بەرپرسێکی یەکێتی لە حکوومەت: خەونە بڵێین ئێران دەستی لەخۆپیشاندانەکانی عێراق هەیە

بەرپرسێکی یەکێتی لە حکوومەتی هەرێمی کوردستان رای گەیاند، ”خەونە“ ئەگەر کەسانێک پێیان وابێت، کۆماری ئیسلامیی ئێران دەستی لە خۆپیشاندانەکانی عێراقدا هەیە و بە گوتەی خۆی، ئاڵۆزیی رەوشی عێراق لە قازانجی ئێران نییە.

نازم دەباغ، نوێنەری حکوومەتی ھەرێمی کوردستان لە تاران کە لەسەر پشکی یەکێتیی نیشتمانیی کوردستانە، بە (باسنیوز)ی ڕاگەیاند ”خەونە کە بڵێین ئێران دەستی لە خۆپیشاندانەکانی عێراقدا هەیە، ئایا ئەوانەی خۆپیشاندان دەکەن سەر بە ئێران؟ من پێموانییە و بەپێی شارەزایی خۆم، بەڵکوو پێموایە ئێران ھەوڵ و کۆششی بۆ ئەوەیە لە عێراق و مەرزەکانی خۆی پشێوی نەبێت، چونکە بتەوێت و نەتەوێت، ڕەنگدانەوەی لەسەر ئێران دەبێت“.

ڕوونیشی کردەوە کە تێکدانی سیستمی عێراق لە زیانی ئێرانە، چونکە ”حکوومەتی عێراق شیعەیە“.

بە بڕوای نازم دەباغ، ئەم بارودۆخەی لە عێراقدا هەیە، لە قازانجی ڕێکخراوی تیرۆریستیی داعشە و دەڵێت: ”سەیرکەن چالاکییەکانی داعش لە عێراقدا زیادی کردووە، ئایا ئێران چالاکییەکانی داعش دەکا؟“.

باڵیۆزی فەڕه‌نسا بە بۆنەی رۆژی نەتەەوەیی وڵاتی فەڕەنسا بانگهێشتنامەی ئاراستەی "نازم دەبا‌غ" نوێنەری حکوومەتی هەرێمی كوردستان لە تاران کرد.

رۆژی شەممە ١٤/٧/٢٠١٨ بە بۆنەی رۆژی نەتەەوەیی فەڕەنسا، باڵیۆزخانەی وڵاتی فەڕەنسا لە تاران ئاهەنگێکی گێرا و بانگهێشتنامەی ئاراستەی گەورە بەرپرسانی ئێرانی و باڵیۆزی وڵاتانی جۆراوجۆری جیهان لە تاران کرا، هەروەها بانگهێشتنامەی باڵیۆزی فەڕه‌نسا ئاراستەی "نازم عومەر دەباغ" نوێنەری حکوومەتی هەرێمی کوردستان لە تاران کرا.

رۆژی نەتەوەیی فەڕەنسا، جه‌ژنێکه که له ساڵی ١٨٨٠ هه‌موو ساڵێک له ١٤ ژوئیه‌دا به‌ڕێوه‌ده‌چێت و ئه‌م جه‌ژنه سیمبولێکه له کۆتایی حکوومه‌تی پاشایه‌تی له‌م وڵاته‌دا. ئه‌م رۆژه له فه‌ڕه‌نسا پشوودای ڕه‌سمییه و له لایه‌ن باڵیۆزی فەڕه‌نساوه بۆ به‌شداریی له‌م جه‌ژنه بانگهێشتنامە ئاراستەی باڵیۆزی وڵاتانی جۆراوجۆری جیهان ده‌کرێت.

رادیۆ نەوا - لە سەرەتای ئەم هەفتەیەوە، ترانزێتی بازرگانی لە مەرزی پەروێزخانی نێودەوڵەتییەوە دەستیپێكردوە و "نازم ده‌باغ" نوێنه‌رى حکوومه‌تى هه‌رێمى کوردستان له‌ شاری تاران رایدەگەیەنێت: "كردنەوەی هەر خاڵێكی ترانزێتی بازرگانی، لە بەرژەوەندی گەشەی بازرگانی هەرێمی كوردستاندایە".

