سەرۆك بارزانی سەردانی ئاكادیمیای سەربازیی زاخۆ دەكات
ڕۆژی سێشەممە 6ـی 10ـی 2015 بەڕێز مەسعود بارزانی سەرۆكی هەرێمی كوردستان بە مەبەستی ئاگاداربوون لە كاروباری ئاكادیمیای سەربازیی زاخۆ و ڕەوشی خولە سەربازییەكان و بە تایبەتیش یەكەم خولی پێگەیاندنی ئەفسەرانی ئافرەت سەردانی ئاكادیمیای سەربازیی زاخۆ كرد.
لەم سەردانەدا سەرۆك بارزانی لە مەراسیمی نمایشی سەربازیی ئەفسەرانی ئافرەتدا ئامادە بوو و پاشان لەگەڵ فەرماندە و مامۆستا و سەرپەرشتیارانی ئاكادیمیا و خولی تایبەت بە ئەفسەرانی ئافرەت كۆبوویەوە و لە كۆبوونەوەكەدا لە نزیكەوە ئاگاداری وردەكاریی خولەكانی ئاكادیمیا بوو و ئامۆژگاری و ڕێنمایی پێویستی خستەڕوو.
دوای ئەو كۆبوونەوەیەش سەرۆك بارزانی وتەیەكی بۆ قوتابیانی ئافرەتی خولەكە پێشكەش كرد و تێیدا سوپاسی ستافی سەرپەرشتیی ئاكادیمیای زاخۆی كرد كە لە ماوەی 19 ساڵی ڕابردوو ژمارەیەكی زۆر ئەفسەریان بۆ وڵاتەكەیان پێگەیاندووە. سەرۆك بارزانی خۆشحاڵیی خۆیشی نیشاندا بە ئامادەیی ژمارەیەك كچ بۆ بەشداربوونیان لە خولی سەربازیی پێگەیاندنی ئەفسەران و، وێڕای ئاماژەكردن بە ڕۆڵی ئافرەتان جەختی لەوە كردەوە كە كچانیش پێویستە شانبەشانی كوڕان بە زانستی سەربازی پەرەوەردە بكرێن بۆ ئەوەی بەشدار بن لە بەرگریكردن لە وڵاتەكەیان و هەروەها دەبێ پێشانی جیهان بدەین كە كۆمەڵگەیەكی كراوەمان هەیە و جیاوازیی لەنێو كچ و كوڕان نییە و بەهیچ شێوەیەك كچ كەمتر نییە لە كوڕ. سەرۆك بارزانی ئەوەیش خستە ڕوو كە لەدوای دەرچوونی ئەو ژمارەی قوتابیانی كچ ئەوە، ئەركێكی گەورەیان دەكەوێتە سەر شان و دەبێ كچانمان ئەوە بسەلمێنن كە لە ئاییندەدا ڕۆڵیان لە كوڕان زیاتر دەبێت. سەرۆك بارزانی وێڕای ئاماژەدان بە قارەمانێتیی پێشمەرگە لە شكاندنی ئەفسانەی داعش و خۆڕاگریی گەلی كوردستان ئەوەی باس كرد كە پێشمەرگە بووەتە هێما و پێگە بۆ گەلی كوردستان و كچانیش دەتوانن ئەو سەنگ و پێگەیە زیاتر دەكەن. كاتێك وێنەی پێشمەرگە و كچانمان لەبەرەكانی شەڕ لێرە و لە كۆبانێ لەمیدیاكان دەدیترا، ورە و هیمەتی خەڵكی ئەوروپاییشی بەرز دەكردەوە. سەرۆك بارزانی ئامادەیی خۆی نیشاندا كە بە هەموو شێوەیەك پاڵپشتیی ئەم خولەی پێگەیاندنی ئەفسەرانی ئافرەت بێت لە ئاكادیمیای سەربازی.
جێگەی ئاماژەپێدانە بە مەبەستی بایەخدان بە ڕۆڵی ئافرەت لە بەرگریكردن لە وڵات و پەروەردەكردنیان بە زانستی سەربازیی سەردەم یەكەمین خوڵی پێگەیاندنی ئەفسەرانی ئافرەت بە بەشداریی 202 كچ لە ئاكادیمیای سەربازیی زاخۆ ماوەی چەند مانگە دەستی پێكردووە و لە مانگی چواری ساڵی 2016 كوتایی دێت.
بۆ بینینی وتارەكەی سەرۆك بارزانی ئێرە دابگرە
سەرۆكی هەرێمی كوردستان پێشوازی لە وەزیری دەرەوەی هەنگاریا دەكات
ڕۆژی چوارشەممە 7ـی10ـی2015 لە شاری دهۆك بەڕێز مەسعود بارزانی سەرۆكی هەرێمی كوردستان پێشوازی لە پیتێر سیارتۆ وەزیری دەرەوە و بازرگانیی هەنگاریا و شاندێكی یاوەری كرد كە پێكهاتبوون لە تیبۆر زاتماری باڵیۆزی هەنگاریا لە عێراق و كسابا وێزكینی كونسوڵی هەنگاریا لە هەولێر و ژمارەیەك ڕاوێژكاری وەزارەتی دەرەوەی ئەو وڵاتە.
