سه‌رله‌به‌یانیی ئه‌مڕۆ پێنجشه‌ممه 13ى نۆڤه‌مبه‌ری 2014 به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان، پێشوازی له به‌ڕێز د. عادل عه‌بدولمه‌هدی وه‌زیری نه‌وتی عیراق كرد.
له كۆبوونه‌وه‌یه‌كدا كه به‌ڕێز قوباد تاڵه‌بانی جێگری سه‌رۆك وه‌زیرانی هه‌رێمی كوردستان ئاماده‌ی بوو، كێشه‌كانی هه‌ولێر و به‌غدا به‌تایبه‌تی دۆسیه‌ی نه‌وت و چۆنیه‌تیی هه‌نگاونان به‌ره‌و چاره‌سه‌ركردنی تاوتوێ كرا.
كۆبوونه‌وه‌كه به كراوه‌یی ماوه‌ته‌وه و دانیشتنی دیكه‌ی به‌دوادا دێت، دوای ته‌واوبوونیشی، ڕاگه‌یانراوێك ده‌رباره‌ی ناوه‌ڕۆك و ئه‌نجامه‌كانی ئه‌م كۆبوونه‌وه‌یه، بڵاو ده‌كرێته‌وه.
ئێواره‌ی ئه‌مڕۆ چوارشه‌ممه 12ی نۆڤه‌مبه‌ری 2014، به‌ڕێز نێچیرڤان بارزانی سه‌رۆك وه‌زیرانی هه‌رێمی كوردستان، پێشوازی له به‌ڕێز د. ئێستیڤان میكۆلا وه‌زیری ده‌وڵه‌ت بۆ كاروباری ده‌ره‌وه و بازرگانیی هه‌نگاری و شاندێكی یاوه‌ری كرد كه له به‌ڕێزان وه‌زیری ده‌وڵه‌ت بۆ كاروباری به‌رگری، ڕاوێژكاری سه‌رۆك وه‌زیران بۆ كاروباری ئاسایشی وزه و باڵیۆزی هه‌نگاریا له به‌غدا و كونسلی گشتیی هه‌نگاریا له هه‌ولێر، پێكهاتبوو.
شانده‌كه خۆشحاڵیی خۆی به سه‌ردانی كوردستان و به‌شداریكردنیان له ڕێوڕه‌سمی كردنه‌وه‌ی كونسلخانه‌ی گشتیی هه‌نگاریا له هه‌ولێر ده‌ربڕی و، ده‌ستخۆشی له حكوومه‌تی هه‌رێمی كوردستان كرد كه توانیویه‌تی زۆر پێشكه‌وتنی به‌رچاو له هه‌موو بواره‌كانی ئاوه‌دانكردنه‌وه و پێشخستنی وڵاتدا به ده‌ست بێنێت. هه‌روه‌ها ده‌ستخۆشییان له خه‌ڵك و پێشمه‌رگه‌ی كوردستان كرد كه توانیویانه ڕووبه‌ڕووی تیرۆر ببنه‌وه و به‌سه‌ر تیرۆرستاندا سه‌ربكه‌ون و ببنه هێڵی یه‌كه‌می به‌ره‌نگاربوونه‌وه‌ی تیرۆر. جه‌ختیشی له‌وه كرده‌وه كه وه‌ك چۆن هه‌نگاریا هاوكاریی هه‌رێمی كردووه، له‌مه‌ودواش له پێشكه‌شكردنی هاوكاری به‌رده‌وام ده‌بێت.
په‌یوه‌ندیی دووقۆڵیی نێوان هه‌رێمی كوردستان و هه‌نگاریا و چۆنیه‌تیی بره‌ودان به په‌یوه‌ندییه‌كان له بواره‌كانی كه‌لتووری و كۆمه‌ڵایه‌تی و ئابووری و وزه و سیاسی و دیپلۆماسیدا، به‌شێكی دیكه‌ی دیداره‌كه بوو. هه‌روه‌ها باس له په‌یوه‌ندییه‌كانی هه‌ولێر و به‌غدا و چاره‌سه‌ركردنی كێشه‌كان له ڕێگه‌ی دیالۆگه‌وه كرا.
