ئەمڕۆ سێشەممە 2015/4/14 لە هەولێر قوباد تاڵەبانی جێگری سەرۆك وەزیرانی هەرێمی كوردستان پێشوازی لە شاندێكی پەرلەمانی ئەڵمانیا كرد كە لە پەرلەمانتارانی پارتەكانی كریستیان دیموكرات و سۆشیال دیموكرات و پارتی چەپ وپارتی سەوزی ئەڵمانی پێكهاتبوون و بە مەبەستی لە نزیكەوە ئاگاداربوون لە رەوشی سەربازی و مرۆیی و ئابووری، سەردانی هەرێمی كوردستانیان كردووە.
لە دیدارێكدا شاندی میوان خۆشحاڵی خۆیان دەربڕی كە سەردانی هەرێمی كوردستانیان كردووە و ئاماژەیان بەوە كرد كە هەرچەندە شەڕێكی قورس بەرۆكی هەرێمی گرتووە و قەیرانێكی قورسی دارایی ڕووی تێكردووە، بەڵام حكوومەتی هەرێم توانیویەتی هێمنی و ئاسایشی ناوچەكە بپارێزێت و بە شێوەیەكی ڕێك و پێك جێگەی حەوانەوە بۆ ئەو ئاوارە و پەنابەرانە دابین بكات كە لە ترسی تیرۆر ڕوویان لە هەرێم كردووە و هاوكاری و خزمەتگوزاری پێشكەشكردوون و ئەم كارەی حكوومەتی هەرێمیشیان بەرز نرخاند. هەروەها جەختیان لەوە كردەوە كە وەك پەرلەمانی ئەڵمانیا بڕیاریان داوە لە هاوكاریكردنی هەرێمی كوردستان لەڕووی سەربازی و مرۆییەوە بەردەوام بن و ئەوەشیان خستەڕوو كە دوای گەڕانەوەیان بۆ وڵاتەكەیان ڕاپۆرتی خۆیان پێشكەش بە پەرلەمانی ئەڵمانیا دەكەن بۆئەوەی لە پشتگیریكردنی هەرێمی كوردستان بەردەوام بن.
شاندی میوان هەروەها ئاماژەی بەوە كرد كە هەرچەندە هەرێمی كوردستان ڕووبەڕووی هێرشێكی توندی تیرۆریستان بووەتەوە، بەڵام بە هەموو شێوەیەك بەرگری لە بنەماكانی مافی مرۆڤ و دیموكراسی و ئازادی دەكات و پێشمەرگە بەوپەڕی نەبەردی و قارمانییەوە ڕووبەڕووی تیرۆریستان بووەتەوە و هەموو هێرش و پلانەكانی ڕووبەڕووی شكەستن و لەناوبردن كردووەتەوە. لە هەمات كاتدا دڵخۆشی و دەستخۆشی خۆشیان بۆ پێكەوەژیانی ئایین و نەتەوەكان لە هەرێمی كوردستان دەربڕی كە لە ناوچەكەدا بێ هاوتایە.
لای خۆی جێگری سەرۆكی ئەنجومەنی وەزیران سەرەڕای پیشاندانی خۆشحاڵی بەرامبەر سەردانی شاندی پەرلەمانی ئەڵمانیا بۆ هەرێمی كوردستان، هەروەها ئاماژەی بەوە كرد كە ئەڵمانیا لە كاتە سەختەكاندا هاوكاری هەرێمی كردووە بە تایبەت لە ڕووی سەربازی و مەشقپێكردنی پێشمەرگە كە كاریگەرییەكی تەواوی لەسەر بەرەكانی جەنگ لە بەرژوەندی هەرێمی كوردستان هەبووە و داوایكرد كە پشتگیری و هاوكارییەكانیان بەردەوام بن چونكە هەرچەندە پێشمەرگە لە گشت بەرەكانی جەنگ بەسەر تیرۆریستان سەركەوتووە و پانتاییەكی زۆری خاكی هەرێمی كوردستانی لێ پاك كردووەتەوە، بەڵام لە هەمان كاتدا هەڕەشەی تیرۆر كۆتایی نەهاتووە، بۆیە پێویستە هاوكارییەكان زیاتر ببن بۆئەوەی ئەو مەترسییە بە یەكجاری بنبڕ بكرێت. بەڕێز جێگری سەرۆك وەزیران هەروەها كورتەیەكی لەبارەی بارودۆخی ئابووری و كێشەكانی ئابووری و سیاسی نێوان هەرێمی كوردستان و بەغدا لە ڕابردوودا باسكرد.
