ڕۆژی سێشەممە 15ـی 12ـی 2015 بەڕێز مەسعود بارزانی سەرۆكی هەرێمی كوردستان پێشوازی لە فاڵح فەیاز ڕاوێژكاری ئاساییشی نیشتیمانیی عێراق كرد.

لە دیدارەكەدا ڕاوێژكاری ئاساییشی نیشتیمانیی عێراق سڵاو و ڕێزی سەرۆك وەزیرانی عێراقی بە سەرۆك بارزانی گەیاند و خۆشحاڵیی خۆیشی دەربڕی كە بۆ جاری دووەمە كە لە نزیك بەرەكانی جەنگ لەگەڵ سەرۆك بارزانی كۆدەبێتەوە. هەروەها پیرۆزبایی سەركەوتنەكانی پێشمەرگە و ئازادكردنی شنگالیشی لە سەرۆك بارزانی كرد.

لەم كۆبوونەوەیەدا بارودۆخی سیاسی و ئەمنیی ناوچەكە و هەروەها پەیوەندیی نێوان دەوڵەتی عێراق و دراوسێكان و بابەتی هاتنی سوپاس توركیا بۆ نزیك موسڵ تاوتوێ كرا و جەخت لەوە كرایەوە كە پێویستە سەرجەم كێشەكانی نێوان عێراق و دراوسێكانی لەڕێگەی دیالۆگەوە چارەسەر بكرێت و هەوڵیش بدرێت پەیوەندیی نێوان عێراق و دراوسێكانی پەیوەندییەكی باش بێت.

لەبەشێكی دیكەی كۆبوونەوەكەدا باس لە دوا پەرەسەندنە مەیدانییەكانی شەڕی دژی تیرۆریستانی داعش و هەروەها سەركەوتنەكانی هێزی پێشمەرگەی كوردستان و هێزە عێراقییەكان لە بەرەكانی شەڕ و پلانی ئازادكردنی موسڵ و قۆناغی دوای شەڕی داعش كرا و ئەوە دووپاتكرایەوە كە پێویستە هەموو ناوچەكان لەژێر دەستی تیرۆریستان دەربهێندرێن و پێكهاتەكانی عێراقیش ڕۆڵیان لە ئاییندەی ناوچە ئازادكراوەكانی خۆیان هەبێت.

پەیوەندییەكانی نێوان هەرێم و بەغدا تەوەرێكی دیكەی دانیشتنەكە بوو و هەردوولا لەسەر ئەوە هاوڕا بوون كە دیالۆگ و دانیشتن بۆ چارەسەر كردنی كێشەكانی نێوان هەرێم و بەغدا بەردەوام بێت.

ڕۆژی چوارشەممە 16ـی 12ـی 2015 بەڕێز مەسعود بارزانی سەرۆكی هەرێمی كوردستان بە مەبەستی لەنزیكەوە ئاگاداربوون لە ڕەوشی خەڵكی شنگال و داواكارییەكانیان و ئاڵوگۆڕكردنی بیروبۆچوون لەبارەی ئاوەدانكردنەوە و قووڵتركردنی پێكەوەژیان و ئاییندەی شنگال لەگەڵ ژمارەیەك لە كەسایەتی و ڕیشسپی و پیاوماقووڵانی موسڵمانی دەڤەری شنگال كۆبۆیەوە.

لەم كۆبوونەوەیەدا سەرۆك بارزانی گوتەیەكی بۆ ئامادەبووان پێشكەشكرد و تێیدا باسی لە بایەخی سیاسی و نەتەوەیی و جیۆگرافی و كۆمەڵایەتیی شنگال بۆ گەلی كوردستان كرد كە بە درێژایی مێژوو نموونەی پێكەوەژیانی نەتەوەیی و ئایینیی پێكهاتە جیاوازەكان بووە و ئەوەیشی خستەڕوو كە پێویستە ئەو فەرهەنگەی پێكەوەژیان قووڵتر و دەوڵەمەندتر بكرێت لە دەڤەری شنگال و هەموو كوردستان و ڕێگە نەدرێت كە بە هیچ شێوەیەك زیان لە ئاسوودەیی خەڵك و فەرهەنگی پێكەوەژیانی كوردستانیان و خەڵكی شنگال بدرێت و لەم ڕووەشەوە ئەركی مامۆستایانی ئایینی و لایەنە سیاسییەكان و كەسایەتی و پیاماقوڵانی بە گرنگ و كاریگەر وەسف كرد.

