ئێواره‌ی ئه‌مڕۆ دووشه‌ممه 27/7/2015 كۆسره‌ت ره‌سول عه‌لی جێگری سه‌رۆكی هه‌رێمی كوردستان پێشوازی كرد له فرانك به‌یكه‌ر باڵیۆزی به‌ریتانیا له عێراق و ئه‌نكس مه‌كی كونسوڵی گشتی به‌ریتانیا له هه‌رێمی كوردستان.
له دیدارێكدا گفتوگۆ كرا له باره‌ی دوایین پێشهات و رووداوه‌كانی عێراق و ناوچه‌كه، بۆ ئه‌م مه‌به‌سته كۆسره‌ت ره‌سول عه‌لی جه‌ختی له‌وه كرده‌وه كه ده‌بێ سه‌رجه‌م كێشه‌و گیرگروفته‌كان به گفتوگۆ چاره‌سه‌ر بكرێن.
ته‌وه‌رێكی تری كۆبوونه‌وه‌كه تایبه‌ت بوو به پرسی جه‌نگی تیرۆر و رووبه‌ڕووبوونه‌وه‌ی داعش، له‌مباره‌یه‌وه باڵیۆزی به‌ریتانیا سه‌رسامی خۆی به قاره‌مانێتی هێزی پێشمه‌رگه له‌م جه‌نگه ده‌ربڕی و پاڵپشتی و پشتیوانی وڵاته‌كه‌شی بۆ هێزی پێشمه‌رگه‌ی كوردستان ده‌ربڕی و جه‌ختی له‌وه كرده‌وه كه ده‌بێ بازنه‌ی هاوكارییه‌كان فراوانتر بكرێت.
په‌یوه‌ست به جه‌نگی رووبه‌ڕووبوونه‌وه‌ی تیرۆر و رۆڵی هێزی پێشمه‌رگه، جێگری سه‌رۆكی هه‌رێمی كوردستان جه‌ختی له‌وه كرده‌وه كه هێزی پێشمه‌رگه‌ی كوردستان به‌رده‌وام ده‌بێ له رووبه‌ڕووبوونه‌وه‌ی تیرۆر و پێویستیشی به هاوكاری زیاتر هه‌یه.
هه‌ر له كۆبوونه‌وه‌كه‌دا بارودۆخی هه‌رێمی كوردستان و دوایین گۆڕانكاری و پێشهاته‌كان خرایه به‌رباس، بۆ ئه‌م مه‌به‌سته كۆسره‌ت ره‌سول عه‌لی جه‌ختی له‌وه كرده‌وه كه ده‌بێ سه‌رجه‌م لایه‌نه‌كان به‌رژه‌وه‌ندی كورد و ئاینده‌ی كوردستان له‌به‌رچاو بگرن و سازان له‌سه‌ر پرسه‌كان بكه‌ن دوور له هه‌ر جۆره بارگرژییه‌كی حزبی، چونكه ئه‌وه‌ی ئه‌مڕۆ بۆ كورد هاتۆته دی پێویستی به پاراستنه‌و ئه‌مه‌ش ته‌نها به یه‌كڕیزی لایه‌نه‌كان ده‌كرێ".
لای خۆشیه‌وه باڵیۆزی به‌ریتانیا له عێراق گوتی"پێویسته له‌سه‌ر هه‌مووتان به‌رژه‌وه‌ندی گه‌له‌كه‌تان بپارێزن و ئه‌و بارودۆخه‌ی بۆ كورد هاتۆته پێش نه‌یكه‌نه قوربانی ململانێ حزبیه‌كانتان".
له كۆتایی كۆبوونه‌وه‌كه‌داو له‌باره‌ی كێشه‌كانی نێوان هه‌رێم و به‌غدا، هه‌ردوولا به‌پێویستیانزانی جێبه‌جێكردنی رێكه‌وتنه‌كانی نێوان لایه‌نه‌كان ببێته كلیلی چاره‌سه‌ری كێشه‌كان و چاره‌سه‌ری قه‌یرانه‌كان".
ڕۆژی سێشەممە 28ـی 7ـی 2015 لە سەلاحەدین بەڕێز مەسعود بارزانی سەرۆكی هەرێمی كوردستان پێشوازی لە ئیكهارد بروس باڵیۆزی ئەڵمانیا لە عێراقی فیدڕاڵ كرد.
