ڕۆژی دووشەممە 11ـی 1ـی 2016 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە شاندێكی وەزارەتی بەرگریی كۆماری چیك بە سەرۆكایەتی جاكوب لاندۆڤێسكی جێگری وەزیری بەرگریی كۆماری چیك بۆ كاروباری سیاسی و ستراتیژی كرد.

لە دیدارەكەدا جێگری وەزیری بەرگریی كۆماری چیك خۆشحاڵیی خۆی بۆ سەركەوتنەكانی گەلی كوردستان لە شەڕی تیرۆریستان نیشاندا كە بە ئازایەتی و قوربانیدانی پێشمەرگە هاتووەتە دی و ڕایگەیاند كە وڵاتەكەی بەردەوام دەبێت لە پێشكەشكردنی هاوكاری سەربازی بۆ پێشمەرگە و هەروەها مەشق و ڕاهێنانی پێشمەرگە بۆ شەڕی تیرۆریستان و بە شەڕێكی پیرۆزی وەسف كرد و وڵاتەكەیشی بە هاوبەشی گەلی كوردستان لەم شەڕە لە قەڵەم دا. جێگری وەزیری بەرگریی كۆماری چیك وێڕای ئاماژەدان بە هەڕەشەی تیرۆریستان لەسەر ئاساییشی جیهان ئەوە خستەڕوو كە هێزی پێشمەرگە بە قارەمانێتی و ئازایەتیی خۆی ڕێگەی لەوە گرت كە تیرۆریستان پلانەكانیان بۆ داگیركردنی بەشێكی زۆری جیهان پیادە بكەن.

لەبەرانبەردا سەرۆك بارزانی سوپاسی گەل و حكوومەتی كۆماری چیكی كرد كە پشتیوانی گەلی كوردستان و هێزی پێشمەرگەن و پێشوازیشی لە فراوانتربوونی پەیوەندییەكانی هەردوولا كرد لە بوارە جیاجیاكاندا. لە درێژەی قسەكانیدا سەرۆك بارزانی باسی هۆكارەكانی دەركەوتنی توندڕۆیی و تیرۆر كرد و بوونی ململانێی تاییفی بە هۆكارێكی سەرەكیی گەشەی تیرۆریستان لەقەڵەم دا و ئەوەیشی بۆ شاندی میوان ڕوون كردەوە كە گەلی كوردستان خاوەنی فەرهەنگی پێكەوەژیان و لێبوردەییە و هیچ كاتێك نابێتە بەشێك لە ململانێی تاییفی.

هەر لەم دیدارەدا ڕێگەكانی ڕووبەڕووبوونەوەی تیرۆر و بەرپەرچدانەوەی تیرۆریستان لە ئاستی ناوچەیی و جیهانی تاوتوێ كرا و هەردوولا لەسەر ئەوە هاوڕا بوون كە پێویستە لەتەك شەڕی سەربازیی، شەڕی ئایدیۆلۆژی و ئابووریی تیرۆریستان بكرێت.

بارودۆخی سیاسی عێراق و ناوچەكە و پێداویستییە سەربازییەكانی هێزی پێشمەرگەی كوردستان و بەرزكردنەوەی ئاستی پەیوەندییەكانی هەردوولا تەوەرێكی دیكەی ئەو كۆبوونەوەیە بوو.

ڕۆژی یەكشەممە 3ـی 1ـی 2016 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە ڕیچارد چارنێسكی جێگری سەرۆكی پارلەمانی ئەوروپا كرد.

