جێگری سەرۆكی ئەمەریكا لەڕێی تەلەفۆنەوە پەیوەندی بە سەرۆك بارزانی كرد
ئێوارەی ڕۆژی سێشەممە 17ـی 11ـی 2015 جۆ بایدن جێگری سەرۆكی ویلایەتە یەكگرتووەكانی ئەمەریكا لەڕێی تەلەفۆنەوە پەیوەندی بە بەڕێز مەسعود بارزانی سەرۆكی هەرێمی كوردستان كرد.
لەم پەیوەندییە تەلەفۆنییەدا جێگری سەرۆكی ویلایەتە یەكگرتووەكانی ئەمەریكا پیرۆزبایی لە سەرۆك بارزانی كرد بەبۆنەی سەركەوتنی هێزی پێشمەرگەی كوردستان لە ئۆپڕاسیۆنی ئازادكردنی شنگال و سەرسامیی خۆیشی نیشاندا بە قارەمانێتی و ئازایەتی و قوربانیدانی پێشمەرگە لە شەڕی تیرۆریستاندا.
هەر لەم پەیوەندییە تەلەفۆنییەدا جێگری سەرۆكی ئەمەریكا ئەوەی دووپاتكردەوە كە وڵاتەكەی لە پاڵپشتیكردن و یارمەتیدانی و هاوكاریی هێزی پێشمەرگەی كوردستان بەردەوام دەبێت.
سەرۆكی هەرێمی كوردستان پێشوازی لە باڵیۆزی ژاپۆن لە عێراق دەكات
ڕۆژی چوارشەممە 18ـی 11ـی 2015 بەڕێز مەسعود بارزانی سەرۆكی هەرێمی كوردستان پێشوازی لە فۆمیۆ ئیوای باڵیۆزی ژاپۆن لە عێراقی فیدڕاڵ و شاندێكی یاوەری كرد.
لە دیدارەكەدا باڵیۆزی ژاپۆن لە عێراقی فیدڕاڵ خۆشحاڵیی خۆی ڕاگەیاند بەوەی كە توانیویەتی لە نزیك بەرەكانی جەنگ دیداری لەگەڵ سەرۆك بارزانیدا هەبێت و دەستخۆشی و پیرۆزبایی خۆی و وڵاتەكەیشی بە سەرۆك بارزانی ڕاگەیاند بەبۆنەی ئازادكردنی شنگال لە دەستی تیرۆریستانی داعش لە لایەن هێزی پێشمەرگەی كوردستان. هەروەها سوپاسی گەلی كوردستان و حكوومەتی هەرێمی كرد كە بەخشندە بوون و سەرباری بوونی كێشەی قووڵی ئابووری باوەشیان بۆ سەدانهەزار ئاوارە و پەنابەر كردووەتەوە. باڵیۆزی ژاپۆن لە عێراقی فیدڕاڵ ئەوەیشی خستەڕوو كە وڵاتەكەی بایەخێكی زۆر بە ئاساییش و سەقامگیریی عێراق و ڕۆژهەڵاتی ناوەڕاست دەدات و پێزانینیشی بۆ ڕۆڵی هەرێمی كوردستان هەیە لە دابینكردنی سەقامگیری لە ناوچەكەدا.
لەبەرانبەردا سەرۆك بارزانی سوپاسی هەڵوێستی حكوومەتی ژاپۆنی كرد و هیوای سەركەوتنی بۆ باڵیۆزی ژاپۆن لە عێراقی فیدڕاڵ خواست لە ئەرك و كارەكانیدا و لە وتەیەكدا باسی لە بارودۆخی سیاسی و ئەمنیی عێراق و قۆناغی دوای شكستدانی داعش كرد و پەیوەست بە قۆناغی دوای پڕۆسەی ئازادكردنی شنگال ئاماژەی بەوەدا كە بەهۆی شەڕ و كارەساتەكان بەشی زۆری شنگال وێران بووە و پێویستە كار بۆ ئاوەدانكردنەوەی شنگال و پاراستنی لە هەڕەشەكان بكرێت و لەم ڕووەوە هێزی پێشمەرگەی و حكوومەتی هەرێمی كوردستان پشتیوانی شنگال و خەڵكی دەڤەری شنگال دەبێت. سەرۆك بارزانی لە درێژەی قسەكانیدا هێمای بە گرنگیی سەقامگیری و ئاساییش دا و جەختی لەوە كردەوە كە بە بێی سەقامگیری، پێشكەوتن و بووژانەوەی ناوچەكە بەدی ناهێت.