لە دیدارەكە وەزیری دەرەوەی هەنگاریا سڵاوی سەرۆك وەزیرانی وڵاتەكەی بە سەرۆك بارزانی گەیاند و پێزانینیشی هەبوو بۆ هەرێمی كوردستان كە ژمارەیەكی یەكجار زۆری ئاوارە و پەنابەری وەخۆ گرتووە كە بارێكی قورسە لەسەر شانی هەرێمی كوردستان و پێویستەیەكێتیی ئەوڕووپا یارمەتییەكانی خۆی بۆ پەنابەر و ئاوارەكانی ناو هەرێمی كوردستانیش تەرخان بكات. هەروەها وێڕای ئاماژەپێدن بە ڕەهەندە جۆراوجۆرەكانی هاتنی شەپۆڵی ئاوارە و پەنابەر بۆ ئەورووپا، جەختی لەوە كردەوە كە وڵاتانی ئەورووپایی ڕووبەڕووی تەحەدییەكی زۆر گەورە هاتوون و هێشتایش بە تەواوەتی وەڵامێكی دروستیان بۆ قەیرانی ئاوارە و پەنابەران نەدۆزیوەتەوە. ئەوەیشی خستەڕوو كە چارەسەری ڕیشەیی ئەم پرسە لەنێو خاكی ئەورووپادا نییە.
وەزیری دەرەوەی هەنگاریا سەرۆك بارزانیی لە وردەكاریی پلان و پێشنیارەكانی وڵاتەكەی ئاگادار كردەوە كە بەنیازە بۆ چارەسەركردنی كێشەی ئاوارەكان پێشكەش بە یەكێتیی ئەورووپای بكات و لەم ڕووەوە داوای كرد سەرۆك بارزانی تێبینییەكانی خۆی لەسەر چۆنییەتی چارەكردنی پرسی ئاوارەكان و قەیرانەكانی ناوچەكە بخاتەڕوو. هەروەها لەناوبردنی داعش و گەڕاندنەوەی سەقامگیریی بۆ ڕۆژهەڵاتی ناوەڕاست بە یارمەتیدەری چارەسەركردنی قەیرانی ئاوارەكان لەقەڵەم دا و بۆ ئەم مەبەستەیش هاوكاریی هەموو لایەكی بە پێویست زانی. لە بەشێكی دیكەی قسەكانیدا وەزیری دەرەوەی هەنگارییا پاڵپشتیی تەواوی وڵاتەكەی بۆ هەرێمی كوردستان ڕاگەیاند و ئەوەیشی باس كرد كە هەنگاریا بەردەوام دەبێت لە هاوكاریی پێشمەرگە و پێشكەشكردنی مەشق و ڕاهێنان بە هێزی پێشمەرگەی كوردستان.
لەبەرانبەردا سەرۆك بارزانی سوپاسی هەڵوێستی وڵاتی هەنگاریای كرد لە پشتیوانیكردنی هەرێمی كوردستان. پەیوەست بە كێشەی پەنابەر و ئاوارەكان سەرۆك بارزانی ئەوەی بۆ شاندی میوان ڕوونكردەوە كە چارەسەری ئەم كێشەیە لەدەرەوەی خاكی ئەورووپایە و قەیرانی ئابووری و هەڕەشەی تیرۆریستان دوو هۆكاری سەرەكیی ئاوارەبوونی خەڵكی ڕۆژهەڵاتی ناوەڕاستە و بۆ چارەسەركردنی ئەم پرسەیش پێویستە كار بۆ نەهێشتنی هۆكارەكان بكرێت نەك تەنیا مامەڵە لەگەڵ ئەنجامەكاندا بكرێت. لەبارەی شەڕی تیرۆریش سەرۆك بارزانی ڕایگەیاند لەڕووی عەمەلییەوە باری قورسی شەڕی تیرۆر لەسەر شانی پێشمەرگەیە و هێشتا جیهان وەك پێویست بەڕووی ئەو دیاردە ترسناكەدا نەوەستاوەتەوە و ناشكرێ تیرۆر وەك كارتێكی گوشار لە لایەن دەوڵەتانەوە بەكار بهێنرێت.
سەرۆك بارزانی باسیشی لە دوا پەرەسەندنەكان و گورزە ئاسمانییەكانی ڕووسیا كرد و ئەوەی دووپاتكردەوە كە ئەگەر هەماهەنگی و ڕێككەوتن لەنێوان وڵاتانی هاوپەیمانی دژی تیرۆر و ڕووسیا نەبێت ئەوە دۆخەكە ئاڵۆزتر دەبێ و سەقامگیریی لە ناوچەكە ناهێتە دی.
باسكردنی بارودۆخی سووریا و هەروەها پەیوەندییەكانی نێوان هەرێمی كوردستان و وڵاتی هەنگاریا تەوەرێكی دیكەی دانیشتنەكە بوو.
سەرۆكی هەرێمی كوردستان پێشوازی لە نوێنەری تایبەتی سەرۆك ئۆباما دەكات
ڕۆژی هەینی 9ـی 10ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە جۆن ئاڵێن نوێنەری تایبەتی سەرۆك ئۆباما لە هاوپەیمانێتیی نێودەوڵەتی دژی داعش و شاندێكی یاوەری كرد كە پێكهاتبوو لە ستیوارت جۆنز باڵیۆزی ئەمەریكا لە عێراق و ماتیاس میتمان كونسوڵی ئەمەریكا لە هەولێر و ژمارەیەك فەرماندە و ڕاوێژكاری سوپای ئەمەریكا.