گفتوگۆكردنی ئەو ڕەوشە سەختەی كە ئێستا هەرێمی كوردستان و ناچەكەی بە گشتی گرتووەتەوە، لایەنێكی دیكەی دیدارەكە بوو و لەمبارەیەشەوە چەندین بیروبۆچوون خرانەڕوو و هەڵسەنگاندن بۆ بارودۆخەكە بەشێوەیەكی گشتی كرا.
هەریەك لە بەڕێزان كەریم سنجاری وەزیری ناوخۆ، دكتۆر عەلی سندی وەزیری پلاندانان، دكتۆر رێكەوت حەمە رەشید وەزیری تەندروستی و سەفین دزەیی وتەبێژی حكوومەتی هەرێمی كوردستان ئامادەی دیدارەكە بوون.
ئەمڕۆ پێنجشەممە 2ـی 4ـی 2015 بەڕێز مەسعود بارزانی سەرۆكی هەرێمی كوردستان دەیەمین پێشانگای ساڵانەی نێودەوڵەتیی كتێبی لە شاری هەولێر كردەوە. ئەم پێشانگایە لە ژێر چاودێریی سەرۆك بارزانی و بە بەشداری زیاتر لە 200 دەزگەی چاپ و بڵاوکردنەوە و ناوەندی ڕۆشنبیریی جیهانی و عەرەبی و ناوچەیی و عێراقی و كوردستانی كرایەوە. پێشانگاکە لەلایەن دەزگای ئەلمەدا و بە سپۆنسەریی چەند کەناڵێکی ڕاگەیاندن بەڕێوە دەچێت و زیاتر لە ٧٠٠ هەزار ناونیشان کتێب نماییش کراون.
شایەنی باسە هەر یەک لە بەڕێزان فریاد ڕەواندی وەزیری ڕۆشنبیریی عێراقی فیدراڵ و جێگری نوێنەری ڕێکخراوی نەتەوە یەکگرتووەکان لە عێراق و ژمارەیەكی زۆری كەسایەتیی سیاسیی عێراقی و کوردستانی و و كونسوڵ و نوێنەرانی وڵاتان لە هەولێر و ڕۆشنبیران ئامادەی کردنەوەی دەیەمین پێشانگەی نێودەوڵەتیی کتێب بوون.
بەمەبەستى هەڵسەنگاندنى رەوشى پەنابەرانى سوریا و کۆکردنەوەى هاوكاری و کۆمەکى زیاتر بۆ پەنابەرانی سوریا، شاندێكی هەرێمی كوردستان بەسەرۆكایەتی فەلاح مستەفا بەرپرسی پەیوەندیەكانی دەرەوە لە چوارچێوەی شاندی عێراق بە سەرۆكایەتی بەڕێز د. ئەیاد عەلاوی جێگرى سەرۆک کۆمارى عیراق بەشداریان لە سێیەمین كۆنفڕانسی نێودەوڵەتی وڵاتانی كۆمەك بەخش بۆ ئاوارەكانی سوریا لە کوێت کرد كە بە سەرپەرشتی ئەمیری كوێت و بەهاوبەشی لەگەڵ سكرتێری گشتی نەتەوە یەكگرتووەكان سازكرا.
شایانی باسە كۆنفڕانسەكە بە ووتاری میری كوێت شێخ صباح احمد جابر ئەلسەباح دەستی پێكرد كەتیایدا سوپاس و پێزانینی خۆی ئاڕاستەی بەشداربووان و وڵاتانى كۆمەك بەخش و وڵاتانی دراوسێی وسوریا كرد، میرى کوێت بەڵێنی بەخشینی 500 ملیۆن دۆلاریدا و دواتر بەڕێز بان کى موون سكرتێری گشتی نەتەوە یەكگرتووەکان و بەشداربووانی كۆنفڕانس لە ووتارەكانیان رۆڵی وڵاتانی دراوسێی سوریا: عێراق و هەرێمی كوردستان و توركیا و ئەردەن و لوبنان و میسریان بەرز نرخاند و سوپاسیان كردن بۆ پێشوازی كردن لەو ژمارە زۆرەی ئاوارەی سوریا و پێشكەش كردنی خزمەتگوزاری و پێداویستی بۆیان.
هاوكات لە میانەی كۆنفڕانسەكەدا تیشك خرایە سەر رەوشی ئاوارەكان و قەیرانی سوریا و بەرپرسیاریەتی كۆمەڵگای نێودەوڵەتی لەبەرامبەر قەیرانی سوریا و پێویستی دۆزینەوەی چارەسەری سیاسی بۆ سوریا و هاوكات پابەندبوون بە پێشكەش كردنی هاوكاری مرۆیی و تەرخانكردنی بودجەی تایبەت بە پەرەپێدان و بەردەوامیدان بە پێشكەشكردنی هاوكاری مرۆیی بە ئاوارەكانی سوریا لەو وڵاتانە و لە ناوەوەی سوریا.