هەر لەم كۆبوونەوە ڕێگەچارەكانی ڕووبەڕووبوونەوەی توندڕۆیی و چارەسەركردنی قەیرانی سیاسیی عێراق تاوتوێ كرا و بیروڕایش لەبارەی پەیوەندییەكان و هەماهەنگی لە بواری ئابووری و وزە و كارەبا لە نێوان هەرێمی كوردستان و ژاپۆن ئاڵوگۆڕ كرا.
ڕوونكردنەوەیەك لە گوتەبێژی فەرمیی سەرۆكایەتیی هەرێمی كوردستان
لە كۆڕێكی لێپرسراوی دەستەی كارگێڕیی مەكتەبی سیاسیی یەكێتی نیشتیمانی كوردستان لە زانكۆی سلێمانی لەبارەی هاتنی حەشدی شەعبی هەندێ قسە كراوە و ناوی بەڕێز سەرۆكی هەرێمی كوردستان هاتووە و لە میدیاكانیش خوێندنەوەی جۆراوجۆر بۆ ئەم بابەتە كراوە.
لێرەدا بە گشت لایەكی ڕادەگەیێنین كە سەبارەت بە بابەتی حەشدی شەعبی هەڵوێستی بەڕێز سەرۆكی هەرێمی كوردستان لە ئێستا و لە پێشوودا زۆر ڕوون و ئاشكرا بووە كە هەرێمی كوردستان لە تێكشكاندن و لەناوبردنی تیرۆریستاندا ناكۆكی لەگەڵ حەشدی شەعبیدا نییە و هەر كات بۆ شەڕكردن لەگەڵ داعش پێویست بێت هێزی پێشمەرگە و حەشد یارمەتیی یەكتر بدەن. بەڵام ئەوە بەو مانایە نییە حەشدی شەعبی بێت دوزخورماتو داگیر بكات كە خاكی كوردستانە و پێشمەرگە دەیپارێزێت.
جەنابی سەرۆك بارزانی جەخت لەوە دەكاتەوە كە خاكی كوردستان جێگەی حەشدی شەعبی نییە و كوردستان پێشمەرگە و هێزی ئاساییشی خۆی هەیە و پێویست بە هیچ هێزێكی تر ناكات. هێنانی حەشدی شەعبی بۆ نێو خاكی كوردستان نە بە ڕەزامەندی سەرۆك بارزانی بووە و نە كەسیش داوای لێ كردووە ڕەزامەندی پێشان بدات بۆ هاتنی حەشدی شەعبی.
گوتەبێژی فەرمیی سەرۆكایەتیی هەرێمی كوردستان
18ـی 11ـی 2015
پەیامی هاوخەمیی سەرۆك بارزانی بۆ خانەوادەی خوالێخۆشبوو حەمەی حەمەسەعید
بەناوی خودای مەزن و دلۆڤان
بۆ خانەوادەی پێشمەرگە و تێكۆشەری ماندوونەناس خۆالێخۆشبوو حەمەی حەمەسەعید
بە بیستنی هەواڵی كۆچی دوایی شۆڕشگێڕ و پێشمەرگەی قارەمانی گەلەكەمان كاك حەمەی حەمە سەعید زۆر خەمبار بووم. كاكە حەمە پێشمەرگەی شۆڕشی ئەیلوول و گولان و ڕۆڵەیەكی وەفاداری ڕێگەی كوردایەتی و ئازادیخوازی بوو. هەر لە تەمەنی لاوێتی هەتا دوایین چركەساتەكانی ژیانی بێ پسانەوە لەپێناو مافەكانی گەلەكەیدا خەباتی كردووە و كۆڵی نەداوە. لەدەست دانی ئەم تێكۆشەرە مەزنە خەسارەتێكی گەورەیە و هەموومانی خەمبار كرد.