لە دیدارەكەدا نوێنەری تایبەتی سەرۆك ئۆباما لە هاوپەیمانێتیی نێودەوڵەتی دژی داعش ڕایگەیاند كە هەر جارێك كە سەردانی كوردستان دەكات هەست بە قوربانیدان و دەستكەوتەكان و پێشڤەچوونی گەلی كوردستان دەكات و سەرەخۆشییشی لە سەرۆك بارزانی و كەسوكاری ئەو پێشمەرگانە كرد كە لەشەڕی تیرۆردا گیانی خۆیان فیدا كردووە و شەهید بوونە و هەروەها پیرۆزبایی لە سەرۆك بارزانی و هێزی پێشمەرگە كرد بەبۆنەی ئەو سەركەوتنانەی لە بەرەكانی شەڕ مسوگەریان كردووە.
هەر لەم كۆبوونەوەیەدا نوێنەری تایبەتی سەرۆك ئۆباما لە هاوپەیمانێتیی نێودەوڵەتی دژی داعش، بیروبۆچوونی وڵاتەكەی لەبارەی پێشهاتە سیاسی و ئەمنییەكانی ناوچەكە و سووریا و شەڕی تیرۆر و هەروەها گورزە سەربازییەكانی ڕووسیا بۆ سەرۆك بارزانی شی كردەوە و نیگەرانیی خۆیشی لە مەترسیی قووڵتربوونی گرفتەكان و دەستپێكردنی شەپۆڵێكی دیكەی ئاوارەكان نیشاندا.
لەبەرانبەردا سەرۆك بارزانی سوپاسی هەڵوێستی نوێنەری تایبەتی سەرۆك ئۆبامای كرد و خۆشحاڵیی خۆیشی نیشاندا كە هەماهەنگیی نێوان هێزەكانی هاوپەیمانان و پێشمەرگە لە ئاستێكی زۆر باش دایە و ئەنجامی باشی لێ دەكەوێتەوە. سەبارەت بە هێزی پێشمەرگەی كوردستانیش سەرۆك بارزانی ئەوەی بە شاندی میوان ڕاگەیاند كە لەدەستدانی قارەمانان كە بۆ پاراستنی وڵاتیان گیانیان فیدا دەكەن، خەسارتێكی گەورەیە. ئێستا هێزی پێشمەرگەی كوردستان بە ورەیەكی بەرزەوە بەرگری لە كوردستان دەكات. پەیوەست بە گۆڕانكارییە سیاسی و سەربازییەكانی ناوچەكە و دەستێوەردانی سەربازیی ڕووسیا سەرۆك بارزانی ئەوەی دووپاتكردەوە كە بوونی هەماهەنگیی نێوان ڕووسیا و وڵاتانی هاوپەیمان و لە شەڕی تیرۆریستاندا دەستكەوتی زۆر باشی دەبێت و ئەوەیشی ڕاگەیاند پێویستە ئەولەوییەتی هەموو لایەك بە پلەی یەكەم لێدان و لەناوبردنی داعش بێت ئەگینا تووشی هەڵەی گەورە دەبن.
لەبەشێكی دیكەی كۆبوونەوەكە بارودۆخی سیاسیی عێراق و هەروەها بارودۆخی مەیدانیی بەرەكانی شەڕی دژی تیرۆریستان و پێداویستییەكانی هێزی پێشمەرگە تاوتوێ كرا و شاندی میوان ئەوەی بە سەرۆك بارزانی ڕاگەیاندكە ئەمەریكا لە هەموو بارودۆخێكدا هاوكار و هاوپەیمانی هەرێمی كوردستانە و لە یارمەتیدانی هێزی پێشمەرگەیش بەردەوام دەبێت.
جێگەی ئاماژەپێكردنە لەم كۆبوونەوەیەدا مەسروور بارزانی ڕاوێژكاری ئەنجوومەنی ئاساییشی هەرێم و مستەفا سەید قادر وەزیری پێشمەرگە و فواد حوسێن سەرۆكی دیوانی سەرۆكایەتیی هەرێم و فەلاح مستەفا بەرپرسی فەرمانگەی پەیوەندییەكانی دەرەوەی حكوومەت و ئەنوەر حاجی عوسمان جێگری وەزیری پێشمەرگە و جەعفەر شێخ مستەفا و فەریق شێروان عەبدولرەحمان و فەریق جەبار یاوەر ئەندامانی فەرماندەیی گشتیی هێزەكانی پاراستنی هەرێم ئامادە بوون.
ڕێنمایی بە پەلەی سەرۆك بارزانی بۆ تێكڕای دامودەزگە هەرێمی و ئەمنی و كارگێڕی و حزبییەكانی هەرێمی كوردستان
لەبارەی ڕووداوەكانی چەند ڕۆژی ڕابردوو و گرژییەكانی ئەمڕۆی شاری قەڵادزێ، بۆ تێكڕای دامودەزگای هەرێمی و ئەمنی و كارگێڕی و حزبییەكانی هەرێمی كوردستان، ڕێگە نەدەن گرژییەكان پەرە بستێنێت و شوێنەكانی تر بگرێتەوە و دەزگە پەیوەندیدارەكانیش دان بەخۆیاندا بگرن و هەموو ڕێگەیەك بۆ هێوركردنەوەی دۆخەكە بگرنە بەر.