لە دیدارەكەدا جێگری سەرۆكی پارلەمانی ئەوروپا خۆشحاڵیی خۆی لە ڕەخساندنی دیدارەكە دەربڕی بۆ ئەوەی چاوی بە سەرۆك بارزانی بكەوێت و لە نزیكەوە ئاگاداری بارودۆخی سیاسی ناوچەكە و كوردستان بێت. هەروەها ستاییشی سەرۆك بارزانی و گەلی كوردستانی كرد بەهۆی ئەو پێشكەوتنەی كە لە بیست ساڵی ڕابردوودا لە كوردستان هاتووەتە ئاراوە و كوردستانی بە توخمێكی كاریگەر لە قەڵەمدا لە سەقامگیریی ناوچەكە و ڕایگەیاند كە بە بێ كوردستان چارەسەری ئاشتیانە لە ناوچەكەدا بەدی ناهێت. لە درێژەی قسەكانیدا ئەوەی خستەڕوو كە زۆر پێویستە ئەوروپا و جیهان ئاگاداری ڕاستییەكان و ڕۆڵی كوردستان بن لە سەقامگیریی و ئاشتی لە ناوچەكە و پشتگیریی خۆیشی نیشاندا بۆ فراوانكردنی هەوڵەكانی وڵاتانی ئەوروپی بۆ پشتیوانیكردنی كوردستان لەڕووی ئابووری و مرۆڤییەوە. جێگری سەرۆكی پارلەمانی ئەوروپا وێڕای ئەوەی پێزانینی بۆ كولتووری پێكەوەژیانی گەلی كوردستان هەبوو، دەستخۆشی لە سەرۆك بارزانی و هێزی پێشمەرگەی كوردستان كرد لە ڕووبەڕووبوونەوەی تیرۆریستان و هەروەها پاڵپشتیكردن و پاراستنی مەسیحی و پێكهاتەكانی تر لە هەڕەشەكان و هەروەها پەنادانیان.

لەبەرانبەردا سەرۆك بارزانی سوپاسی هەڵوێستی جێگری سەرۆكی پارلەمانی ئەوروپای كرد و باسیی لە ئازار و خەبات و قوربانیدانی گەلی كوردستان كرد لە ماوەی سەد ساڵی ڕابردوو لەپێناو ئازادی و پاراستنی ناسنامە و ئەوەی خستەڕوو كە لە سەرەتای سەدەی پێشوودا بە بێ وەرگرتنی ڕای گەلی كوردستان واقعێكی تاڵ و پڕ لە زوڵم و ئینكار بەسەر گەلەكەماندا سەپێندرا بەڵام گەلی كوردستان لەبەرانبەر ئەو واقعە خۆی بەدەستەوە نەدا و خۆی پاراست و ئێستایش گەلی كوردستان بەشێوازی ئاشتیانە و دیالۆگ بەرەو مسۆگەركردنی مافە ڕەواكانی هەنگاو دەنێ.

لەبەشێكی دیكەی قسەكانیدا سەرۆك بارزانی باسی لە دڕندەیی و وەحشیگەری تیرۆریستانی داعش و مەترسیان لەسەر كۆی مرۆڤایەتی كرد و هێمای بەوەدا كە بە شانازییەوە پێشمەرگە توانی داعش لە كوردستان تێكبشكێنێت و پاراستنی خوشك و برا مەسیحییەكان و پێكهاتە ئایینی و نەتەوەییەكانی تری بە ئەركێكی مرۆڤی و نیشتیمانی گەلی كوردستان وەسف كرد.. هەروەها ئاماژەی بە تێچوونی مادی و مرۆڤی شەڕ و میوانداری ئاوارەكان و گرفتە ئابوورییەكانی هەرێمی كوردستان دا و داوای كرد كە وڵاتانی ئەوروپایی لە یارمەتیدانی ئاوارەكان هاوكاریی كوردستان بكەن.

ئەمڕۆ دووشەممە ٤ـی١ـی٢٠١٦، لە سەلاحەدین، بەڕێز مەسعود بارزانی سەرۆکی هەرێمی کوردستان پێشوازیی لە بەڕیز یاسین عەوەز ئیسماعیل کونسوڵی گشتیی وڵاتی سودان له ‌هه‌رێمی کوردستان کرد.