لەم بۆنە خەمناكەدا هاوبەشی خەمتانم و سەرەخۆشیی خۆم ئاراستەی ئێوە و سەرجەم خزم و ئاشنایان و هەڤاڵانی خوالێخۆشبوو و خەڵكی نیشتیمانپەروەری دەڤەری هەورامان دەكەم.
لەخوای گەورە داواكارم خوالێخۆشبوو كەك حەمەی حەمەسەعید بە بەهشتی بەرین شاد بكات و سەبر و ئارامیش بە هەموو لایەك ببەخشێت.
انا لله و انا الیە راجعون
مسعود بارزانی
سەرۆكی هەرێمی كوردستان
19ـی 11ـی 2015
سەرۆكی هەرێمی كوردستان پێشوازی لە شاندێكی مەكتەبی سیاسیی پارتی دیموكراتی كوردستان دەكات
ڕۆژی پێنجشەممە 19ـی 11ـی 2015 لە یەكێك لەبارەگاكانی فەرماندەیی هێزی پێشمەرگە لە ڕۆژئاوای دیجلە، بەڕێز مەسعود بارزانی سەرۆكی هەرێمی كوردستان پێشوازی لە شاندێكی باڵای مەكتەبی سیاسی پارتی دیموكراتی كوردستان كرد كە پێكهاتبوو لە فازڵ میرانی سكرتێر مەكتەبی سیاسی و ژمارەیەك لە ئەندامانی مەكتەبی سیاسیی پارتی دیموكراتی كوردستان.
شاندی باڵای مەكتەبی سیاسیی پارتی سەركەوتنی پێشمەرگەی كوردستانیان لە ئۆپڕاسیۆنی ئازادكردنی شنگال لە سەرۆك بارزانی و گەلی كوردستان و هێزی پێشمەرگە پیرۆز كرد و دەستخۆشیان لە پێشمەرگە قارەمانەكان و فەرماندەی میحوەرەكان كرد كە ئەو داستانە مێژوویەیان تۆمار كرد كە لە مێژووی گەلی كوردستاندا بێ وێنەیە.
شاندی باڵای مەكتەبی سیاسی سەرەخۆشیان لە خانەوادەی سەربەرزی ئەو پێشمەرگانە كرد كە لە شەڕی تیرۆریستاندا گیانی خۆیان فیدا كردووە و هیوای چاكبوونەوەیشیان بۆ برینداران خواست.
لەم دیدارەدا باس لە بایەخ و ڕەهەندە سەربازی و سیاسی و ستراتیژییەكانی ئازادكردنی شنگال و كاریگەری لەسەر لاوازبوونی تیرۆریستانی داعش كرا.
سەرۆک بارزانی سوپاسی بەرێوەبەرایەتیی گشتیی تەندروستیی دهۆک و بەڕێوەبەرایەتیی ڕێگاوبان و پردەکان دەکات
دوای سەرکەوتنی ئۆپەراسیۆنی ئازادکردنی شەنگال، بۆ ڕێزگرتن لە ماندووبوونی کارمەندانی تەندروستیی و ڕێگاوبانی پارێزگەی دهۆک لەو ئۆپەراسیۆنە، ڕۆژی ١٦ـی ١١ـی ٢٠١٥، بەڕێز مەسعود بارزانی سەرۆکی هەرێمی کوردستان، سوپاسنامەی ئاراستەی هەریەک لە بەرێوەبەرایەتیی گشتیی تەندروستیی دهۆک و بەڕێوەبەرایەتیی ڕێگاوبان و پردەکان لە پارێزگای دهۆک کرد.