"نازم عومه‌ر ده‌باغ" نوێنه‌رى حکوومه‌تى هه‌رێمى کوردستان له‌ شاری تاران بۆ رادیۆی "نەوا" جەختی كردەوە: كردنەوەی ترانزێتی بازرگانی لە مەرزی "پەروێزخان" لە بەرژەوەندی گەشەی بازرگانیدایە، بازرگانان دەتوانن لە ماوەیەكی كورت و بە تێچوویەكی كەم، كاڵا و شتومەكەكانیان هاوردە بكەن و ئەم هەنگاوەش لە بەرژەوەندیی جوڵەی بازرگانی و بازرگانانی هەرێمدایە.

نوێنه‌رى حکوومه‌تى هه‌رێمى کوردستان له‌ وڵاتی ئێران راشیگەیاند: بێجگە لە بازرگانیكردنی چەك و تەقەمەنی و خواردنەوە كهولییەكان و مادە هۆشبەرەكان، كۆماری ئیسلامی ئێران دەروازەی بازرگانی و ترانزێت و هاوردە و هەناردەكردنی لە چوارچێوەی یاسادا، بە ڕووی بازرگاناندا واڵایە بۆ هەموو كاڵا و شتومەكێك.

سالم سەلیم

لینکی هه‌واڵ: 

http://www.radionawa.com/Ku/all-detail.aspx?jimare=6604

 "نازم ده‌باغ" نوێنه‌رى حکوومه‌تى هه‌رێمى کوردستان له‌ تاران، له‌گه‌ڵ خاتوو "کارا جۆنسۆن مالینا" جێگری بەرپرسی نووسینگەی یونامی لە وڵاتی ئێران دیداریی کرد. 

خاتوو "کارا جۆنسۆن مالینا" جێگری بەرپرسی نووسینگەی یونامی لە تاران، ئەمرۆ یەکشەمە رێکەوتی ٨/٧/٢٠١٨ سەردانی نوێنەرایەتی حکوومەتی هەرێمی کوردستان له‌ تارانی کرد و له لایه‌ن "نازم عومەر ده‌باغ" نوێنەری حکوومه‌تى هه‌رێمى کوردستان له‌ وڵاتی ئێران پێشوازی لێکرا. 

خاتوو "کارا جۆنسۆن مالینا" دەستخۆشی پێشوازیی و میواندارییەکەی کرد و وتی هەمیشە راوبۆچوونەکانی نوێنەری نوێنه‌رى حکوومه‌تى هه‌رێمى کوردستان له‌ تاران بەلامانەوە گرنگە و دەربارەی بارودۆخی عێراق و کوردستان، بەشداری کردنی کورد لە پێکهێنانی حکوومەتی ئایندەی عێراق  و پەیوەندیی نێوان بەغدا و هەولێر پرسیاری له نوێنەری حکوومه‌تى هه‌رێمى کوردستان له‌ تاران کرد.

له درێژه‌ی ئه‌م کۆبوونه‌وه‌یه‌دا "نازم ده‌باغ" نوێنه‌رى حکوومه‌تى هه‌رێمى کوردستان له‌ وڵاتی ئێران راوبۆچوونی حکوومه‌تى هه‌رێمى کوردستان بۆ بەشداری کردن لە حکوومەتی ئایندەی عێراق  ڕوونکردنەوە و ڕایگەیاند کە حکوومه‌تى هه‌رێمى کوردستان بۆ بەشداری کردنی، سوورە لە سەر پاراستنی مافەکانی خەڵکی هەرێمی کوردستان و حکوومەتی ئایندە ئەو هەڵانەی پێشوو دووبارە نەکاتەوە بۆ ئەوەی گەلی عێراق بە هەموو چین و توێژەکانییەوە لە ئارامی و ئاسوودەیی ژیان بەسەربەرن.

گرتنەوەی ئاوی زێی بچوك لە لایەن ئێرانەوە بەردەوامە و بەڕێوەبەریی ئاوی ڕاپەڕینیش مەترسیەك لەسەر دابینكردنی ئاوی خواردنەوە ئاشكرادەكات و ڕاشیدەگەیەنێت: "ئاستی ئاو دابەزیوە"، "نازم دەباغ" نوێنەری‌ حكومەتی‌ هەرێمی کوردستان لە تارانیش ڕایدەگەیەنێت: "ئێران بە گوێرەی ئیستیحقاقی یاسایی ڕێژەی ئاوەكەی بەرداوەتەوە". 

ئاستی ئاو دابەزیوە

"سەلام عومەر" بەڕێوەبەری ئاوی ڕاپەڕین بە ئاژانسی هه‌واڵی سلێمانی SNNی ڕاگەیاند: "تائێستا گرتنەوەی ئاوی زێی بچوك لە لایەن ئێرانەوە بەردەوامە و بە هۆی بەرزبونەوەی پلەكانی گەرماشەوە، ئاستی ئاو لە هەرێمی كوردستان دابەزیوە".