سەرۆك بارزانی باسی لە وەحشیگەری و بێویژدانی تیرۆریستانی داعش كرد كە بە درێژایی مێژوو هیچ دوژمنێك وەك داعش تاوانی قێزەوەن و دژەمرۆیی لە بەرانبەر گەلی كوردستان ئەنجام نەداوە و ئەو تاوانانەی داعش لەدژی هەموو خەڵكی كوردستان بوون و برینی خوشك و برا ئێزیدییەكان برینی هەموو تاكێكی كوردە و ئەوەی بەرانبەر خوشك و برا ئێزیدییەكان كراوە بەرانبەر هەموو گەلی كوردستان كراوە و باسی ئەوەیشی كرد كە خوشك و برا ئێزییدییەكان دووجار و بەهۆی كوردبوون و بەهۆی ئایینەكەیشیان زوڵمیان لێكراوە و تاوانیان دەرهەق كراوە. هەروەها ئاماژەی بەوەدا كە داعش لەڕووی سەربازییەوە لەسەر دەستی پێشمەرگە تووشی شكست هاتووە بەڵام نابێ ڕێگە بدەین ئامانجەكانی داعش لە تێكدانی برایەتی و پێكەوەژیان بهێنەدی و دەست بەو فەرهەنگە دەوڵەمەندەی پێكەوەژیانە بگرین كە بەهۆیەوە پێگە و ناوبانگی گەلی كوردستان لە ئاستی جیهانیدا بەرز و شاییستەیە و جەختی لەوە كردەوە كە لەدەستدانی پێكەوەژیان بۆ گەلی ئێمە سەرەتایەك دەبێ بۆ نەمان و كارەسات. سەرۆك بارزانی لە درێژەی قسەكانیدا باسی لە پێویستیی ئاوەدانكردنەوەی شنگال و بایەخدان بە باری ئابووری و گوزەرانی خەڵكی ئەم دەڤەرە كرد و بۆ ئەم مەبەستەیش داوای كرد كە خەڵكی شنگال بە هەموو پێكهاتەكانیەوە لەگەڵ لایەنە پەیوەندیدارەكانی حكوومەتی هەرێم كار بۆ ئەوە بكەن كە شنگال بە باشترین شێوە ئاوەدان بكرێت و هەروەها كاریش بۆ ئەوە بكرێت كە لەڕووی ئیدارییەوە ناوچەی شنگال تایبەتمەندیی خۆی هەبێت و بكرێتە پارێزگا.

لە بەشێكی تری كۆبوونەوەكە بەشداربووانی سوپاسی سەرۆك بارزانیان كرد كە بەڵێنەكەی خۆی بەجێ گەیاند و دەڤەری شنگالی لەدەست تیرۆریستانی داعش ڕزگاركرد و ستاییشی قوربانیدانی هێزی پێشمەرگەیان كرد كە قارەمانانە بە خوێنی خۆیان چیای شنگال و شاری شنگالیان ڕزگار كرد و ئەو بەڵێنەیشیان بە سەرۆك بارزانیدا كە پارێزەری برایەتی و پێكەوەژیان بن لە ناوچەكەیان و ئەو پێكەوەژیانە دەوڵەمەندتر و قووڵتر بكەن. دواتر پرسیار و تێبینی و پێشنیارەكانی خۆیان لەمەڕ ئاییندەی شنگال و ئاوەدانكردنەوەی بۆ سەرۆك بارزانی خستەڕوو.

