كاروان جمال جێگری بەرپرسی فەرمانگە پێشوازی كرد لە خاتوو یورون تاكسدال سكرتێری یەكەم لە باڵیۆزخانەی شانشینی نەرویجی لە عەممان

سەرەتای دیدارەكە شاندی میوان مەبەستی سەردانەكەیان دەربری بۆ لە نزیكەوە ئاگاداربوون لە بارودۆخی سیاسی ناوچەكە وە ئاگاداربوون لە بارودۆخی ئاوارەكان و پێداویستسەكان بە مەبەستی كۆكردنەوەی داتاو زانیاری دروست و هاوكاری كردنی زیاتی ئاوارەكانی نیشتەجێی هەرێمی كوردستان هەروەك ئاماژەی بەوە كرد كە لەو ماوەیە بەردەوام سەردانی هەولێرو ناوچەكە دەكەن بۆ باشتر رایی كردنی كارەكانیان.

لە بەرامبەردا بەرێز جێگری بەرپرسی فەرمانگە بەخێرهاتنی شاندی ناوبراوی كرد بۆ هەرێمی كوردستان و دەستخۆشی لە هاوكاریەكانی شانشینی نەرویج كرد بۆ هەرێمی كوردستان وە ئاماژەی بەوەكرد كە هەرێمی كوردستان پێویستی بە هاوكاری و پشگیری نێودەوڵەتی زیاتر هەیە بە بۆ روبەروبونەوەی قەیرانەكان لەوانە قەیرانی ئاوارەكان و بەهاناوەچونیان لە بوارە جیاوازەكان ، وە داوای كرد كە هەوڵ بدرێت یارمەتیەكانیان زیاتر بكرێت بۆ ئاوارەكان بەتایبەتی ناردنی یارمەتیەكان بەشێوەیەكی راستەوخۆ كە كاریگەری زیاتر دەبێت هاوكات وەرزی زستان كاریگەری لەسەر ژیان و گوزەرانی ئاوارەكان دروست كردووە و حكومەتی هەرێم پێویستی بە دروست كردنی كەمپی خێرا هەیە بۆ بەهاناوەچون و نیشتەجێ‌ كردنی ئاوارەكان.

لە بەشێكی تری دیدارەكە جێگری بەرپرسی فەرمانگە داوای كرد كە بەپێویستی دەزانن كە شانشینی نەرویج نوێنەرایەتی خۆی لە هەرێمی كوردستان بكاتەوە بەمەبەستی باشتر ڕاپەراندنی كارەكانیان لە هەرێم

تەوەرێكی تری دیكەی دیدارەكەدا باس لە هاوكاریە سەربازیەكانی نەرویج كرا بۆ هەرێمی كوردستان و عێراق بەگشتی لە ناردنی ڕاوێژكاری سەربازی بەمەبەستی مەشق پێدانی پێشمەرگەو سوپای عێراق كە ئێستا ژمارەیەكیان لە هەرێم بەغدا مەشق بە هێزەكانی پێشمەرگەو سوپای عێراق دەكەن
 

پێشنیوه‌ڕۆى ئه‌مڕۆ دووشه‌ممه ‌17ى نۆڤه‌مبه‌رى 2014, ئه‌نجومه‌نى ئابووریى هه‌رێمى كوردستان، به‌ سه‌رۆكایه‌تیى به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان و سه‌رۆكى ئه‌نجومه‌نه‌كه‌، كۆبووه‌وه‌.

له‌ كۆبوونه‌وه‌كه‌دا پێداچوونه‌وه‌ به‌ شێوازى هاورده‌ و هه‌نارده‌كردن له‌ خاڵه‌ سنوورییه‌كان، گومركه‌كان و یه‌كخستنى تاریفه‌كانى و به‌رزكردنه‌وه‌ى ئاستى كارمه‌ند و كادیرانى داموده‌زگانى‌ ئه‌و بواره‌دا كرا، هه‌روه‌ها جه‌خت له‌ هه‌ماهه‌نگیى زیاتر له‌گه‌ڵ به‌غدا كرایه‌وه‌، به‌ تایبه‌تى كه‌ عیراق ئه‌ندامى كۆمه‌ڵێك ڕێكخراوى نێوده‌وڵه‌تیى تایبه‌ت به‌و بواره‌یه‌ و به‌رده‌وام كۆرس و خولى تایبه‌ت به‌و بوارانه‌ بۆ كارمه‌ندانى ده‌كاته‌وه‌ و ده‌كرێ هه‌رێمى كوردستانیش سوودیان لێوه‌ربگرێت.