وتیشی: "ڕۆژانە كار لە بەنداوی "خاس" لە قەزای دەكرێت، بە مەبەستی دابینكردنی ئاوی خواردنەوە بۆ شارۆچكەكە بە شێوەیەكی كاتی".

ڕاشیگەیاند: "ئەگەر ڕۆژانە كار لەو بەنداوە نەكرێت، ئەوە ناتوانرێت ئاوی خواردنەوە بۆ قەڵادزێ دابین بكرێت، تا ئێستاش بەو چارەسەرە كاتییە ئاو دابینكراوە".

مەترسی پیسبون بە ڤایرۆس هەیە

بە وتەی "سەلام عومەر"، "هەرچەندە تا ئێستا ئەو بەنداوە كاتییە و هێندە كەمینەكردوە كە مەترسی نەبونی ئاوی خواردنەوە بۆ شارۆچكەكە دروستبكات، بەڵام ئەگەر ئاستی ئاوەكە كەمبكات، ئەوە مەترسی پیسبونی ئاوەكە بەڤایرۆس و هەندێك بەكتریان دروستدەبێت".

ئەوەشی وت: "ئەگەر ڕێژەی تێكەڵكردنی مادەی پاكژكەرەوەكانی وەكوو كلۆر زیادبكرێت لە ئاوەكەدا، ئەوە مەترسی لەسەر ئاوەكە دروستدەبێت".

مەترسی لەسەر ئەم ناوچانە دروستدەبێت

بەڕێوەبەری ئاوی ڕاپەڕین ئاشكراشیكرد: "ئەگەر گرتنەوەی ئاوی زێی بچوك بەردەوامبێت، ئەوە كێشەی كەمی ئاوی خواردنەوە لە قەڵادزێ و ڕانیە و پیرەمەگرون و سلێمانی و بازیان و ناوەڕاست و خواروی عیراق دروستدەبێت.

نوێنەرایەتی حكوومەتی هەرێمی کوردستان لە تاران ڕونكردنەوە دەدات

نوێنەری حكوومەتی هەرێمی کوردستان لە تاران دوایین زانیاری لە بارەی گرتنەوەی ئاوی ڕوباری زێی بچوك لە لایەن كۆماری ئیسلامی ئێرانەوە ئاشكرادەكات.

"نازم دەباغ" نوێنەری‌ حكومەتی‌ هەرێمی کوردستان لە تاران بە ئاژانسی هه‌واڵی سلێمانی SNNی‌ ڕاگەیاند: "ئێران بە گوێرەی ئیستیحقاقاتی قانونی و بەڕەچاوكردنی هاوسێیەتی، ئێستا ئاوی زێی بچوكی بەرداوەتەوە، پێشموانییە لەوە زیاتر بگرێتەوە، بەڵام دەبێت ئەوەمان لەبەرچاوبێت بەتەواوكردنی بەنداوەكان، ئەو ڕوبارانەی بەنداوەكانی كەوتۆتەسەر ئاوەكانیان دەگیرێتەوە بۆ پڕكردنی".

ئێران وەكو توركیا ناكات

نوێنەری حكوومەتی هەرێمی کوردستان لە تاران تەئكیدیكردەوە: "گرتنەوەی ئاو پەیوەندیی بە هەرێمی کوردستان و عیراق و دواتر بە هەرێم و عیراق و ئێرانیشەوە هەیە، لەگەڵ ئەوەشدا پێموانییە ئێران وەك توركیا بكات، چونكە گرتنەوەی ئاوەكە بڕیاریی سیاسی نییە".

"نازم دەباغ"  نمونەی هێنایەوە و وتی: "بۆ نمونە وەك ئەوەی لە دەستپێكردنەوەی گەشتەكان بینیمان كە ڕێگە بە گشتەكانی توركیا بۆ هەولێر دراوە، بەڵام سلێمانی لەو بڕیارە بەدەركراوە، ئێران ئەوە ناكات".

SNN: ئەركان ـ شادان

نوێنه‌ری‌ حكومه‌تی‌ هه‌رێم له‌تاران كاتی‌ ده‌ستپێكردنی‌ ترانزێتی‌ بازرگانی نێوان ئێران و عیراق له‌مه‌رزی‌ په‌روێزخانه‌وه‌ ئاشكراده‌كات و رایده‌گه‌یه‌نێت"پێشتر ته‌نها ترانزێتی‌ سوته‌مه‌نی‌ هه‌بووه‌".