شایانی باسە ووتاری عێراق لەلایەن بەڕێز ئەیاد عەلاوی جێگری سەرۆك كۆماری عێراق پێشكەش كرا و تیشكی خستە سەر رەوشی پەنابەرانی سوریا و ئاوارەكانی ناوخۆی عێراق لە هەرێمی كوردستان و داوای هاوكاری و كۆمەكی زیاتری كرد بۆ ئاوارەكان و هاوكات لەسەر داوای شاندی هەرێمی كوردستان پێشنیاری سازكردنی كۆنفڕانسێكی نێودەوڵەتی تایبەتی كرد لەسەر رەوشی پەنابەرانی سوریا و ئاوارەكانی ناوخۆی عێراق لە هەرێمی كوردستان و بەشەكانی تری عێراق.
لە میانەی كۆنفڕانسەكەدا كە زۆربەی وڵاتانی كۆمەك بەخش ئامادە بوون، جێگری یەكەمی سەرۆك وەزیرانى کوێت و سكرتێری گشتی نەتەوە یەكگرتووەكان رایانگەیاند كە بەڵێنی بەخشینی بڕی 3.8 ملیار دۆلاری ئەمریكی دراوەو وڵاتە كۆمەك بەخشەكان بەڵنیاندا كە لە سەر هەردوو ئاستی ڕاستەوخۆ و نەتەوە یەكگرتووەكان پابەندبن و بەردەوام بن لە هاوكاریكردن و كۆمەك كردنی وڵاتانی دراوسێی سوریا و پەنابەرانی سوریا بۆ كەمكردنەوەی كەمێك لە ئێش و ئازاری ئەو هاوڵاتیانە.
لە پەراوێزی كۆنفڕانسەكەدا فەلاح مستەفا سەرۆکى شاندى هەرێمى کوردستان ژمارەك كۆبوونەوە و دیدارى هاوبەشى لەگەڵ سەرۆك وەزیرانی ئەردەن و سەرۆك وەزیرانی لوبنان و عبداللە معتوق راوێژكاری دیوانی ئەمیری كوێت و نێردەی تایبەتی سكرتێری گشتی نەتەوە یەكگرتووەكان بۆ كاروباری مرۆیی ئەنجامدا.
هەر لە پەراوێزى ئەم کۆنفڕانسە نێودەوڵەتیە بەرپرسى پەیوەندیەکانى دەرەوەى حکومەت و شاندى یاوەرى کە پێکهاتبوو لە بەڕێزان سەلیم پاشا راوێژکار لە فەرمانگەى پەیوەندیەکانى دەرەوەو هۆشەنگ محمد بەرێوەبەرى پێشکەوتوو لە فەرمانگە لەگەڵ وەزیرانى دەرەوەى چەند وڵاتێکى بەشداربووى کۆنفڕانس و ژمارەیەک لە ئاژانسى نەتەوە یەکگرتووەکان بیروڕایان ئاڵوگۆڕ کرد لەسەر پرسى ئاوارەو پەنابەران لە هەرێمى کوردستان رەوشى ئەمڕۆى هەرێمى کوردستان و عیراق و ناوچەکە.
جێگەى باسە دووەم جارە شاندى هەرێمى کوردستان بەشدارى کۆنفڕانسى نێودەوڵەتى وڵاتانى کۆمەک بەخش بۆ ئاوارەکانى سوریا دەکات..
ئەمڕۆ شەممە ٢٨/٣/٢٠١٥ فەلاح مستەفا بەرپرسى پەیوەندیەکانى دەرەوەى حکومەت پێشوازى لە بەڕێز ژۆن ئازلبۆرن وەزیرى دەرەوەى لۆکسمبۆرگ و شاندێکى یاوەرى کرد.
لە دیدارێکدا کە کاروان جەمال جێگرى بەرپرسى فەرمانگەى پەیوەندیەکانى دەرەوەو دلاوەر ئاژگەیی نوێنەرى حکومەتى هەرێم لە بەلجیکاو ژماریەک لە راوێژکاران و بەڕێوەبەران لە فەرمانگە ئامادەبوون، جەخت لەسەر بەردەوامى پشتیوانى نێودەوڵەتى بۆ هەرێمى کوردستان و ئاڵوگۆڕى سەردانەکان و پەرەپێدانى پەیوەندیەکانى نێوان هەردوولا کرایەوە.