كۆبوونه‌وه‌كه‌ له‌ فراونكردنى ده‌روازه‌ سنوورییه‌كان و به‌تایبه‌تیش ده‌روازه‌ى سنووریى ئیبراهیم خه‌لیلى  كۆڵییه‌وه‌ بۆ فراوانبوونى بازرگانى و دامه‌زراندنى سیسته‌مێكى ئه‌لكترۆنى بۆ پێدانى مۆڵه‌تى هه‌نارده‌ و هاوره‌كردن و پێكه‌وه‌به‌ستنى هه‌موو خاڵه‌ سنوورییه‌كان له‌ ڕێگه‌ى ئه‌م سیسته‌مه‌ ئه‌لكترۆنییه‌وه‌.

له‌ به‌شێكى دیكه‌ى كۆبوونه‌وه‌كه‌دا دوایین هه‌نگاوه‌كانى دامه‌زراندنى بۆرسه‌ى هه‌ولێر، یان "بازاڕى هه‌ولێر بۆ كاغه‌زه‌ داراییه‌كان" خرایه‌ به‌ر باس و دواى پێداچوونه‌وه‌ به‌ پرۆژه‌ و پێشنیاره‌كاندا، داوا كرا لایه‌نى په‌یوه‌ندار پشت به‌ پسپۆڕانى بیانیى ئه‌و بواره‌ ببه‌ستێت بۆ پێداچوونه‌وه‌ به‌ په‌یكه‌رى كارگێڕى و كاره‌كانى ئه‌م پرۆژه‌یه‌ به‌ شێوه‌یه‌ك كه‌ له‌گه‌ڵ سه‌رده‌م و پێوه‌ره‌ جیهانییه‌كان و واقعى ئه‌مڕۆى كوردستاندا بگونجێت.

بەناوی خوای گەورە و میهرەبانه‌وه‌

هەواڵی كۆچی دواییی د.كەمال فوئاد، خەمگینی كردین، بەو بۆنه‌یەوە سەرەخۆشی لە یەكێتیی نیشتمانیی كوردستان و بنەماڵەی خوالێخۆشبوو دەكەین.

خوالێخۆشبوو د.كەمال فوئاد، جگە لەوەی یەكێك بوو لە ئەندامانی دەستەی دامەزرێنەری یەكێتیی نیشتمانیی كوردستان و یەكێك بوو لە سەركردە خەباتكارەكانی یەكێتی، لە هەمان كاتدا لە دوای ڕاپەڕین لە پۆستە ئیدارییەكاندا و هەروەها وەك سەرۆكی پەرلەمانی كوردستانیش لە خولی گواستنەوەدا، ڕۆڵێكی دیاری لە چەسپاندنی ئاشتی و تەباییدا هەبوو. هەروەها د.كەمال فوئاد، لە بواری ڕۆشنبیریشدا خزمەتێكی زۆری ڕووناكبیری و مێژووی ڕۆژنامەگەریی كوردی كردووە، كە شاری خۆشەویستی سلێمانی و كوردستان بەگشتی، بەڕێزەوە ئەو خزمەتانەی بەبیر دێنێتەوە.

بۆ كۆچی دواییی د.كەمال فوئاد، هیواى بەهەشت بۆ خوالێخۆشبوو و، دڵنەوایی بۆ هەڤاڵان و كەسوكاری لە خوای مەزن دەخوازین.

نێچیرڤان بارزانی

سەرۆك وەزیرانی هه‌رێمى كوردستان.

2014/11/16

مەنسوور جیهانی ـ کورتە فیلمی کوردی "ماڵ و کلیل" لە دەرهێنانی سینەماکاری کورد "شوان عەتووف" خەڵاتی باشترین فیلمی نێودەوڵەتیی نۆیەمین خولی فیستیڤاڵی نێودەوڵەتیی فیلمی "ئاریکا ناتیوا" لە وڵاتی چیلی بەدەستهێنا.