لە وەڵامی پرسیار و تێبینییەكانی ئامادەبووان سەرۆك بارزانی سوپاسی پابەندبوونی خەڵكی شنگالی كرد بە بنەماكانی برایەتی و پێكەوەژیان و ئەوەی دووپاتكردەوە كە هەموومان برا و كەسوكاری یەكترین و هیچ جیاوازییەكمان نییە و هەر كەس ئازادە تەعبیر لە بیروبۆچوون و دینداریی خۆی بكات بێ ئەوەی باوەڕی خۆی بەسەر كەسێكی تردا بسەپێنێت. سەرۆك بارزانی سوپاسی خەڵكی پارێزگای دهۆك و هەموو گەلی كوردستانی كرد كە مەردانە و برایانە لەم شەڕەدا هاتنە دەست و بە خوێن و بە قوربانیدان دوژمنیان شكاند و بە دڵفراوانی و هەستێكی نیشتیمانی و نەتەوەیی یارمەتیی ئاوارە و لێقەوماوانیان دا.

لە كۆتایی گوتەكەیدا سەرۆك بارزانی جەختی لەوە كردەوە كە پێویستە خەڵكی شنگال بڕیار لەسەر ژیان و دواڕۆژی خۆیان بدەن و هیوای خواست كە شنگال بۆ هەموو پێكهاتەكانی ببێتە نموونەی ئاوەدانی و بەختەوەریی هاووڵاتیان.

ڕۆژی پێنجشەممە 17ـی 12ـی 2015 لە شاری هەولێر بەڕێز مەسعود بارزانی سەرۆكی هەرێمی كوردستان پێشوازی لە ئاشتن كارتر وەزیری بەرگریی ئەمەریكا و شاندێكی یاوەری كرد كە پێكهاتبوو لە ژمارەیەك بەرپرس و ڕاوێژكاری وەزارەتی بەرگری و سوپای ئەمەریكا و باڵیۆزخانەی ئەم وڵاتە لە عێراق.

لە دیدارەكەدا وەزیری بەرگریی ئەمەریكا سەرسامیی خۆی بە بوێری و ئازایەتی هێزی پێشمەرگەی كوردستان دەربڕی لە ڕووبەڕووبوونەوەی تیرۆریستان و شكستدانیان و پێزانینی بۆ قوربانیندانی پێشمەرگە هەبوو و سەرەخۆشیشی لە سەرۆك بارزانی و كەسوكاری ئەو پێشمەرگانە كرد كە گیانی خۆیان بەخشیوە و شەهید بوونە. هەروەها ستاییشی سەركەوتنەكانی پێشمەرگەی لە بەرەكانی شەڕ كرد كە لە ئەنجامی هەماهەنگی و كاری هاوبەشی پێشمەرگە و هێزی هاوپەیمانان هاتووەتە دی. هەروەها باسی لەوەیش كرد كە هەرێمی كوردستان زۆر بە باشی توانیویەتی شەڕ بكات و بەرگری لەخۆی بكات و لە هەمانكاتیشدا خۆیشی بە باشی بەڕێوە ببات و ئەوەیش جێگەی سەرنجی هەموو لایەكە. داوایشی كرد هەموو لایەك سوود لە ئەزموونە گرانبەهاكانی هێزی پێشمەرگە وەربگرن لە شەڕی دژی تیرۆریستاندا. وەزیری بەرگریی ئەمەریكا وێڕای دووپاتكردنەوەی دۆستایەتیی و متمانەی نێوان هەرێمی كوردستان و وڵاتەكەی ئەوەیشی بە سەرۆك بارزانی ڕاگەیاند كە بۆ تۆكمەتركردنی لێكتێگەییشتن و هەماهەنگیی نێوان هەردوولا سەردانی هەولێری كردووە و وڵاتەكەی ڕەزامەندە لەو متمانە و هەماهەنگییەی كە لەنێوان سوپای ئەمەریكا و هێزی پێشمەرگەدا هەیە.