لە دیدارێكدا کونسوڵی سودان سڵاو و ڕێزی سەرۆک و گەلی سودانی بە سەرۆک بارزانی ڕاگەیاند و خۆشحاڵیی خۆی بە دیدارەکە نیشان دا و سەرسامیی خۆی بە پێشکەوتنەکانی هەرێمی کوردستان خستەڕوو، هەروەها سوپاس و پێزانینی وڵاتەکەی بۆ سەرۆک بارزانی و حکوومەتی هەرێمی کوردستان ڕاگەیاند بۆ هاوکاریی و هەماهەنگییان لەگەڵ کونوسوڵگەریی سودان و ئامادەیی وڵاتەکەشی بۆ پەرەپێدانی زیاتری پەیوەندییەکانی لەگەڵ هەرێمی کوردستان دەربڕی.

کونسوڵی سودان پێزانینی خۆی بۆ ڕۆڵی قارەمانانەی پێشمەرگە لە شکاندنی تیرۆریستان نیشان دا و ئاماژەی بەوە کرد کە هەرێمی کوردستان سەرباری شەڕ و ڕەوشی خراپی ئابووری باوەشی بۆ نزیکەی دوو ملیۆن ئاوارە و پەنابەر کردۆتەوە و نموونەیەکی زۆر درەوشاوەی پێشکەشی مرۆڤایەتی کردووە و مێژوو ئەو سەروەرییە تۆمار دەکات. هیواشی خواست هەرچی زووتر کێشە ئابوورییەکانی هەرێم چارەسەر ببن و کوردستان لە پێشکەوتن بەردەوام بێت.

کونسوڵی گشتیی سودان هەروەها ئەوەشی باس کرد کە لەو ڕووداو و گۆڕانکارییانەی کە لە ناوچەکە هەن ڕۆڵی سەرکردایەتیی سەرۆک بارزانی زۆر گرینگ و بەرچاوە و هەرێمی کوردستان بایەخێکی زۆری هەیە، بۆیە وڵاتەکەی دەیەوێ لە هەموو ئاستەکاندا پەیوەندییەکانی لەگەڵ هەرێی کوردستان پەرە پێ بدات و ئامادەی هەرجۆرە هاوکاری و هەماهەنگییەشن، بەتایبەتی لە بواری کشتوکاڵدا دەتوانن هاوکاریی هەرێمی کوردستان بکەن.

لە بەرانبەردا سەرۆک بارزانی وێڕای بەخێرهێنانیان، هیوای سەرکەوتنی بۆ کونسوڵی سودان خواست و خۆشحاڵی خۆی بۆ بەرەوپێشچوونی ئاستی پەیوەندییەكانی نێوان هەردوولا پێشان دا و ئەزموونی سودانی بۆ چارەسەرکردنی کێشە ناوخۆییەکانی وڵات بەرز نرخاند.

سەرۆک بارزانی ئاماژەی بە ڕەوشی بەرەکانی بەرەوڕووبوونەوەی تیرۆریستان کرد و ئاماژەی بەوە کرد کە پێشمەرگە لەگەڵ دڕندەترین دوژمن لە شەڕدایە و زۆر ئازایانە توانیویەتی ئەفسانەی داعش تێکبشکێنێت. تەئکیدیشی کردەوە کە گەلی کوردستان تا پێشتر چەندین قەیران و کێشەی گەورەی تێپەڕاندووە و بە دڵنیاییەوە لەم شەڕ و قەیرانەش بە سەربەرزی دەردەچێت.

هەر لەم دیدارەدا لەبارەی بارودۆخی سیاسی و ئەمنیی عێراق و ناوچەكە و هەڕەشەی تیرۆریستان بۆ سەر ئاساییشی ناوچەكە و جیهان و دوایین پەرەسەندنە سیاسییەكان، گفتوگۆ کرا.

ڕۆژی دووشەممە 4ـی 1ـی 2016 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە خاتوو ئەلێساندرا دی پیپۆ كونسوڵی نوێی ئیتالیا لە هەولێر كرد.