ڕاگەیەنراوی فەرمی کۆمپانیای "ئای لۆف فیلم" لە باشووری کوردستان و وڵاتی بەریتانیا ڕایدەگەیەنێت کە کورتە فیلمی چیرۆکی "ماڵ و کلیل" Home & Key لە نووسین و دەرهێنانی سینەماکاری کورد "شوان عەتووف" و بەرهەمی بەڕێوەبەرایەتی هونەری سینەمای سلێمانی لە نوێترین بەشداری نێونەتەوەیی خۆیدا لە بەشی پێشبڕکێی نێودەوڵەتیی نۆیەمین خولی فیستیڤاڵی نێودەوڵەتیی فیلمی "ئاریکا ناتیوا" Arica Nativa لە وڵاتی چیلی نمایشکرا و توانی خەڵاتی باشترین فیلمی ئەم فیستیڤاڵە بەدەستبێنێت.

"ماڵ و کلیل" بۆ بەدەستهێنانی ئەم خەڵاتە گرینگە لەگەڵ کۆمەڵێک فیلم لە وڵاتانی ئیسپانیا، ڕووسیا، ئەمەریکا، مەکزیک، ئەڕژانتین، ڤێنزۆئێلا و چەندین وڵاتی دیکە لە ڕکابەریدا بوو. 

ئەم فیستیڤاڵە بە بەشداری کورتە فیلمەکانی چیرۆکی، ئەنیمەیشنی و دیکۆمێنتاری لە سینەماکارانی وڵاتانی جۆراوجۆری جیهان لە چەندین بەشی پێشبڕکێی لە ڕۆژانی 9 تا 19ی تەشرینی یەکەم / ئۆکتۆبەری 2014 لە وڵاتی چیلی بەڕێوەچوو.

ئەم کورتە فیلمە کوردییە تا ئێستا لە چەندین فیستیڤاڵی نێودەوڵەتیی فیلم لە ئاستی جیهاندا بەشداری کردووە و خەڵاتی باشترین فیلم لە لایەن ئەندامانی لێژنەی دادوەران و هەروەها خەڵاتی باشترین فیلمی لە لایەن بینەرانی بەشی پێشبڕکێی سەرەکی کورتە فیلمەکانی فیستیڤاڵی نێودەوڵەتیی فیلمی "فۆئێنکالینتێ رۆرال" لە وڵاتی ئیسپانیا و هەروەها خەڵاتی باشترین فیلم لە لایەن ئەندامانی لێژنەی دادوەرانی بەشی پێشبڕکێی سەرەکی کورتە فیلمی "بەهرە نوێیەکان" لە 26ـەمین خولی فیستیڤاڵی نێودەوڵەتیی فیلمی "گیرۆنا" لە وڵاتی ئیسپانیای بەدەستهێناوە.

"ماڵ و کلیل" هەروەها لە بەشی پێشبڕکێی سەرەکی 14ـەمین خولی فیستیڤاڵی نێودەوڵەتیی فیلمی ماڵی هونەریی ڤیدیۆیی "ئۆاهم" لە شاری مەدرید لە ئیسپانیا، لە بەشی پێشبڕکێی سەرەکی فیستیڤاڵی نێودەوڵەتیی فیلمی "ئێست" لە شاری لەندەن لە وڵاتی بەریتانیا، لە بەشی پێشبڕکێی سەرەکی فیستیڤاڵی نێودەوڵەتیی فیلمی "کراتکۆفیل پلووس" لە شاری بانجالۆکا لە بۆسنی و هێرزێگۆڤین، لە بەشی پێشبڕکێی سەرەکی فیستیڤاڵی نێودەوڵەتیی فیلمی "ئاندگراوند"ی لە شاری مۆنیخ لە وڵاتی ئەڵمانیا، لە فیستیڤاڵی نێودەوڵەتیی فیلمی "ئۆکسێ" لە شاری هامبوورگ لە وڵاتی ئەڵمانیا، لە بەشی پێشبڕکێی سەرەکی فیستیڤاڵی نێودەوڵەتیی فیلمی "شوناس" لە شاری باڕشلۆنە لە وڵاتی ئیسپانیا، لە فیستیڤاڵی فیلمی "هال ئۆف لایت" لە وڵاتی کۆلۆمبیا، لە فیستیڤاڵی نێودەوڵەتیی فیلمی "ڤیمبڵدۆن" و لە فیستیڤاڵی نێودەوڵەتیی فیلمی "شۆرتە بیلۆ" لە وڵاتی بەریتانیا، لە فیستیڤاڵی نێودەوڵەتیی فیلمی "فینە کۆرتییە" لە وڵاتی ئیتاڵیا، لە فیستیڤاڵە نێودەوڵەتییەکان فیلمی"ئیڤام ئام"، "کوترا کۆرتینی" و "ماربیلا پێرلا یدنستات" لە وڵاتی ئیسپانیا، و هەروەها چەندین فیستیڤاڵی دیکە چۆتە سەر پەردەی سینەماکان.

