ئێواره‌ی ئه‌مڕۆ پێنچشه‌ممه 20ی نۆڤه‌مبه‌ری 2014، به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان، پێشوازی له كه‌سایه‌تیی ناوداری جیهان قه‌داسه‌تی ’’شری شری ڕاڤی شه‌نكار’’ سه‌رۆكی كۆڕبه‌ندی جیهانی بۆ به‌ها مرۆییه‌كان كرد.
له دیدارێكدا وێڕای تاوتوێكردنی بارودۆخی ئێستا و نه‌هامه‌تییه‌كانی شه‌ڕ و به‌ره‌نگاربوونه‌وه‌ی تیرۆر، باسی له سه‌ردانی خۆی بۆ چه‌ند كه‌مپێكی ئاواره‌كان له هه‌رێمی كوردستان كرد و ڕۆڵی خه‌ڵك و حكوومه‌تی هه‌رێمی كوردستانی بۆ به‌هاناوه‌چوون و یارمه‌تیدانی ئاواره و په‌نابه‌رانی به‌رز هه‌ڵسه‌نگاند و به مایه‌ی ڕێز و پێزانینی له قه‌ڵه‌م دا.
هه‌روه‌ها تیشكی خسته سه‌ر ته‌بایی و لێبورده‌یی و پێكه‌وه‌ژیانی پێكهاته نه‌ته‌وه‌یی و ئایینییه‌كانی هه‌رێمی كوردستان و ستایشی ئه‌و كه‌لتووره دێرینه‌ی كوردستانی كرد كه له سایه‌یدا هه‌موو پێكهاته نه‌ته‌وه‌یی و ئایینییه‌كان به ئاشتی و ئارامی پێكه‌وه ژیاون و ده‌ژین. دووپاتیشی كرده‌وه لقی ڕێكخراوه‌كه‌یان كه له هه‌رێمی كوردستان هه‌یه، هه‌وڵ ده‌دات هه‌موو كۆمه‌ك و هاوكارییه‌ك پێشكه‌ش به ئاواره و په‌نابه‌ران بكات.
لای خۆیه‌وه به‌ڕێز سه‌رۆك وه‌زیران خۆشحاڵیی خۆی به سه‌ردانی به‌ڕێزیان بۆ هه‌رێمی كوردستان ده‌ربڕی و باسی له ڕه‌وشی ئاواره‌كان و پێویستیی هاوكاریكردنی زیاتریان له لایه‌ن كۆمه‌ڵگه‌ی نێوده‌وڵه‌تییه‌وه كرد و ڕوونی كرده‌وه كه حكوومه‌تی هه‌رێمی كوردستان و خه‌ڵكی هه‌رێمیش به‌گشتی بێ جیاوازی هاوكاریی ئاواره و په‌نابه‌رانیان كردووه و ده‌كه‌ن، به‌ڵام پێویستییان به كۆمه‌ك و هاوكاریی زیاتر هه‌یه و داوای كرد ڕێكخراوه‌كه‌یان له‌مباره‌یه‌وه له‌سه‌ر ئاستی نێوده‌وڵه‌تی ڕۆڵی خۆ بگێڕێت.
هه‌روه‌ها جه‌ختی له‌وه كرده‌وه خه‌ڵك و حكوومه‌تی هه‌رێمی كوردستان شانازی به كه‌لتووری پێكه‌وه‌ژیان و ئاشتی و ته‌بایی و لێبورده‌یی و مرۆڤدۆستی و ژیاندۆستی ده‌كه‌ن، كه به‌شێكی گرنگ و دیاری بنیات و پێكهاته‌ی كۆمه‌ڵگه‌ی كوردستانه و كوردستانیان به هه‌موو پێكهاته ئایینی و نه‌ته‌وه‌ییه‌كانییه‌وه په‌روه‌رده‌ی ئه‌م كه‌لتووره‌ن، حكوومه‌تی هه‌رێمی كوردستانیش هه‌میشه كاری له‌سه‌ر قووڵكردنه‌وه‌ی ئه‌م به‌ها مرۆییانه كردووه و به‌رده‌وام هه‌وڵی داوه ئه‌م كه‌لتووره به‌ره‌و پێشه‌وه ببات و هه‌رواش به‌رده‌وام ده‌بێت.