لە دیدارەكەدا كە كارمێلۆ فیكاڕا كۆنسوڵی پێشووی ئیتالیا لە هەولێر ئامادە بوو، كونسوڵی نوێی ئیتالیا كە بە مەبەستی خۆناساندن سەردانی سەرۆك بارزانی كردبوو خۆشحاڵیی خۆی بە دیداری لەگەڵ سەرۆك بارزانی و دەستپێكردنی ئەرك و كاری لە هەرێمی كوردستان نیشان دا. باسیشی لەوە كرد كە كوردستان بۆ گەل و حكوومەتی ئیتالیا بایەخێكی تایبەتی هەیە و هەموو هەوڵێك دەدا بۆ ئەوەی ئاستی پەیوەندییەكانی نێوان وڵاتەكەی و هەرێمی كوردستان باشتر بكات و بەرەو پێشەوەی ببات. هەر لەم دیدارەدا كونسوڵی پێشووی ئیتالیا لە هەولێر ڕایگەیاند كە گەل و حكوومەتی ئیتالیا بە تەواوی ئاگاداری هەوڵەكانی سەرۆك بارزانی و خەڵكی كوردستانن بۆ تێپەڕاندنی تەحەدیات و هەڕەشەكان و ستایشی كولتووری پێكەوەژیان و ژیانی دیموكراسی و پاراستنی پێكهاتەكان و یارمەتیدانی ئاوارە و لێقەوماوان دەكەن. هەروەها باسی لە ماوەی كاركردن و ئەزموونی خۆی كرد لە هەرێمی كوردستان و ناسینی سەرۆك بارزانی بە شەرەفێكی گەورە لە قەڵەم دا.

لەبەرانبەردا سەرۆك بارزانی هیوای سەركەوتنی بۆ كونسوڵی نوێ و پێشووی ئیتالیا خواست و سوپاسی گەل و حكوومەتی ئیتالیای كرد كە لە ڕۆژانی تەنگانەدا پاڵپشتی گەلی كوردستان بوون و سەردانی بەرپرسە باڵاكانی ئیتالیا هەر لە دەستپێكی شەڕی تیرۆریستان هەتا ئێستا ئاماژەیەكی ڕوونە بۆ دۆستایەتی نێوان هەر دوو گەلی كوردستان و ئیتالیا و گەلی كوردستان هەڵوێستی وڵاتی ئیتالیا لە پشتیوانیكردنی پێشمەرگە و كوردستان لەبیر ناكات. هەروەها هیوای خواست كە پەیوەندییەكانی نێوان هەرێمی كوردستان و ئیتالیا لە هەموو بوارەكاندا بەرەوپێشڤەچوونی زیاتر بەخۆیەوە ببینێت.

ڕۆژی چوارشەممە 30ـی 12ـی 2015 بەڕێز مەسعوود بارزانی سەرۆکی هەرێمی کوردستان و حەیدەر عەبادی سەرۆکوەزیرانی عێراق، لە پەیوەندییەكی تەلەفۆنیدا بارودۆخی مەیدانیی شەڕ و دوا پەرەسەندنە سەربازییەكانیان لەدژی تیرۆریستانی داعش تاوتوێ کرد.

هەر لەو پەیوەندییە تەلەفۆنییەدا، سەرۆک بارزانی و سەرۆکوەزیرانی عێراق حەیدەر عەبادی، ئازادکردنی ڕومادی و ناوچەکانی دیکەیان خستە بەر باسەوە؛ هاوکات سەرۆک بارزانی پیرۆزبایی لە حەیدەر عەبادی کرد بە بۆنەی ئازادكردنی شاری ڕومادی و ئەو سەرکەوتنەی کە هێزەکانی عێراق لە ڕومادییان بەدەستیان هێناوە و شارەکەیان لە دەست تیرۆریستان ئازاد کرد.

هەروەها سەرۆکی هەرێمی کوردستان و سەرۆکوەزیرانی عێراق، باسیان لە بەردەوامی هاوکاری و هەماهەنگیی نێوان هێزەکانی پێشمەرگە و هێزەکانی عێراق کرد لە شەری دژی تیرۆردا، ئەوەیش دووپات کراویەوە کە، گوشاری سەربازی لە هەموو بەرەکان لەسەر تیرۆریستان بەردەوام بێت بۆ ئازادکردنی ناوچەکان و شکستدان و لەناوبردنی تیرۆریستان.