سەرۆک بارزانی پڕ بە دڵ سوپاسی کارمەندانی ئەو دوو فەرمانگەیەی کردووە کە هەر لەسەرەتای هێرشی تیرۆریستانەوە تا ئێستا، لە میحوەرەکانی ڕۆژهەڵات و ڕۆژئاوای دیجلە و شنگال و بەرەکانی دیکەی نزیک لە پارێزگای دهۆک، ڕۆڵێکی پێشمەرگانە و نیشتیمانپەروەرانەیان لە ڕزگارکردنی گیانی پێشمەرگە بریندارەکان و یارمەتیدانی خەلکی ئاوارە و پاڵپشتییکردنی هێزی پێشمەرگە و یارمەتیدانیان بە دروستکردنی سەنگەر و پرد و ڕێگەوبان و گواستنەوەی کەلوپەلی پێویست بۆ پێشمەرگە، هەبووە.
نێچیرڤان بارزانى پشتگیریی گه‌لی فه‌ره‌نسا ده‌كات و ده‌ڵێت شكست به تیرۆریزم دێت
به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان، له په‌یامیكدا به‌بۆنه‌ى هێرشه تیرۆرستییه‌كانى دوێنێ شه‌وى پاریسه‌وه، پشگیریی گه‌لی فه‌ره‌نسا ده‌كات و ده‌ڵێت شكست به تیرۆریزم دێت. ئه‌مه ده‌قى په‌یامه‌كه‌یه‌تى:
به دڵێكی پڕ په‌ژاره‌وه هه‌واڵى هێرشه ترسناكه‌كانى دژی خه‌ڵكی پاریسم بیست، له ناخی دڵه‌وه سه‌ره‌خۆشییان لێده‌كه‌م و ئه‌وپه‌ڕى پشتگیریی خۆم و گه‌لی كوردستانیان پێ ڕاده‌گه‌یه‌نم.
له شه‌ڕى دژى تیرۆریزمدا، فه‌ره‌نسا لێبڕاوانه له‌گه‌ڵ هه‌رێمی كوردستان وه‌ستاوه و له شه‌ڕی ئه‌واندا، ئێمه‌ش له‌گه‌ڵیانین. ته‌حه‌دای سه‌ركه‌وتن به‌سه‌ر ئه‌م هه‌ڕه‌شه‌یه‌دا زۆر گه‌ل و نه‌ته‌وه له سه‌رتاسه‌ری جیهاندا یه‌ك ده‌خات، ئه‌مه تێكۆشانى شارستانییه‌ت دژ به ده‌مارگیری و دڕنده‌ییه.
هێرشی له‌مجۆره به مه‌به‌ستی بڵاوكردنه‌وه‌ی ترسه، به‌ڵام كۆمه‌ڵگه‌ی نێوده‌وڵه‌تی ده‌بێت به‌وپه‌ڕی بڕوابه‌خۆبوونه‌وه وه‌ڵام بداته‌وه. له ڕاستیدا، ئه‌م تراژیدیایه ڕۆژێك پاش شكستی گه‌وره‌ی داعش له شنگال هات، ئێمه ده‌توانین و ده‌بێت شكست به تیرۆریزم بهێنین.
نێچیرڤان بارزانى
سه‌رۆك وه‌زیرانى هه‌رێمى كوردستان
14/11/2015
نێچیرڤان بارزانى سه‌ردانى كونسولخانه‌ى گشتیى فه‌ره‌نسا ده‌كات
بۆ ده‌ربڕینى هاوخه‌مى و هاوسۆزى له‌گه‌ڵ فه‌ره‌نسا، ئێواره‌ى ئه‌مڕۆ شه‌ممه 14/11/2015، به‌ڕێز نێچیرڤان بارزانى سه‌رۆك وه‌زیرانى هه‌رێمى كوردستان و شاندێكى یاوه‌رى، سه‌ردانى كونسلخانه‌ى گشتیى فه‌ره‌نسایان له هه‌ولێر كرد.