لەبەرانبەردا سەرۆك بارزانی بەخێرهاتنی وەزیری بەرگریی ئەمەریكای كرد و سوپاسی یەكە و تیمەكانی سوپای ئەمەریكایشی كرد كە هاوكار و یارمەتیدەری پێشمەرگە بوونە و پێزانینی بۆ ماندووبوون و پەرۆشیی ئەوان هەبوو و ئاستی هەماهەنگیی نێوان هێزی پێشمەرگە و سوپای ئەمەریكای لە شەڕی تیرۆریستان بە زۆر باش وەسف كرد. لەدرێژەی قسەكانیدا باسی لە بارودۆخی مەیدانیی بەرەكانی شەڕ كرد و جەختی لەوە كردەوە كە ئەولەویەتی گەلی كوردستان بەرگریكردنە لە خۆی و شەڕكردنە لەگەڵ تیرۆریستانی داعش و ئامادەیی هەرێمی كوردستانیشی نیشاندا بۆ هەموو جۆرە هەماهەنگی و هاوكارییەك لەگەڵ هەر لایەنێك كە شەڕی تیرۆریستان بكات. سەرۆك بارزانی باسی لە هەوڵی هەمەلایەنە كرد بۆ لەناوبردنی تیرۆر لە عێراق و جەختی لەوەیش كردەوە كە پێویستە هاوكات بیر لە چارەسەری بارودۆخی سیاسیی عێراقیش بكرێت. هەروەها ئەوەیشی بە وەزیری بەرگریی ئەمەریكا ڕاگەیاند كە هەرچەندە گەلی كوردستان لەژێر گوشاری شەڕ و قەیرانی ئابووری و بڕینی بوودجە دایە بەڵام خۆڕاگر بووە و خۆڕاگرییەكەیشی بۆ ئەوە دەگەڕێتەوە كە خاوەنی دۆزی ڕەوای خۆیەتی و لەپێناویدا تێدەكۆشێ و قوربانی دەدات.

هەر لەم كۆبوونەوەیەدا باسی بارودۆخی سیاسی و ئەمنی عێراق و سووریا و ناوچەكە بە گشتی و پلانی ئازادكردنی شاری موسڵ كرا و هەروەها چۆنییەتی بەرزكردنەوەی ئاستی هەماهەنگی و كاری هاوبەشی نێوان هێزە عێراقییەكان و هێزی پێشمەرگە و هێزی هاوپەیمانان تاوتوێ كرا.

جێگەی ئاماژەپێكردنە لەم كۆبوونەوەیەدا جێگری سەرۆك وەزیرانی حكوومەتی هەرێم و ڕاوێژكاری ئەنجوومەنی ئاساییشی هەرێم و وەزیری ناوخۆ و پێشمەرگە بە وەكالەت و سەرۆكی دیوانی سەرۆكایەتیی هەرێم و بەرپرسی فەرمانگەی پەیوەندییەكانی هەرێم و بریكاری وەزارەتی پێشمەرگە و جەعفەر شێخ مستەفا و فەریق شێروان عەبدولرەحمان و فەریق جەبار یاوەر ئەندامانی فەرماندەیی گشتیی هێزەكانی پاراستنی هەرێم و نوێنەری حكوومەتی هەرێمی كوردستان لە ئەمەریكا ئامادە بوون.

بە ناوی خوای مەزن و دلۆڤان

خۆشحاڵم كە ئەمساڵ لەکاتێکدا جەژنی ڕۆژووی خوشك و برایانی ئێزیدی پیرۆز دەکەین کە پێشمەرگە قارەمانەکانی کوردستان، ئازادکردنەوەی شنگالیان وەک دیاری پێشكەشی خوشك و برایانی ئێزیدی و گەلی کوردستان کردووە. ئازادکردنەوەی شنگال شیاوترین پیرۆزباییە بۆ خوشک و برایانی ئێزدی لە کوردستان و سەراسەری دنیا و ساڕێژی برینی ئێمە و ئەو ئازیزانەیە.