ئەوانەیشی بەرپرسن لەم ڕووداوانە بە پێی یاسا مامەڵەیان لەگەڵدا بكرێت و خۆیان بەرپرسن لە ئەنجامی كردەوەكانیان.
مسعود بارزانی
سەرۆكی هەرێمی كوردستان
9ـی 10ـی 2015
نێچیرڤان بارزانی و نوێنەری سەرۆك ئۆباما دۆخی ناوچەكە و شەڕی دژی تیرۆر تاوتوێ دەكەن
ئێوارەی ئەمڕۆ هەینی 9/10/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەڕێز جۆن ئاڵن نوێنەری تایبەتی باراك ئۆبامای سەرۆكی ویلایەتە یەكگرتووەكانی ئەمەریكا لە هاوپەیمانێتیی دژی تیرۆرستانی داعش و شاندێكی دیپلۆماسی و سەربازیی یاوەری كرد.
سەرەتا بەڕێز ئاڵن مەبەستی سەردانەکەی خستە ڕوو كە بۆ خوداحافیزی هاتبوو چونكە لەم مانگەدا كۆتایی بە ئەركەكەی دێت. دواتر باسی لە بارودۆخی عێراق و هەرێمی كوردستان و بەرەكانی شەڕی نێوان هێزی پێشمەرگە و تیرۆرستانی داعش كرد و پێشڕەوی و سەركەوتنەكانی پێشمەرگەی بەرز نرخاند كە توانیویانە بوێرانە و دلێرانە ڕووبەڕووی ئەو هێرشانە ببنەوە و سەركەوتن بەسەر تیرۆردا تۆمار بكەن و ڕێز و سۆزی ڕای گشتی بەدەست بهێنێت.
هەروەها جەختی لەسەر هەماهەنگیی زیاتری نێوان هەردوولا و بە تایبەتی بەردەوامیی هاوكارییەكانی ئەمەریكا بۆ هەرێمی كوردستان كردەوە بۆ ئەوەی بە شێوەیەكی كۆتایی هەڕەشەی تیرۆر لە ناوچەكەدا بنبڕ بكرێت، جیا لەوەش باس لە هەماهەنگیی نێوان هەرێمی كوردستان و بەغدا و ڕەوشی ڕۆژهەڵاتی ناوەڕاست بە شێوەیەكی گشتی كرد.
لای خۆیەوە بەڕێز نێچیرڤان بارزانی سەرۆك وەزیرانی هەرێمی كوردستان سوپاسی ئەو سەردانەی كرد و ستایشی ئەو كار و هەماهەنگییەی بەڕێز ئاڵن -ی كرد كە لە ماوەی كاركردنی لە عێراق لەگەڵ هەرێمی كوردستاندا هەیبووە و ئاشكرای كرد كە هاوكاری و هەماهەنگییەكی زۆر باشی لەگەڵ هەرێم هەبووە و هیوای سەركەوتنی بۆ خواست لە كار و ئەركی نوێیدا.
بەڕێزیان هەروەها دووپاتی كردەوە كە ڕاستە پێشمەرگە لە بەرامبەر تیرۆرستانی داعش سەركەوتنی بەدەست هێناوە، بەڵام شێوازی ڕووبەڕووبوونەوەی داعش گۆڕاوە، بۆیە پێویستە بە شێوەیەكی بەردەوام هاوكاری بۆ هێزی پێشمەرگە دابین بكرێت و هەماهەنگیی زیاتر لە نێوان هێزی هاوپەیمان و هەرێمی كوردستان و عێراق هەبێت.
گفتوگۆكردنی پەیوەندییە دوو قۆڵییەكانی نێوان هەرێمی كوردستان و ئەمەریكا و زیاتر بەهێزكردنیان لە سەرجەم بوارەكاند، لایەنێكی دیكەی دیدارەكە بوو.
لە دیدارەکەدا هەریەكە لە بەڕێزان سەرۆكی دیوانی سەرۆكایەتیی هەرێم و وەزیری ناوخۆ و وەزیری پێشمەرگە و بەرپرسی فەرمانگەی پەیوەندییەکانی دەرەوە و وتەبێژی حکوومەت، ئامادە بوون.
هۆڵەندا لە هاوكاریكردنی هەرێمی كوردستان بەردەوام دەبێت
نیوەڕۆی ئەمڕۆ سێشەممە 6/10/2015 بەڕێز نێچیرڤان بارزانی سەرۆك وەزیرانی هەرێمی كوردستان، پێشوازی لە بەڕێز جان واڵتمانس باڵیۆزی نوێی هۆڵەندا لە عێراق و شاندێكی دیپلۆماسیی یاوەری كرد.
لە دیدارێكدا بەڕێز باڵیۆزی هۆڵەندا خۆشحاڵیی خۆی بە سەردانی هەرێمی كوردستان دەربڕی و پابەندبوونی حكوومەتی وڵاتەكەی بۆ پشتگیریكردنی هەرێمی كوردستان لە ڕووی سەربازی و مرۆییەوە پیشان دا. هەروەها ئاماژەی بە پەیوەندییە لەمێژینەكانی نێوان هەرێمی كوردستان و هۆڵەندا كرد و هیوای تۆكمەتركردنی ئەو پەیوەندییانەی لە هەموو بوارەكاندا خواست.