قه‌داسه‌تی ’’شری شری ڕاڤی شه‌نكار’’ كه به یه‌كێك له سه‌ركرده ڕۆحانی و مرۆییه‌كان ده‌ناسرێت، به‌هۆی بیروڕاكانییه‌وه كه بریتین له كاركردن له‌پێناو جیهانێكی ناتوندوتیژ و كۆمه‌ڵگایه‌كی بێ سترێس و، گرنگی به ئاشتی و پاراستنی به‌ها مرۆییه‌كان و پێكه‌وه‌ژیانی نێوان پێكهاته جیا ئایینییه‌كان ده‌دات، به ملیۆنه‌ها هه‌واداری له جیهاندا هه‌یه.
دره‌نگانی پێنجشه‌ممه 20ی نۆڤه‌مبه‌ری 2014، به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان، له فڕۆكه‌خانه‌ی نێوده‌وڵه‌تیی هه‌ولێر، پێشوازی له به‌ڕێز ئه‌حمه‌د داوود ئۆغلو سه‌رۆك وه‌زیرانی توركیا و شاندێكی باڵای یاوه‌ری كرد كه به یاوه‌ر‌یی ژماره‌یه‌ك له وه‌زیر و ڕاوێژكار و به‌رپرسان، سه‌ردانی هه‌رێمی كوردستان ده‌كات.
بڕیار وایه سه‌رله‌به‌یانیی هه‌ینی هه‌ردوو سه‌رۆك وه‌زیران كۆببنه‌وه و دوای ئه‌وه‌ش به‌رله نیوه‌ڕۆ به‌ڕێز سه‌رۆك وه‌زیرانی توركیا له‌گه‌ڵ به‌ڕێز مه‌سعوود بارزانی سه‌رۆكی هه‌رێمی كوردستان كۆببێته‌وه.
به‌ڕێز سه‌رۆك وه‌زیرانی توركیا و شاندی یاوه‌ری سه‌رله‌به‌یانیی ئه‌مڕۆ به سه‌ردانێكی فه‌رمی گه‌یشتبووه به‌غدا و له‌گه‌ڵ سه‌رۆك وه‌زیران و سه‌ركۆمار و به‌رپرسانی عیراقی دیدار و كۆبوونه‌وه‌ی ئه‌نجام دا.
سەرلەبەیانیی ئەمڕۆ هەینی 21ی نۆڤەمبەری 2014، بەڕێز نێچیرڤان بارزانی سەرۆک وەزیرانی هەرێمی کوردستان، لەگەڵ بەڕێز ئەحمەد داوود ئۆغلو سەرۆک وەزیرانی تورکیا و شاندی یاوەری کۆبووەوە.
لە کۆبوونەوکەدا کە بەڕێزان قوباد تاڵەبانی جێگری سەرۆک وەزیران و وەزیرانی ناوخۆ، پێشمەرگە، دارایی و ئابووری، پلاندانان، شارەوانی و گەشتوگوزار، کاروباری پەرلەمان و وتەبێژی فەرمیی حکوومەتی هەرێمی کوردستان ئامادەی بوون، بارودۆخی عیراق و هەرێمی کوردستان و ناوچەکە و دوایین پێشهاتە ئەمنی و سەربازییەکان و بەرەنگاربوونەوەی تیرۆر و شەڕی دژی داعش تاوتوێ کران. هەروەها کێشەکانی هەولێر و بەغدا و هەوڵەکان بۆ چارەسەرکردنیان و پەیوەندییەکانی تورکیا لەگەڵ عیراق و هەرێمی کوردستان و برەودان بە پەیوەندییە بازرگانی و دیپلۆماسی و سیاسییەکان، خرانە بەر باس.
بەرێز داوود ئۆغلو تیشکی خستە سەر دیدار و کۆبوونەوەکانی لە بەغدا و ئەنجامی سەردان و کۆبوونەوەکانی بە ئەرێنی لە قەڵەم دا، هەروەها ئاماژەی بەوە دا کە تێڕوانینی بەغدا بۆ هەرێمی کوردستان و چارەسەرکردنی کێشەکان ئەرێنییە و دامەزرانی کابینەی نوێی حکوومەتی عیراقی بە دەرفەتێک بۆ بەرەنگاربوونەوەی تیرۆر و چارەسەرکردنی کێشەکان زانی. جەختیشی لەوە کردەوە کە تورکیا لە هەموو بوارەکاندا لە هاوکاریی هەرێمی کوردستان و عیراق بەردەوام دەبێت.