ئەم کورتە فیلمە 15 خولەکییە هەروەها لە ڕۆژانی 19 تا 22ی تەشرینی دووەم / نۆڤەمبەری 2014 لە بەشی پێشبڕکێی سەرەکی فیستیڤاڵی نێودەوڵەتیی کورتە فیلمی "ئۆ کورت" O Curt لە شاری ناپۆلی لە وڵاتی ئیتاڵیا نمایش دەکرێت.

مەنسوور جیهانی ـ فیلمی سینەمایی کوردی "بیرەوەرییەکانی سەر بەرد" لە دەرهێنانی سینەماکاری کورد "شەوکەت ئەمین کورکی" خەڵاتی مرواریی ڕەشی باشترین فیلمی جیهانی عەڕەبی بەشی پێشبڕکێی سەرەکی هەشتەمین خولی فیستیڤاڵی نێودەوڵەتیی فیلمی ئەبووزەبی لە بەدەستهێنا و ئەم خەڵاتەی پێشکەش کرد بە یادەوەری منداڵانی شەهید و قوربانی شەڕ دژی گرووپی تیرۆریستی داعیش.

فیلمی سینەمایی "بیرەوەرییەکانی سەر بەرد" Memories On Stone نوێترین بەرهەمی "شەوکەت ئەمین کورکی"، بە نوێنەرایەتیی لە هەرێمی کوردستان و بە ئامادەبوونی ئەم سینەماکارە کوردە، "مەمەد ئەکتاش" بەرهەمهێنەر و سیناریۆنووسی کورد و هەروەها "ئەیووب ڕەمەزان" بەڕێوەبەری گشتیی ڕۆشنبیری و هونەری پارێزگای دهۆک، لە چوارەمین بەشداری نێودەوڵەتیی خۆیدا لە دوو سانسی جیاوازدا لە بەشی پێشبڕکێی سەرەکی هەشتەمین خولی فیستیڤاڵی نێودەوڵەتیی فیلمی ئەبووزەبی لە وڵاتی ئیماڕات چووە سەر پەردەی سینەماکان و توانی خەڵاتی مرواریی ڕەش بۆ باشترین فیلمی جیهانی عەڕەبی بەشی پێشبڕکێی سەرەکی ئەم فیستیڤاڵە بەدەستبێنێت.

"شەوکەت ئەمین" دوای وەرگرتنی خەڵاتی مرواریی ڕەشی فیستیڤاڵی نێودەوڵەتیی فیلمی ئەبووزەبی لە وتووێژ لەگەڵ دەزگاکانی ڕاگەیاندنی عەڕەبییدا ئەم خەڵاتەی پێشکەش کرد بە یادەوەری شەهیدان و قوربانیانی شەڕ دژی گرووپی تیرۆریستی داعیش و بە تایبەت منداڵانی شەهید و قوربانی ئەم کارەساتە و هەروەها خۆڕاگریی خەڵکی کوردستان بەرانبەر بە داعیش.

ئەندامانی لێژنەی دادوەرانی بەشی پێشبڕکێی سەرەکی هەشتەمین خولی فیستیڤاڵی نێودەوڵەتیی فیلمی ئەبووزەبی، کە بریتی بوون لە: ئەکتەری ناوداری هیندستانی "عیرفان خان" ـ سەرۆکی لێژنەی دادوەران، "وکینی لریدج" ـ نووسەر لە ئەلجەزایر، "ئێستیون شاینبێرگ" ـ بەرهەمهێنەر و دەرهێنەر لە بەریتانیا، "کیت شۆرتلەند" ـ نووسەر و دەرهێنەر لە ئوستوڕاڵیا و "عەلی سولەیمان" ـ ئەکتەر لە فەلەستین، دوای بینین و هەڵسەنگاندنیی 18 فیلمی ئەم بەشەی فیستیڤاڵ، خەڵاتی تەندیسی مرواریی ڕەشیان بە براوەکانی بەشە جۆراوجۆرەکانی ئەم فیستیڤاڵە پێشکەش کرد، لەوانە: باشترین فیلمی نێودەوڵەتیی، باشترین دەرهێنانی نێودەوڵەتی، باشترین فیلمی جیهانی عەڕەب، باشترین دەرهێنانی جیهانی عەڕەب، باشترین ئەکتەری ڕۆڵی یەکەمی پیاو، باشترین ئەکتەری ڕۆڵی یەکەمی ئافرەت و هەروەها خەڵاتی تایبەتی ئەندامانی لێژنەی دادوەران.