لای خۆیەوە بەڕێز نێچیرڤان بارزانی سەرۆك وەزیرانی هەرێمی كوردستان سوپاسی ئەو سەردانەی كرد و هیوای سەركەوتنی بۆ بەڕێز واڵتمانس وەك باڵیۆزی نوێی هۆڵەندا لە عێراق خواست و ئامادەییی حكوومەتی هەرێمی بۆ هەر هاوكاریی و پشتگیرییەك دەربڕی. هەروەها سوپاسی گەل و حكوومەتی هۆڵەندای كرد بۆ ئەو پشتیوانییە سەربازی و مرۆییەی كە لە سەرەتای دەستپێكردنی هێرشەكانی تیرۆرستانی داعش، پێشكەش بە هەرێمی كوردستانیان كردوە.
دواتر بەڕێزیان تیشكی خستە سەر چەند بابەتێكی هەنووكەییی پەیوەست بە هەرێمی كوردستان و عێراق لەوانە، شەڕی دژی تیرۆرستانی داعش، بارگرانی هاتنی ژمارەیەكی زۆری ئاوارە و پەنابەران بۆ هەرێمی كوردستان، ئەو قەیرانە داراییەی ڕووبەڕووی هەرێمی كوردستان بووەتەوە، پەیوەندییەكانی نێوان هەولێر و بەغدا و جێبەجێنەكردنی ڕێككەوتنی نێوان هەردوولا وەك خۆی و بڕینی بەشە بودجەی هەرێمی كوردستان لەلایەن بەغداوە، لەمبارەیەشەوە جەختی لەوە كردەوە كە هەرێمی كوردستان بڕوای بە دیالۆگ و گفتوگۆیە بۆ چارەسەركردنی كێشەكان.
هەروەها ئاماژەی بە پرۆسەی چاكسازی و پابەندبوونی حكوومەتی هەرێم بەو پرۆسەیەوە لە هەموو بوارەكاندا كرد بە تایبەتی لە بوارەكانی ئابووری و داراییەوە. سەبارەت بە پرسی سەرۆكایەتیی هەرێمی كوردستانیشەوە ئاماژەی بەوە كرد كە جیاوازیی بیروبۆچوون لە نێوان لایەنەكاندا هەیە و ئێستا هەموولایەنەكان لە گفتوگۆ و دانوستاندان بۆئەوەی پرسەكە چارەسەر بكەن. جەختی لەوەش كردەوە كە لە هەموو كێشەكان زیاتر، قەیرانی دارایی خەڵكی هەرێمی كوردستانی هەراسان كردووە و دووپاتی كردەوە هەرچەند هەرێمی كوردستان توانای زیادكردنی بەرهەمهێنانی نەوتی هەیە، بەڵام دابەزینی نرخەكەی هۆكارێكی دیكەیە بۆ بەردەوامیی ئەو قەیرانە داراییەی ڕووبەڕووی هەرێمی كوردستان بووەتەوە.
باسكردنی پەیوەندییە دووقۆڵییەكانی نێوان هەرێمی كوردستان و هۆڵەندا لە هەموو بوارەكانەوە، لایەنێكی دیكەی دیدارەكە بوو و لەم بارەیەشەوە بەڕێز سەرۆك وەزیرانی هەرێمی كوردستان دووپاتی كردەوە كە دەرگاكانی هەرێم بۆ كۆمپانیا وەبەرهێنەكانی هۆڵەندا واڵایە و هانی وەبەرهێنەران دەدات بێن سەرمایەگوزاری لە هەرێمی كوردستان بكەن و بەم ڕێگەیەشەوە هاوكار بن بۆ كەمكردنەوەی ئەو قەیرانە ئابووریەی ڕووبەڕووی هەرێمی كوردستان بووەتەوە.
قوباد تاڵەبانی: دەبێت هەموومان یەکدەنگبین لە ئارامکردنەوەی دۆخی هەرێمی کوردستان
جێگری سەرۆك وەزیران لە کۆبوونەوەی لەگەڵ پارێزگاری هەولێر، سلێمانی، دهۆك و هەڵەبجە ڕایگەیاند، پێویستە هەموومان بەرپرسانە مەماڵە بکەین و ڕۆڵێکی باش و کاریگەرمان هەبێت بۆ ئێستای کوردستانەکەمان . ئەوەی دوپاتکردەوە دوای بڕینی بەشە بودجەی هەرێم لەلایەن بەغدادەوە، هۆکارێکی دیکە بریتیە لەوەی کە خەرجی زیاترە لە داهات، بۆ چارەسەرکردنی دەبێت خەرجیەکانمان کەم بکەینەوە و داهات زیاد بکەین، کە ئەمەش گرفتی چەندساڵەیە و لە ئێستا تەواو کاریگەری دروستکردووە.
لە کۆبوونەوەکەدا کە بەڕێزان وەزیری ناوخۆ، وەزیری دارای و وەزیری پلاندان و وتەبێژ و سکرتێری ئەنجومەنی وەزیران تێدا ئامادە بوون، بەڕێز قوباد تاڵەبانی داوای لە پارێزگارە بەڕێزەکان کرد لەگەڵ بەڕێوەبەرەکاندا بەردەوام لە پەیوەندیدابن لەگەڵ فەرمانبەران و هاوڵاتیانی بەڕێز، بۆ ئەوەی بەرچاوڕوونی پێویستیان پێبدرێت بەرامبەر ئەو قەیرانانەی هەرێمی کوردستانی گرتووەتەوە و پلان و هەنگاوەکانی حکومەتی هەرێم بۆ دەربازبوون لەو قەیرانانە ڕوون بکەنەوە.