دره‌نگانی شه‌وى ڕابردوو به‌ڕێز ئه‌حمه‌د داوود ئۆغلو سه‌رۆك وه‌زیرانی توركیا و شاندێكی باڵای یاوه‌ری له فڕۆكه‌خانه‌ى نێوده‌وڵه‌تیى هه‌ولێر له لایه‌ن به‌ڕێز نێچیرڤان بارزانی سه‌رۆك وه‌زیرانى هه‌رێمى كوردستانه‌وه پێشوازى لێكرا.
به‌ناوی خوای گه‌وره‌و میهره‌بان
جه‌ماوه‌ری خۆڕاگری هه‌ولێر
له كاتێكدا هێزی پێشمه‌رگه‌ی كوردستان به‌رده‌وامه له سه‌ركه‌وتنه یه‌ك به‌دوای یه‌كه‌كانی و ته‌نگیان به تیرۆرستان هه‌ڵچنیوه، به‌داخه‌وه ئه‌مڕۆ چوارشه‌مه كوێره‌كانی دژی ئازادی و دیموكراسی هه‌ولێری پایته‌ختیان كرده ئامانج و كرده‌وه‌یه‌كی تیرۆریستیان ئه‌نجامدا، له‌م كاته‌دا وێڕای ئیدانه‌كردنی ئه‌م ته‌قینه‌وه‌یه و هه‌وڵدان بۆ خستنه‌گه‌ڕی تواناكان بۆ دۆزینه‌وه‌ی تاوانباران و بكه‌رانی كاره‌كه، داوا له هاووڵاتیانی شاری هه‌ولێری خۆشه‌ویستیش ده‌كه‌م وه‌ك هه‌میشه خۆڕاگر بن و هاوكاری هێزه ئه‌منییه‌كان بن له كاتی بینینی هه‌ر شتێكی نه‌خوازراو، هه‌روه‌ك تیرۆرستان دڵنیا ده‌كه‌ینه‌وه كه ئه‌م جۆره ته‌قینه‌وانه ساردمان ناكه‌نه‌وه‌و به‌رده‌وام ده‌بین له جه‌نگی به‌ره‌نگاربوونه‌وه‌ی تیرۆر و پاككردنه‌وه‌ی بست به بستی خاكی كوردستان له ده‌ستی تیرۆرستان.
له كۆتاییدا وێڕای دووباره ئیدانه‌كردنی ئه‌م ته‌قینه‌وه‌یه‌و دانه‌واندنی سه‌ری رێز و نه‌وازش بۆ شه‌هیدان، هیوای زوو چاكبوونه‌وه بۆ برینداران ده‌خوازم و هیواخوازم ئه‌مه دوایین ناخۆشیمان بێ و ده‌زگا ئه‌منییه‌كانیش چاوكراوانه‌تر له جاران كاربكه‌ن و رێگر بن له دووباره‌بوونه‌وه‌ی ئه‌م كاره تیرۆرستیانه.
كۆسره‌ت ره‌سول عه‌لی
جێگری سه‌رۆكی هه‌رێمی كوردستان
ئەمڕۆ هەینی 21ـی 11ـی 2014 لە شاری هەولێر بەڕێز مەسعود بارزانی پێشوازی لە ئەحمەد داود ئۆغلو سەرۆك وەزیرانی توركیا كرد.