بەناوی خودای بەخشندە و میهرەبان

خوشك و برایانی خۆشەویست

بەبۆنەی ساڵی نوێی زایینی پیرۆزبایی لە گەلی كوردستان و هەموو جیهانیان دەكەم. هیوادارم ساڵی 2016 ببێتە ساڵی نەمانی شەڕ و تیرۆر و بەدیهاتنی ئاشتی و خۆشگوزەرانی لە كوردستان و هەموو شوێنێكی جیهاندا.

لە ساڵی 2015ـدا پێشمەرگە بۆ پاراستنی گەلی كوردستان بەهەموو پێكهاتە نەتەوەیی و ئاینییەكانییەوە قوربانی و خوێنێكی زۆریدا و، لەپێناو پاراستنی بەها مرۆڤایەتییەكان و ژیانی مەدەنی لە جیهاندا لەبەرامبەر گەورەترین هەڕەشەی سەردەمەدا فیداكارییەكی كەموێنەی نواند. هەروەها ساڵی شكستدان و وەستاندنی داعش و ساڵی سەركەوتنە مەزنەكانیش بوو، لە هەمانكاتدا ساڵێكی پڕ لە قوربانیدان و سەختیی گوزەران بوو بۆ گەلی كوردستان. بەهۆی بەردەوامبوونی بڕینی بودجەی هەرێمی كوردستان لەلایەن حكومەتی عێراق و دابەزینی نرخی نەوت و زۆریی خەرجییەكانی شەڕی بەرەنگاربوونەوەی تیرۆر و میوانداریی ملیۆنێك و هەشت سەد هەزار ئاوارە و پەنابەر، ئەمانە هەموویان گوزەرانی خەڵكی كوردستانیان زۆر سەختكردووە.

بەڵام كوردستان خاوەن گەلێكی بەهێز و زیندووە و دەتوانێ بە باشترین شێوە سوود لە سامانەكانی وەربگرێ. بۆیە دڵنیام ئایندەیەكی زۆر گەش چاوەڕێی دەكات. لەگەڵ ئەوەیشدا تێپەڕاندنی ئەو بارودۆخەی ئێستا، تەحەمولێكی زیاتری دەوێت و لێرەدا بە پێویستی دەزانم سوپاسی بێ پایانی گەلی كوردستان بكەم بۆ خۆڕاگری و هەڵوێستی بەرپرسانەیان. هەروەها كوردستان پێویستی بە یارمەتیی وڵاتانی دۆست و هاوپەیمانە بۆ ئەوەی گەلی كوردستان و هەموو جیهان لەشەڕی تیرۆردا سەركەون، بۆیە داوا لە هەموو ئەو دەوڵەتانە دەكەم یارمەتی پێشمەرگە و گەلی كوردستان بدەن.

هاونیشتیمانیانی خۆشەویست

لەپێناو چارەسەركردنی ئەو گرفتانەی لە پڕۆسەی سیاسیی هەرێمدا هاتوونەتە پێش، لە دەستپێكی ساڵی تازەدا لەگەڵ حزبەكانی بەشدار لە حكوومەت و پارلەمان و لەپێناو بەرژەوەندیی گەلی كوردستان هەموو هەوڵێك دەدەم بۆ ئەوەی گرفتەكان نەمێنن و كەموكوڕی و كێشەكان دووبارە نەبنەوە و، پارلەمان و حكوومەت لەسەر بنەمایەكی تازە دەستبەكار ببنەوە. سەبارەت بە بابەتی سەرۆكایەتیی هەرێمیش جارێكی تر داوا لە هەموو حزبە مۆڵەتپێدراوەكانی هەرێمی كوردستان دەكەم كە لەگەڵ یەكتردا كۆببنەوە و كۆتایی بەم بابەتە بهێنن. یان بڕیار لەسەر سازدانی هەڵبژاردنی سەرۆك بدەن، یان لەسەر دەستنیشانكردنی بەڕێزێك ڕێكبكەون كە هەتا هەڵبژاردنەكانی ساڵی 2017 ئەركی سەرۆكایەتیكردنی هەرێم بگرێتە ئەستۆ و منیش بەهەموو توانایەك پاڵپشتیی دەكەم، یانیش بڕیار لەسەر ئەوە بدەن تاوەكو هەڵبژاردنەكانی 2017 بارودۆخەكە بەوشێوەیەی ئێستا بمێنێتەوە، ئەوەیش لەبەر شەڕ و ئەو دۆخە تایبەتەی كە كوردستان پێیدا تێدەپەڕێت. داوایش دەكەم كۆتایی بە ئیستغلالكردنی بابەتی سەرۆكایەتی بهێندرێت و چیتر بۆ ماندووكردنی خەڵك و قووڵتركردنی كێشەكان بەكار نەهێندرێت. ئەوەی بەلای منەوە گرنگ و پیرۆزە پێشمەرگایەتییە و ئەگەر لە هەر پۆست و پلە و پایەیەكدا بم هەموو هەوڵێكم دەخەمە گەڕ بۆ پاراستنی كوردستان و لە شەڕی داعش و كاركردن بۆ سەربەخۆیی وڵاتەكەم بەردەوام دەبم.