به‌ڕێز سه‌رۆك وه‌زیران سوپاسی سه‌ردانی شانده‌كه و هاوكارییه‌كانی هه‌نگاریای بۆ هه‌رێمی كوردستان كرد و، ده‌ستخۆشی و پیرۆزبایی لێكردن بۆ كردنه‌وه‌ی كونسلخانه‌ی گشتیی وڵاته‌كه‌یان له هه‌ولێر و دووپاتی كرده‌وه كه حكوومه‌تی هه‌رێمی كوردستان هه‌موو هاوكارییه‌ك بۆ سه‌ركه‌وتنی كاره‌كانی كونسلخانه‌كه پێشكه‌ش ده‌كات. ئاماژه‌ی به‌وه‌ش دا كه هه‌رێمی كوردستان و هه‌نگاریا ده‌توانن له زۆر بواردا هاوكار بن و هه‌رچه‌نده ئێستا شه‌ڕی تیرۆر هه‌یه، به‌ڵام له داهاتوودا ده‌رفه‌تی زۆری ئه‌نجامدانی كار و پرۆژه له هه‌رێمی كوردستان ده‌بێت.
له دیداره‌كه‌دا، به‌شداریی هه‌رێمی كوردستان له حكوومه‌تی عیراقدا و هه‌وڵه‌كان بۆ چاره‌سه‌ركردنی كێشه‌كان و سه‌ردانی چاوه‌ڕوانكراوی به‌ڕێز وه‌زیری نه‌وتی عیراق بۆ هه‌ولێر باس كرا، به‌و هیوایه‌ی كه ببێته زه‌مینه‌خۆشكه‌رێك بۆ هه‌نگاونان به‌ره‌و چاره‌سه‌ركردنی كێشه‌كان و ده‌ستپێكردنی گفوگۆكان. هه‌ر له‌م سه‌ردانه‌ی شاندی هه‌نگاریدا، پرۆتۆكۆلێكی لێكگه‌یشتن له نێوان هه‌رێمی كوردستان و هه‌نگاریادا بۆ هاوكاری و هه‌ماهه‌نگی له بواره جیاكانی كولتوری، شوێنه‌وار، بازرگانی و چه‌ندین بواری دیكه‌دا، له لایه‌ن به‌ڕێز قوباد تاڵه‌بانی جێگری سه‌رۆك وه‌زیرانی هه‌رێم و سه‌رۆكی شانده‌كه‌دا ئیمزا كرا.
ئێواره‌ی ئه‌مڕۆ سێشه‌ممه 11/11/2014 كۆسره‌ت ره‌سول عه‌لی جێگری سه‌رۆكی هه‌رێمی كوردستان له شاری هه‌ولێر پێشوازی كرد له "د. ئه‌یاد عه‌لاوی" جێگری سه‌رۆك كۆماری عێراق.
له كۆبوونه‌وه‌یه‌كدا هه‌ردوولا گفتوگۆیان كرد له‌باره‌ی دوایین پێشهات و گۆڕانكارییه‌كانی عێراق و ناوچه‌كه‌و جه‌نگی رووبه‌ڕووبوونه‌وه‌ی تیرۆر، بۆ ئه‌م مه‌به‌سته هه‌ردوولا به پێویستیانزانی هه‌ماهه‌نگی و هاوكاری زیاتر هه‌بێ بۆ رووبه‌ڕووبوونه‌وه‌ی ئه‌م جه‌نگه‌و هه‌رچی زوو كۆتایی پێهێنانی.
له ته‌وه‌رێكی تری گفتوگۆكاندا، قسه‌كرا له‌باره‌ی كێشه‌كانی نێوان هه‌رێم و به‌غدا، بۆ ئه‌م مه‌به‌سته، كۆسره‌ت ره‌سول عه‌لی گوتی"له سه‌ره‌تاوه گووتوومانه پێویسته كێشه‌كانی نێوان هه‌رێم و به‌غدا له رێگای گفتوگۆ و له‌یه‌ك گه‌یشتنه‌وه چاره‌سه‌ر بكرێ و ناكرێ هاووڵاتیان بكرێنه قوربانی ململانێ سیاسییه‌كان".