پەیامم بۆ خوشک و برایانی ئێزدی و هەموو پێکهاتەکانی شنگال ئەوەیە کە ناوچەکەیان بە درێژایی مێژوو نموونەی پێكەوەژیانی نەتەوەیی و ئایینیی پێكهاتە جیاوازەكان بووە و پێویستە ئەو فەرهەنگەی پێكەوەژیان قووڵتر و دەوڵەمەندتر بكرێت لە دەڤەری شنگال و هەموو كوردستان و ڕێگە نەدرێت كە بە هیچ شێوەیەك زیان بە ئاسوودەیی خەڵك و فەرهەنگی پێكەوەژیانی كوردستانیان و خەڵكی شنگال بگەیەندرێت. هەروەها هیوادارم هەموو پێكهاتەكانی شنگال لەگەڵ لایەنە پەیوەندیدارەكانی حكوومەتی هەرێم كار بۆ ئەوە بكەن كە شنگال بە باشترین شێوە ئاوەدان بكرێت و هەروەها كاریش بۆ ئەوە بكرێت كە لەڕووی ئیدارییەوە ناوچەی شنگال تایبەتمەندیی خۆی هەبێت و بكرێتە پارێزگا.

لێرەوە خوشک و برایانی ئێزدی دڵنیا دەکەینەوە کە خەڵکی کوردستان پشتوپەنای ئێوەن و هیچ هێزێک ناتوانێت ئێوە لە گەلەکەمان داببڕێت و هەموو توانامان بۆ دابینکردنی ئایندەیەکی گەش بۆ ئێوەی خۆشەویست شان بە شانی گەلەی کوردستان، دەخەیەنە گەڕ.

هیوادارم ئه‌م جه‌ژنه‌ ببێته‌ مایه‌ی خێر و خۆشیی زیاتر بۆ خوشک و برایانی کوردی ئێزدی و ساڵ لەدوای ساڵ لە سایەی کوردستانێکی ئارام و ئازاددا و به‌خێروخۆشی و كامه‌رانی جەژنەکانیان پیرۆز بکەن.

مسعود بارزانی

سەرۆكی هەرێمی كوردستان

17ـی 12ـی 2015

بەناوی خودای مەزن و دلۆڤان

هاووڵاتیانی خۆشەویستی كوردستان

خۆڕاگریی گەلەكەمان و دلێری و قارەمانێتی پێشمەرگەكانمان لە هەموو قۆناغ و ڕۆژە سەختەكاندا بووەتە هۆی ئەوەی گەلی كوردستان هەمیشە بە سەربەرزی بمێنێتەوە. دوای ئەو كارەسات و ئەو شەڕە زاڵمانەی لە لایەنە تیرۆریستانی دوژمنی ئەخلاق و مرۆڤایەتی بەسەر گەلی كوردستاندا سەپێندرا هێزی پێشمەرگەی كوردستان بە خوێن و گیانفیدایی خۆی ئەفسانەی داعشی شكاند و بووە هۆی سەرسامیی جیهان، لە سایەی قوربانیدانی پێشمەرگە ئێستا هەموو مرۆڤایەتی بەچاوی ڕێز و ستاییشەوە سەیری گەلی كوردستان دەكات.

