان بارزانی باسی لە پەیوەندییەكانی نێوان هەرێمی كوردستان و بەغدا كرد و لەم بارەیەشەوە چەندین بیروڕا لە نێوان هەردوولادا، ئاڵوگۆڕ كران.

پێشنیوەڕۆی ئەمڕۆ یه‌كشه‌ممه‌ 2015/3/15 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێز دكتۆر عەلاء عەلوان بەڕێوەبەری گشتیی ڕێكخراوی جیهانیى تەندروستی WHO و شاندێكی یاوەری كرد.

لە دیدارێكدا بەڕێز بەڕێوەبەری گشتیی WHO هەڵسەنگاندنێكی لەبارەی بارودۆخی تەندروستی لە هەرێمی كوردستان پێشكەش كرد و ئاماژەی بە كار و چالاكییەكانی وەزارەتی تەندروستی بەگشتی و بەڕێوەبەرایەتیی گشتیی تەندروستیی پارێزگای دهۆك بەتایبەتی كرد و ڕۆڵی وەزارەت و بەڕێوەبەرایەتیی گشتیی تەندروستیی دهۆكی بەرز نرخاند كە وێڕای ئەو بارودۆخە قورسەی لەسەر شانیانە، توانیویانە بە شێوەیەكی ڕێكوپێك و لە هه‌مان كاتدا خزمەتگوزاریی پزیشكی و تەندروستی پێشكەش بە ئاوارە و پەنابەران لە كەمپەكان و هاووڵاتیان بە شێوەیەكی گشتی بكەن.

بەڕێز بەڕێوەبەری گشتیی ڕێكخراوی WHO هەروەها تیشكی خستە سەر ئەوەی كە هەوڵی بەردەوام دەدەن بۆ بەدەستهێنان و پێشكەشكردنی سەرچاوەی زیاتری كۆمەك و هاوكاری بۆ هەرێمی كوردستان لە بواری تەندروستیدا و ڕوونیشی كردەوە كە لە دیدار و كۆبوونەوەكانیدا لەگەڵ حكوومەتی فیدراڵی عیراق، باس لە كار و چالاكییەكانی حكوومەتی هەرێمی كوردستان و وەزارەتی تەندروستی دەكات كە بێ‌ جیاوازی خزمەتگوزاری بە هەموو لایەنێك دەگەیەنن و جەخت لەسەر ئەوەش دەكاتەوە كە هەرێمی كوردستان پێویستی بە هاوكاریی زیاترە و داوا له‌ حكوومەتی فیدراڵی عیراق ده‌كات هاوكاریی زیاتری ته‌ندروستى و پزیشكی پێشكەش بە هەرێمی كوردستان بكات.

لای خۆیەوە بەڕێز سەرۆك وەزیران سوپاسی ئەم سەردانەی بەڕێز بەڕێوەبەری گشتیى WHOی كرد و سوپاسی هەڵسەنگاندنی بەڕێزیان بۆ كار و چالاكییەكانی وەزارەتی تەندروستی و بەڕێوەبەرایەتیی گشتیی تەندروستیی پارێزگای دهۆك كرد، كە لە هەوڵی بەردەوامدان بۆ پێشكەشكردنی خزمەتگوزاریی تەندروستی و پزیشكی بۆ ئاوارە و پەنابەران لە كەمپەكانی سەرتاسەری پارێزگای دهۆك و بەردەوامیش ده‌یانه‌وێ بە شێوەیەكی ڕێكوپێك، هاوكارییەكانیان باشتر و زیاتر بكەن. هەروەها سوپاسی ڕێكخراوی WHOی كرد بۆ ئەو هاوكاری و هەماهەنگیەی لەگەڵ دەزگا پەیوەندیدارەكانی بواری تەندروستی و پزیشكی لە هەرێمی كوردستان هەیانە.

پێشنیوەڕۆی ئەمڕۆ چوارشەممە 2015/3/18 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێز لێڤۆن سارگسیان نوێنەری تایبەتی حكوومەتی ئەرمەنستان و بەڕێز كارین گرێگۆریان باڵیۆزی ئەو وڵاتە لە بەغدا كرد.