لە دیدارەكەدا سەرۆك وەزیرانی توركیا خۆشحاڵیی خۆی بۆ سەردانی كوردستان و دیداری لەگەڵ سەرۆك بارزانی نیشاندا و سەرەخۆشیی خۆیشی بۆ كەسوكاری شەهیدان و قوربانیانی تەقینەوەی تیرۆریستیی ڕۆژی چوارشەممەی ڕابردووی شاری هەولێر بە سەرۆك بارزانی ڕاگەیاند. هەروەها وێڕای ئاماژەدان بە گرنگی و بایەخی سەقامگیریی عێراق و هەرێمی كوردستان بۆ وڵاتەكەی ئەوەی دووپات كردەوە كە توركیا لە شەڕی دژی تیرۆریستان هاوكاری هەرێمی كوردستان و عێراق دەبێت. هەر لەم كۆبوونەوەیەدا سەرۆكوەزیرانی توركیا ئامادەیی وڵاتەكەیشی خستەڕوو بۆ بەردەوامبوون لە یارمەتیدانی مرۆڤیی بۆ هەرێمی كوردستان لە حەواندنەوەی ئاوارەكان و هەروەها قووڵتركردنەوەی پەیوەندییەكان و فراوانتركردنی بازرگانی و پەیوەندیی ئابووریی نێوان هەردوولا.
لەبەرانبەردا سەرۆك بارزانی بەخێرهاتنی سەرۆك وەزیرانی توركیای كرد و سەردانی سەرۆك وەزیرانی توركیای بۆ هەرێمی كوردستان بە دەرفەتێكی باش زانی بۆ نەهێشتن و قسەكردن لەسەر ئەو كەموكوڕییانەی لە هاوكاری و هەماهەنگیی هەردوولا لە بوارە جیاجیاكاندا لە ئارادان.
هەر لەم كۆبوونەوەیەدا هەردوولا جەختیان لە بەردەوامیی ڕاوێژ و هاوكاریی نێوان هەرێمی كوردستان و توركیا كردەوە لە شەڕی دژی تیرۆر و پتەوتركردنی پەیوەندییەكان.
لە تەوەرێكی دیكەی ئەم دانیشتنەدا هەڕەشەكانی تیرۆریستانی داعش و بارودۆخی سیاسی و ئەمنیی عێراق و ناوچەكە خرایە بەر باس و لەبارەی چۆنییەتی ڕووبەڕووبوونەوەی تیرۆریستان و هاوكاریی و هەماهەنگیی زیاتری نێوان هەرێمی كوردستان و توركیا لەم بارەیەوە بیروڕا ئاڵوگۆڕ كرا.
جێگەی ئاماژەكردنە كە لە دوای تەواوبوونی كۆبوونەوەكە سەرۆك بارزانی و سەرۆك وەزیرانی توركیا لە پرێسكۆنفرانسێكدا ئامانجی سەردانەكە و ناوەڕۆكی كۆبوونەوەكەیان بۆ دەزگاكانی ڕاگەیاندن خستەڕوو.
دکتۆر فواد حوسێن سەرۆكی دیوانی سەرۆكایەتیی هەرێم و فەلاح مستەفا بەرپرسی فەرمانگەی پەیوەندییەكانی حكوومەتی هەرێم رۆژی دووشەممە 17ـی 11ـی 2014 چەند چاوپێکەوتنێکیان ئەنجامدا لەگەڵ هەریەک لە سیناتۆر کارل لڤین ومایک لی لە لیژنەی خزمەتگۆزاری سەربازیەکان لە ئەنجومەنی پیران بۆئەوەی دوایەمیین پێشهاتەکانی شەڕی داعش و پێداویستیەکانی پێشمەرگەیان پێ ڕابگەیێنێن. سیناتۆر لڤین بە شاندەکەی گووت" زۆر هاوڕێی باشتان هەیە لە واشنتۆن و خۆشم یەکێکم لەوانە"
هەر لەم دیدارەدا دکتۆر فواد ڕایگەیاند پێشمەرگە تەنها هێزە لە ناوچەکە کە خۆی گرتوە و توانای ئەوەی هەیە لە داعش بباتەوە و ئەگەر هات وچەکی قورس و کەل و پەڵ و ڕاهینانمان بۆدابینکرا ئەوە دەبینە ئەو هێزە کە لە پێگەی داعش کەمدەکات و ئەم تێروریستانە بنبڕ بکات.
لەم كۆبوونەوەیەدا فەلاح مستەفا ئاماژەی بەوەدا كە دەبێ کۆمەڵگای نێودەوڵەتی بە ئەمریکاوەش ڕۆڵ ببینن لە کەمکردنەوەی هەڕەشەی داعش لەسەر ناوچەکە و گشت جیهان.