هەروەها لە بەشێکی دیکەی ڕێوڕەسمی کۆتایی هەشتەمین خولی فیستیڤاڵی نێودەوڵەتیی فیلمی ئەبووزەبیدا، ئەندامانی لێژنەی دادوەرانی بەشی پێشبڕکێی "ئاسۆی نوێی"، بەشی پێشبڕکێی "فیلمە بڵیندە دیکۆمێنتارییەکان" و بەشی تازە دامەزراویی "چاودێری لە منداڵان"، خەڵاتی تەندیسی مرواریی ڕەشیان بە براوەکانی بەشە جۆراوجۆرەکانی ئەم فیستیڤاڵە پێشکەش کرد.

لە بەشێکی دیکەی ئەم ڕێوڕەسمەشدا، خەڵاتی "نێتپەک"، خەڵاتی فیدڕاسیۆنی نێودەوڵەتیی ڕەخنەگرانی فیلم واتە "فیپڕشی" و هەروەها خەڵاتی "باشترین فیلم لە ڕوانینی بینەرانەوە" بە براوەکانی ئەم بەشانە پێشکەش کرا.  

هەشتەمین خولی فیستیڤاڵی نێودەوڵەتی فیلمی ئەبووزەبی بە نمایشی 197 فیلم لە سینەماکارانی 61 وڵاتی جۆراوجۆری جیهان لە چەندین بەشی پێشبڕکێی و دەرەوەی پێشبڕکێی، لەوانە: بەشی "پێشبڕکێی سەرەکیی"، بەشی پێشبڕکێی "ئاسۆی نوێی"، بەشی پێشبڕکێی "فیلمە بڵیندە دیکۆمێنتارییەکان"، بەشی "نمایشی سینەمای جیهان"، بەشی پێشبڕکێی "کورتە فیلمە چیرۆکی و دیکۆمێنتارییەکان"، بەشی پێشبڕکێی "فیلمە ئیماڕاتییەکان"، بەشی پێشبڕکێی "چاودێری لە منداڵان"، بەشی "نمایشی تایبەتی کۆمەڵە فیلمەکانی سینەماکاری ناوداری سینەمای جیهان فڕانسوا تڕۆفۆ"، بەشی "نماشی فیلمە کلاسیکییەکان"، "چەندین کۆبوونەوەی پسپۆڕانە سەبارەت بە هونەری سینەما" و هەروەها "کۆڕی ڕخنە و هەڵسەنگاندیی فیلمەکان" لە ڕۆژانی 23ی تەشرینی یەکەم / ئۆکتۆبەر تا 1ی تەشرینی دووەم / نۆڤەمبەری 2014 لە هۆڵی گەورەی کۆشکی ئیمارات و هەروەها ناوەندی سینەمایی "مارینا ماڵ" لە شاری ئەبووزەبی لە وڵاتی ئیماڕات یەکگرتووی عەڕەبی بەڕێوەچوو.

فیلمی سینەمایی "بیرەوەرییەکانی سەر بەرد" لە دوایین بەشداری نێونەتەوەیی خۆیدا لە سەرەتای مانگی تەشرینی یەکەم / ئۆکتۆبەری 2014 لە بەشی دەرەوەی پێشبڕکێی بە ناونیشانی "پەنجەرەیەک بەرەو سینەمای ئاسیا" لە میانەی نۆزدەیەمین فیستیڤاڵی نێودەوڵەتیی فیلمی پووسان لە وڵاتی کۆریای باشوور نمایشکرا.

بەرپرسی پەیوەندیەكانی دەرەوە چاوی كەوت بە بارۆنێس ئێما نیكلسن نێردەی تایبەتی سەرۆك وەزیرانی بەریتانیا بۆ كاروباری بازرگانی و سەرۆكی دامەزراوەی ئەمماری خێرخوازی نێودەوڵەتی.