بەرپرسى پەیوەندیەکانى دەرەوە پوختەیەکى دەربارەى مێژووى هەرێمى کوردستان و نەهامەتیەکانى چەند دەیەى رابردوو بۆ شاندى میوان خستەڕوو، گووتى هەرچەندە رووبەڕووى زۆر کێشەو ئاستەنگ بووەتەوە، بەڵام لە دەرئەنجامى لێهاتووى سەرکردایەتى سیاسى و خۆڕاگرى گەلى کوردستان لە قۆناغە جیاجیاکاندا توانیویەتى بگاتە ئەم قۆناغەى ئێستا. هاوکات جەختى لە سیاسەتى حکومەتى هەرێمى کوردستان بۆ پەیوەندی دۆستانە لەگەڵ کۆمەڵگەى نێودەوڵەتى لەسەر بنەماى رێزگرتن و بەرژەوەندى هاوبەش کردەوە.
سەبارەت بە پەیوەندیەکانى هەولێر و بەغدا گووتى هەرێمى کوردستان هەمیشە دەرفەتى داوە بۆ دیالۆگ و چارەسەرکردنى پرسەکان و بەردەوام دەبێ بۆ گەیشتن بە لێکتێگەیشتن بۆ هاوبەشى کردنى راستەقینە لە دەسەڵات. گووتیشى لە عێرقدا پێویستمان بە شێوازێکى نوێ بۆ پێکەوەژیان هەیەو پێویستە پەیوەندیەکان لەسەر بنەمایەکى دروست دابڕێژرێنەوە.
دواتر هەردوولا باسیان لە بارودۆخى ئێستاى هەرێمى کوردستان و عێراق و ناوچەکە کرد لەڕووى سەربازى و ئاسایش. هاوکات باس لە بارودۆخى ئاوارەکانى سوریا و پەنابەرانى ناوخۆ کرا لە هەرێمى کوردستان. فەلاح مستەفا گووتى لەگەڵ ئەوەى هەرێمى کوردستان لەبارودۆخێکى دارایی خراپدایە بەهۆى بڕینى ١٧% بودجەى هەرێم لەسەرەتاى ساڵى رابردووەوە، زیاتر لە ١.٥ ئاوارەو پەنابەرى لەخۆگرتووە. گووتیشى حکومەتى عێراق وەک پێویست بەدەنگ دابینکردنى پێداویستیەکانی ئەو لێقەوماوانەوە نەهاتووە، بۆیە دواى کرد کە ووڵاتى لۆکسمبۆرگ و ووڵاتانى دیکەى جیهان هاوکارى زیاتر پێشکەش بە هەرێمى کوردستان بکەن. لەم رووەشەوە وەزیرى دەرەوەى لۆکسمبۆرگ جەختى لەسەر بەردەوام بوونى ووڵاتەکەى بۆ پێشکەشکردنى هاوکارى مرۆیی بۆ هەرێمى کوردستان کردەوە.
فەلاح مستەفا هیواى خواست کە لۆکسمبۆرگ و کۆمەڵگاى نێودەوڵەتى پشتگیرى لە هێزى پێشمەرگەى کوردستان بکەن کە ئەمڕۆ لەجیاتى جیهانى ئازاد شەڕى تیرۆرستانى داعش دەکات. هاوکات داواى کرد کە مەشق و راهێنان بە هێزەکانى پێشمەرگە بکرێت و پێداویستیە سەربازیەکانیان بۆ دابین بکرێ.
لە تەوەرێکى دیکەى دیدارەکەدا فەلاح مستەفا تیشکى خستەسەر ئەو دەرفەت و بوارانەى کە دەکرێ ببنە دەروازەى پەرەپێدانى پەیوەندیەکانى نێوان هەرێمى کوردستان و ووڵاتى لۆکسمبۆرگ، ئەوەش بەسوود وەرگرتن لە دەرفەتەکانى وەبەرهێنان و بازرگانى لە هەرێم لە لایەن کۆمپانیاو وەبەرهێنەرانى لوکسمبۆرگ، هاوکات جەخت لەسەر کارکردن بۆ ئاڵوگۆڕى ئەکادیمى و کەلتورى لە نێوان هەردوولا کرایەوە.
هەردوولا کۆک بوون لەسەر بەردەوامى هەوڵەکان بۆ بڕینى سەرچاوە داراییەکانى تیرۆرستانى داعش. هاوکات جەخت کرایەوە لەسەر ئەوەى کەوا پێویستە لەڕووى کۆمەڵایەتى و فکریشەوە شەڕ دژى تیرۆستان بکرێت.