لای خۆیه‌وه د. ئه‌یاد عه‌لاوی جێگری سه‌رۆك كۆماری عێراق تیشكی خسته سه‌ر ئامانجی سه‌ردانه‌كه‌ی بۆ هه‌ولێر و رایگه‌یاند ده‌یانه‌وێ به زووترین كات و له رێگای گفتوگۆوه كێشه‌كان چاره‌سه‌ر بكرێن و به‌سته‌ڵه‌كی نێوان هه‌رێم و به‌غدا بتوێته‌وه".
به‌شێكی تری كۆبوونه‌وه‌كه تایبه‌ت بوو به قسه‌كردن له‌سه‌ر په‌یوه‌ندی نێوان هێز و لایه‌نه سیاسییه عێراقییه‌كان، بۆ ئه‌م مه‌به‌سته جێگری سه‌رۆكی هه‌رێمی كوردستان رایگه‌یاند"ئێمه وه‌ك هه‌رێمی كوردستان هه‌میشه هه‌وڵمانداوه‌و هه‌وڵده‌ده‌ین كه باشترین و دۆستانه‌ترین په‌یوه‌ندیمان له‌گه‌ڵ سه‌رجه‌م لایه‌نه عێراقییه‌كان هه‌بێ و به هه‌موومان بتوانین رووێكی جوانی دیموكراسی له ناوچه‌كه نیشان بده‌ین".
له كۆتایی كۆبوونه‌وه‌كه‌دا هه‌ردوولا به پێویست و گرنگیانزانی ئه‌م جۆره سه‌ردان و گفتوگۆیانه به‌رده‌وام بن و سه‌رجه‌میشیان به ئامانجی گه‌یشتن بێ به چاره‌سه‌ری كێشه‌كانی نێوان هه‌ردوولا.
ئەمڕۆ چوارشەممە 12ـی 11ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە بەڕێز د. یوسف محەمەد سەرۆكی پارلەمانی كوردستان كرد.
لە دیدارێكدا كە فواد حوسێن سەرۆكی دیوانی سەرۆكایەتیی هەرێمی كوردستان ئامادەی بوو، بارودۆخی مەیدانیی بەرەكانی ڕووبەڕووبوونەوەی تیرۆریستانی داعش و سەركەوتنەكانی هێزی پێشمەرگەی كوردستان خرایە بەر باس و جەخت لەسەر پاڵپشتیكردنی هێزی پێشمەرگە كرایەوە. هەر لەم دیدارەدا هەنگاوەكانی كاركردن بۆ بەجینۆسایدناساندنی پەلاماردانی تیرۆریستانی داعش بۆ سەر شنگال تاوتوێ كرا و بە پێویستیش زانرا كە ڕاگەیاندنە كوردییەكان بە هەست بەبەرپرسیارێتییەوە مامەڵە لەگەڵ بارودۆخی بەرەكانی شەڕ و پشتیوانیكردنی هێزی پێشمەرگە بكەن و بە هەستێكی نەتەوەیی و نیشتیمانییەوە كەیسی ژنە ڕفێندراوەكانی شنگال بخەنەڕوو.
لە بەشێكی دیكەی كۆبوونەوەی نێوان سەرۆك بارزانی و سەرۆكی پارلەمانی كوردستان باس لە هەماهەنگیی زیاتری نێوان دامەزراوە سیادییەكانی هەرێم كرا و تیشكیش خرایە سەر ڕەشنووسی پڕۆژەی دەستووری هەرێمی كوردستان و چۆنییەتیی مامەڵەكردن لەگەڵ ئەم پڕۆژەیە لە قۆناغی ئێستا و داهاتوودا.
هەر لەم كۆبوونەوەیەدا بیروڕا لەبارەی كۆنگرەی نەتەوەیی و چۆنییەتی كاركردن لەبارەی سازدان و سەرخستنی كۆنگرەی نەتەوەیی ئاڵوگۆڕ كرا.
ئەمڕۆ چوارشەممە 12ـی 11ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە شاندێكی باڵای حكوومەتی هەنگاریا كرد كە پێكهاتبوون لە ستێڤان میكۆلا وەزیری دەولەت بۆ كاروباری دەرەوە و تاماس ڤارگا وەزیری دەولەت بۆ كاروباری بەرگری و تیبۆر ساتماری باڵیۆزی هەنگاریا لە عێراقی فیدڕاڵ و ژمارەیەك ڕاوێژكاری سیاسی و ئابووریی حكوومەتی هەنگاریا.