لەسەرەتایی دیدارەكەدا باس لە بارودۆخی ئەمڕۆیی هەرێمی كوردستان  و ناوچەكە و ئاوارە ناوخۆیی و پەنابەران كرا و تیشك خرایە سەر پەیوەندیەكانی نێوان هەرێمی كوردستان و بەغدا و كارە تیرۆریستیەكانی ڕێكخراوی داعش كە بەرامبەر خەلكی سیڤیل ئەنجامی دەدەن.

هەروەها ئاماژەكرا بە هەوڵەكانی حكومەتی هەرێم لە ڕووی بایەخ دان بە پێشكەشكردنی خزمەتگوزاری و دابین كردنی پێداویستیەكانی ئاوارەكان و كاركردن لەگەڵ نەتەوە یەكگرتووەكان و ڕێكخراوە نێودەوڵەتیەكان.

لە دیدارەكەدا بارۆنێس ئێما نیكلسن باسی لە چالاكیەكانی دامەزراوەكەیان كرد لە هەرێمی كوردستان كە كاردەكەن لەسەر هاوكاری كردنی  ئاوارەكانی ناوخۆ كە ڕوویان لە هەرێم كردووە بە تایبەتی لە بوارەكانی تەندروستی و خوێندن. بۆ ئەم مەبەستەش ئێستا لە قۆناغی كۆتایی دروستكردنی سەنتەرێكی تەندروستین لە كەمپی خانكێ‌ لە شاری دهۆك و جگە لەو كارانەی كە لە ناوچەكانی تری خوارووی عێراق ئەنجامیانداوە و نیازی ئەنجامدانی بەرنامەی خوێندنی خێران بۆ ئاوارەكان و هەوڵدەدەن سوود لەو مامۆستایانە وەربگرن كە دانیشتووی كەمپەكانن كە ئەمەش دەبێتە ڕەخساندنی دەرفەتی كار و پێشكەشكردنی خزمەتگوزاری بە ئاوارەكان. هەروەها هەوڵدەدەن كە ژمارەیەك كەل و پەلی زستانە بۆ ئاوارەكان دابین كردووە.

بەجینۆساید ناساندنی تاوانەكانی دژ بە كوردانی ئێزیدی و پێكهاتەكانی تر تەوەرێكی تر دیدارەكە بوو.

باڕۆنس ئێما نیكلسن دڵگرانی خۆی خستەڕوو بەرامبەر كارە قێزەونەكانی ڕێكخراوی تیرۆرستی داعش ئەویش كرداری جینۆسایدە بەرامبەر بە كوردانی ئێزیدی و پێكهاتەكانی تر و لە نزیكەوە كاردەكات لەسەر پێشكەش كردنی هاوكاری بۆ بەجینۆساید ناساندنی ئەو تاوانە لەسەر ئاستی نێودەوڵەتی.

لە بەرامبەردا بەرپرسی پەیوەندیەكانی دەرەوە وێڕای بەخێرهێنانی بارۆنێس ئیما نیكلسن و شاندی یاوەری دەست خۆشی كرد لەو كاروچالاكیانەی كە ئەنجامیانداوە كە لە پێناو خزمەتی مرۆڤایەتی و كەمكردنەوەی ئێش و مەینەتی ئاوارەكان كردووە و داوایكرد كە بتوانن كار و چالاكیەكانیان فراوانتربكەن كە زۆربەی دانیشتوانی كەمپەكان سوود لە خزمەتگوزاریەكانی دامەزراوەكەیان وەربگرن بە تایبەتی كە ئێستا بەرەو وەرزی زستان نزیك دەبینەوە.

سەبارەت بە پرسی بەجینۆساید ناساندنی كۆمەڵكوژی كوردانی ئێزیدی، فەلاح مستەفا داوای لە بارۆنێس ئێما نیكلسن كرد كە بەپێی ئەزموون و شارەزایی خۆی پشتگیری بكات لە كەیسی بە جینۆساید ناساندنی تاوانەكانی دژ بە كوردانی ئێزیدی.