لە دیدارێكدا بەڕێز نوێنەری تایبەتی حكوومەتی ئەرمەنستان سڵاو و ڕێزی سەرۆك كۆمار و سەرۆك وەزیرانی وڵاتەكەی بە بەڕێز سەرۆك وەزیرانی هەرێمی كوردستانی ڕاگەیاند و تیشكی خستە سەر پەیوەندیی دێرینی نێوان هەردوو گەلی كورد و ئەرمەن و خاڵە هاوبەشەكانی نێوان هەردوو گەل كرد و ئامادەییی وڵاتەكەی بۆ دروستكردنی پەیوەندییەكی بەهێز و پتەو لە نێوان هەولێر و یەریڤاندا دەربڕی و بۆ ئەم مەبەستەش ئاماژەی بەوە كرد كە ئەوان ئامادەن كۆمسیۆنێكی هاوبەشی دۆستایەتی لە نێوان هەرێمی كوردستان و ئەرمەنستاندا دروست بكەن بە شێوەیەك كار لەسەر ژمارەیەك بابەتی وەك ڕۆشنبیری و بازرگانی و ئابووری و بوارەكانی دیكە لە نێوان هەردوولادا بكات.

شاندی میوان هەروەها ئەوەیان بە بەڕێز نێچیرڤان بارزانی ڕاگەیاند كە لە داهاتوویەكی نزیكدا كونسوڵخانەی ئەرمەنستان لە هەولێر دەكەنەوە و هەروەها هێڵی ئاسمانیی ئەرمەنستانیش لە نێوان هەولێر و یەریڤاندا دەست بە گەشتەكانی دەكات و ئاماژەیان بەوەش دا كە كەرتی تایبەتی ئەرمەنستان ئامادەیە لە هەرێمی كوردستان سەرمایەگوزاری بكات و بۆ ئەم مەبەستەش داوای هاوكاری و ئاسانكاری لە حكوومەتی هەرێمی كوردستان دەكەن.

لای خۆیەوە بەڕێز سەرۆك وەزیرانی هەرێمی كوردستان وێڕای بەخێرهێنانی شاندی میوان، سوپاس و پێزانینی خۆی بۆ سەرۆك كۆمار و سەرۆك وەزیرانی ئەرمەنستان دەربڕی و پێشوازی لە بڕیارەكەیان لە بارەی كردنەوەی كونسوڵخانەی وڵاتەكەیان لە هەولێر و دەستپێكردنی گەشتە ئاسمانییەكانی هێڵی ئاسمانیی ئەرمەنستان بۆ هەرێم كرد و پشتگیریی تەواوی خۆی بۆ دروستكردنی كۆمسیۆنی هاوبەشی دۆستایەتیی نێوان هەرێمی كوردستان و ئەرمەنستان دەربڕی و ئاماژەی بەوە كرد كە هەموو هاوكاری و كارئاسانییەك پێشكەش بەو كارسازان و سەرمایەدارانەی ئەرمەنستان دەكرێت كە دەخوازن وەبەرهێنان و سەرمایەگوزاری لە هەرێمی كوردستان بكەن و بۆ ئەم مەبەستەش ئەو كۆمسیۆنەی كە لە نێوان هەولێر و یەریڤاندا دروست دەكرێت، دەتوانێت ئەو بابەتانە بە شێوەیەكی ڕێكوپێك گفتوگۆ بكات و ئەو بوارانە دیاری بكات كە هەردوولا دەتوانن كاری لەسەر بكەن و حكوومەتی هەرێمیش ئامادەیە بەپێی یاساكانی سەرمایەگوزاری و وەبەرهێنان لە هەرێم، هاوكارییان بكات.

بەڕێز نێچیرڤان بارزانی لە بەشێكی دیكەی قسەكانیدا جەختی لەسەر بایەخی پەیوەندییە سیاسی، ئابووری، كۆمەڵایەتی و زانستییەكانی نێوان هەرێم و ئەرمەنستاندا كردەوە، بەتایبەتی لە بواری ئاڵوگۆڕی شاند و دابینكردنی كبۆرسی خوێندن بۆ قوتابیانی هەرێمی كوردستان لە زانكۆكانی ئەرمینیا، كە ئەمەش دەچێتە چورچێوەی دروستكرنی پەیوەندیی دوولایەنە لە نێوان هەولێر و یەریڤاندا.

نیوەڕۆی ئەمڕۆ پێنجشەممە 2015/3/19 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە شاندێكی پەرلەمانتارانی پەرلەمانی یەكێتیی ئەورووپا كرد.