لە دیدارەكەدا شاندی میوان سوپاسی سەرۆك بارزانیان كرد بۆ ڕەخساندنی ئەم دیدارە و گەشبینیی خۆیشیان نیشاندا بەرانبەر بە داهاتووی هەرێمی كوردستان و پێشكەوتنەكانی هەرێمی كوردستانیان لە بواری ئابووری و بنیاتنان بەرز نرخاند. هەروەها وێڕای ئاماژەدان بە ڕۆحی خۆڕاگریی گەلی كورد باسی ئەوەیان كرد كە گەلی كوردستان و گەلی هەنگاریا لە خۆڕاگری و ڕووبەڕووبوونەوەی داگیركاراندا مێژوویەكی هاوشێوەیان هەیە. شاندی میوان نیگەرانیی خۆیشیان لە بارودۆخی ئاوارەكان و پێكهاتە ئایینی و نەتەوەییەكانی عێراق ڕاگەیاند و دەستخۆشیی هەرێمی كوردستانیان كرد كە بوونەتە پەناگەی ئاوارەكان و پێكهاتە ئایینی و نەتەوەییەكانی عێراق دەپارێزن.
شاندی میوان سڵاوی سەرۆك وەزیرانی وڵاتەكەیان بە سەرۆك بارزانی گەیاند و ئاماژەیان بەوەدا كە سەردانی پێشووی سەرۆك بارزانی بۆ هەنگاریا و دیداریان لەگەڵ سەرۆك وەزیرانی هەنگاریا بناخەیەكی پتەوی بۆ پەیوەندییەكانی نێوان هەرێمی كوردستان و هەنگاریا دامەزراند. شاندی باڵای حكوومەتی هەنگاریا جەختیشی لەوە كردەوە كە هاوكاریكردنی هێزەكانی پێشمەرگە و كردنەوەی كونسوڵخانە لە شاری هەولێر و كار و چالاكییەكانی كۆمپانییەكانی هەنگاریا لە هەرێمی كوردستان نیشانەی ئەوەیە كە هەرێمی كوردستان بۆ هەنگاریا جێگەی بایەخێكی زۆرە و هیوای ئەوەیشیان خواست كە یادداشتێكی لێكتێگەییشتن لەنێوان هەردوولا مۆر بكرێت.
لەبەرانبەردا سەرۆك بارزانی بەخێرهاتنی شاندی میوانی كرد و سوپاسی سەرۆك وەزیرانی هەنگاریای كرد و هەروەها سوپاس و پێزانینی خۆی بۆ ئەو هاوكارییە سەربازییانە ڕاگەیاند كە لە لایەن هەنگاریاوە پێشكەشی هێزی پێشمەرگەی كوردستان كراوە.
سەبارەت بە شەڕی تیرۆریستان و بارودۆخی مەیدانی سەرۆك بارزانی ئەوەی بۆ شاندی میوان باس كرد كە گەلی كوردستان هەر لە كۆبانێ هەتا خانەقین ڕووبەڕووی ڕێكخراوێكی تیرۆریستیی ترسناك بووەتەوە كە ئیمكانیات و چەكی دوو دەوڵەتی كەوتووەتە دەست. بەڵام هێزی پێشمەرگە هەر زوو هاوكێشەكەی لە بەرژەوەندیی كوردستان گۆڕی و ڕێگەی لە پێشڕەویی تیرۆریستان گرت و كەوتە هەڵوێستی هێرشبردن و ئێستا پێشمەرگە لە قۆناغە كۆتاییەكانی هێرشبردن و تێكشكاندنی تیرۆریستانی داعش و دەركردنیانە لە خاكی كوردستان. لە درێژەی قسەكانیدا سەرۆك بارزانی ئەوەی دووپاتكردەوە كە تیرۆریستان هەڕەشەیەكی جیهانین بۆ هەموو گەل و وڵاتێك بۆیە لەناوبردنیان هەوڵێكی هەموو لایەكی پێویستە. هەروەها نابێ هیچ پەناگەیەك لە هیچ شوێنێك بۆ تیرۆریستان بمێنێت و لەڕووی سیاسی و ئابووری و فكریشەوە پێویستە ڕووبەڕووی تیرۆریستان ببینەوە.