بەڕێزان/ خانەوادەی خوالێخۆشبوو دکتۆر كه‌مال فواد

مەکتەبی سیاسیی یه‌كێتیی نیشتیمانیی كوردستان

به‌داخەوە، هه‌واڵی كۆچی دوایی دکتۆر كه‌مال فواد، کەسایەتیی نیشتیمانپەروەر و سه‌رۆكی پێشووتری په‌رله‌مانی كوردستان و ئه‌ندامی دەستەی دامه‌زرێنه‌ر و مه‌كته‌بی سیاسیی یه‌كێتیی نیشتیمانیی كوردستان – مان پێگەیشت، كه‌ بە نەخۆشی له‌ ئه‌ڵمانیا كۆچی دوایی كرد.

به‌م بۆنه‌ خه‌مناكه‌وه‌، سه‌ره‌خۆشی له‌ خانه‌واده‌ به‌ڕێزه‌كه‌ی و خوشک و برایانمان لە مەکتەبی سیاسی و سەرکردایەتیی یەکێتیی نیشتیمانیی کوردستان و سه‌رجه‌م هه‌ڤاڵانی دکتۆر كه‌مال ده‌كه‌م و هاوبەشی خەمتانم.

له‌ خوای گه‌وره‌ داواكارم ئارامی و دڵنه‌وایی به‌ هه‌موو لایه‌ك ببه‌خشێت و گیانی خوالێخۆشبوویش به‌ به‌هه‌شتی به‌رین شاد بكات .

انا لله‌ و انا الیه‌ راجعون

مسعود بارزانی

سه‌رۆكی هه‌رێمی كوردستان

١٦ـی ١١ـی ٢٠١٤

ئێوارەی ئەمڕۆ شەممە 15ـی 11ـی 2014 لە شاری هەولێر بەڕێز مەسعود بارزانی سەرۆكی هەرێمی كوردستان پێشوازی لە جەنەڕاڵ مارتین دەمبسی سەرۆكی دەستەی ئەركانی هاوبەشی سوپای ئەمەریكا و شاندێكی یاوەری كرد كە لە ستیوارت جۆنز باڵیۆزی ئەمەریكا لە عێراق و ژمارەیەك پلەدار و ڕاوێژكاری سیاسی و سەربازیی سوپای ئەمەریكا پێكهاتبوون.

لە كۆبوونەوەكەدا كە مەسرور بارزانی ڕاوێژكاری ئەنجوومەنی ئاساییشی هەرێم و مستەفا سەید قادر وەزیری پێشمەرگە و كەریم شنگالی وەزیری ناوخۆ و فەریق شێروان و جەبار یاوەر ئەندامانی فەرماندەیی گشتیی هێزەكانی پاراستنی هەرێم ئامادە بوون، سەرۆكی دەستەی ئەركانی هاوبەشی سوپای ئەمەریكا سوپاسی سەرۆك بارزانی كرد بۆ ڕەخساندنی ئەم دیدارە و خۆشحاڵیی خۆیشی نیشاندا بەوەی كە هەماهەنگیی نێوان پێشمەرگە و هێزە هاوپەیمانەكان بە باشی بەڕێوە دەچێت و جەختیشی لەوە كردەوە كە هێزە هاوپەیمانەكان بەردەوام دەبن لە پاڵپشتیكردنی پێشمەرگە و مەشقپێكردنیان و هەروەها وەشاندنی گورزی ئاسمانی لە تیرۆریستان لە هەر شوێنێك كە پێویست بكات. سەرۆكی دەستەی ئەركانی هاوبەشی سوپای ئەمەریكا سەركەوتنەكانی ئەم دواییەی هێزی پێشمەرگەی بەرز نرخاند و پێزانینی بۆ ڕۆڵی پێشمەرگە لە شەڕی دژی تیرۆردا هەبوو و سەرەخۆشیشی لە خانەوادە و كەسوكاری ئەو پێشمەرگانە كرد كە لە شەڕی تیرۆریستاندا شەهید بوونە و گیانی خۆیان بەخت كردووە. لە بەشێكی دیكەی قسەكانیدا سەرۆكی دەستەی ئەركانی هاوبەشی سوپای ئەمەریكا ئەوەی دووپاتكردەوە كە وڵاتەكەی و هێزە هاوپەیمانەكان لەشەڕی دژی داعشدا پشت بە ستراتیژییەكی هەمەلایەنەی ڕوون دەبەستێت. سەرۆكی دەستەی ئەركانی هاوبەشی سوپای ئەمەریكا ڕایگەیاند كە ئامانجی سەردانەكەیشی بۆ هەولێر لەنزیكەوە ئاگاداربوونە لە بارودۆخی مەیدانی و هەروەها گوێگرتنە لە پێشنیار و ئامۆژگاری و بۆچوونەكانی سەرۆك بارزانی لەبارەی چۆنییەتیی بەردەوامبوون لە لێدان و لەناوبردنی تیرۆریستانی داعش. هەروەها ئەوەیشی بە سەرۆك بارزانی ڕاگەیاند كە هێزە هاوپەیمانەكان هەموو تێبینییەكانی هەرێمی كوردستان و پێداویستییەكانی پێشمەرگە بە جدی وەردەگرن و كار بۆ دابینكردنی دەكەن.