لە دیدارێكدا بارودۆخی ئێستای هەرێمی كوردستان، پرسی ئاوارەكان، بەرەكانی شەڕی دژی تیرۆریستانی داعش و پەیوەندییەكانی نێوان هەولێر و بەغدا تاوتوێ كران و شاندی میوان دەستخۆشییان لە حكوومەتی هەرێمی كوردستان كرد كە سەرەڕای ئەوەی تووشی قەیرانی بێ بودجەیی هاتووە و بارێكی قورسی لەسەر شانە، ئەركێكی گەورە و پیرۆزی مرۆیی ئەنجام داوە بە حەواندنەوەی سەدان هەزار ئاوارە كە لە ترسی تیرۆر لە دەڤەرەكانی دیكەی عیراقەوە ڕوویان لە هەرێمی كوردستان كردووە و توانیویەتی تا ڕادەیەكی باش پێداویستییەكانیان دابین بكات.

شاندی پەرلەمانی یەكێتیی ئەورووپا هەروەها باسیان لە بەرەكانی شەڕی دژی تیرۆریستانی داعش كرد و ئاماژەیان بەوە كرد ناوی پێشمەرگە بووەتە وشەیەكی گرنگ و گەشاوە لە سەرتاسەری ئەورووپا و جیهاندا كە بە هەموو شێوەیەك بەرگری لە بنەماكانی ئازادی و مرۆڤایەتی دەكات و فیداكارییەكانی پێشمەرگەیان بەرز نرخاند و هیوایان خواست ئەو شەڕە لە ماوەیەكی كورتدا بە سەركەوتنی پێشمەرگە و هێزە ئازادیخوازەكان دژی تیرۆر و تۆقاندن، كۆتایی پێ بێت. هەر لە دیدارەكەدا باسیان لە پێدوایستییەكانی هەرێمی كوردستان لە ڕووی مرۆیی و سەربازی و ڕێككەوتنی نێوان هەولێر و بەغدا كرد.

لە لایەن خۆیەوە بەڕێز نێچیرڤان بارزانی سوپاس و پێزانینی خەڵك و حكوومەتی هەرێمی كوردستانی بۆ هەڵوێستە ئەرێنییەكانی یەكێتیی ئەورووپا لە بەرامبەر هەرێم بە شاندی میوان ڕاگەیاند و ئاماژەی بەوە كرد كە خەڵك و حكوومەتی هەرێمی كوردستان لە پێشكەشكردنی هاوكاری بۆ پەنابەران و ئاوارەكانی دەستی تیرۆر بەردەوام دەبن، بەڵام ئەوەی كە لە كۆمەڵگەی نێودەوڵەتی بۆ بەهاناوەچوون و هاوكاریكردنی ئاوارەكان چاوەڕوان دەكرا، وەك پێویست نەبووە، بە تایبەتی كە چاوەڕوان دەكرێت لەگەڵ دەستپێكردنی شەڕی ئازادكردنی مووسڵ لە دەست تیرۆریستان، ژمارەیەكی زۆرتری ئاوارە ڕوو لە هەرێمی كوردستان بكەن، بۆیە چاوەڕوانی ئەوە دەكەین كۆمەڵگەی نێودەوڵەتی بە شێوەیەكی گشتی و بە تایبەتی یەكێتیی ئەورووپا چ ڕاستەوخۆ یان بە ڕێگەی ئاژانسەكانی سەر بە نەتەوە یەكگرتووەكان و ڕێكخراوە ناحكوومییەكان، خۆیان بۆ هاوكاریی پێویست ئامادە بكەن.

لە بەشێكی دیكەی قسەكانیدا بەڕێز سەرۆك وەزیرانی هەرێمی كوردستان بە وردی تیشكی خستە سەر بەرەكانی شەڕی هێزی پێشمەرگە دژی تیرۆریستانی داعش و ئاماژەی بە سەركەوتن و پێشڕەوییە بەردەوامەكانی پێشمەرگە كرد. سەبارەت بە پەیوەندییەكانی نێوان هەرێمی كوردستان و بەغداش باسی لەوە كرد كە هەرێم پابەندی ئەو ڕێككەوتنەیە كە لەگەڵ بەغدا هەیەتی، بەڵام پێویستە لە چوارچێوەی یاسای بودجەی ساڵی 2015دا بەغداش ئەركەكانی خۆی بەرامبەر هەرێمی كوردستان جێبەجێ بكات.

ئاڵوگۆڕكردنی بیروڕا لەسەر چەند بابەتێكی دیكەی مایەی بایەخی هەردوولا، بەشێكی دیكەی دیدارەكە بوو.