به‌رێز سه‌رۆك وه‌زیران وێڕاى به‌توندى ئیدانه‌كردنى هێرشه تیرۆرستییه‌كانى شه‌وى ڕابردووى پاریس، به ناوى خۆى و حكوومه‌ت و خه‌ڵكى هه‌رێمى كوردستانه‌وه، نیگه‌رانى و هاوسۆزى و هاوخه‌مى له‌گه‌ڵ خه‌ڵك و حكوومه‌ت و سه‌رۆكایه‌تیى فه‌ره‌نسا دووپات كرده‌وه و پرسه و سه‌ره‌خۆشى ئاراسته‌ى كه‌سوكارى قوربانیان كرد و هیواى زووچاكبوونه‌ى بۆ برینداران خواست.
هه‌روه‌ها هاوخه‌مى و هاوسۆزى و پرسه و سه‌رخۆشیى تایبه‌تى به‌ڕێز جه‌نابى سه‌رۆكى هه‌رێمى كوردستانى گه‌یانده جه‌نابى سه‌رۆك و گه‌ل و حكوومه‌تى فه‌ره‌نسا و دووپاتى كرده‌وه كه چۆن له ڕۆژگار و سه‌رده‌مه سه‌خته‌كاندا هه‌میشه فه‌ره‌نسا پشتیوان و هاوسۆزى گه‌لى كوردستان بووه و به‌رده‌وام هاوكارى و یارمه‌تى پێشكه‌ش كردووه، به هه‌مان شێوه ئه‌مڕۆ گه‌لى كوردستان هاوسۆز و هاوخه‌مى گه‌لى فه‌ره‌نسایه و به‌شدارى خه‌م و په‌ژاره‌یانه.
لاى خۆیه‌وه به‌ڕێز ئالان گێپغات كونسولى گشتیى فه‌ره‌نسا له هه‌رێمى كوردستان، سوپاس و پێزانینى خۆى بۆ سه‌ردانى به‌ڕێز نێچیرڤان بارزانى و شاندى یاوه‌رى ده‌ربڕى و دووپاتى كرده‌وه كه ئه‌م سه‌ردانه‌ى به‌ڕێزیان نیشانه‌ى په‌یوه‌ندیى پته‌و و دۆستایه‌تیى نزیكى هه‌ردوو گه‌ل و حكوومه‌تى فه‌ره‌نسا و گه‌ل و حكوومه‌تى هه‌رێمى كوردستانه و ئه‌م به‌سه‌ركردنه‌وه‌یه و هاوسۆزى و به‌شداریى به‌ڕێزیانى، به مایه‌ى ڕێز و پێزانینێكى زۆر له‌قه‌ڵه‌م دا. هه‌روه‌وها جه‌ختى له‌وه كرده‌وه كه فه‌ره‌نسا و هه‌رێمى كوردستان بۆ هه‌میشه به دۆست و پشتیوانى یه‌كتر ده‌مێننه‌وه.
بەریتانیا لە پێویستییەكانی قۆناغی ئێستای هەرێمی كوردستان دەكۆڵێتەوە
پاشنیوەڕۆی ئەمڕۆ یەكشەممە 15/11/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە شاندێكی پەرلەمانتارانی بەریتانیا لە گرووپی دۆستایەتیی هەموو پارتەكانی پەرلەمانی بەریتانیا بۆ پشتگیری لە هەرێمی كوردستان كرد.