لە دۆخی ئێستادا ئەوە لە هەموومان دەخوازرێت لەجیاتی ڕكابەری و دژایەتی سیاسی، هەوڵی باشكردنی ژیانی خەڵكی كوردستان بدەین و سوود لە دەرفەتەكانی ئێستا وەربگرین، بەتایبەتی كە ناوچەكە لە گۆڕانكاری بەردەوامدایە و گەلی كوردستان ئێستا لە هەموو كات زیاتر داوای یەكڕیزیمان لێدەكات.

هەر بەم بۆنەیەوە داوا لە حكومەتی هەرێمی كوردستان دەكەم پلانی سەركەوتووانە دابنێت بۆ تێپەڕاندنی هەموو سەختییەكان و چاكسازییەكی بنەڕەتی ئەنجام بدات. دڵنیام گەلی كوردستان دەتوانێت بەسەر سەختییەكانی ئێستا و داهاتوو زاڵ ببێت و بەرەو ژیانێكی خۆشتر هەنگاو دەنێت. هاووڵاتیانی خۆشەویست لەوە دڵنیا دەكەمەوە كە ئاوەدانی و بووژانەوەی كوردستان دەستپێدەكاتەوە و كار بۆ ژێرخانێكی ئابووریی پتەو دەكرێت.

لێرەدا سەری ڕێز لەبەردەم یاد و ڕۆحی پاكی شەهیدانی پێشمەرگە دادەنەوێنم و ستاییشی تەحەممولی بریندارەكان دەكەم و هیوای چاكبوونەوەیان بۆ دەخوازم. سوپاسی ڕۆڵە خۆبەخشەكان دەكەم كە لە شەڕەكاندا قارەمانانە شانبەشانی هێزی پێشمەرگە لە سەنگەری بەرگری لە كوردستانن. سوپاسی گەلی كوردستان دەكەم كە لەم شەڕە دژوارەدا پشتیوانی هێزی پێشمەرگە بوون و هەروەها بە پێویستیشی دەزانم سوپاسی وڵاتانی دۆست و هاوپەیمان بكەم كە لە شەڕی دژی تیرۆریستاندا پاڵپشتی پێشمەرگە بوون.

هیوادارم ساڵی 2016 ساڵی كۆتایهاتنی كێشە و قەیرانەكان و ساڵی سەركەوتنی گەلەكەمان بێت. ئومێد دەكەم لە ساڵی داهاتوودا ئاشتی و سەقامگیری باڵ بەسەر ناوچەكەماندا بكێشێت و كۆتایی بە هزری شەڕانگێزی تیرۆر و توندڕۆیی و ئینكار بێت و بەختەوەری و ئاسوودەیی بۆ هەموو مرۆڤایەتی بێتەدی.