لە دیدارەكەدا باڵیۆزی ئەڵمانیا لە عێراق سوپاسی خەڵك و حكوومەتی كوردستانی كرد بۆ حەواندنەوەی ئاوارە و پەنابەران و ئاماژەی بەوەدا كە جیهان سەرسامە بەوەی كە هەرێمی كوردستان باوەشی بۆ سەدانهەزار ئاوارە كردەوە كە زۆربەشیان لە نەتەوەی كورد نین. هەروەها سەرۆك بارزانی لە هەوڵەكانی وڵاتەكەی ئاگادار كردەوە بۆ یارمەتیدانی ئەو ئاوارانەی بۆ ناوچە ئازادكراوەكان دەگەڕێنەوە. سەبارەت بە فراوانبوونی بەرەی دژی داعش باڵیۆزی ئەڵمانیا لە عێراق ڕایگەیاند كە وڵاتەكەی پێشوازی لە بڕیاری توركیا دەكات بۆ ئەوەی بچێتە بەرەی شەڕی دژی داعش بەڵام لە هەمان كاتدا نیگەرانیشە كە بەهۆی پەرەسەندنەكانی نێوان حكوومەتی توركیا و پەكەكە پڕۆسەی ئاشتی بكەوێتە ژێر مەترسییەوە چونكە پڕۆسەی ئاشتی لە توركیا خەریك بوو بگاتە ئەنجام.
لەبەرانبەردا سەرۆك بارزانی سوپاسی هەوڵەكانی ئەڵمانیای بۆ یارمەتیدانی ئاوارەكان و هەروەها هاوكاریكردنی پێشمەرگە و ئەوەی خستە ڕوو چارەسەری سەرەكیی كێشەی ئاوارەكان ئەوەیە كە بگەڕێنەوە ناوچەكانی خۆیان و هەر هەنگاوێك بە ئاراستەی یارمەتیدانی خەڵكی ئاوارە بێت بۆ گەڕانەوەیان هەرێمی كوردستان پێشوازی لێ دەكات.
پەیوەست بە گرژی و پەرەسەندنەكانی نێوان حكوومەتی توركیا و پەكەكە سەرۆك بارزانی ئاماژەی بەوەدا كە لەمبارەیەوە هەڵوێستی هەرێمی كوردستان و ئەڵمانیا لە یەك نزیكە و ئەوەی دووپاتكردەوە كە هاتنی توركیا بۆ نێو بەرەی شەڕی دژی داعش هەنگاوێكی ئیجابیە بەڵام زۆر نیگەرانین لە سەرهەڵدانەوەی شەڕی نێوان سوپاس توركیا و پەكەكە و هانی هەردوولا دەدەین بگەڕێنەوە بۆ پڕۆسەی ئاشتی و دانوساندن چونكە چەندین ساڵ دانوساندن باشترە لە یەك كاتژمێر شەڕ، بۆ سەرگرتنی ئەو بابەتەش ئەوەی لەدەستمان بێت دەیكەین بۆ یارمەتیدان هەردوولا كە بگەڕێنەوە بۆ بنەماكانی پڕۆسەی ئاشتی. سەرۆك بارزانی لەدرێژەی قسەكانیدا ئەوەیشی خستەڕوو كە بوونی كورد لە توركیا و ناوچەكە واقعێكە و دەبێ هەموو لایەك مامەڵەی لەگەڵدا بكەن. لەگەڵ ئەوەیشدا لەپێناو سەرخستنی ئاشتی پێویستە لایەنە كوردییەكانیشە واقعبینانە سەیری پێشهاتەكان بكەن.
سەرۆكایەتیی ئەنجومەنی وەزیرانی هەرێمی كوردستان، لە ڕاگەیەندراوێكدا هێرشی ئاسمانی بۆ سەر گوندی زارگەلی لە قەزای ڕواندز ئـیدانە كرد، كە بووە هۆی شەهیدبوونی 8 كەس، كە پێنجیان گوندنشینانی ناوچەكەن. ئەمەش دەقی ڕاگەیەندراوەكەی سەرۆكایەتیی ئەنجومەنی وەزیرانی هەرێمی كوردستانە:
بەرەبەیانی ئەمڕۆ 1/8/2015 لە ئەنجامی هێرشی فڕۆكەكانی توركیا بۆ سەر گوندی زارگەلی لە قەزای ڕواندزی پارێزگای هەولێر، هەشت كەس شەهید بوون كە پێنج لە وانە هاووڵاتیی هەرێمی كوردستانن و ژمارەیەكی دیكەش بریندار بوون.