لە لایەكی دیكەوە هەر لەم ڕۆژەدا شاندی هەرێمی كوردستان لەگەڵ بەرپرسانی ئیدارەی ئەمریکا و نەتەوە یەكگرتووکان کۆبووە بۆ دانوستاندن دەربارەی قەیرانی مرۆیی ئیستای هەرێمی کوردستان. فەلاح مستەفا بە خاتوو ئان سی رێچارد یاریدەدەری وەزیری دەرەوەی ئەمریکا بۆ ئوفیسی خەلک و ئاوارەکان و کۆچکردن و بەرێز ئەنتۆنیۆ گوتیریس نێردراوی باڵای نەتەوەیەگرتوەکانی ڕایگەیاند كە لە وەرزی زستانی کوردستان باران و بەفری زۆرە و پلەکانی گەرما زۆر نزم دەبەنەوە و ئاوارەكان لە هەرێمی کوردستان دەكەونە دۆخێكی زۆر ناخۆش بۆیە بێ یارمەتی نێودەوڵەتی ئەم زستانە دەبێتە زستانی قەیران بۆ ئاوارەكان.
لە بەشێكی دیكەی چالاكییەكانی شاندی هەرێم دکتۆر فواد حوسێن و فەلاح مستەفا لە وەزارەتی دەرەوەی ئەمریکا بە مەبەستی باسکردن لە دانوساندنەكانی نێوان حکۆمەتی هەرێم و بەغدا چاویان بە بەرێز گێرالد فیرستاین کەوت کە جێگری یەکەمی یاریدەدەری وەزیری دەرەوەی ئەمریکایە. دکتۆر فواد داوی کرد لە ئەمریکا داوا لە بەغدا بکات بەشی هەرێمی کوردستان لە بودجەی فیدرالیەوە بدات وئاماژەی بەوەدا كە ئەگەر بەغدا وەك هاووڵاتیی مامەڵەی لەگەڵ خەڵكی هەرێمی كوردستان كردبا ئەوە هەموو كەس لە كوردستان حەزی لەوە دەبوو خۆی وەك بەشێك لە عێراق بزانێت.
سەبارەت بە دۆخی ئاوارەكان شاندی هەرێمی كوردستان ئەوەیشیان بۆ جێگری یەکەمی یاریدەدەری وەزیری دەرەوەی ئەمریکا ڕوون كردەوە ئێستا هەرێمی کوردستان میوانداری ١.٦ ملیۆن پەنابەر كردووە، زۆریان لە شوێنی بینا و دەزگا گشتیەکان و قوتابخانە دەژین و هیچ ئامێری گەرمکەروەیان نیە تەنانەت جلی زستانیشیان کەمە. حکۆمەتی هەرێمی کوردستان لە گەڵ چەند لایەنی نێودەڵەتی ٢٦ کامپ و جێی کاتی دروست دەکات بۆ ئەوەی جێگای حەواندنەوە بۆ ئاوارەکان دابین بکات.
هەروەها شاندەکە لەگەڵ چەند شروڤەکار و ئاکادیمیی ئەنستیتوتی رۆژهەلاتی نزیک لە واشنتون بەشێوەیەكی نافەرمی دەربارەی پێشهاتکەنی ئەم دواییە لە بوارەکانی ئاساییش و سیاسەت و بارودۆخی مرۆیی لە هەرێمی کوردستان كۆبوونەوە.
شایانی باسە دکتۆر فواد و فەلاح مستەفا بۆ ئیوارە خوانێکی تایبەت لە لایەن گەورە پسپۆڕەکانی ناوەندە هزرییە پێشکەوتووەكانی واشنتون بانگهێشتكران.
حکوومەتی هەرێمی کوردستان بە توندی ئیدانەی ئەو کردەوە تیرۆریستییە دەکات کە نیوەڕۆی ئەمڕۆ لەبەردەم باڵەخانەی پارێزگای هەولێر ئه‌نجام درا و بووە هۆی شەهیدبوونی 4 کەس و برینداربوونی 29 کەسی دیکە. به‌م بۆنه‌یه‌وه پرسە وسەرەخۆشى ئاراستەی کەسوکاری شەهیدان دەکەین و هیوای زووچاکبوونەوە بۆ برینداران دەخوازین، بە هاووڵاتیانی بەڕێزی هەرێمی کوردستانیش ڕادەگەیەنین كه دەزگا ئەمنییەکانی هەرێم دەستیان بە لێکۆڵینەوە کردووە.