لە چەند ڕۆژی ڕابردوو پێشمەرگە لە چەندین داستانی بێوێنەدا دوایین هەوڵی تیرۆریستانیان بۆ پەڵاماردانی خاكی كوردستان تێك شكاند و زیانێكی زۆر گەوەرەیان لە دوژمن دا. لە شەڕێكی بیست و چوار سەعاتیدا داعش هەوڵیدا بە فراوانترین شێوە و بە باشترین هێز و چەك و تەقەمەنی و ژمارەیەكی زۆر ئۆتۆمبێلی بۆمبڕێژكراو پەلاماری پێشمەرگە بدات. ئەو هێرشەی تیرۆریستان بە گەورەترین هێرشیان هەژمار دەكرێت و ماوەی یەك مانگ خۆیان بۆ ئامادە كردبوو بەڵام پێشمەرگە قارەمانانە لەسەرجەم میحوەرەكان داعشیان تێكشكاند. دەستخۆشییان لێ دەكەم و بەرخودان و ئازایەتیان مایەی شانازین، هەروەها سوپاسی گەلی خۆڕاگری كوردستان دەكەم كە پشتیوانی پێشمەرگەن و ڕۆڵەی ئەوها ئازا و چاونەترس و نیشتیمانپەروەرەیان پێگەیاندووە بۆ بەرگریكردن لە خاك و نیشتیمان. سوپاسی پشتگیری و پاڵپشتیی ئاسمانیی هێزی هاوپەیمانانیش دەكەم كە لە شەڕەكاندا پشتیوانی هێزی پێشمەرگەی كوردستان بوون.

تیرۆریستان ویستیان لە ڕۆژی ئاڵای كوردستاندا پەلاماری كوردستان بدەن و ئاڵای كوردستان لە سەر لانەی شێران دابگرن بەڵام خەیاڵی تیرۆریستان و دوژمنان خاوە و ئاڵاكەمان لەسایەی خودای گەورە و قارەمانێتی پێشمەرگە و هیمەتی گەلەكەمان هەرگیز نەوی نابێ و بە بەرزی دەمێنێتەوە.

زۆر خەمبارم بە لەدەستدانی پۆڵێك پێشمەرگەی قارەمان، شەهیدبوونیان خەسارەتێكی گەورە بوو بۆ هەموومان. هەر پێشمەرگەیەك كە گیانی پاكی دەبەخشێ و شەهید دەبێ برینێك دەخاتە دڵی من، بەڵام باوەڕێكی تەواوم هەیە كە خوێنی پاكی شەهیدە سەربەرزەكانمان گەلی كوردستان بەرەو ڕۆژی سەركەوتن دەبات، هەروەها پابەندبوونمان بەرانبەر خاك و نیشتیمان و دواڕۆژی گەلی كوردستان زیاتر دەكات. گیانی شەهیدەكانمان هەوێنی سەربەرزی و سەركەوتنی گەلی كوردستانە. مەردایەتی و فیداكاریی ئەو ئازیزانە هەموومان مكوڕتر دەكات كە دەستبەرداری دۆزی ڕەوای گەلەكەمان نەبین و ئێرادەی گەلی كوردستان بۆ ڕووبەڕووبوونەوەی دوژمن و گەییشتن بە سەركەوتنی یەكجارەكی بەهێزتر دەكات.

سڵاو لە گیانی پاكی شەهیدان و هیوای چاكبوونەوە بۆ برینداران دەخوازم.

مسعود بارزانی

سەرۆكی هەرێمی كوردستان

19ـی 12ـی 2015

ڕۆژی شەممە 19ـی 12ـی 2015 بەڕێز مەسعود بارزانی سەرۆكی هەرێمی كوردستان بە مەبەستی لەنزیكەوە ئاگاداربوون لە ڕەوشی بەرەكانی شەڕ و بارودۆخی پێشمەرگە، سەردانی سەنگەرەكانی پێشمەرگە لە بەرەكانی شەڕ لە میحوەری باشیك كرد و لە نزیكەوە چاوی بە فەرماندە و پێشمەرگەكانی هەر سێ میحوەری خازر و باشیك و ناوەران كەوت.

لەو سەردانەدا سەرۆك بارزانی وتەیەكی بۆ فەرماندە و پێشمەرگەكانی هەر سێ میحوەری باشیك و خازر و ناوەران پێشكەش كرد و تێیدا دەستخۆشی لە قارەمانێتی و سەركەوتنەكانی هێزی پێشمەرگە لەو سێ میحوەرە كرد و سەرەخۆشیشی لە كەسوكاری ئەو پێشمەرگانە كرد كە لە شەڕی دژی تیرۆریستاندا گیانی خۆیان بەخت كردووە و شەهید بوونە و هیوای چاكبوونەوەیشی بۆ برینداران خواست.