نازم ده‌باغ نوێنه‌ری‌ حكومه‌تی‌ هه‌رێم له‌تاران به‌SNNی‌ راگه‌یاند"دوای‌ ئه‌وه‌ی‌ مانگی‌ رابردوو  بڕیاردرا به‌په‌سه‌ندكردنی ترانزێتی‌ بازرگانی له‌نێوان ئێران و عیراق له‌مه‌رزی‌ په‌روێزخانه‌وه‌، بڕیاره‌ی‌ هه‌فته‌ی‌ داهاتوو ئه‌و ترانزێته‌ نێوده‌وڵه‌تییه‌ ده‌ستپێبكات".

"نازم دەباغ" نوێنەری حکوومەتی هەرێمی کوردستان لە تاران گوتی: سوپای تورکیا لە ڕێکەوتنەکانی سەردەمی حکوومەتی سەدام بۆ دەستدرێژی کردنە سەر خاکی عێراق بە شێوەیەکی خراپ کەڵک وەردەگرێت.

گرووپی نێودەوڵەتی ئاژانسی ئانا ـ ناوچە سنوورییەکانی هەرێمی کوردستانی عێراق بۆتە گۆڕەپانی نێوان هێزی پ.ک.ک و سوپای تورکیا. دوای جمووجۆڵەکانی سوپای تورکیا لە ناو خاکی سووریا و کۆنترۆڵکردنی ناوچە گرینگەکان لە باکووری ئەم وڵاتە، بەرپرسە نیزامی و سیاسییەکانی ئەنکارا هەوکات لەگەڵ پرۆپاگاندای هەڵبژاردنەکان، لە تەپڵی درێژە پێدان بە شەڕ لەگەڵ پ.ک.ک و ئەم ڕێکخراوەیەیاندا لە دەرەوە سنوورەکانی خۆیان بە تایبەت لە عێراق و لەم پێناوەدا راپۆڕتەکانی دەزگاکانی راگەیاندن و وتەی بەرپرسانی تورک هەواڵیان لە چوونەناوەی سوپای تورکیا بە درێژایی 30 کیلۆمەتر بۆ ناو خاکی هەرێمی کوردستاندا.

نازم دەباغ" نوێنەری حکوومەتی هەرێمی کوردستان لە تاران لە وتووێژ لەگەڵ گرووپی نێودەوڵەتی ئاژانسی "ئانا" لەمبارەیەوە گوتی: بوونی سوپای تورکیا لە هەرێمی کوردستان و لە ناو خاکی عێراق بابەتێکی نوێی نییە. لە سەردەمی حکوومەتی سەدامدا ڕێکەوتنەکان بوونی هەبوو کە لە هەر باروودۆخێکدا ئەگەر تورکیا پێویستی بەوە هەبوو تاکوو سوپای خۆی ڕەوانەی خاکی عێراق بکات، ئەم کردەوەیە ئەنجامبدات. بەداخەوە سوپای عێراق لەم بوارەدا هیچ کردەوەیەکی ئەنجامنەداوە و تەنیا هەنگاوەکانی سوپای تورکیای بۆ ناو خاکی عێراقی مەحکووم کردووە.

گوتیشی: بەگشتیی، بوونی سوپای تورکیا بە هۆی رێگەگرتن لە چالاکییەکانی پارتی کریکارانی کوردستان (پ.ک.ک) بووە، بەڵام لە مێژوودا تا ئێستا زیاتر لە 28 یا 29 جار سوپای تورکیا لە ڕێگای ئەو پایەگایانەی کە لە هەرێمی کوردستان هەیەتی هێرشی کردۆتە سەر پ.ک.ک کە لە زۆربەیاندا سوپای تورکیا شکستی خواردووە و پاشەکشێی کردووە و نەیتوانیوە دەسەڵاتی خۆی بەسەر هەرێمی کوردستان و ناوچەکانی دیکەی خاک عێراقدا بسەپێنێت.