لە دیدارێكدا شاندی میوان سوپاس و پێزانینی بەریتانیایان پێشكەش بە خەڵك و حكوومەتی هەرێمی كوردستان كرد كە سەرەڕای قەیرانی دارایی، پێشوازییان لە ژمارەیەكی یەكجار زۆری ئاوارە و پەنابەرانی دەستی تیرۆر كردووە و خزمەتگوزاریی پێویستیان پێشكەش كردوون. ئاماژەیان بەوەش دا كە شانازی بەوەوە دەكەن هاوپەیمانی هەرێمی كوردستانن لە شەڕی دژی تیرۆر و پیرۆزباییان پێشكەش بە خەڵك و حكوومەتی هەرێمی كوردستان كرد بە بۆنەی ئازادكردنی شاری شەنگالەوە لە دەستی تیرۆرستانی داعش كە گرنگییەكی زۆری بۆ كۆمەڵگەی نێودەوڵەتی و مرۆڤایەتی بە شێوەیەكی گشتی هەیە.
هەروەها باسیان لەو هاوكارییانە كرد كە لە ڕابردوو و ئێستادا لەلایەن بەریتانیاوە پێشكەش بە هەرێمی كوردستان كراون و خوازیار بوون پێویستییەكانی قۆناغی ئێستا بزانن بۆ ئەوەی بەپێی پێویستیی قۆناغەكە هەوڵ بدەن هاوكارییەكان بۆ هەرێمی كوردستان دابین بكەن. هەروەك باسیان لە بارودۆخی عێراق بە گشتی و هەرێمی كوردستان بە تایبەتی و پرۆسەی سیاسی لە ناوچەكە و ئەو گرفتانەی لە عێراق هەن، كرد.
لای خۆیەوە بەڕێز سەرۆك وەزیرانی هەرێمی كوردستان سوپاسی ئەو سەردانەی كرد و خۆشحاڵیی خۆی دەربڕی بەوەی پەرلەمانتارانی هەموو پارتە سیاسییەكانی پەرلەمانی بەریتانیا پشتگیری لە هەرێمی كوردستان دەكەن و ئاماژەی بەوە دا كە حكوومەتی هەرێمی كوردستان هاوكارییەكانی بەریتانیا و ئەمەریكا و هەموو وڵاتانی نێو هاوپەیمانیی نێودەوڵەتیی دژی داعش بۆ هەرێمی كوردستان بەرز دەنرخێنێت، بە تایبەتی لەڕووی سەربازییەوە كە كاریگەرییەكی بەرچاویان لە ئازادكردنی دەڤەرەكان بە گشتی و بە تایبەتی ڕزگاركردنی شاری شەنگال لە دەستی تیرۆرستانی داعش هەبووە و هیوای خواست لە ڕووی سەربازی و مرۆییەوە هاوكارییەكان زیاتر بكرێن بۆ ئەوەی بتوانرێت مەترسیی تیرۆر بە یەكجاری لە ناوچەكە بنبڕ بكرێت و وەك پێویستیش هاوكاریی ئاوارە و پەنابەران بكرێت.
لەلایەكی دیكەی قسەكانیدا بەڕێزیان ئاماژەی بە قەیرانی دارایی و هاتنی ژمارەیەكی یەكجار زۆری ئاوارە و پەنابەرانی دەستی تیرۆر بۆ هەرێمی كوردستان كرد كە بارگرانییەكی زۆری بۆ هەرێم دروست كردووە و هیواخواز بوو لە سووككردنی ئەو بارگرانییە، هاوكاریی زیاتری هەرێم بكەن. دەربارەی بارودۆخی سیاسی و ئەو كێشانەی بەم دواییە لە هەرێمی كوردستان دروست بوون، بەڕێز سەرۆك وەزیران سەرەتا پوختەیەكی لەبارەی ئەو ڕووداوانەوە پێشكەش كرد و دووپاتی كردەوە كە پێویستە سەرجەم كێشەكان لە ڕێگەی گفتوگۆ و دیالۆگەوە چارەسەر بكرێن.