هه‌روه‌ها داوا لە هاووڵاتیانی بەڕێزی شاری هەولێر و تێکڕای هەرێمی کوردستان دەکەین، وەک هەمیشە لە ئاستی بەرپرسیاریه‌تی و چاوکراوە بن و هه‌مووان دڵنیا دەکه‌ینەوە کە ده‌زگا ئه‌منییه‌كان هەموو هەوڵێک دەگرنە بەر بۆ پاراستنی ئاسایش وسەقامگیریی هەرێم، كاروانى ئاوەدانى و به‌ره‌وپێشچوونیش ناوەستێت و ئەم کردەوانە حكوومه‌ت و خه‌ڵكى كوردستان ناترسێنن.
ئەنجومەنی وەزیرانی هەرێمی کوردستان
19ی نۆڤەمبەری 2014
مەنسوور جیهانی ـ بە ناوبژیوانی سینەماکاری کورد "هیشام زەمان"، خەڵاتی مرواری ڕەشیی هەشتەمین خولی فیستیڤاڵی نێودەوڵەتیی فیلمی ئەبووزەبی بەسەر سەرکەوتوواندا دابەشکرا.
بە ناوبژیوانی سینەماکاری کوردی دانیشتووی وڵاتی نەرویج "هیشام زەمان" و چەندین سینەماکاری دیکەی جیهانی، خەڵاتی مرواری ڕەشیی بەشی پێشبڕکێی فیلمە ئیماڕاتییەکانی هەشتەمین خولی فیستیڤاڵی نێودەوڵەتیی فیلمی ئەبووزەبی، لە هۆڵی کۆشکی ئیماڕات لە شاری ئەبووزەبی لە وڵاتی ئیماڕاتبەسەر هونەرمەندانی سەرکەوتوودا دابەشکرا.
ئەندامانی لێژنەی دادوەرانی بەشی پێشبڕکێی فیلمە ئیماڕاتییەکانی هەشتەمین خولی فیستیڤاڵی نێودەوڵەتیی فیلمی ئەبووزەبی، کە بریتی بوون لە: "فەرید بێنل یەزید" ـ سەرۆکی دەستەی دادوەران لە وڵاتی مۆراکۆ، "ئیبراهیم ئەلحەساوی" ـ ئەکتەر و سیناریۆنووس لە وڵاتی سعوودییە، "فاتیمە ئەلریمەیهی" ـ بەرهەمهێنەر و دەرهێنەر لە وڵاتی قەتەر، "عەبدوڵڵا ساڵح" ـ ئەکتەر و دەرهێنەر لە وڵاتی ئیماڕات و "هیشام زەمان" ـ دەرهێنەر لە وڵاتی نەرویج، دوای بینین و هەڵسەنگاندنیی فیلمەکانی ئەم بەشەی فیستیڤاڵ، خەڵاتی نەقدی و تەندیسی مرواریی ڕەشیان بە سینەماکارانی براوەی بەشە جۆراوجۆرەکان فیستیڤاڵ پێشکەش کرد، لەوانە: بەشی "پێشبڕکێی کورتە فیلمە چیرۆکییەکان"، بەشی "پێشبڕکێی کورتە فیلمە چیرۆکییەکانی قوتابیانی سینەما"، بەشی "پێشبڕکێی کورتە فیلمە دیکۆمێنتارییەکان" و بەشی "پێشبڕکێی کورتە فیلمە دیکۆمێنتارییەکانی قوتابیانی سینەما".
هەر لەم فیستیڤاڵەدا فیلمی سینەمایی "بیرەوەرییەکانی سەر بەرد" Memories On Ston نوێترین بەرهەمی "شەوکەت ئەمین کورکی" بە نوێنەرایەتیی لە هەرێمی کوردستان و بە ئامادەبوونی ئەم سینەماکارە کوردە، بەرهەمهێنەر و سیناریۆنووسی کورد "مەمەد ئەکتاش" و "ئەیووب ڕەمەزان" بەڕێوەبەری گشتیی ڕۆشنبیری و هونەری پارێزگای دهۆک، لە بەشی پێشبڕکێی سەرەکیی هەشتەمین خولی فیستیڤاڵی نێودەوڵەتیی فیلمی ئەبووزەبی چووە سەر پەردەی سینەماکان و توانی خەڵاتی مرواریی ڕەشی باشترین فیلمی جیهانی عەڕەبی ئەم فیستیڤاڵە بەدەستبێنێت.