نازم دەباغ" سەبارەت بەوەی کە "ئایا تورکیا مەبەستی ئەنجامدانی ئۆپڕاسیۆنی سەربازی بەربڵاوی لە ناوچەکەدا نییە؟" گوتی: تورکیا نایەتە ناوچەیەکە بە بێ دەسەڵاتدارییەوە کە بیەوێت مانۆڕی تێدابدات. ئەوان لە چوارچێوەی ئەو ڕێکەوتنانەی کە لە ڕابردوودا بوویانە دەیان جار لەو هەلوومەرجەی کە بۆیان ڕەخساوە بە شێوەیەکی خراپ کەڵکیان وەرگرتووە و هاتوونەتە ناو خاکی هەرێمی کوردستانەوە و چەند ناوچەیەکیان بۆ ماوەیەک داگیرکردووە. 

نوێنەری حکوومەتی هەرێمی کوردستان لە تاران سەبارەت بە باروودۆخی سەقامگیری و ئارامی لە هەرێمی کوردستاندا گوتی: بە پێی وتەی هەندێک لە سەرچاوەکان سەبارەت بەوەی کە هەرێمی کوردستان ئاسایش و ئارامی تێدا سەقامگیرنییە، بە پێچەوانەوە ناوچەکە زۆر ئارام و سەقامگیرە، بەڵام لە هەندێک ناوچەی سنووری بە هۆی بوونی هێزەکانی پ.ک.ک و بۆردوومانی ئەم ناوچانە لە لایەن تورکیاوە، ئێمە کوژرا و بریندارمان داوە و باغ و زەوی و زاری کوردەکان سووتاون و ئاژەڵ و مەڕووماڵاتیش لەناوچوون. وادیارە کە ئۆپڕاسیۆنی سوپای تورکیا لە هەرێمی کوردستان بە بێ ئاگاداریی حکوومەتی عێراق ئەنجامدەدرێت و تەنانەت بەرپرسانی هەرێمی کوردستانیش لە بوونی ئەم جۆرە ئۆپڕاسیۆنانە ئاگادارنین. تا ئێستا جمووجۆڵ و هێرشەکانی سوپای تورکیا لە چوارچێوەی ڕێکەوتنەکانی ئەوان لەگەڵ  حکوومەتی سەردەمی سەدامدا بووە.

گوتیشی: حکوومەتی هەرێمی کوردستان لە چوارچێوەی پاراستنی بەرژەوەندییەکانی خۆیدا چەندین جار بە توندی ناڕەزایەتیی خۆی سەبارەت بەم جۆرە ڕێکەوتنانە دەربڕیوە. و گوتوویەتی کە نابێت هێچ هێزێک لە هەرێمەوە دژی وڵاتانی دراوسێ ببێتە مایەی نائارامی و ئەم جۆرە هێرشانە ئەنجامبدرێت، بەڵام تورکیا بە هێرشکردنی هێزەکانی پ.ک.ک بۆ سەر ناوچە سنوورییەکان ناڕازییە و ئەوەی کردۆتە ئامرازێک بۆ بڵاوەپێکردنی هێزەکانی خۆی لە ناو خاکی هەرێمی کوردستاندا.

لینکی هەواڵ: 

http://www.ana.ir/news/400736

نازم دەبا‌غ بەشداریی له ئاهەنگی رۆژی نیشتیمانی وڵاتی فیدڕاسیۆنی روسیای کرد

"نازم دەبا‌غ" نوێنەری حکوومەتی هەرێمی كوردستان لە تاران، بەشداریی له ئاهەنگی رۆژی نیشتیمانی وڵاتی فیدڕاسیۆنی روسیای کرد.

"نازم دەباغ" نوێنەری حکوومەتی هەرێمی کوردستان لە تاران، رۆژی چوارشەممە 27/06/2018 لەسەر بانگهێشتی فەرمی "لێڤان دژاگاریان" Levan Dzhagaryan باڵیۆزی وڵاتی فیدڕاسیۆنی روسیای فیدراڵ لە تاران بەشداری ئاهەنگی رۆژی نیشتیمانی روسیای کرد. لەو ئاهەنگەدا ژمارەیەکی زۆر لە باڵیۆزی وڵاتانی جیهان لە تاران و بەرپرسانی باڵای کۆماری ئیسلامی ئێران تیایدا بەشداربوون.

لە لایەن نوێنەرایەتی حکوومەتی هەرێمی کوردستانه‌وه دەستە گوڵێکی شایستە بەم بۆنەویەوە پێشکەشی باڵیۆزخانەی ڕووسیا کرا و هەروەها لە لایەن "لێڤان دژاگاریان" باڵیۆزی ڕووسیا و ستافی باڵیۆزخانەکه‌وه پێشوازی گەرم له "نازم دەباغ" نوێنەری حکوومەتی هەرێمی کوردستان لە تاران کرا.