ئێمە شەهیدكردنی هاووڵاتیانی هەرێمی كوردستان و كردنە ئامانجی گوندەكانی هەرێمی كوردستان ئیدانە دەكەین و داوا لە توركیا دەكەین بە هەموو شێوەیەك خۆی لە بۆمبابارانكردنی گوند و ئاواییەكانی هەرێمی كوردستان بەدوور بگرێت، لە هەمان كاتدا داوا لە پارتی كرێكارانی كوردستانیش دەكەین كە هێزەكانیان و بارەگا و دەزگاكانیان لە گوند و ئاواییەكانی هەرێمی كوردستان دوور بخەنەوە، بۆ ئەوەی چیتر گیانی هاووڵاتیانی هەرێمی كوردستان و بەرژەوەندییەكانیان نەكەونە ناو چوارچێوەی شەڕی ئەوان و توركیا. هەروەها داوا لە هەردوولا دەكەین بگەڕێنەوە بۆ گفتوگۆكردنی ڕاستەوخۆ لەگەڵ یەكتر و بۆ ئەو مەبەستەش ئێمە ئامادەی هەموو هاوكارییەكین.
سەرۆكایەتیی ئەنجومەنی وەزیرانی هەرێمی كوردستان
1/8/2015
ئه‌مڕۆ، بەڕێز قوباد تاله‌بانی، جێگری سەرۆکی حکومەتی هه‌رێم لەگەڵ لیندڵ ساکس باڵیۆزی ئوسترالیا لە عێراق كۆبۆوه وپرسی سەربازی و سیاسی عێراق و ناوچەکەیان تاوتوێکرد.
بەریز قوباد تاڵەبانی ڕایگەیاند، جەنگی داعش تەنها جەنگێکی سەربازی نیە بەڵکو پێش هەموو شتێك سیاسیە و پاشان فکری و کۆمەڵایەتی. ئێمە بە پاڵپشتی پێشمەرگە قارەمانەکان و هاوپەیمانان دەتوانین بە باشی شکست بە داعش بێنین. کەواتە یەکڕیزیمان لە ئێستادا بەرامبەر تێرۆر و ئەو قەیرانانەی ڕووی لە هەرێمی کوردستان کردووە سەرکەوتوومان دەکات.
باڵیۆزی ئوسترالیا ستایشی ئازایەتی پێشمەرگەی کرد وبەردەوامی وڵاتەکەی لە هاوکاریە مرۆیی وسەربازیەکان بۆ هەرێمی کوردستان دوپاتکردەوە. ئاماژەی بەوەدا یەکێك لە گرفتەکانی دەوڵەتی عێراق بریتیە لە بوونی تێڕوانینی جیاواز بۆ دەوڵەتی عێراق لەلایەن پێکهاتە جیاوازەکانەوە.
لەکۆتایدا قوباد تاڵەبانی سوپاسی دەوڵەتی ئوسترالیای کرد و گرنگی پاڵپشتی وڵاتانی دۆستی دووپاتکردووە لە جەنگی دژ بە داعش و چارەسەرکردنی قەیرانەکان لە هەرێمی کوردستاندا.
سەرۆكایەتیی ئەنجومەنی وەزیران لە بەیاننامەیەكدا بە توندی تەقاندنەوەی بۆڕیی نەوتیی هەرێمی كوردستان لەلایەن پارتی كرێكارانی كوردستان PKKەوە شەرمەزار دەكات و ئەوە بە هێرشكردنە سەر سەرچاوەی قووتی خەڵكی هەرێمی كوردستان لێكدەداتەوە. ئەمەش دەقی بەیاننامەكەی سەرۆكایەتیی ئەنجومەنی وەزیرانی هەرێمی كوردستانە:
هێرشی PKK بۆ سەر سەرچاوەی قووتی خەڵكی هەرێمی كوردستان شەرمەزار دەكەین ڕۆژی 29/7/2015 ئەو بۆڕییە نەوتەی كە نەوتی هەرێمی كوردستان دەگوازێتەوە لە ناوچەی شرناخ لەناو سنووری توركیادا تەقێندرایەوە، ڕۆژی دواتر هێزی پاراستنی گەل HPG، كە هێزی چەكداری پارتی كرێكارانی كوردستان PKKیە، بە شێوەیەكی فەرمی، بەرپرسیارێتیی خۆی لەو تەقاندنەوەیە ڕاگەیاند.