هەر لەم كۆبوونەوەیەدا ئاستی چالاكیی كۆمپانییەكانی هەنگاریا و پەرەپێدانی پەیوەندییەكانی نێوان هەردوولا تاوتوێ كرا و سەرۆك بارزانی ئامادەیی هەرێمی كوردستانی نیشاندا بۆ فراوانتركردنی پەیوەندییەكانی نێوان هەنگاریا و هەرێمی كوردستان.
جێگەی ئاماژەیە لەم كۆبوونەوەیەدا فواد حوسێن سەرۆكی دیوانی سەرۆكایەتیی هەرێم و مستەفا سەید قادر وەزیری پێشمەرگە و فەلاح مستەفا بەرپرسی فەرمانگەی پەیوەندییەكانی دەرەوەی حكوومەتی هەرێم ئامادە بوون.
ئەمڕۆ چوارشەممە 12ـی 11ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە د. ئەیاد عەلاوی جێگری سەرۆك كۆماری عێراق كرد.
لە دیدارەكەدا بارودۆخی ئەمنی و سیاسیی عێراق و ناوچەكە و هەڕەشەی تیرۆریستان و سەركەوتنەكانی ئەم دواییەی هێزەكانی پێشمەرگە لە بەرەكانی شەڕی دژی تیرۆریستانی داعش خرایە بەر باس و گفتوگۆ.
هەر لەم دیدارەدا پڕۆسەی سیاسیی عێراق و پەیوەندییەكانی نێوان هەرێم و بەغدا تاوتوێ كرا و جەخت لەوە كرایەوە كە بۆ سەرخستنی پڕۆسەی سیاسی پێویستە هەموو لایەك پابەندی دەستوور و ڕێككەوتنی نێوان لایەنە سیاسییەكان بن.
لەم كۆبوونەوەیەدا هەردوولا لەسەر ئەوە هاوڕابوون كە سەركەوتنی پڕۆسەی سیاسیی عێراق یارمەتیدەرە بۆ ئەوەی تیرۆریستانی داعش زووتر تێكبشكێندرێن.
ئەمڕۆ پێنجشەممە 13ـی 11ـی 2014 لە سەلاحەدین، بەڕێز مەسعود بارزانی سەرۆکی هەرێمی کوردستان پێشوازی لە بەڕێز عادل عەبدولمەهدی وەزیری نەوتی عێراق كرد.
له دیدارەكەدا، سەرەتا وەزیری نەوتی عێراق خۆشحاڵیی خۆی بۆ ڕەخسانی دەرفەتی ئەو دیدارە دەربڕی و دەستخۆشی لە هێزی پێشمەرگەی کوردستان کرد بۆ ئەو سەرکەوتنە گەورانەی لە بەرەکانی شەڕ دژی تیرۆریستان وەدەستیان هێناوە و هیوای خواست بە زووترین کات تیرۆریستان لە هەموو عێراق تێکبشکێندرێن و ئارامی بۆ وڵات بگەڕێتەوە.
لە بەرانبەردا سەرۆک بارزانی پیرۆزبایی لە بەڕێز عادل عەبدولمەهدی کرد بەبۆنەی وەرگرتنی پۆستی وەزیری نەوتی عێراقی فیدراڵ و هیوای سەرکەوتنی بۆ خواست. سەبارەت بە بەرەکانی ڕووبەڕووبوونەوە لەگەڵ تیرۆریستانیش سەرۆک بارزانی تەئکیدی کردەوە کە تیرۆریستان لە بەرانبەر پێشمەرگەی کوردستان خۆیان پێ ڕاناگیرێ و هیچ بستێک لەخاکی کوردستان لەژێر دەستیاندا نامێنێتەوە و ئازاد دەکرێن، هیواشی خواست بە زووترین کات بە هەماهەنگی و هاوکاریی هەموولایەک تیرۆریستان لە هەموو شوێنێک تێکبشکێندرێن و بۆ ئەوەش پێویستە هەنگاوی کردەیی بۆ سەرخستنی پرۆسەی سیاسیی بگیرێتەبەر، چونکە ئەوە تێکشکاندنی تیرۆریستانی داعش ئاسانتر دەکات.