لە بەرانبەردا سەرۆك بارزانی بەگەرمی بەخێرهاتنی جەنەڕاڵ مارتین دەمبسی و شاندی یاوەری كرد و سوپاس و پێزانینی خۆیشی بۆ پاڵپشتی و ڕۆڵی ئەمەریكا و هاوپەیمانان دووپاتكردەوە كە هاوكارییەكانیان لە شەڕی دژی داعش كاریگەر بووە. سەرۆك بارزانی لە گوتەیەكدا بە وردی تیشكی خستە سەر بارودۆخی مەیدانیی بەرەكانی ڕووبەڕووبوونەوەی تیرۆریستان و باسی لە چۆنییەتیی تێكشكانی تیرۆریستانی داعش لەسەر دەستی هێزی پێشمەرگە كرد و ئاماژەی بەوەدا سەرباری ئەوەی هێزی پێشمەرگە ئابڵۆقەی لەسەر بوو، بە ئیمكانیاتێكی كەم توانی هێرشی ڕێكخراوێكی تیرۆریستی ڕابگرێت كە چەكی پێشكەوتوو و ئیمكانیاتی دوو دەوڵەتی كەوتبوو دەست. سەرۆك بارزانی ئەوەیشی خستەڕوو كە هێزی پێشمەرگە زۆر خێرا توانی هێرشی داعش ڕابگرێ و خۆی بكەوێتە هەڵوێستی هێرشبردن و لە زۆر شوێن تێكیانبشكێنن. سەرۆك بارزانی ئەوەیشی دووپات كردەوە كە هەموو قوربانییەك دەدەین بۆ ئەوەی تیرۆریستان لە وڵاتی خۆمان وەدەربنێین و هەموو بستێكی كوردستان لە چنگی تیرۆریستان ئازاد دەكەین. لە درێژەی قسەكانیدا سەرۆك بارزانی هێمای بەوەدا كە شەڕی تیرۆر تەنیا ڕەهەندی سەربازی نییە بەڵكو پێویستە لەڕووی فكری و سیاسی و ئابووریشەوە ڕووبەڕوویان ببینەوە. ئەوەیشی بە پێویست زانی كە هیچ پەناگەیەك نابێ لە عێراق و سووریا و هیچ شوێنێكی دی بۆ تیرۆریستان بمێنێت. سەرۆك بارزانی دەستخۆشیشی لە هێزی پێشمەرگە و هێزە هاوپەیمانەكان كرد كە تا ئێستا تەنانەت یەك شوێنی مەدەنییش نەكراوەتە ئامانج و هەماهەنگی و هێرشەكان بە پڵانی ڕێكوپێك بەڕێوە دەچێت.

هەر لەم كۆبوونەوەیە چۆنییەتیی هەماهەنگیی نێوان هێزی پێشمەرگە و هێزەكانی عێراق خرایە بەر باس و هەردوولا دووپاتیان كردەوە كە پێویستە بەغدا لە یارمەتیدانی هێزی پێشمەرگە جدی بێت و ئەرك و پابەندبوونەكانی جێبەجێ بكات. لە بەشێكی دیكەی ئەم كۆبوونەوەیەدا قسە لەبارەی بارودۆخی كۆبانێ و چوونی پێشمەرگە بۆ كۆبانێ كرا و هەردوولا جەختیان لەسەر پاراستنی كۆبانێ و پاڵپشتیكردنی ئەو هێزەی پێشمەرگە كردەوە كە ئێستا لە كۆبانێ بەشداری شەڕی دژی داعشن.