پارێزگارە بەڕێزەکان سەرنج و داواکاری خۆیان پێشکەشکرد و هەموولایەك هاوڕابوون لە سەر پێویستی ئارامکردنەوەی دۆخی ئێستای هاوڵاتیان و پێکەوە بە هەموو ڕەنگ و دەنگە جیاوازەکانەوە بەرپرسانە و دڵسۆزانە هەوڵەکان بخەنە گەڕ بەرەو چاکسازی و چارەسەری گونجاو.
یانزەمین پیشانگای نێودەوڵەتی هەولێر دەرگاكانی خۆی بەڕووی هاوڵاتیاندا كردەوە
یانزەمین خولی پیشانگای نێودەوڵەتی هەولێر لە 4ی تشرینی یەكەم/ ئۆكتۆبەر، بە بەشداری 140 كۆمپانیا لە 14 وڵات، دەرگاكانی بەڕووی هاوڵاتیاندا كردەوە. هاوكات لەگەڵ ئەم پیشانگایەشدا شەشەمین پێشانگا بۆ كاروباری كارەبا و وزە نوێ بووەكان كرایەوە.
چەندین بەرپرسی حكومی وئیداری و نوێنەری وڵاتان لە هەرێمی كوردستان لەڕێوڕەسمی كردنەوەی پیشانگاكە ئامادەی بوون. هەروەها ژمارەیەكی زۆری خاوەنكار و خاوەنی كۆمپانیای گەورە لەسەر ئاستی جیهان و ناوچەكە ئامادەی بوون.
سەڵاحەدین بابەكر، وەزیری كارەبای حكومەتی هەرێمی كوردستان لە لێدوانێكدا بۆ رۆژنامەنووسان، باسی لە گرنگی كردنەوەی پێشانگاكە وبەشداربوونی كۆمپانیای ناوخۆو بیانیەكان كرد، بەتایبەتی لەم بارودۆخە هەستیارەدا.
ئاماژەی بەوەشدا، بوونی كۆمپانیای بیانی لەهەرێمی كوردستان لەم هەلومەرجەدا مایەی خۆشحاڵیە و ئەمەش بەڵگەیە بۆ ئەوەی سەرەڕای ئەو قەیرانانەی تووشی هەرێمی كوردستان بووە، رەوشی ژیان و گەشەپێدان بەردەوامە.
لەم پیشانگایەدا، جگە لەبەشداربوونی چەندین كۆمپانیا لەبواری جیاجیادا، چەندین دەزگای حكومی وفەرمی لەسەر ئاستی عیراق وهەرێمی كوردستان وئەڵمانیا وئێران وتوركیا وفەڕەنسا بەشداریان كردووە و لەبواری پەروەردە وفێركردن وگەشتوگوزار وبازرگانی گشتی كاڵای جۆراوجۆر نمایشكراوە.
نەوزاد هادی، پارێزگاری هەولێر دووپاتیکردەوە ئەو سیاسەتەی حكومەتی هەرێم لەبواری ئابوری وبازرگانیدا گرتویەتیە بەر بۆ ناساندنی هەرێمی كوردستان وپتەوتركردنی متمانەی نێودەوڵەتی بەم هەرێمە سەركەوتنی بەدەستهێنا.
پارێزگاری هەولێر لە لێدوانێكی تایبەت بە مالپەڕی حكومەتی هەرێمی كوردستان گوتی "ئەم سیاسەتەی حكومەتی هەرێمی كوردستان بووە هۆی ئەوەی تەنها لە هەولێر بایی 24 ملیار دۆلار وەبەرهێنان بكرێت لە پرۆژەی جیاجیا. راستە قەیرانی دارایی بەشێكی زۆری ئەو پرۆژانەی راگرت كە لەلایەن حكومەتی هەرێمەوە تەمویل دەكران بەهۆی نەبوونی سەرچاوەی دارایی بۆ درێژە پێدانیان. ئێستا كاری سەرەكی حكومەت بەپلەیەك دابینكردنی مووچەی فەرمانبەرانە لەلایەن وەزارەتی دارایی و ەزارەتی سامانە سروشتیەكان. بەڵام چالاكی و جووڵەی كەرتی تایبەت نەوەستا وپرۆژە وپیشانگاكانیش بەردەوامن تەنانەت بەشێكی ئاوارەكانیش ئەوانەی لەدەرەوەی كامپەكاندا دەژین بەشێكن لەجووڵەی بازاڕ و سیاسەتی سەركەوتووانەی حكومەتی هەرێمی كوردستان لەمبارەیەوە رۆڵ وكاریگەری خۆی هەبووە".
لەماوەی ئەم مانگەشدا هەولێر لە چالاكی بازرگانی و ئابوری بەدەر نەبوو ئەگەرچی بارودۆخ لەسەر ئاستی عیراقیش لەباشیدا نیە و تا ئێستاش بەغدا و هەرێمی كوردستان نەگەیشتونەتە رێككەوتن لەبارەی پرسی بودجەوە.