هەر لە دیدارەکەدا وەزیری نەوتی عێراق ڕۆشنایی خستە سەر پەیوەندییەکانی نێوان هەرێمی کوردستان و بەغدا لە بواری وزە و سیاسەتی نوێی عێراقی لە بواری نەوت بۆ سەرۆک بارزانی ڕوون کردەوە و بە وردی باسی ڕەوشی ئابووری و سیاسیی عێراقی کرد.
له‌م رووه‌وه سەرۆک بارزانی هیوای خواست بەرنامەی کاری وەزیری نەوتی عێراق هەنگاوێک بێت بۆ چارەسەری کێشەکانی نێوان هەرێم و بەغدا لەبواری وزەدا. هەردوولایش ته‌ئكیدیان له سه‌ر گرنگیی چالاككردنی دیالۆگی بنیاتنه‌ری نێوان لایه‌نه‌كان كرده‌وه به مه‌به‌ستی دۆزینه‌وه‌ی رێگه چاره‌ی ریشه‌یی بۆ سه‌رجه‌م كێشه‌كان به پشت به‌ستن به ده‌ستوور و ئه‌نجامی رێككه‌وتنه‌كانی نێوان هێز و لایه‌نه عیراقییه‌كان و شه‌راكه‌تی راسته‌قینه له بنیاتنانی وڵات و سه‌رخستنی پرۆسه‌ی سیاسی و دیموكراتی له ته‌واوی عێراقدا.
ئەمڕۆ پێنجشەممە 13ـی 11ـی 2014 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە سری ساكیك سەرۆكی شارەوانیی ئاگری كرد.
لە دیدارەكەدا كە فواد حوسێن سەرۆكی دیوانی سەرۆكایەتیی هەرێم ئامادەی بوو سەرۆكی شارەوانیی ئاگری سوپاسی سەرۆك بارزانی كرد بۆ ڕەخساندنی ئەم دیدارە و وێڕای ئاماژەدان بە پێشڤەچوونی دۆزی كورد لە باكوور جەختی لەوە كردەوە كە ڕێكاری ئاشتی و كاری سیاسی دۆزی كورد بەهێزتر دەكات. هەروەها سوپاسی سەرۆك بارزانی و هەرێمی كوردستانی كرد بۆ یارمەتیدانی ڕۆژئاوا و كۆبانێ و ڕایگەیاند كە چوونی پێشمەرگە بۆ یارمەتیدانی خوشك و براكانی لە كۆبانێ هەنگاوێكی مێژوویی بوو و دڵی هەموو كوردێكی لە جیهان شاد كرد. سەرۆكی شارەوانیی ئاگری ڕۆڵی سەرۆك بارزانیی لە یارمەتیدانی دۆزی كورد و پڕۆسەی ئاشتی لە باكوور و هەروەها هەوڵدان بۆ یەكگرتنی لایەنە كوردییەكانی ڕۆژئاوا بەرز نرخاند. سەرۆكی شارەوانیی ئاگری داوایشی لە سەرۆك بارزانی كرد كە هەموو لایەك هەوڵەكانیان بخەنە گەڕ بۆ بەستنی كۆنگرەی نەتەوەیی.
لە بەرانبەردا سەرۆك بارزانی بەخێرهاتنی سەرۆكی شارەوانیی ئاگری كرد و خۆشحاڵیی خۆیشی نیشاندا لەوەی دۆزی كورد بە ڕێكاری ئاشتییانە لە توركیا بەرەو پێشەوە چووە و ئەوەی خستەڕوو كە لە توركیا هەنگاوی باش بۆ كرانەوە و چارەسەری كێشەی كورد نراوە. سەرۆك بارزانی لەبارەی خەباتی گەلی كورد ئاماژەی بەوەدا كە خەباتی چەكداریی گەلی كورد لەپێناو بەرگریكردن لە مانەوە و پاراستنی ناسنامە بووە. ئێستا كە كورد توانی بە خەبات و كۆڵنەدانی خۆی ناسنامەی خۆی بپارێزێ پێویستە لەڕێی سیاسی و بەهۆی ئاشتییەوە مافەكانی مسۆگەر بكات. سەرۆك بارزانی لە درێژەی قسەكانیدا جەختی لەوە كردەوە كە لە ئاشتیدا دەستكەوتی مەزنتر بەدی دێن و بۆ سەرخستنی ئاشتیش دەبێ هەموو لایەك پشوودرێژ بین و دەبێ هاوكاری ئەو كەسانە بین كە دەرفەت بۆ ئاشتی دروست دەكەن. هەروەها نابێ بیانوو بدەینە دەست شۆڤینی و فاشیستەكان بۆ ئەوەی لە ناوچەكەدا شەڕی نێوان نەتەوەكان هەڵبگیرسێنن. لەگەڵ ئەوەیشدا گەلی كورد تەعەدا لە كەس قبوول ناكات و لە بەرانبەر زوڵم و داگیركاریدا بەرگری لەخۆی دەكات.