سەرۆك بارزانی لە درێژەی قسەكانیدا باسی لە پەلاماری چەند ڕۆژ پێشی تیرۆریستانی داعش كرد بۆ ئەو سێ میحوەرە و ڕایگەیاند كە زیاتر لە مانگێكە تیرۆریستان خۆیان بۆ ئەم پەلامارە ئامادە كردووە و پەلامارێكی گەوەرەیان بۆ سەر سەنگەرەكانی پێشمەرگە ئەنجام دا بەڵام شكستێكی گەورەیشیان خواست. سەرۆك بارزانی باسی لە قوربانیدانی پێشمەرگە كرد و جەختی لەوە كردەوە كە پاراستنی وڵات پێویستی بە قوربانیدانە و كوردستان بۆیە بە نرخە چونكە خوێن و قوربانی لەپێناویدا دراوە و مادام كوردستانیش خاوەنی پێشمەرگەیە هەر سەر دەكەوێت و ئەوەیشی خستەڕوو كە جیهانیان بەچاوی ڕێز و ستاییشەوە سەیری قوربانیدانی گەلی كوردستان و هێزی پێشمەرگە دەكەن و پێشمەرگە جێگەی شانازیی كوردستان و دۆستانی كوردستانە. سەرۆك بارزانی ئاماژەی بە شەڕەكانی ئەم دواییەی هێزی پێشمەرگە و تیرۆریستان دا و ڕایگەیاند كە ئەو شەڕانە وانەیەكی نوێ بوون بۆ خۆڕاگریی هەموومان و پێویستە خاڵە لاوازەكانمان نەهێڵین و خاڵە بەهێزەكانمان پتەوتر بكەین.

هەر لەم سەردانەدا سەرۆك بارزانی لەگەڵ فەرماندەی و ئەفسەر و پلەدارەكانی هەر سێ میحوەری باشیك و خازر و ناوەران كۆبوویەوە و گوێی لە ڕا و بۆچوون و تێبینییەكانی ئەوان گرت لەمەڕ بارودۆخی مەیدانیی بەرەكانی شەڕ و پێداویستییەكانی پێشمەرگە و هەروەها ئەو پلان و ئامادەكارییە سەربازییانە تاوتوێ كران كە بۆ داهاتووی ئەو میحوەرانە لە ئارادان. لەم كۆبوونەوەیەدا سەرۆك بارزانی ڕێنوێنی و ئامۆژگاریی پێویستی بۆ فەرماندەكانی پێشمەرگە خستەڕوو.

بۆ بینینی وتەكەی سەرۆك بارزانی ئێرە دابگرە

ڕۆژی دووشەممە 21ـی 12ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە ئەحمەد بن محەمەد ئەلجەروان سەرۆكی پارلەمانی عەرەبی و شاندێكی یاوەری كرد.

لە دیدارەكەدا سەرۆكی پارلەمانی عەرەبی سەرەخۆشیی خۆی ئاراستەی سەرۆك بارزانی و كەسوكاری ئەو پێشمەرگانە كرد كە لە شەڕی تیرۆریستاندا گیانی خۆیان بەخشیوە و شەهید بوونە و پیرۆزبایی سەركەوتنە مەزنەكانی هێزی پێشمەرگەی كوردستانیشی لە سەرۆك بارزانی كرد لە شەڕی تیرۆریستانی داعش و ستاییشی ڕۆڵ و قارەمانێتی و خەباتی گەلی كوردستانی كرد لە پاراستنی مرۆڤایەتیدا. هەروەها پێزانینیشی بۆ گەلی كوردستان و حكوومەتی هەرێم هەبوو كە سەدانهەزار ئاوارەیان حەواندووەتەوە و بوونەتە پەناگەی لێقەوماوان و هاتنی خەڵك بۆ هەرێم لەبەر كەرامەت و مەزنیی و دڵفراوانیی خەڵكی كوردستانە.