ئێوارەی ڕۆژی پێنجشەممە 31ـی 12ـی 2015 بەڕێز مەسعود بارزانی سەرۆكی هەرێمی كوردستان لە پەیامێكدا ئیدانەی كردەوە تیرۆریستییەكانی شاری قامیشلوی كرد و سەرەخۆشیشی لە كەسوكاری قوربانیانی ئەو كردەوانە كرد. ئەمەی خوارەوە دەقی پەیامەكەی سەرۆك بارزانیە:

بەناوی خودای مەزن و دلۆڤان

بە داخێكی زۆرەوە جارێكی تر خوشك و براكانمان لە ڕۆژئاوای كوردستان بوونە قوربانیی دەستی تاوانباری تیرۆریستان و، ئێوارەی ڕۆژی چوارشەممە 30ـی 12ـی 2015 لە شاری قامیشلو، لە ئەنجامی چەند كردەوەیەكی تیرۆریستیدا ژمارەیەك هاووڵاتیی بێ تاوانی ئەم شارە شەهید و بریندار بوون. وێڕای ئەوەی زۆر بە توندی ئیدانەی ئەو كردەوە قێزەوەن و ترسنۆكانەی تیرۆریستان دەكەم سەرەخۆشی لە گەلی كوردستان لە ڕۆژئاوا و كەسوكاری شەهیدانی ئەم كردەوانە دەكەم و هاوبەشی خەمیانم و هیوای چاكبوونەوەیش بۆ برینداران دەخوازم. خوشك و براكانمان لە شاری قامیشلو و ڕۆژئاوای كوردستان لەوە دڵنیا دەكەینەوە كە لە هەموو دۆخێكدا پاڵپشتیان دەكەین و ئێستایش هەرێمی كوردستان و دەزگە پەیوەندیدارەكانی ئامادەن بۆ پێشوازیكردن و یارمەتیدان و هاوكاریكردنی بریندران و لێقەوماوانی كردەوە تیرۆریستییەكانی شاری قامیشلو.

تیرۆریستان و دوژمنانی مرۆڤایەتی دەبێ باش بزانن ئەنجامدانی كردەوەی قێزەوەن و ترسنۆكانەی لەم چەشنە ئیرادەی گەلەكەمان بۆ خۆڕاگری و ڕووبەڕووبوونەوە و شكستدانی تیرۆریستان بەهێزتر دەكات و دەبێ تیرۆریستان باجی هەموو تاوانەكانیان بدەن و چارەنووسیان و شكست و لەناوچوونە.

نازم دەباغ" نوێنەری حکوومەتی ھەرێمی کوردستان لە تاران لەگەڵ مامۆستا"سه‌لاحه‌الدین به‌هائه‌دین" ئەمینداری گشتی پێشووی یەکگرتووی ئیسلامی کوردستان دیداریی کرد.

مامۆستا"سه‌لاحه‌الدین به‌هائه‌دین" ئەمینداری گشتی پێشووی یەکگرتووی ئیسلامی کوردستان که‌ لە لایەن کۆماری ئیسلامی ئێرانەوە بۆ بەشداریکردن لە کۆنفرانسی "وه‌حده‌ت" لە تاران بانگهێشت کرابوو، کاتژمێر ١١ی سەر لە بەیانی ئەمرۆ چوارشەمە (٣٠/١٢/٢٠١٥) سەردانی نوێنەرایەتی حکوومەتی هەرێمی کوردستان لە شاری تارانی کرد و لە لایەن "نازم عومەر دەباغ"نوێنەری حکوومەتی ھەرێمی کوردستان لە وڵاتی ئێران، "هیوا ڕه‌سوڵ ره‌شید" و هه‌روه‌ها "ئەمجەد بابەحاجی" کارمەندانی نوێنەرایەتی حکوومەتی ھەرێمی کوردستان پێشوازیی گەرمیان لێکرا.

لەم دانیشتنەدا باس لە بارودۆخی هەرێمی کوردستان بە تایبەتی و بارودۆخی عێراق و ئێران به گشتی کرا.

گرینگیی پەیوەندییەکانی هەرێمی کوردستان لەگەڵ کۆماری ئیسلامی ئێران تەوەرێکی دیکەی دانیشتنەکە بوو.