حكوومەت و خەڵكی كوردستان، بەهۆی نەناردنی بودجە لەلایەن حكوومەتی فیدرالیی عێراق و شەڕی داعشەوە، لە دەستتەنگییەكی گەورەی داراییدا دەژیت و ئەو هێڵە نەوتییە تاكە سەرچاوەی سەرەكیی مووچە و قووتی خەڵكی هەرێمی كوردستانە، هەروەها هۆكارێكی سەرەكیی خۆڕاگریی خەڵك و حكوومەتی هەرێمی كوردستانە بەرامبەر هەموو گوشارەكان، لە هەمان كاتدا سەرچاوەی سەرەكیی داهاتی شەڕی بەرەنگاریی پێشمەرگەیە لەگەڵ داعشدا و سەرچاوەی یارمەتییەكانی حكوومەتی هەرێمی كوردستانە بۆ ملیۆنێك و 800 هەزار ئاوارە لە هەرێمی كوردستان.
ئێمە بە توندی ئەو هێرشەی PKK شەرمەزار دەكەین و بە كارێكی نابەرپرسیاریانەی دادەنێین بەرامبەر بە ژیانی خەڵكی هەرێمی كوردستان و بەرگریی پێشمەرگە و ژیانی ئاوارەكان لە هەرێمی كوردستان. ئەو هێرشە هیچ مانەیەكی نییە جگە لە لێدانی ئابووریی هەرێمی كوردستان و ژیانی خەڵكی هەرێمی كوردستان نەبێت. ئەو كردەوەیەی PKK مایەی شەرمەزاركردنە لەلایەن خەڵكی كوردستان و هەموو لایەنەكانەوە. داواش لە PKK دەكەین ئەو دوژمنكاریە بەرامبەر خەڵكی هەرێمی كوردستان دووبارە نەكاتەوە.
ئێستا حكوومەتی هەرێمی كوردستان لە هەوڵدایە بۆ ئەوەی ئەو بۆڕییە بەكار بهێنێت كە كۆمانیای نیشتمانیی بەمبازاڕكردنی نەوتی عێراق
(سۆمۆ) بەكاری دەهێنێ، بۆ ئەوەی بتوانێ درێژە بە هەناردەكردنی نەوتەكەی بدات.
سەرۆكایەتیی ئەنجومەنی وەزیرانی هەرێمی كوردستان
31/7/2015
"نازم دەباغ" نوێنەری حکوومەتی ھەرێمی کوردستان لە شاری تاران لە مێزگردیی ڕۆژنامەی "ئێران" لەگەڵ کارناسانی ڕۆژھەڵاتی ناوەڕاست و وڵاتی ئێران بەشداریی کرد.
"نازم عومەر دەباغ" نوێنەری حکوومەتی ھەرێمی کوردستان لە وڵاتی ئێران لە مێزگردیی ڕۆژنامەی "ئێران" سەبارەت بە ڕووداوەکانی ئەم دوایانەی تورکیا لەگەڵ کارناسانی ڕۆژھەڵاتی ناوەڕاست و ناوچەکە لەوانە: دکتۆر "بەھرام ئەمیر ئەحمەدیان" مامۆستای زانکۆ و کارناسی کاروباریی نێودەوڵەتیی و بە تایبەت وڵاتی تورکیا و ھەروەھا دکتۆر "مێھدی موتەھەری نیا" لێکۆڵەری سیاسیی و مامۆستای زانکۆ و ئەندامی لێژنەی زانستیی زانکۆ قوم بەشداریی کرد.