سەرەڕای ئەوەش، لە 3ی ئەیلوول/ سێپتەمبەری ئەمساڵ، دووەمین پیشانگای كاڵای میسڕی لە هەولێر بەئامادەبوونی ژمارەیەكی زۆری بەرپرسانی حكومی لە هەرێمی كوردستان ومیسڕ دەستی پێكرد و بۆ ماوەی دە رۆژ پێشوازی لە میوانان كرد.
چاوەڕوانیش دەكرێت ساڵی داهاتوو هەمان پیشانگا ئەگەر دەرفەت بۆ كۆمپانیای رێكخەری پیشانگا رەخسا، دووجار لە دوو كاتی جیادا لە هەولێر بكرێتەوە. هەر لە 9ی ئەیلوول / سێپتەمبەری ئەمساڵ، سێیەمین لقی كارفور كە بڕاندێكی فەڕەنسی بەناوبانگە وەكو بازاڕێك بۆ فرۆشتنی كەلوپەل وكاڵای جۆراوجۆر لەهەرێمی كوردستان ودووەمین لقی لەهەولێر كرایەوە. وەك ئاماژەكانیش دەری دەخەن تا ئێستا زیاتر لە 20 ملیۆن جار سەردانی كارفور كردواوە.
دارا جەلیل خەیات سەرۆكی یەكێتی ژوورەكانی بازرگانی وپیشەسازی هەرێمی كوردستان لەلێدوانێكی تایبەت بە ماڵپەڕی حكومەتی هەرێمی كوردستان گوتی كە "سەرەڕای قەیرانەكان، هاوڵاتیانی هەرێمی كوردستاندا هێشتا بەبەردەوامی مامەڵە لەگەڵ بازاڕ دەکەن ولە سروشتیاندا بووە كۆڵنەدەر بن".
هاوكات دارا جەلیل خەیات نەیشاردەوە "هەرێمی كوردستان لە شەڕێكی گەورەی ئابوریشدایە كە چەندین ئاستی بەخۆوە گرتووە بەتایبەتی بە هەبوونی قەیرانێكی ناڕەوای دارایی لەلایەن بەغداوە ودابەزینی نرخی نەوت لەسەر ئاستی جیهان، ئەمەش جگە لە شەڕی تیرۆر كە كاریگەری زۆری بەسەر باری ئابوری هەرێمی كوردستانەوە هەیە".
بە باشیشی زانی، "حكومەتی هەرێمی كوردستان چەندین رێوشوێنی دیكە بگرێتە بەر وسەرچاوەی دیكەشی بۆ ئابووری هەبێت وپشت بەستن تەنها بە نەوتەوە نەبێت چونكە دابەزینی بەهای نەوت زیاتر لە 60% ی بودجەی هەرێمی كوردستانی كەمكردەوە و گرفتی زۆری دروستكرد بۆیە پێویستە هەرچی زووە حكومەت چارەسەری بەپەلەی هەبێت بۆ دەرچوون لەم قەیرانانە".
لەلای خۆشیەوە فادی دەرویش رێكخەری پیشانگای نێودەوڵەتی هەولێر گرێدانی ئەم پیشانگایە لەخۆیدا وەڵامێكی بەهێزە بۆ ئەوانەی گرەویان لەسەر گرێنەدانی ئەم پیشانگایە دەكرد.
دەرویش لە لێدوانێكی تایبەت بە ماڵپەڕی حكومەتی هەرێمی كوردستانی راگەیاند، ئەو پیشانگایە هەمیشە وێستگەیەكی سەرەكی بووە بۆ بەیەكگەیشتنی كۆمپانیاكانی ناوخۆ و دەرەوە. كاری زۆر كرا بۆ ئەوەی ئەم وێستگەیە گرنگە ئەمساڵ لەهەولێردا بوونی نەبێت، بەڵام متمانەی كۆمپانیاكان بە هەرێمی كوردستان بەهێزتربوو، بە بەڵگەی ئەوەی جگە لە خولی ئەم پیشانگایەدا شەشەمین پیشانگای وزە و هەشتەمین پیشانگای پرۆجێكت-عیراق كرایەوە. هاوكات سوپاسی كۆمپانیای كۆڕەك تیلیكۆمیشی كرد كە بوە سپۆنسەری پیشانگاكە و پاڵپشتی تەواوی پیشانگاكە كرد.
هەر لەمبارەیەوە، بەڕێوەبەری پەیوەندیە گشتیەكانی كۆمپانیای كۆڕەك تیلیكۆم لە لێدوانێكی تایبەت بە ماڵپەڕی فەرمی حكومەتی هەرێمی كوردستان رایگەیاند، كۆمپانیاكەیان بە ئەركی نیشتیمانی و نەتەوەیی خۆی هەستاوە بۆ گرتنە ئەستۆی سپۆنسەری ئەم پیشانگایە و چەندین پرۆژەی دیكەش لەسەر ئاستی هەرێمی كوردستان، ئاماژەی بەوەشدا ئەم پیشانگایە سەركەوتنی بەرچاو بەدەستدێنێت بە لەبەرچاوگرتنی ئەو بارودۆخەی كوردستان وعیراق وناوچەكە بەگشتی پێیدا تێدەپەڕێت و ئەوەشی خستەڕوو قەیرانی دارایی سەرەڕای ئەوەی كاریگەری بەسەر بەشێكی زۆری پرۆژە و چالاكیە ئابوریەكاندا هەبووە بەڵام بە پاڵپشتی هەموو لایەك ئەمساڵ رێگە بە هەڵپەساردنی ئەم پیشانگایە نەدرا.