لە کۆتایی دیدارەکەدا بەرپرسى پەیوەندیەکانى دەرەوە بە ئامادەیوونى وەیزرى دەرەوەى لۆکسمبۆرگ لە لێدوانێکدا بۆ دەزگا راگەیاندنەکانى لۆکسمبۆرگ جەختى کردەوە لەسەر ئەوەى کە حکومەتى هەرێمى کوردستان لە گفتوگۆکانى لەگەڵ بەغدا بەردەوام دەبێ بۆ گەیشتن بە تێگەیشتنى هاوبەش و بەشدارى راستەقینەى لە دەسەڵاتى سیاسى و دابەش کردنى داهات بە شێوەیەکى دادپەروەرانە.
جێگەى باسە سەرلەبەیانى ئەمڕۆ ژۆن ئازلبۆرن وەزیرى دەرەوەى لۆکسمبۆرگ و شاندى یاوەرى لە رێگەى فڕۆکەخانەى نێودەوڵەتى هەولێر گەیشتنە هەرێمى کوردستان و لەلایەن فەلاح مستەفا بەرپرسى پەیوەندیەکانى دەرەوەى حکومەت پیشوازیان لێکرا.
لە چوارچێوەى سەردانەکەیان بۆ هەرێمى کوردستان بەڕێز ژۆن ئازلبۆرن وەزیرى دەرەوەى لۆکسمبۆرگ و شاندى یاوەرى هاوڕێ لەگەڵ فەلاح مستەفا بەرپرسى پەیوەندیەکانى دەرەوەى حکومەت و دلاوەر ئاژگەیى نوێنەرى حکومەتى هەرێم لە بەلجیکا و نیهاد لەتیف قۆجەو دارا یەعقوبى سەردانى کەمپى ئاوارەکانى بەحرکەیان کرد لە هەولیر.
وەزیرى دەرەوەى لۆکسمبۆرگ لەنزیکە لە بارو گوزەرانى ئاوارەکان و خواست و داواکاریەکانیانى پرسى و هاوخەمى خۆى دەربڕى بۆ ژیانى سەختى ئاوارەکان.
فەلاح مستەفا پوختەیەکى لەسەر ژمارەى ئاوارەو پەنابەرانى نیشتەجێى هەرێمى کوردستان دابەشبوونى جوگرافى و خواست و پێداویستیەکانیان پێشکەش کردو هیواى خواست وڵاتى لۆکسمبۆرگ بڕى کۆمەک و یارمەتیە مرۆییەکانى بۆ هەرێمى کوردستان زیاد بکات بە مەبەستى کەم کردنەوەى خەم و ئازارى ئاوارەو پەنابەران.
هەمان رۆژ ژۆن ئازلبۆرن وەزیرى دەرەوەى لۆکسمبۆرگ و فەلاح مستەفا بەرپرسى پەیوەندیەکانى دەرەوەى حکومەت سەردانى قەڵاى دێرینى هەوڵێریان کرد کە وەک شوێنەوارێکى میژوویى نایاب لەسەر ئاستى جیهان دێتە ژماردن و نیشانەى بوونى شارستانیەتى کۆنە لەم شارەدا.
بەڕێزیان سەرسامى خۆى نیشاندا لە بەرامبەر ئەم شوێنەوارەو هیواى خواست هەرێمى کوردستان هەمیشە سەقامگیرى بەخۆیەوە ببینێ و لە گەشەسەندن بەردەوام بێت.
ئێوارەی ئەمڕۆ یەكشەممە 2015/9/23 بەڕێز نێچیرڤان بارزانی سەرۆك وەزیرانی هەرێمی كوردستان پێشوازی لە بەڕێز ژان ئاسڵ بۆرن وەزیری دەرەوەی لۆكسەمبۆرگ و شاندێكی یاوەری كرد.
لە دیدارێكدا باس لە ڕەوشی ئەو ئاوارانە كرا كە ڕوویان لە هەرێمی كوردستان كردووە و بارگرانییەكی زۆریان بۆ حكوومەتی هەرێمی كوردستان دروست كردووە، لە كاتێكدا هەرێم خۆی دووچاری قەیرانی دارایی و نەبوونی بودجە و شەڕێكی نەگریس بووەتەوە، وێڕای ئەمەش توانیویەتی پێشوازی لەو ئاوارانە بكات و لە هەموو بوارەكاندا هاوكاری و خزمەتگوزارییان پێشكەش بكات، بۆ ئەمەش شاندی میوان سوپاسی حكوومەتی هەرێمی كرد.