سەرۆكی پارلەمانی عەرەبی و شاندی یاوەری جەختیان لە پاڵپشتیی خۆیان بۆ مافە ڕەواكانی گەلی كورد كردەوە و ڕایانگەیاند كە جیهان دەبێ پشتیوانی گەلی كوردستان بێت و وەك پارلەمانی عەرەبی ئامادەیی خۆیان نیشاندا كە هەوڵەكانیان بخەنەگەڕ بۆ یارمەتیدانی هەرێمی كوردستان.

لەبەرانبەردا سەرۆك بارزانی بەخێرهاتنی شاندی میوانی كرد و سوپاسی هەڵوێستی ئەوانی كرد و هەروەها دەستخۆشی لەو وڵاتانە كرد كە یارمەتییان پێشكەشی ئاوارەكان كردووە و ئاماژەی بە ڕۆڵی ڕێكخراوەكانی ئیماراتی یەكگرتووی عەرەبی دا كە لە كاتی تەنگانە و سەختدا یارمەتیی حكوومەتی هەرێمیان داوە بۆ هاوكاریكردنی پەنابەر و ئاوارەكان. سەرۆك بارزانی لەدرێژەی قسەكانیدا باسی لە وەحشیگەریی تیرۆریستان و هەروەها بارودۆخی بەرەكانی شەڕ كرد و پەیوەست بە ئاوارەكانیش سەرۆك بارزانی جەختی لەوە كردەوە كە چارەسەری بنەڕەتیی ئاوارەكان ئەوەیە كە ناوچەكانیان ئازاد بكرێت و بگەڕێنەوە شوێنەكانی خۆیان و یارمەتی بدرێن.

بە بۆنەی کۆچی دوایی هونەرمەندی ناسراوی کوردستان، حاجی مەکی عەبدوڵڵا، بەڕێز مەسعود بارزانی سەرۆکی هەرێمی کوردستان پەیامێکی هاوخەمیی ئاراستەی خانەوادەی ئەو هونەرمەندە و سەرجەم هونەرمەندانی کوردستان کرد، کە ئەمە دەقەکەیەتی:

بەناوی خوای گەورە و میهرەبان

خانەوادەی بەڕێزی هونەرمەندی کۆچکردوو حاجی مەکی عەبدوڵڵا

بەداخەوە هەواڵی کۆچی دوایی هونەرمەندی نیشتیمانپەروەر و ناسراوی کوردستان کاکە حاجی مەکی عەبدوڵڵامان پێگەیشت.خۆم بە هاوبەشی خەمتان دەزانم و پرسە و سەرخۆشیی ئاراستەی خانەوادە بەڕێزەکەتان و سەرجەم هونەرمەندانی کوردستان و خزم و کەسوکارتان دەکەم.

کاک حاجی مەکی وەک هونەرمەندێکی نیشتیمانپەروەر هەموو تەمەنی خۆی بۆ خزمەتکردنی هونەری کوردستان تەرخان کرد و هونەری نمایشی کردە ڕێگایەک بۆ پێشاندانی مەینەتی و ئازارەکانی خۆی و گەلەکەی و بەرهەمێکی زۆری پێشکەشی گەلەکەمان کرد و جێ دەستی دیارە و کۆچی دواییشی کەلێنێکی گەورەیە. هیوادارم هاوڕێ و هاوکارانی لەسەر ڕێبازی نیشتیمانپەروەرانەی ئەو هونەرمەندە بەردەوام بن.

لە خوای گەورە داواکارم گیانی کاک حاجی مەکی بخاتە بەر دلۆڤانیی خۆی و ئارامی و دڵنەواییش بە هەموولایەک ببخەشێت.

انا للە وانا الیە راجعون

مسعود بارزانی
سەرۆکی هەرێمی کوردستان
١٩ـی١٢ـی٢٠١٥