تاوتوێكردنی چەند بابەتێكی دیكەی پەیوست بە هەردوولا، بە تایبەتی پەیوەندییەكانی نێوان هەرێمی كوردستان و بەریتانیا و زیاتر تۆكمەكردنیان لە هەموو ڕوویەكەوە، لایەنێكی دیكەی دیدارەكە بوو.
جێگری وەزیری بەرگریی ئەمەریكا كۆنترۆڵكردنەوەی شەنگال بەرز دەنرخێنێت
ئێوارەی ئەمڕۆ یەكشەممە 15/11/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە خاتوو كرستین وۆرموس جێگری وەزیری بەرگریی ئەمەریكا بۆ كاروباری سیاسی و شاندێكی سەربازی و دیپلۆماسیی یاوەری كرد.
لە دیدارێكدا كە بەڕێز قوباد تاڵەبانی جێگری سەرۆك وەزیرانی هەرێمی كوردستان ئامادەی بوو، شاندی میوان پیرۆزباییان لە خەڵك و حكوومەتی هەرێمی كوردستان كرد بە بۆنەی سەركەوتنی ئۆپەراسیۆنی ئازادكردنی شاری شەنگال و هاوخەمی خۆیان بۆ كەسوكاری شەهیدانی ئەو ئۆپەراسیۆنە دەربڕی و هیوای زوو چاكبوونەوەیان بۆ برینداران خواست. هەروەك ئۆپەراسیۆنەكەشیان بە یەكێك لە دەستكەوتەكانی هاوكاریی نێوان هێزەكانی پێشمەرگە و هاوپەیمانیی دژی داعش بە تایبەتی ئەمەریكا زانی، كە كاریگەری لەسەر لاوازبوونی هێزی داعش لە ناوچەكە و ڕزگاركردنی دڤەرەكانی دیكە، هەیە.
لە بەشێكی دیكەی قسەكانیاندا ئامادەیی خۆیان بۆ هەر هاوكاری و هەماهەنگییەك بەمەبەستی بەهاناوەچوونی ئەو دەڤەرانەی لە دەستی داعش ڕزگار كراون دەربڕی، بە تایبەتی لە بواری ئاوەدانكردنەوەیاندا.
لای خۆیەوە بەڕێز سەرۆك وەزیرانی هەرێمی كوردستان سوپاسی سەرۆك و خەڵك و حكوومەتی هەرێمی كوردستانی پێشكەش بە ئەمەریكا و وڵاتانی نێو هاوپەیمانیی دژی داعش كرد كە بەهۆی هاوكارییە سەربازییەكانیانەوە توانرا لە ماوەیەكی زۆر كورتدا شەنگال لە داعش پاك بكرێتەوە و هیوای بەردەوامیی ئەو هەماهەنگییەی خواست بۆ ڕزگاركردنی هەموو دەڤەرەكانی دیكەی عێراق لە تیرۆرستان. ئاماژەی بەوەش دا ئەو دەڤەرانەی ڕزگار دەكرێن پێویستیان بە خزمەتگوزاری و ئاوەدانكردنەوەیە و ئەمەش لە كاتێكدایە كە حكوومەتی هەرێمی كوردستان بە قەیرانێكی قوڵی داراییدا تێدەپەڕێت بۆیە هیوای خواست كۆمەڵگەی نێودەوڵەتی لەو بوارانەدا هاوكاریی حكوومەتی هەرێم بكات.
لە بەشێكی دیكەی قسەكانیدا بەڕێزیان ئاماژەی بەوە كرد كە لە قۆناغی داهاتوودا پێویستە پێداچوونەوە بە شێوازی هاوكارییەكان بكرێت بە شێوەیەك لەگەڵ قۆناغەكە بگونجێت و كاریگەرییان زیاتر بێت.
تاوتوێكردنی پەیوەندییەكانی نێوان هەولێر و بەغدا لەلایەك و هەولێر و ئەمەریكا لەلایەكی دیكە و چەند بابەتێكی دیكەی پەیوەندیدار، لایەنێكی دیكەی دیدارەكە بوو.