ڕوونكردنه‌وه‌یەك له ئه‌نجومه‌نى وه‌زیرانه‌وه
له كاتێكدا هه‌رێمى كوردستان به دۆخێكى دژواردا تێده‌په‌ڕێت و له‌گه‌ڵ یه‌كێك له مه‌ترسیدارترین دوژمنانى مرۆڤایەتى له شه‌ڕێكى قورسدایه و كۆمه‌ڵێك كێشه و قه‌یرانى سه‌خت به‌رۆكى خه‌ڵك و حكوومه‌تى هه‌رێمى كوردستانى گرتووه، به‌داخه‌وه له هه‌ندێ شوێنى هه‌رێمى كوردستان خۆپیشاندان و ناڕه‌زاییه‌كان، توندوتیژییان لێ دەكه‌وێته‌وه و هاووڵاتیان و كارمه‌ندانى حكوومى تیادا ده‌بنه قوربانى.
دڵگرانى و ناڕه‌حه‌تیى خۆمان به‌رامبه‌ر به دروستبوونى پشێووى و كه‌وتنه‌وه‌ى قوربانیان ده‌رده‌بڕین، داواش له هه‌موو خۆپیشانده‌ران و خه‌ڵك و لایه‌نه سیاسییه‌كانى كوردستان ده‌كه‌ین كه به شێوازێكى ئارام و شارستانیانه مامه‌ڵه له‌گه‌ڵ دۆخه‌كه و ڕووداوه‌كاندا بكه‌ن و هیچ لایه‌كیان نه‌بنه هۆى ئاڵۆزبوونى زیاتر و به هه‌موو لایه‌ك هه‌وڵى ئارامكردنه‌وه و كۆنترۆڵكردنى دۆخه‌كه بده‌ن.
داوا له هه‌موو هێزه‌كانى ئاسایش و پۆلیس و لایه‌نه په‌یوه‌نداره‌كانیش ده‌كه‌ین كه هه‌موو هه‌وڵێكیان بخه‌نه گه‌ڕ بۆ پاراستنى ئارامى و سه‌ر و ماڵى هاووڵاتیان و داموده‌زگا حكوومى و حزبییه‌كان، هه‌روه‌ك داوا له ته‌واوى ده‌زگاكانى ڕاگه‌یاندن ده‌كه‌ین كه به‌رپرسانه مامه‌ڵه له‌گه‌ڵ دۆخه‌كه‌دا بكه‌ن و فاكته‌رى ئارامكردنه‌وه بن.
ئه‌نجومه‌نى وه‌زیرانى هه‌رێمى كوردستان
9-10-2015
قوباد تاڵەبانی: هەموو هەوڵێك دەخەینە گەڕ بۆ چارەسەرکردنی کێشەی موچەی فەرمانبەر و مامۆستایان
جێگری سەرۆکی ئەنجوومەنی وەزیران لە کۆبوونەوەی لەگەڵ سکرتاریەت و لێپرسراوی لقەکانی یەکێتی مامۆستایانی کوردستان، سوپاسی ڕۆڵی مامۆستایانی کوردستانی کرد لە خزمەتکردن بە نیشتمانەکەیان و پێگەیاندنی نەوەکانمان و داواکانیان لە ئێستادا ڕەوایە، بەڵام خۆپیشاندان و بایکۆتکردن چارەسەری گرفتەکانیان ناکات.
قوباد تاڵەبانی ئەوەشی ڕاگەیاند، قەیرانەکانی هەرێمی کوردستان تەنها مامۆستایانی بەڕێزی نەگرتووەتەوە بەڵکو هەرێمی کوردستانی بە گشتی گرتووەتەوە، کەواتە دەبێت هەموومان بەرپرسانە مامەڵە لەگەڵ دۆخی ئێستای کوردستاندا بکەین و نابێت قەیرانەکان تێکەڵ بە پرسە سیاسیەکان بکرێت و کوردستان بەرەو ئاقارێکی ناجێگیردا ببرێت.
ئاماژەی بەوەدا وەك حکومەتی هەرێمی کوردستان هەموو هەوڵەکانمان چڕ دەکەینەوە بۆ دەربازبوون لە قەیرانەکان و چارەسەرکردنی کێشەی موچەی فەرمانبەران بە گشتی و موچەی مامۆستایان بەتایبەتی.
لە کۆبوونەوەکەدا کە وەزیری پەروەردە و وتەبێژی حکومەتی هەرێم و سکرتێری ئەنجومەنی وەزیران تێیدا ئامادە بوون، قەیرانی ئێستای هەرێمی کوردستان بە ڕوونی خرایە ڕوو و هەموو لایەك بەگرنگیان زانی کە هەریەکە و بەپێی قەبارەی خۆی بەرپرسیارێتی بگرێتە ئەستۆ و داواش کرا ڕاگەیاندن و کەسانی بەرپرس ڕەچاوی دۆخی ئێستای کوردستان بکەن و خۆیان لە چەواشەکاری و موزایەدە بپارێزن.