لەم دانیشتنەدا پەیامنێرانی بەشی نێودەوڵەتیی ڕۆژنامەی "ئێران" پرسیارەکانی خۆیان سەبارەت بە ڕووداوەکانی ئەم دوایانەی ناوچەکە، دانووستانەکانی ئێران لەگەڵ وڵاتانی ١+٥ و بە تایبەت ڕووداوەکانی تورکیا، لەوانە: ھەڵبژاردنەکانی ئەم دوایانەی تورکیا و سەرکەوتنی کوردەکانی ئەم وڵاتە، سیناریۆکانی تورکیا سەبارەت بە ھێرش کردنە سەر داعێش، پێکدادان لە نێوان تورکیا و کوردەکانی ئەم وڵاتە و چەندین بابەتی دیکە ئاراستەی بەرشداربووان کرد کە ئەوانیش بە وردی وڵامی ئەم پرسیارانەیان دایەوە.
"نازم دەباغ" نوێنەری حکوومەتی ھەرێمی کوردستان لە تاران لەم مێزگردەی ڕۆژنامەی "ئێران"دا باسی لە ڕۆڵ و پێگەی کوردەکانی ھەرێمی کوردستان لە سەقامگیریی و ئارامیی لە ناوچەکەدا کرد.
ڕۆژی سێشەممە 28ـی 7ـی 2015 بەڕێز مەسعود بارزانی سەرۆكی هەرێمی كوردستان پێشوازی لە فڕانك باكر باڵیۆزی بریتانیا لە عێراقی فیدڕاڵ و شاندێكی یاوەری كرد.
لە دیدارەكەدا بارودۆخی سیاسی و ئەمنیی ناوچەكە و پەیوەندییەكانی نێوان هەرێم و حكوومەتی فیدڕاڵ و هەروەها كێشەكانی بەردەم ڕێككەوتنەكانی نێوان حكوومەتی هەرێم و بەغدا خرایە بەر باس و گفتوگۆ. هەر لەم كۆبوونەوەیەدا بیروڕا لەبارەی بارودۆخی مەیدانیی بەرەكانی شەڕی تیرۆریستانی داعش لە ئەنبار و سەلاحەدین و نەینەوا و چۆنیەتی سەرخستنی پلانی شكستدانی تیرۆریستان لە عێراق ئاڵوگۆڕ كرا.
بارودۆخی سیاسی توركیا و گرژی و پەرەسەندنەكانی نێوان سوپای توركیا و پەكەكە تەوەرێكی دیكەی ئەم كۆبوونەوەیە بوو و تێیدا سەرۆك بارزانی بڕیاری حكوومەتی توركیای بۆ بەشداریكردن هاوپەیمانێتی نێودەوڵەتیی شەڕی دژی تیرۆریستان بە هەنگاوێكی گرنگ و كاریگەر لە قەڵەمدا لە ڕووبەڕووبوونەویە تیرۆریستان بەڵام ئەو بەشداریكردنە نابێ بە بەهای لێدانی لایەنە كوردییەكان بێت لە توركیا و سووریا.هەروەها نیگەرانیی خۆی لە تێكچوونی بارودۆخەكە و پەرەسەندنە سەربازییەكانی نێوان سوپای توركیا و پەكەكە نیشان دا و جەختیشی لەوە كردەوە كە هەرێمی كوردستان داڕێژەری سیاسەتی پەكەكە یان توركیا نییە بەڵكو پاڵپشتی پڕۆسەی ئاشتی و دانوساندن دەكات و شەڕ بە چارەسەرێكی خەراب دەزانێت و هانی لایەنەكانیش دەدات كە بگەڕێنەوە بنەماكانی پڕۆسەی ئاشتی. چونكە ئاشتی و خەباتی سیاسی خزمەتی بەرژەوەندیی گەلی كورد و توركیا دەكات.
لە بەشێكی دیكەی ئەم دانیشتنە باس لە پەیوەندییەكانی سیاسی و ئابوورییەكانی نێوان هەرێمی كوردستان و بریتانیا و ئاستی وەبەرهێنان و سەرمایەگوزاریی كۆمپانیا بریتانیاكان لە هەرێمی كوردستان كرا.