"شەوکەت ئەمین" دوای وەرگرتنی خەڵاتی مرواریی ڕەشی فیستیڤاڵی نێودەوڵەتیی فیلمی ئەبووزەبی، لە وتووێژ لەگەڵ دەزگاکانی ڕاگەیاندنی عەڕەبییدا ئەم خەڵاتەی پێشکەش کرد بە یادەوەری شەهیدان و قوربانیانی شەڕ دژی گرووپی تیرۆریستی داعیش و بە تایبەت منداڵانی شەهید و قوربانی ئەم کارەساتە و هەروەها خۆڕاگریی خەڵکی کوردستان بەرانبەر بە داعیش.
هەشتەمین خولی فیستیڤاڵی نێودەوڵەتی فیلمی ئەبووزەبی بە بەڕێوەبەرایەتیی "عەلی ئەلجابری" و بە نمایشی 197 فیلم لە سینەماکارانی 61 وڵاتی جۆراوجۆری جیهان لە چەندین بەشی پێشبڕکێی و دەرەوەی پێشبڕکێی، لەوانە: بەشی "پێشبڕکێی سەرەکیی"، بەشی پێشبڕکێی "ئاسۆی نوێی"، بەشی پێشبڕکێی "فیلمە بڵیندە دیکۆمێنتارییەکان"، بەشی "نمایشی سینەمای جیهان"، بەشی پێشبڕکێی "کورتە فیلمە چیرۆکی و دیکۆمێنتارییەکان"، بەشی پێشبڕکێی "فیلمە ئیماڕاتییەکان"، بەشی پێشبڕکێی "چاودێری لە منداڵان"، بەشی "نمایشی تایبەتی کۆمەڵە فیلمەکانی سینەماکاری ناوداری سینەمای جیهان فڕانسوا تڕۆفۆ" و بەشی "نمایشی فیلمە کلاسیکییەکان" لە ڕۆژانی 23ی تەشرینی یەکەم / ئۆکتۆبەر تا 1ی تەشرینی دووەم / نۆڤەمبەری 2014 لە هۆڵی گەورەی کۆشکی ئیماڕات و هەروەها ناوەندی سینەمایی "مارینا ماڵ" لە شاری ئەبووزەبی لە وڵاتی ئیماڕات بەڕێوەچوو.
دوایین هەواڵەکان
- نوێنەری حکومەتی هەرێم لە ئێران: سەردانەکەی پزیشکیان ئاماژەیە بۆ گرنگیدانی ئێران بە هەرێمی کوردستان
- هه‌رێمى كوردستان و ئێران جهخت له برهودان به پهيوهندييهكانيان دهكهنهوه
- سهرۆک نێچیرڤان بارزانی: سەردانی سەرۆک کۆماری ئێران مێژوویی بوو
- نازم دەباغ له وتووێژ له‌گه‌ڵ ئاژانسی ئیرنا: مەسعوود پزشکیان سەردانی هەولێر دەکات
- نازم دەباغ: کاتی سەردانی پزیشکیان بۆ عێراق دیار نییە
- «سەلام رشدی» له‌گه‌ڵ شاندی یهکێتی هاورده و ناردنکارانی لقی هه‌ولێر کۆبۆوه
- سه‌رۆك نێچيرڤان بارزانى: ههميشه پشتيوانى و بهرگرى له مافهكانى ئێزدييان دهكهين
- سهرۆک نێچیرڤان بارزانی له‌گه‌ڵ باڵیۆزی یهکێتیی ئهورووپا کۆبووهوه
- سه‌رۆك نێچيرڤان بارزانى له‌گه‌ڵ باڵيۆزى نهمسا كۆبووهوه
- سه‌رۆك نێچيرڤان بارزانى سوپاسى جهنهرال ڤاول ده‌كات