شاندی میوان هەروەها باسیان لەوە كرد كە هەموو هەوڵەكانیان دەخەنە گەڕ بۆ ئەوەی كۆمەڵگای نێودەوڵەتی و بە تایبەتی وڵاتانی ئەورووپا لە بارەی پێشكەشكردنی خزمەتگوزاری بە ئاوارەكان، یارمەتیی حكوومەتی هەرێمی كوردستان بدات و بۆ ئەم مەبەستەش هەفتەی داهاتوو لە میانی بەشداریكردنیان لە كۆنفرانسی وڵاتە كۆمەكبەخشەكان كە لە كوێت دەبەسترێت، باس لەوە دەكەن حكوومەتی هەرێمی كوردستان له ڕووی هاوكاریكردنی ئاوارەكانه‌وه، ئەركی سەرشانی خۆی جێبەجێ كردووە و پێویستە كۆمەڵگای نێودەوڵەتیش ئەركەكانی بەرامبەر هەرێمی كوردستان جێبەجێ بكات.
لە تەوەرێكی دیكەی دیدارەكەدا باس لە بارودۆخی ئێستای عیراق و بەرەكانی شەڕی دژی تیرۆریستان و ڕەوشی سیاسیی وڵات كرا و شاندی لۆكسەمبۆرگ سوپاس و پێزانینی خۆیان بۆ ئەو نەبەردییەی هێزی پێشمەرگە دەربڕی كە توانیویەتی بوێرانە ڕووبەڕووی ئەو گرووپە تیرۆیستییە ببنەوە و ئامادەییی خۆیان دەربڕی كه بۆ چارەسەركردنی بریندارانی پێشمەرگە، هاوكاریی پێویست پێشكەش بكەن.
لای خۆیەوە بەڕێز نێچیرڤان بارزانی سوپاسی شاندی میوانی كرد بۆ سەردانەكەیان و هەڵوێستەكەیانی بەرز نرخاند و دڵنیای كردنەوە كە هەرێمی كوردستان بەبێ جیاوازیی ئایین و مەزهەب و نەتەوە، باوەشی بۆ هەموو ئاوارەكان كردووەتەوە و ئاماژەی بەوەش كرد ئەو شەڕەی پێشمەرگە لە دژی تیرۆیستان دەیكات، بۆ پاراستنی بنەماكانی مافی مرۆڤە كە خەڵكی كوردستان لەگەڵ خەڵكی ئازادیخواز و مرۆڤدۆستی جیهان، هاوبەشی ئەو بنەمایانەن و بەردەوام لەبەرچاوی گرتوون.
لە تەوەرێكی دیكەی قسەكانیدا بەڕێز سەرۆك وەزیران بارودۆخی سیاسیی عێراق و بەرەكانی شەڕ و بە تایبەت ڕەوشی شاری مووسڵی بۆ شاندی میوان خستە ڕوو و جەختی لەوە كردەوە كە هەرێمی كوردستان بەردەوام دەبێت لەسەر پاراستنی ئەو ناوچانەی كە ئازادی كردوون و هه‌موو هاوكارییەكیش بۆ نەهێشتنی مەترسیی تیرۆر پێشكەش دەكات.
لە كۆتایی دیدارەكەدا بەڕێز نێچیرڤان بارزانی باسی لە پەیوەندییەكانی نێوان هەرێمی كوردستان و بەغدا كرد و لەم بارەیەشەوە چەندین بیروڕا لە نێوان هەردوولادا، ئاڵوگۆڕ كران.
به‌ناوی خوای گه‌وره و میهره‌بان
به بۆنه‌ی سه‌ری ساڵی ئاشووری بابلی و جەژنەکانی ئەکیتۆ، پیرۆزباییه‌كی گه‌رم ئاراسته‌ی خوشك و برا ئاشووری و كلدانی و سریانییه‌كانی كوردستان و عێراق و جیهان ده‌كه‌م.
ئەمساڵ لەکاتێکدا بەشداریی لەو جەژنەی ئێوەی خۆشەویست دەکەین کە گەلەکەمان بە هەموو پێکهاتە ئایینی و نەتەوەییەکانییەوە بەورڕووی شەڕێکی داسەپاوی تیرۆریستانی دڕندە و هەڵگرانی بیری نکۆڵیکاری و شۆڤینیزم بۆتەوە و بەهۆیەوە ژمارەیەکی زۆر لە خوشک و برایانی کریستیانی پارێزگای موسڵ لەگەڵ پێکهاتەکانی دیکەی ئەو پارێزگایە ناچار بوونە ماڵ و موڵکی خۆیان بەجێ بهێڵن و ڕوو لە هەرێمی کوردستان بکەن و هەرێمی کوردستانیش وەک هەمیشە نەوایەکی ئارام و ماڵی هەموو لێقەوماوانە و ئەو بەها بەرزانەی گەلەکەمان لە هەموو ناوەندە نێودەوڵەتییەکاندا بۆتە جێی ستایش و پێزانین.