ئێوارەی ڕۆژی سێشەممە 28ـی 7ـی 2015 لە شاری هەولێر بەڕێز مەسعود بارزانی سەرۆكی هەرێمی كوردستان پێشوازی لە لۆید ئۆستن فەرماندەی فەرماندەیی ناوەندیی هێزەكانی ئەمەریكا و ستیوارت جۆنز باڵیۆزی ئەمەریكا لە عێراق و شاندێكی یاوەری كرد كە پێكهاتبوون لە ژمارەیەك بەرپرس و ڕاوێژكاری سوپای ئەمەریكا.
لە دیدارەكەدا بارودۆخی مەیدانی بەرەكانی ڕووبەڕووبوونەوەی تیرۆریستان لە پارێزگاكانی ئەنبار و سەلاحەدین و كەركووك و نەینەوا خرایە بەر باس و گفتوگۆ و، هەروەها ڕۆشنایی خرایە سەر ئاستی ئامادەیی هێزی پێشمەرگە و هێزەكانی عێراقی بۆ تێكشكاندنی تیرۆریستانی داعش.
هەر لەم دیدارەدا هەردوولا خۆشحاڵیی خۆیان بۆ بڕیاری توركیا بۆ بەشداریكردن لە شەڕی دژی داعش كردەوە كە كاریگەریی ئیجابی لەسەر ڕووبەڕووبوونەوەی تیرۆریستانی داعش لە ناوچەكەدا دەبێت. لەبارەی گرژییەكانی ئەم دواییەی نێوان سوپای توركیا و پەكەكە سەرۆك بارزانی نیگەرانیی خۆی لە پەرەسەندنی گرژییەكان نیشاندا و ئەوەی خستەڕوو كە داوا دەكات هەردوولا بگەڕێنەوە سەر مێزی گفتوگۆ و ئاشتی و، بە پێویستیشی زانی تەركیزی گشت لایەك لەسەر ڕووبەڕووبوونەوە و لەناوبردنی تیرۆریستانی داعش بێت.
لەبەشێكی دیكەی ئەم كۆبوونەوەیەدا فەرماندەی فەرماندەیی ناوەندیی هێزەكانی ئەمەریكا وێڕای ئاماژەدان بە ئازایەتی و لێهاتوویی پێشمەرگە ئەوەی دووپاتكردەوە كە سوپای ئەمەریكا لە هەموو هەنگاوێكدا پاڵپشتی هێزی پێشمەرگەی كوردستان دەبێت.
جێگەی ئاماژەپێكردنە لەم كۆبوونەوەیەدا مستەفا سەید قادر وەزیری پێشمەرگە و د. فواد حوسێن سەرۆكی دیوانی سەرۆكایەتیی هەرێم و ئەنوەر حاجی عوسمان بریكاری وەزارەتی پێشمەرگە و جەعفەر شێخ مستەفا و فەریق شێروان عەبدوڵڕەحمان و فەریق جەبار یاوەر ئەندامانی فەرماندەیی گشتیی هێزەكانی پاراستنی هەرێم و سەفین دزەیی گوتەبێژی حكوومەتی هەرێم ئامادە بوون.
دوایین هەواڵەکان
- نوێنەری حکومەتی هەرێم لە ئێران: سەردانەکەی پزیشکیان ئاماژەیە بۆ گرنگیدانی ئێران بە هەرێمی کوردستان
- ههرێمى كوردستان و ئێران جهخت له برهودان به پهيوهندييهكانيان دهكهنهوه
- سهرۆک نێچیرڤان بارزانی: سەردانی سەرۆک کۆماری ئێران مێژوویی بوو
- نازم دەباغ له وتووێژ لهگهڵ ئاژانسی ئیرنا: مەسعوود پزشکیان سەردانی هەولێر دەکات
- نازم دەباغ: کاتی سەردانی پزیشکیان بۆ عێراق دیار نییە
- «سەلام رشدی» لهگهڵ شاندی یهکێتی هاورده و ناردنکارانی لقی ههولێر کۆبۆوه
- سهرۆك نێچيرڤان بارزانى: ههميشه پشتيوانى و بهرگرى له مافهكانى ئێزدييان دهكهين
- سهرۆک نێچیرڤان بارزانی لهگهڵ باڵیۆزی یهکێتیی ئهورووپا کۆبووهوه
- سهرۆك نێچيرڤان بارزانى لهگهڵ باڵيۆزى نهمسا كۆبووهوه
- سهرۆك نێچيرڤان بارزانى سوپاسى جهنهرال ڤاول دهكات