سەرۆك بارزانی بەرانبەر بە ئاییندەی گەلی كورد گەشبینیی خۆی نیشاندا و ڕایگەیاند كە ئێستا گەلی كورد لە ئاستی جیهانیدا ناوبانگێكی زۆر باشی هەیە. كورد هەر لە كۆبانێ هەتا خانەقین بە ئیمكانیاتی كەم توانی بەرانبەر تیرۆریستان بوەستێ و تێكیانبشكێنێت. لەبارەی چوونی پێشمەرگە بۆ كۆبانێ هێمای بەوەدا كە چوونی پێشمەرگە بۆ یارمەتیدانی كۆبانێ هەستی نەتەوەیی كوردانی بەرز كردەوە و یەكگرتوویی كوردی بەهێزتر كرد و ئەوەیشی دووپات كردەوە كە هێزی ئێمە لە یەكگرتووییماندایە و ئەگەر بمانەوێ گەلێكی ئازاد بین دەبێ یەكبگرین.
لەبارەی ڕۆژئاوای كوردستانیش سەرۆك بارزانی ئەوەی بۆ سەرۆكی شارەوانیی ئاگری باس كرد كە جیوگرافیای ڕۆژئاوا و دووربوونی ناوچە كوردییەكان لە یەكتر وا دەخوازێ كە هەموو هێز و لایەنەكان لەگەڵ یەكتر بن. هەر لە سەرەتای قەیرانی سووریا بە كوردانی ڕۆژئاوامان ڕاگەیاند كە بەیەكەوە بن و نەبنە دوو بەرە و هەر بڕیارێك كە ئێوە بیدەن ئێمە پاڵپشتیتان دەكەین. سەرۆك بارزانی ئەوەیشی خستەڕوو كە لە دوای هێرشی تیرۆریستان بۆ سەر ڕۆژئاوا چۆن پاڵپشتی پێشمەرگە بووین ئەوەهایش هاوكار و پاڵپشتی ڕۆژئاوا بووین.
لە بەشێكی دیكەی قسەكانیدا سەرۆك بارزانی جەختی لەسەر پێویستیی بەستنی كۆنگرەی نەتەوەیی كردەوە.
دوایین هەواڵەکان
- نوێنەری حکومەتی هەرێم لە ئێران: سەردانەکەی پزیشکیان ئاماژەیە بۆ گرنگیدانی ئێران بە هەرێمی کوردستان
- ههرێمى كوردستان و ئێران جهخت له بره‌ودان به پهيوهندييهكانيان دهكهنهوه
- سهرۆک نێچیرڤان بارزانی: سەردانی سەرۆک کۆماری ئێران مێژوویی بوو
- نازم دەباغ له وتووێژ له‌گه‌ڵ ئاژانسی ئیرنا: مەسعوود پزشکیان سەردانی هەولێر دەکات
- نازم دەباغ: کاتی سەردانی پزیشکیان بۆ عێراق دیار نییە
- «سەلام رشدی» له‌گه‌ڵ شاندی یهکێتی هاورده و ناردنکارانی لقی هه‌ولێر کۆبۆوه
- سه‌رۆك نێچيرڤان بارزانى: ههميشه پشتيوانى و بهرگرى له مافهكانى ئێزدييان دهكهين
- سهرۆک نێچیرڤان بارزانی له‌گه‌ڵ باڵیۆزی یهکێتیی ئهورووپا کۆبووهوه
- سه‌رۆك نێچيرڤان بارزانى له‌گه‌ڵ باڵيۆزى نهمسا كۆبووهوه
- سه‌رۆك نێچيرڤان بارزانى سوپاسى جهنهرال ڤاول ده‌كات