لێرەوە جارێکی دیکە داوا ئێوەی خۆشەویست دەکەم بیر لە بەجێهێشتنی وڵات نەکەنەوە و دڵنیاتان دەکەمەوە کە پێشمەرگە قارەمانەکانی کوردستان وەک چۆن ئێستا تیرۆریستان تێک دەشکێنن و زۆربەی ناوچەداگیرکراوەکانیان لە دوژمنانی مرۆڤایەتی پاک کردۆتەوە و بەرگرییان لە هەموو پێکهاتەکانی ناوچە ئازادکراوەکان کردووە، لە داهاتوویشدا هەروا کوردستان سەروماڵی ئێوە و هەموو هاونیشتیمانییان دەپارێزێت و تیرۆریستانیش هیچ داهاتوویەکیان نییە و هەموو ئەوانەی ناچاربوونە ناوچەکانی خۆیان بەجێ بهێڵن، بە سەربەرزی دەگەڕێنەوە سەر ماڵ و موڵکی خۆیان.
هیوادارم ئێوەی ئازیز هه‌موو ساڵێك له‌ژێر سایه‌ی ئارامی و ئاسووده‌ییدا جه‌ژن و شادییه‌كانتان به خۆشی بگێڕن.
مسعود بارزانی
سه‌رۆكی هه‌رێمی كوردستان
31/3/2015
ئه‌مڕۆ یه‌كشه‌ممه 29/3/2015 به‌ڕێز مسعود بارزانی سه‌رۆكی هه‌رێمی كوردستان پێشوازی له ژان ئاسڵ بۆرن وه‌زیری ده‌ره‌وه و كاروباری یه‌كێتی ئه‌وڕووپای لوگزەمبۆرگ و شاندی یاوه‌ری كرد.
له‌م دیداره‌دا وه‌زیری ده‌ره‌وه‌ی لوگزەمبۆرگ ستایشی سه‌ركه‌وتنه‌كانی پێشمه‌رگه‌ی كرد و پێزانینی خۆشی ده‌ربڕی به‌رامبه‌ر ئه‌و یارمه‌تییه‌ی هه‌رێمی كوردستان پێشكه‌شی ئاواره‌كانی كردووه و رایگه‌یاند، جیهان به‌ڕێزه‌وه سه‌یری ڕۆڵی كوردستان له حه‌واندنه‌وه‌ی ئاواره‌كان و پاراستنی پێكهاته نه‌ته‌وه‌یی و ئایینیه‌كان ده‌كات. هه‌روه‌ها ستایشی ئه‌و سه‌قامگیری و پێشكه‌وتنانه‌ی كرد، كه كوردستان به‌خۆیه‌وە بینیوویەتی و پابه‌ندی بنه‌ماكانی دیموكراسی و پێوه‌ره‌كانی مافی مرۆڤ بووه. له به‌شێكی دیكه‌ی قسه‌كانیدا ئه‌وه‌شی به سه‌رۆك بارزانی راگه‌یاند، كه لەنێو وڵاتانی ئەورووپاییدا مەیلێكی زۆر هه‌یه بۆ یارمه‌تیدانی هه‌رێمی كوردستان له‌ڕووی سه‌ربازی و هاوكاری مرۆییه‌وه، وڵاته‌كە‌شی له پشتیوانی و هاوكاری مرۆیی بۆ هه‌رێمی كوردستان به‌رده‌وام ده‌بێت و رایشیگه‌یاند، به هه‌ماهه‌نگی له‌گه‌ڵ وڵاتی ئه‌ڵمانیادا ئاماده‌ی چاره‌سه‌ركردنی پێشمه‌رگه برینداره‌كان و دابینكردنی پێداویستی پزیشكین.
لە بەشێكی دیكەی قسەكانیدا وه‌زیری ده‌ره‌وه‌ی لوگزەمبۆرگ ئاماژه‌ی به‌وه‌دا، كه له ئه‌وڕووپادا رێزێكی زۆر بۆ پێشمه‌رگه هه‌یه و رایگه‌یاند، ئێمه باش له‌و ئه‌ركه قوڕسه ده‌گه‌ین، كە پێشمەرگە بەجێیگەیاندووە به‌ڵام ئه‌گه‌ر پێشمه‌رگه نه‌بوایه، داعش نه‌ده‌شكا. ئه‌و شه‌ڕه به‌ته‌نها شه‌ڕی كوردستان نییه و چونكه داعش هه‌ڕه‌شه‌یه بۆ هه‌مووان بۆیە ده‌بێ به هه‌موو لایه‌ك روبه‌ڕووی ئه‌و هه‌ڕه‌شه جیهانییه ببینه‌وه.
له به‌رامبه‌ردا سه‌رۆك بارزانی سوپاسی هه‌ڵوێستی وڵاتانی دۆستی هه‌رێمی كوردستانی كرد و رایگه‌یاند هه‌رچه‌نده كوردستان له شه‌ڕێكی قورسدا بوو، به‌ڵام یارمه‌تیدانی ئاواره‌كانی به ئه‌ركێكی نیشتمانی و مرۆیی زانی و له‌و ئه‌ركه‌یشدا به‌رده‌وام ده‌بێت. سەرۆك بارزانی جه‌ختیشی له‌وه كرده‌وه، كه پێشمه‌رگه به شانازییه‌وه شه‌ڕی تیرۆریستان ده‌كات و توانیشی ئوستوره‌ی داعش بشكێنێ و دووپاتی كردەوە داعش هه‌ڕه‌شه‌یه بۆ هه‌موو لایه‌ك و روبه‌ڕووبونه‌وه‌یشی ته‌نها به ڕێگەی سه‌ربازی ناكرێ، به‌لكو ده‌بێ له‌ڕووی فكریشه‌وه شه‌ڕی بكرێ و سه‌رچاوه داراییه‌كانی وشك بكرێن. ئه‌وه‌شی خسته‌ڕوو، كه نابێ رێگه بدرێ تیرۆریستان له وڵاتانی ئه‌وڕووپادا ئازادییه‌كان بۆ مەبەستی ئاسانكاریی كاری تیرۆریستی بەكار بهێنن.
بارودۆخی سیاسی و قه‌یرانه‌كانی ناوچه‌كه و په‌یوه‌ندییه‌كانی نێوان هه‌رێمی كوردستان و به‌غدا ته‌وه‌رێكی دیكه‌ی دیداره‌كه بوو، له‌وباره‌وه سه‌رۆك بارزانی ئاماژه‌ی به‌وه‌دا، كه گه‌لی كوردستان خاوه‌نی كولتووری پێكه‌وه‌ژیان و لێبورده‌ییه و به هیچ شێوه‌یه‌ك نابێته به‌شێك له‌و ململانێ تایفییه‌ی له ناوچه‌كه‌دا له ئارادایه، هه‌روه‌ها دووپاتی كرده‌وه، كه تیرۆر و فه‌رهه‌نگی توندڕۆیی به هیچ شێوه‌یه‌ك ناتوانێ جێ پێی خۆی له كوردستان بكاته‌وه. سه‌رۆكی هه‌رێمی كوردستان له‌باره‌ی په‌یوه‌ندییه‌كانی هه‌رێمی كوردستان و به‌غدا ئاماژه‌ی به‌وه‌دا، كه رێككه‌وتنێك لە نێوان هەردوولا هه‌یه و لایه‌نی كوردستانی پێوه‌ی پابه‌نده و چاوه‌ڕێی جێبه‌جێكردنی ئه‌و رێككه‌وتنه‌یه.
له كۆتایی دیداره‌كه‌دا سه‌رۆك بارزانی لێدوانێكی رۆژنامه‌وانی دا. بۆ بینی لێدوانه‌كه ئێره كلیك بكه.
دوایین هەواڵەکان
- نوێنەری حکومەتی هەرێم لە ئێران: سەردانەکەی پزیشکیان ئاماژەیە بۆ گرنگیدانی ئێران بە هەرێمی کوردستان
- ههرێمى كوردستان و ئێران جهخت له برهودان به پهيوهندييهكانيان دهكهنهوه
- سهرۆک نێچیرڤان بارزانی: سەردانی سەرۆک کۆماری ئێران مێژوویی بوو
- نازم دەباغ له وتووێژ له‌گه‌ڵ ئاژانسی ئیرنا: مەسعوود پزشکیان سەردانی هەولێر دەکات
- نازم دەباغ: کاتی سەردانی پزیشکیان بۆ عێراق دیار نییە
- «سەلام رشدی» له‌گه‌ڵ شاندی یهکێتی هاورده و ناردنکارانی لقی ههولێر کۆبۆوه
- سه‌رۆك نێچيرڤان بارزانى: ههميشه پشتيوانى و بهرگرى له مافهكانى ئێزدييان دهكهين
- سهرۆک نێچیرڤان بارزانی له‌گه‌ڵ باڵیۆزی یهکێتیی ئهورووپا کۆبووهوه
- سه‌رۆك نێچيرڤان بارزانى له‌گه‌ڵ باڵيۆزى نهمسا كۆبووهوه
- سه‌رۆك نێچيرڤان بارزانى سوپاسى جهنهرال ڤاول ده‌كات